ᐊᒃᓱᑕᔅ 17 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᓂᐱᔾ ᑲ ᐅᒋ ᐎᐎᔨᐱᒡ ᐊᓯᓂᒡ ᐅᒡ Exodus 17.1-7 (Lent-3 Year A; Proper-21 Year A)

¹ ᒥᓯᐛ ᐃᔅᕋᐃᓪ ᐃᔪᒡ, ᓯᓐ ᐸᐧᑯᑎᔅᑭᒥᑲᒡ ᒋ ᐅᒋ ᔅᑐᑕᐅᒡ, ᐊᔭᑎᐊᑐᒐᒡ ᒧᔭᒻ ᑲ ᐃᑎᓱᒥᑯᒡ ᑎᐸᔨᒋᒐᓱᐛ᙮ ᐸᐃᒂᐤ ᕆᐱᑎᒻ ᒋ ᐎᒍᐅᒡ, ᒥᒄ ᓇᒪ ᐅᒋ ᑎᑯᓂᔪᐤ ᐊᓐᑕ ᓂᐱᔪᐤ ᒐᒋ ᒥᓂᒡ ᐃᔪᒡ᙮

² ᐊᑯ ᐃᔪᒡ ᒂ ᐊᓏᔨᒪᒡ ᒧᓱᓴ ᐊ ᐃᑕᒡ, “ᐸᒋ ᒥᔨᓇᓐ ᓂᐱᔾ ᒐ ᒥᓂᔭᒡ᙮” ᐊᑯ ᒧᓱᔅ ᐊᑕᑦ, “ᒐᒂᓐ ᐛᒋ ᐊᓏᔨᒥᔭᒄ ? ᒐᒂᓐ ᐛᒋ ᑯᒂᒐᐊᒄ ᑎᐸᔨᒋᒐᓱᐤ ?”

³ ᒥᒄ ᒋᒋᐛ ᒋ ᓄᑕᔭᐸᒂᐅᒡ ᐃᔪᒡ ᑭᔭ ᒋ ᐊᓏᔨᒪᐅᒡ ᒧᓱᓴ᙮ ᒋ ᐃᑕᐅᒡ, “ᒐᒂᓐ ᐛᒋ ᐎᐎᑕᐃᔭᒡ ᐃᒋᑉᑎᒡ ᐅᒡ ᒐᒋ ᐃᑐᑐᐅᔭᒡ ᓂᔭᓐ ᑭᔭ ᓂᑦ ᐊᐛᓯᒥᓇᓐᒡ ᑭᔭ ᓂᑦ ᐊᐛᓯᓯᒥᓇᓐᒡ ᒐᒋ ᒋᒪᐸᒂᔭᒡ ?”

⁴ ᐊᑯ ᒧᓱᔅ ᓇᑐᑎᒧᐛᑦ ᑎᐸᔨᒋᒐᓱᐛ, “ᒐᒂᔪᐤ ᒐ ᐃᑐᑐᐅᒂᐤ ᐅᒡ ᐃᔪᒡ ? ᓴᔅ ᐅᒡ ᒐᑲᑦ ᐊᔭᔅᑯᔪᐅᒡ ᒐᒋ ᓂᐸᐃᒡ ᐊᐱᒧᓯᓇᑕᐅᒡ ᐊᓯᓂᔭ᙮”

⁵ ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ, “ᐅᑎᓂᒡ ᐱᔅᒐ ᐅᒋᒪᐅᒡ ᐃᔅᕋᐃᓪ ᐃᔪᒡ ᑭᔭ ᒐ ᒋᔅᒋᓄᑕᐃᑥᐤ ᐃᔪᒡ, ᐊᓯᒡ ᒐ ᑕᐧᑯᓂᒥᓐ ᒋᓯᔅᑲᐅᓐ ᐊᓐ ᑲ ᐊᐱᒋᑕᔨᓐ ᑲ ᐅᑕᒪᐸᑲᒥᓐ ᓇᐃᔭᓪ ᓯᐱᔾ᙮

⁶ ᐃᔅᐱ ᐅᑎᑎᒪᒂ ᐦᐅᕋᑉ ᐊᓯᓂᔾ ᐊᓐᑕ ᓴᐃᓇᐃ ᐱᔅᑯᑎᓇᒡ ᓂᑭ ᑕᓐ ᐊᓐᑕ ᐊ ᑕᔭᒄ᙮ ᒐ ᐅᑕᒪᒥᓐ ᐊᓯᓂᔾ ᐊᑯ ᓂᐱᔾ ᒐ ᐸᒋ ᐎᐎᐱᔨᒡ ᒐ ᒥᓂᒡ ᐃᔪᒡ,” ᐊᐅᑯᓐ ᑲ ᐃᑎᑦ ᒧᓱᔅ ᐊ ᑭᓄᐛᐱᒥᑯᑦ ᐃᔅᕋᐃᓪ ᐅᒋᒪᐅᒡ᙮

⁷ ᐊᑯ ᒪᓴ (ᑯᒂᒋᐃᐛᐅᓐ ᐊ ᐃᓇᓄᐅᒡ) ᑭᔭ ᒪᕆᐸ (ᐊᓏᔨᒐᓄᐅᓐ ᐊ ᐃᓇᓄᐅᒡ) ᒂ ᐃᓯᓂᐧᑲᑕᐧᒃ ᒧᓱᔅ ᐊᓂᔭ ᐃᑕᐅᓂᔪᐤ ᐛᔅ ᐊᒋ ᑯᒂᒐᐊᒡ ᐃᔅᕋᐃᓪ ᐃᔪᒡ ᑎᐸᔨᒋᒐᓱᐛ ᐊ ᐃᔅᒋᔄᒡ, “ᑕᐤ ᐊ ᑎᐸᔨᒋᒐᓱᐤ ᐊ ᑕᐛᐧᒄ ᑭᔭ ᒪᒃ ᓇᒪ ᑕᐤ ᐊ ?”

ᑲ ᐅᓂᑕᐅᒧᑎᔭᑭᓄᐅᒡ ᐊᒪᓕᒃ ᐃᔪᒡ

⁸ ᐊᑯ ᐊᒪᓕᒃ ᐃᔪᒡ ᐅᑦ ᐊᓂᔅᑯᑕᐸᓄᐛᐛ ᒋ ᑎᑯᓯᓂᔪᐛ ᑭᔭ ᒂ ᒪᓯᐧᑯᐛᔨᒋ ᐊᓂᔭ ᐃᔅᕋᐃᓪ ᐃᔪᐛ ᐊᓐᑕ ᕆᐱᑎᒻ᙮

⁹ ᒧᓱᔅ ᒂ ᐃᑕᑦ ᐊᓂᔭ ᒐᓱᐛᔨᒋ, “ᒐ ᐅᑎᓂᑥᐤ ᓇᐸᐅᒡ ᒐᒋ ᔅᑐᑕᒡ ᑭᔭ ᒐᒋ ᒪᓯᐧᑯᐛᒡ ᐊᓂᔭ ᐊᒪᓕᒃ ᐃᔪᐛ᙮ ᐛᐸᓂᔨᒐ ᓂᑭ ᓂᐳᐅᓐ ᐊᓐᑕ ᑕᐧᑯᒡ ᐱᔅᑯᑎᓇᒡ, ᓂᑭ ᑕᐧᑯᓇᒺᓐ ᐊᓂᔭ ᒋᓴᒪᓂᑐᐤ ᐅᓯᔅᑲᐅᓐ ᑲ ᐃᔅᒋᔄᑦ ᒐᒋ ᑕᐧᑯᓂᒧᒡ᙮”

¹⁰ ᐊᑯ ᒂ ᐃᑐᑕᐧᒃ ᒐᓱᐛ ᑲ ᐃᑎᑯᑦ ᒧᓱᓴ ᒐᒋ ᐃᑐᑕᐧᒃ᙮ ᒋ ᐅᑎᓇᐤ ᓇᐸᐛ ᒐ ᒪᓯᐧᑯᐛᔨᒋ ᐊᒪᓕᒃ ᐃᔪᐛ᙮ ᐊᑯ ᒪᒂᒡ ᐅᔭ ᐊᔅᐱᔨᒡ, ᒧᓱᔅ, ᐊᕋᓐ ᑭᔭ ᐦᐅᕐ ᒋ ᐃᑐᑕᐅᒡ ᐊᓐᑕ ᑕᐧᑯᒡ ᐱᔅᑯᑎᓇᒡ᙮

¹¹ ᒋ ᑲᓂᔪᐎᒡ ᐊ ᓂᑐᐱᔨᒡ ᐃᔅᕋᐃᓪ ᐃᔪᒡ ᑕᑥᐤ ᐛᐱᓂᔅᒐᒋ ᒧᓱᔅ, ᒥᒄ ᐊ ᔭᓯᐱᑕᒋ ᐅᔅᐱᑐᓇ ᐊᒪᓕᒃ ᐃᔪᒡ ᒋ ᑲᓂᔪᐎᒡ᙮

¹² ᐊᑯ ᒧᓱᔅ ᒂ ᐊᔭᔅᑯᓯᑦ, ᐊᕋᓐ ᑭᔭ ᐦᐅᕐ ᒂ ᐃᑐᑐᐛᒡ ᐊᓯᓂᔪᐤ ᒧᓱᓴ ᒐᒋ ᑕᑎᐱᔨᒋ᙮ ᐊᑯ ᐊᔨᑐᐤ ᐛᒋᑲᐳᔅᑐᐛᒡ ᒧᓱᓴ ᑭᔭ ᑎᔭᐧᑯᓂᒧᐛᒡ ᐅᔅᐱᑐᓂᔨᐛ ᐃᔅᐱᔅ ᐛᑕᑯᓯᔨᒡ᙮

¹³ ᐊᑯ ᒐᓱᐛ ᑭᔭ ᐊᓂᔭ ᓇᐸᐛ ᑲ ᐎᒐᐅᑯᑦ ᒋ ᐅᓂᑕᒧᑎᔭᐅᒡ ᐊᒪᓕᒃ ᐃᔪᐛ᙮

¹⁴ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᒥᓯᓇᑕᒥᓐ ᐅ ᑲᒪᓯᐧᑲᑐᓇᓄᐅᒡ, ᑭᔭ ᒐ ᐃᔨᒥᑐᐅᑦ ᐅᔭ ᒐᓱᐛ ᐅᓴᒻ ᓂᑭ ᑐᑕᓐ ᒐᒋ ᐅᓂᒋᔅᒋᑐᐛᑭᓄᐅᒡ ᐊᒪᓕᒃ ᐃᔪᒡ᙮”

¹⁵ ᒧᓱᔅ ᒂ ᐅᓯᑕᑦ ᐱᔅᑎᓂᒐᐅᓇᐱᔅᑯᔪᐤ ᑭᔭ “ᑎᐸᔨᒋᒐᓱᐤ ᓂᒋ ᒥᔨᒄ ᐱᔅᒋᔭᒐᐅᓂᔪᐤ᙮” ᒂ ᐃᓯᓂᐧᑲᑕᐧᒃ᙮

¹⁶ ᐊᑯ ᒧᓱᔅ ᒂ ᐃᔅᒋᔄᑦ, “ᑎᐸᔨᒋᒐᓱᐤ ᓂᒋ ᐊᔅᐸᔨᒧᑐᑐᐛᐤ, ᒥᒄ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ, ᑎᐸᔨᒋᒐᓱᐤ ᒋᑭ ᒪᓯᐧᑯᐛᐤ ᐊᒪᓕᒃ ᐃᔪᐛ ᒧᔅ ᑲᒋᒡ᙮”