ᐊᒃᓱᑕᔅ 16 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒪᓇ ᑭᔭ ᐱᔭᓱᐛ

¹ ᒥᓯᐛ ᐃᔅᕋᐃᓪ ᐃᔪᒡ ᒋ ᓂᑭᑎᒧᒡ ᐃᓕᒻ ᑭᔭ ᒂ ᐃᑐᑕᒡ ᐊᓐᑕ ᐸᐧᑯᑎᔅᑭᒥᑲᒡ ᓯᓐ ᑲ ᐃᓯᓂᐧᑲᑕᔨᒡ᙮ ᑕᑕᐅᒡ ᐊᓐᑕ ᐃᓕᒻ ᑭᔭ ᓴᐃᓇᐃ ᐱᔅᑯᑎᓇᔪᐤ᙮ ᐱᑕᑕᒡ ᑕᑐᓴᑉ ᒋᓯᑯᔪᐤ ᐊᓂᔭ ᓂᓱ ᐱᓯᒺ ᐃᔅᐱ ᑲᒋ ᓂᑭᑕᒡ ᐃᒋᑉᑦ ᐊᔅᒋᔪᐤ᙮

Exodus 16.2-15 (Proper-20 Year A, Proper-13 Year B)

² ᐊᓐᑕ ᒪᒃ ᐸᐧᑯᑎᔅᑭᒥᑲᒡ, ᒋ ᐊᓏᔨᒪᐅᒡ ᐃᔪᒡ ᒧᓱᓴ ᑭᔭ ᐊᕋᓇ᙮

³ ᐊ ᐃᑕᒡ, “ᑭᒪ ᒋ ᓂᐸᐃᒥᑎᑕᒂ ᑎᐸᔨᒋᒐᓱᐤ ᐊᓐᑕ ᐃᒋᑉᑎᒡ ! ᐃᔅᐱ ᐊᓐᑕ ᑲ ᐎᒋᔭᒡ, ᐊᔪᐛᒡ ᓂᒋ ᐛᔅᑲᐱᔅᑕᓇᓐ ᐊᔅᒋᒂ ᐊ ᓴᑭᔅᒋᓇᒡ ᐎᔭᔅ ᑭᔭ ᓂᒋ ᒥᒋᓇᓐ ᒥᒋᒻ ᒥᒄ ᐊᔅᐱᔅ ᓂᑐᐛᔨᑎᒪᒡ, ᒥᒄ ᔅᒋ ᐸᓱᐅᓇᓐ ᐅᑕ ᐸᐧᑯᑎᔅᑭᒥᑲᒡ ᒐᒋ ᒥᓯᐛ ᑯᐧᑭᑕᐊᔭᒡ᙮”

⁴ ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ, “ᒋᑭ ᐃᑎᓴᐊᒪᑎᓇᐛᐤ ᐸᒂᓯᑭᓐ ᒋᓯᑯᒡ ᐅᒡ, ᐊᓯᑯᒻ ᒋᓯᑲᐛ ᒋᑭ ᐎ ᓇᒋ ᒪᒧᓴᒋᓇᐅᒡ ᐃᔪᒡ ᐊᓂᔭ ᐸᒂᓯᑭᓇ ᒐ ᐃᔅᐱ ᐃᔅᐱᔨᒡ ᐊᓂᔭ ᒋᓯᑯᔪᐤ᙮ ᐊᑯᑕ ᒐ ᐅᒋ ᑯᒂᒋᐃᒂᐤ ᑭᔭ ᒐᔅᒐᔨᒥᒂᐤ ᒐ ᓇᓴᐊᒥᒂᓂᒋ ᓂᑦ ᐃᑎᓱᐛᐅᓇ᙮

⁵ ᐊᓱᑕᒡ ᒋᓯᑯᔪᐤ ᒪᒃ, ᓂᔄᐤ ᐊᓐᑕ ᒋᑭ ᐃᔅᐱᔅ ᒪᒧᓴᒋᓂᒧᒡ ᒥᒋᒥᔪᐤ ᑲ ᐃᔅᐱᔅ ᒪᒧᓴᒋᓇᒡ ᑭᔭ ᒋᑭ ᐊᔭᔅᑯ ᐃᑐᑎᒧᒡ᙮”

⁶ ᐊᑯ ᒧᓱᔅ ᑭᔭ ᐊᕋᓐ ᐊᔨᑕᒡ ᒥᓯᐛ ᐃᔅᕋᐃᓪ ᐃᔪᐛ, “ᐅᑕᑯᓯᔨᒐ ᒋᑭ ᒋᔅᒐᔨᑕᓇᐛᐤ ᐎᔾ ᐊᓐ ᑎᐸᔨᒋᒐᓱᐤ ᑲ ᐸᒋ ᐎᐎᑕᐃᑕᒄ ᐃᒋᑉᑎᒡ ᐅᒡ᙮

⁷ ᒐᒋᓴᐸᔭᒐ ᒋᑭ ᐛᐸᑎᒺᓇᐛᐤ ᑎᐸᔨᒋᒐᓱᐤ ᐅᒋᔅᑕᔨᑕᑯᓱᐅᓐ, ᐛᔅ ᒋ ᐸᑎᒻ ᑲ ᐊᓏᔨᒐᔭᒄ᙮ ᐊᐛᓐ ᐅ ᓂᔭᓐ, ᒐᒋ ᐊᓏᔨᒥᔭᒡ ?”

⁸ ᒧᓱᔅ ᐃᔭᐱᒡ ᒋ ᐃᔅᒋᔄᐤ, “ᐎᔾ ᐊᓐ ᑎᐸᔨᒋᒐᓱᐤ ᒐ ᒥᔨᑕᒄ ᐎᔭᓯᔪᐤ ᒐ ᒥᒍᐛᒄ ᐛᑕᑯᓯᔨᒋ ᑭᔭ ᒪᒃ ᐊᔅᐱᔅ ᓂᑐᐛᔨᑎᒺᒄ ᒥᒋᒥᔪᐤ ᒋᔭᒋᓴᐸᔭᔨᒋ, ᐛᔅ ᒋ ᐸᑎᒻ ᑕᓐ ᑲ ᐃᔅᐱᔅ ᐊᓏᔨᒐᔭᒄ, ᐎᔾ ᐊᓐ ᑕᑈ ᑎᐸᔨᒋᒐᓱᐤ ᔅᒋ ᐊᓏᔨᒪᐛᐤ, ᓇᒪᔭᐤ ᓂᔭᓐ᙮”

⁹ ᐊᑯ ᒧᓱᔅ ᐊᑕᑦ ᐊᕋᓇ, “ᒐ ᐃᑎᑥᐤ ᒥᓯᐛ ᐃᔅᕋᐃᓪ ᐃᔪᒡ, ‘ᐸᑐᑕᒄ ᒐ ᐅᑎᔅᑯᑲᐳᔅᑐᐛᒄ ᑎᐸᔨᒋᒐᓱᐤ, ᐛᔅ ᒋ ᐸᑎᒻ ᑲ ᐊᓏᔨᒐᔭᒄ᙮’ ”

¹⁰ ᒪᒂᒡ ᐊᕋᓐ ᑲ ᐃᔨᒪᐊᑦ ᒥᓯᐛ ᐃᔅᕋᐃᓪ ᐃᔪᐛ, ᐸᐧᑯᑎᔅᑭᒥᑲᒡ ᒋ ᐃᑕᐳᐅᒡ ᐃᔪᒡ, ᐊᑯᑕ ᒪᒃ ᑲ ᓄᑯᓂᔨᒡ ᑎᐸᔨᒋᒐᓱᐤ ᐅᒋᔅᑕᔨᑕᑯᓱᐅᓐ ᐊᓐᑕ ᑭᔅᑯᐅᓂᒡ᙮

¹¹ ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ,

¹² “ᓂᒋ ᐸᑎᒺᓐ ᐊᓏᔨᒐᒡ ᐃᔅᕋᐃᓪ ᐃᔪᒡ᙮ ᒐ ᐃᑎᑥᐤ, ‘ᐎᔭᔅ ᒋᑭ ᒥᒋᓇᐛᐤ ᐊᓯᑯᒻ ᐅᑕᑯᓯᔪᐛ ᑭᔭ ᒋᑭ ᐃᔅᐱᔨᑯᓇᐛᐤ ᐸᒂᓯᑭᓐ ᒋᔭᒋᓴᐸᔭᒋ᙮ ᐊᑯ ᒐᔅᒐᔨᒥᔭᒄ ᓂᔾ ᐊᐅᒄ ᑎᐸᔨᒋᒐᓱᐤ ᒋᒋᓴᒪᓂᑐᒧᐛᐤ᙮’ ”

¹³ ᐊᓂᔭ ᒪᒃ ᐛᑕᑯᓯᔨᒡ, ᐱᔭᓱᐛ ᒋ ᐸᐱᔪᐛ ᑭᔭ ᒥᓯᐛ ᐊᓐᑕ ᒋ ᑥᐅᔪᐛ ᐊᓐᑕ ᑲ ᐎᒋᒡ, ᑭᔭ ᒋᔭᒋᓴᐸᔭᒡ ᒋ ᐊᑯᔅᒋᐸᔭᐤ ᒥᓯᐛ ᐛᔅᑲ ᐊᓐᑕ ᐛᒋᓇᓄᐅᒡ᙮

¹⁴ ᐃᔅᐱ ᐊᑲ ᓄᒂᒡ ᑲ ᐊᑯᔅᒋᐸᔭᒡ, ᐊ ᐱᐅᐱᔨᒡ ᒐᒂᓐ ᒧᔭᒻ ᐊ ᓂᐱᐛᐱᑕᒡ ᐊ ᐃᓯᓇᒂᒡ ᒋ ᓄᑯᓐ ᐊᓐᑕ ᒧᔅᑎᔅᑭᒥᒡ ᐸᐧᑯᑎᔅᑭᒥᑲᒡ᙮

¹⁵ ᐃᔅᐱ ᐃᔅᕋᐃᓪ ᐃᔪᒡ ᐎᔭᐸᑕᒡ ᐅᔭ, ᐊᑯ ᑲ ᐃᑎᑐᒡ, “ᒐᒂᓐ ᐊᓐ ?” ᐛᔅ ᓇᒪ ᐅᒋ ᒋᔅᒐᔨᑎᒧᒡ ᒐᒂᔪᐤ ᐊᓂᔭ᙮ ᐊᑯ ᒧᓱᔅ ᐊᑕᑦ, “ᐊᐅᑯᔪᐛ ᐊᓂᔭ ᐸᒂᓯᑭᓇ ᑲ ᒥᔨᑕᒄ ᑎᐸᔨᒋᒐᓱᐤ ᒐᒋ ᒧᐅᒪᑯᐤ᙮”

¹⁶ ᐊᐅᑯᔪᐤ ᐅᔭ ᑎᐸᔨᒋᒐᓱᐤ ᑲ ᐃᑎᓱᐛᑦ: ᑕᑐᐎᒡ ᐸᐃᒄ ᐊᐛᓐ ᒋᑭ ᐎ ᐅᑎᓂᒪᓱᐤ ᐊᔅᐱᔅ ᓄᑕᐱᔨᑦ ᐎᔾ᙮

¹⁷ ᐃᔅᕋᐃᓪ ᐃᔪᒡ ᒋ ᐃᑐᑎᒧᒡ ᑲ ᐃᑎᓱᒪᑭᓄᐅᒡ᙮ ᐱᔅᒐ ᒋ ᒥᔅᑎ ᐅᑎᓇᓱᐅᒡ ᑭᔭ ᐱᔅᒐ ᐱᔅᓯᔅ ᒋ ᐅᑎᓇᓱᐅᒡ᙮

¹⁸ ᒥᒄ ᑲᒋ ᑎᐸᐸᑲᐊᒡ ᐊᓂᔭ ᑲ ᒪᐅᑎᒪᓱᒡ, ᐸᐃᒄ ᐊᐛᓐ ᒧᔭᒻ ᒋ ᐃᔅᐱᔅ ᒪᐅᒋᑎᒪᓱᐤ ᐊ ᐃᓯ ᓄᑕᐱᔨᑦ, ᓇᒪ ᒐᒂᓐ ᐅᒋ ᐃᔅᑯᐱᔪᐤ᙮

¹⁹ ᐊᑯ ᒧᓱᔅ ᒂ ᐃᑕᑦ, “ᒐ ᐊᑲ ᑭᓄᐛᔨᑎᒪᒃ ᒐᒂᓐ ᐸᐃᑯᑎᐱᔅᑲᐛ᙮”

²⁰ ᐱᔅᒐ ᐊᐛᓐᒋ ᓇᒪ ᐅᒋ ᓂᑐᑐᐛᐅᒡ ᒧᓱᓴ ᑭᔭ ᐊᕋᓇ, ᒋ ᐃᔅᑯᓇᐅᒡ ᐸᒂᓯᑭᓇ, ᒋ ᒥᓐᑐᓱᐅᔪᐤ ᑭᔭ ᒋ ᒥᒋᒪᑯᓂᔪᐤ ᐊᓂᔭ ᒥᒋᒥᔪᐤ᙮ ᐊᑯ ᒧᓱᔅ ᒋᒋᐛ ᒋ ᒋᔄᐃᑯᐤ ᐃᔅᕋᐃᓪ ᐃᔪᐛ᙮

²¹ ᐊᓯᑯᒻ ᒋᔭᒋᓴᐸᔭᒋ ᒥᓯᐛ ᐊᐛᓐ ᒋ ᒪᐅᒋᑎᒪᓱᐤ ᐊ ᐃᔅᐱᔅ ᓄᑕᐱᔨᑦ ᐊᑯ ᐊ ᒋᓱᐎᔨᒋ ᐱᓯᒺ ᒋ ᐊᐸᓱᔪᐛ ᐸᒂᓯᑭᓇ᙮

²² ᐊᓱᑕᒡ ᒋᓯᑯᔪᐤ ᑲᒋ ᒋᒋᐱᔨᒡ ᐊ ᒪᐅᒋᑎᒪᓱᒡ, ᒥᓯᐛ ᐊᐛᓐ ᓂᔄᐤ ᒋ ᐃᔅᐱᔅ ᒪᒧᓴᒋᓇᐤ ᐸᒂᓯᑭᓇ᙮ ᒥᓯᐛ ᐅᒋᒪᐅᒡ ᒋ ᐎᑎᒧᐛᐅᒡ ᒧᓱᓴ᙮

²³ ᒧᓱᔅ ᒂ ᐃᑕᑦ “ᐊᐅᑯᔪᐤ ᐅᔭ ᑎᐸᔨᒋᒐᓱᐤ ᑲ ᐃᑎᓱᒥᑕᒄ: ᐛᐸᒐ, ᐊᐅᒄ ᐊᓐ ᒋᓱᒄ ᒐ ᐎ ᐊᔅᑕᔭᔅᑯᓯᔭᒄ ᐛᔅ ᐊᐅᒃ ᐊᓐ ᒋᓯᒄ ᐊ ᒋᔅᑕᔨᒪᑭᓄᐅᑦ ᑎᐸᔨᒋᒐᓱᐤ᙮ ᒐ ᐱᒥᓄᐛᔭᒄ ᑭᔭ ᒐ ᐅᓯᒪᒄ ᒐᒂᓐ ᐛ ᐅᓯᒪᒄ᙮ ᑭᔭ ᐃᔅᑯᐱᔭᒂ ᒥᒋᒻ ᒐ ᑭᓄᐛᔨᑎᒪᒄ ᐃᔅᐱᔅ ᒐᒋᓴᐸᔭᒐ᙮”

²⁴ ᐊᑯ ᒂ ᑐᑕᒡ ᐊᓂᔭ ᒧᓱᓴ ᐊᑎᓱᒥᑯᒡ᙮ ᐊᓂᔭ ᐊᔅᑯᐱᔨᒡ, ᒋ ᑭᓄᐛᔨᑎᒧᒡ ᐃᔅᐱᔅ ᒋᔭᒋᓴᐸᔨᒡ ᑭᔭ ᓇᒪ ᒋ ᐅᒋ ᐎᒐᑭᓂᔪᐤ ᑭᔭ ᒐᒋ ᒥᓐᑐᓱᐎᒡ᙮

²⁵ ᒧᓱᔅ ᒂ ᐃᑕᑦ “ᒥᒋᒄ ᐊᓄᒡ ᐊᓐ ᒥᒋᒻ ᑲ ᐃᔅᑯᔅᑎᒪᒄ, ᐛᔅ ᐊᓄᒡ ᐅ ᐊᔽᓯᐅᒋᓯᒄ ᒋᑭ ᒪᒥᒋᒪᓄᐤ ᑎᐸᔨᒋᒐᓱᐤ, ᑭᔭ ᓇᒪ ᒋᑭ ᒥᔅᑲᓇᐛᐤ ᒥᒋᒻ ᐎᐎᑎᒥᒡ᙮

²⁶ ᐊᓯᑯᒻ ᒥᓇᔅᑕᑭᓇ, ᒋᑭ ᐎ ᒪᒧᓴᒋᓇᐛᐤ ᐸᒂᓯᑭᓐ᙮ ᒥᒄ ᐊ ᓂᔄᐅᑕᒡ ᐊ ᒋᓯᑲᒡ ᐊᓐ ᒋᓯᒄ ᐊ ᒪᒥᒋᒪᑭᓄᐅᑦ ᑎᐸᔨᒋᒐᓱᐤ, ᓇᒪ ᒋᑭ ᒥᔅᑲᓇᐛᐤ ᒥᒋᒻ ᐎᐎᑎᒥᒡ᙮”

²⁷ ᒥᒄ ᑲᒋ ᐅᑎᒋᐱᔨᒡ ᐊᓂᔭ ᓂᔄᐅᑕᒡ ᒋᓯᑯᔪᐤ, ᐱᔅᒐ ᐃᔪᒡ ᒋ ᐎᐎᔪᐅᒡ ᒐᒋ ᒪᒧᓴᒋᓇᒡ ᐱᔅᒐ ᒥᒋᒥᔪᐤ᙮ ᓇᒪ ᐅᒋ ᑎᑯᓂᔪᐤ ᒥᒋᒥᔪᐤ ᒐᒋ ᒪᒧᓴᒋᓇᒡ᙮

²⁸ ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᑕᓐ ᒐ ᐃᔅᐱᔅ ᐊᑲ ᓂᑐᑎᒪᒄ ᓂᑦ ᐃᑎᓱᐛᐅᓇ ?”

²⁹ ᐎ ᒋᔅᒋᑎᒧᒃ ᓂᔾ ᐅ ᑎᐸᔨᒋᒐᓱᐤ ᑲ ᒥᔨᑎᑯᒡ ᐅ ᒋᓯᒄ ᒐᒋ ᐊᔅᑕᔭᔅᑯᓯᔭᒃ᙮ ᐊᐅᑯᓐ ᐛᒋ ᒥᔨᑎᑯᒡ ᐊᓱᑕᒡ ᒋᓯᒄ ᓂᔄᐤ ᒐᒋ ᐃᔅᐱᔅ ᐅᑎᓂᒪᒄ ᒥᒋᒻ ᓂᓱ ᒋᓯᑲᐛ ᒐ ᐃᔅᐱᔭᒄ᙮ ᒥᓯᐛ ᐊᐛᓐ ᐎᒋᒡ ᒋᑭ ᐎ ᐃᑕᐤ ᒐ ᐊᑲ ᔅᑐᑕᑦ ᑭᔭ ᒪᒃ ᒐᒋ ᐎᐎᑦ᙮

³⁰ ᐊᑯ ᐃᔅᕋᐃᓪ ᐃᔪᒡ ᒂ ᐊᔅᑕᔭᔅᑯᓯᒡ ᓂᔄᐅᑕᒡ ᒋᓯᑯᔪᐤ᙮

³¹ ᐃᔅᕋᐃᓪ ᐃᔪᒡ “ᒪᓇ” ᒋ ᐃᓯᓂᐧᑲᑕᐅᒡ ᐊᓂᔭ ᐸᒂᓯᑭᓇ᙮ ᒧᔭᒻ ᐊ ᐛᐸᓯᒋ ᓂᑕᐅᒋᑕᑭᓇ ᒋ ᐃᓯᓇᑯᓂᔪᐛ, ᑭᔭ ᒧᔭᒻ ᑲᓯᐛᓯᐛᐳᐎᔾ ᐃᔭᑲᐅᑐᐛ ᒋ ᐃᔅᐳᑯᓯᔪᐛ᙮

³² ᒧᓱᔅ ᒂ ᐎᑎᒧᐛᑦ ᐃᔪᐛ ᒐᒂᔪᐤ ᑲ ᐃᔅᒋᔄᔨᒋ ᑎᐸᔨᒋᒐᓱᐛ, “ᒐ ᑭᓄᐛᔨᒪᒄ ᐱᔅᒐ ᒪᓇ ᒐᒋ ᐛᐱᒪᒡ ᒋᑦ ᐊᓂᔅᒐ ᐊᓂᔅᑯᑕᐸᓄᐛᐅᒡ, ᒐᒋ ᐛᐱᒪᒡ ᐸᒂᓯᑭᓇ ᑲ ᒥᔨᑐᑯᒡ ᐊᓐᑕ ᐸᐧᑯᑎᔅᑭᒥᑲᒡ ᐃᔅᐱ ᐃᒋᑉᑎᒡ ᐅᒡ ᑲ ᐅᑐᑕᔭᒄ᙮”

³³ ᒧᓱᔅ ᒂ ᐃᑕᑦ ᐊᕋᓇ, “ᐅᑎᓇ ᐸᐃᒄ ᐊᔅᒋᐧᒄ ᑭᔭ ᒐ ᐱᑕᐅᑦ ᐊᓐᑕ ᒪᓇ ᐳᔅᑯᔭᑭᓐ᙮ ᐊᑯ ᒐ ᐊᔅᑕᔨᓐ ᐊᓐᑕ ᐅᑎᔅᑯᐤ ᑎᐸᔨᒋᒐᓱᐤ ᐊᑕᑦ ᒐᒋ ᑭᓄᐛᔨᑕᑭᓄᐅᒡ᙮”

³⁴ ᐊᕋᓐ ᒂ ᐃᑐᑕᐧᒄ ᑎᐸᔨᒋᒐᓱᐛ ᑲ ᐃᑎᓱᒪᔨᒋ ᒧᓱᓴ᙮

³⁵ ᐃᔅᕋᐃᓪ ᐃᔪᒡ ᓇᐎᔪᐛᐱᐳᓇ ᒋ ᐃᔅᐱᔅ ᒧᐛᐅᒡ ᐊᓂᔭ ᒪᓇ, ᐊᒺᔭ ᐅᑎᑕᒡ ᑲᐃᓇᓐ ᐊᔅᒋᔪᐤ᙮

³⁶ ᐱᑕᑕᒡ ᑕᑐᔭᑭᓐ ᒋ ᐃᔅᐱᓴᒐ ᐊ ᑎᐸᐸᑲᐃᑭᓄᐅᒡ ᐸᐃᒄ ᐊᔅᒋᐧᒄ᙮