ᐊᒃᓱᑕᔅ 10 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᒥᒐᑎᒡ ᒂᔅᑯᑎᓯᓯᒡ

¹ ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᓇᑎᑦ ᒋᓴᐅᒋᒪᐤ, ᐛᔅ ᓂᒋ ᐃᑐᑐᐛᐅᒡ ᒐᒋ ᒥᔅᑯᔅᑎᒂᓇᒡ ᐎᔾ ᑭᔭ ᐅᑯᐸᓇᒪ, ᐊᑯ ᒪᒃ ᒐ ᐃᑐᑎᒧᒡ ᑲ ᓱᐧᑲᑎᓯᒥᑭᓂᔨᒋ ᒪᒥᔅᑲᒡ ᐃᑐᐅᓇ ᐊᓐᑕ ᐊ ᐃᑕᒡ᙮

² ᑭᔭ ᐃᔭᐱᒡ ᒐᒋ ᐛ ᐎᑎᒧᐛᑯᒡ ᒋᑦ ᐊᐛᓯᒧᐛᐅᒡ ᑭᔭ ᐊᓐᒡ ᒍᓯᒧᐛᐅᒡ ᑕᓐ ᑲ ᐃᓯ ᐊᔨᒥᔨᐊᒂᐤ ᐃᒋᑉᑦ ᐃᔪᒡ ᑭᔭ ᑲ ᐃᑐᑎᒧᒡ ᐊᓂᔭ ᑲ ᓱᐧᑲᑎᓯᒥᑭᓂᔨᒋ ᒪᒥᔅᑲᒡ ᐃᑐᐅᓇ, ᑭᔭ ᒥᓯᐛ ᒋᔨᐛᐤ ᒐ ᒋᔅᒐᔨᑎᒪᒄ ᓂᔾ ᐊ ᐎᔭᓐ ᑎᐸᔨᒋᒐᓱᐤ᙮”

³ ᐊᑯ ᒧᓱᔅ ᑭᔭ ᐊᕋᓐ ᒂ ᓂᑐᐛᐱᒪᒡ ᒋᓴᐅᒋᒪᐛ᙮ ᒂ ᐃᑕᒡ, “ᒪᐤ ᐅᔭ ᐊᔅᒋᔄᑦ ᑎᐸᔨᒋᒐᓱᐤ, ᐃᑉᕈᐤ ᐃᔪᒡ ᐅᒋᓴᒪᓂᑐᒧᐛᐛ, ‘ᑕᐃᔅᐱ ᒐ ᐳᓂᔨᓐ ᐊᑲ ᑕᑈᑎᒥᓐ ? ᓇᐃᒥᒡ ᓂᑦ ᐃᔨᒥᒡ ᒐᒋ ᔅᑐᑕᒡ ᑭᔭ ᒐᒋ ᐊᔭᒥᐊᔅᑐᐅᒡ᙮

⁴ ᐊᑲ ᑕᑈᑎᒥᓇ ᒐᒋ ᐱᔅᑎᓂᑥᐤ ᓂᑦ ᐃᔨᒥᒡ, ᐛᐸᒐ ᓂᑭ ᐃᑎᓴᐛᒡ ᒂᔅᑯᑎᓯᓯᒡ ᐊᓐᑕ ᒥᓯᐛ ᒋᑦ ᐊᔅᒋᐛᒡ᙮

⁵ ᒥᓯᐛ ᒋᑭ ᐊᑯᓇᐊᒧᒡ ᐊᔅᒋᔪᐤ, ᑭᔭ ᓇᒪ ᒋᑭ ᒋ ᐛᐸᑕᓇᐛᐤ ᒧᔅᑎᔅᑭᒥᔾ᙮ ᒋᑭ ᒥᒍᐅᒡ ᐊᓂᔭ ᐊᐱᓯᔅ ᑲ ᐃᔅᑯᐱᔨᒋ ᑲᒋ ᐳᓂ ᓯᓯᑯᓂᐱᔨᒡ᙮ ᒥᓯᐛ ᒋᑭ ᒥᒍᐅᒡ ᐊᓂᔭ ᐊᔅᑯᐱᔨᒋ ᐊᓐᑕ ᒥᔅᑎᑯᒡ ᐊᔅᒄ ᓇᑕᐅᒋᓂᔨᒋ᙮

⁶ ᒥᓯᐛ ᒋᑭ ᓴᑭᔅᒋᓇᐅᒡ ᐊᓐᑕ ᒋᒋᐛᐛᒡ ᑭᔭ ᒋᑦ ᐊᐱᒋᐊᑭᓄᐛᐅᒡ ᐎᒋᐛᐛᒡ, ᑭᔭ ᒥᓯᐛ ᐃᒋᑉᑎᒡ ᐃᔪᒡ ᐎᒋᐛᐛᒡ᙮ ᒍᑕᐎᐛᐅᒡ ᑭᔭ ᒋᒧᓱᒧᐛᐅᒡ ᓇᒪ ᓂᑕ ᐛᐸᑎᒧᒡ ᐊᓂᔭ ᐊᓯᓇᑯᓂᔨᒡ ᑲ ᐃᔅᐱᔅ ᑕᒡ ᐅᑕ ᐊᔅᒋᒡ, ᐊᓐᑕ ᑲ ᑎᑯᓯᓂᒡ ᐃᔅᐱᔅ ᐊᓄᒡ᙮’ ” ᒧᓱᔅ ᒂ ᒋᐛᑲᐳᐅᑦ ᑭᔭ ᒂ ᓂᑭᑕᑦ ᒋᓴᐅᒋᒪᐛ᙮

⁷ ᒋᓴᐅᒋᒪᐤ ᐅᑦ ᐊᐱᒋᐊᑭᓇ ᒂ ᐃᑎᑯᑦ, “ᑕᓐ ᒐ ᐃᔅᐱᔅ ᐃᑐᑕᑕᐧᒄ ᐅ ᓇᐸᐤ ᒐᒋ ᐊᔨᒥᐅᐛᐧᒃ ? ᐱᔅᑎᓂᒡ ᐃᔅᕋᐃᓪ ᐃᔪᒡ ᒐᒋ ᔅᑐᑕᒡ ᒐᒋ ᐊᔭᒥᐊᔅᑐᐛᒡ ᑎᐸᔨᒋᒐᓱᐛ ᐅᒋᓴᒪᓂᑐᒧᐛᐛ᙮ ᓇᒪ ᐊ ᐊᔅᒄ ᒋᔅᒐᔨᑕᓐ ᓇᓱᓇᒋᑕᑭᓄᐅᒡ ᐃᒋᑉᑦ ᐊᔅᒋᔾ ?”

⁸ ᐊᑯ ᒧᓱᔅ ᑭᔭ ᐊᕋᓐ ᒂ ᐃᑐᑕᑭᓄᐅᒡ ᐊᓐᑕ ᒥᓐ ᒋᓴᐅᒋᒪᐛ, ᑭᔭ ᒂ ᐃᑎᑯᒡ, “ᒪᒋᒄ ᒐ ᐊᔭᒥᐊᔅᑐᐛᐧᒃ ᑎᐸᔨᒋᒐᓱᐤ ᒋᒋᓴᒪᓂᑐᒧᐛᐤ᙮ ᒥᒄ ᐊᐛᓐᒋ ᐊᓐ ᒐ ᔅᑐᑕᒡ ?”

⁹ ᒧᓱᔅ ᒂ ᐃᑕᑦ, “ᒥᓯᐛ ᓂᑭ ᔅᑐᑕᓇᓐ, ᐊᓯᒡ ᐊᐛᓯᐅᒡ ᑭᔭ ᐊ ᒋᓴᐃᔪᐅᒡ, ᓂᑯᓯᓇᓐᒡ ᑭᔭ ᓂᑕᓂᓯᓇᓐᒡ, ᑭᔭ ᒥᒋᑎᐧᑯᒡ᙮ ᐛᔅ ᓂᑭ ᐎ ᒥᒋᓱᓇᓂᒐᓇᓐ ᒐᒋ ᒋᔅᑕᔨᒥᒋᒡ ᑎᐸᔨᒋᒐᓱᐤ᙮”

¹⁰ ᒋᓴᐅᒋᒪᐤ ᒋ ᐃᑕᐤ, “ᓂᑦ ᐊᓱᑎᒪᒐᓐ ᑎᐸᔨᒋᒐᓱᐤ ᐅᒡ, ᒐ ᐊᑲ ᓂᑕ ᓇᐊᔨᒥᑎᑯᒡ ᒐᒋ ᔅᑐᑕᐊᑯᒡ ᐃᔎᐅᒡ ᑭᔭ ᒋᑦ ᐊᐛᓯᒧᐛᐅᒡ ! ᐛᐸᑎᒥᒄ, ᑎᑯᓐ ᒐᒂᓐ ᐊ ᒥᒋ ᐃᑕᔨᑎᒪᒄ᙮

¹¹ ᓇᒪ, ᒋᔨᐛᐤ ᒥᒄ ᓇᐸᐅᒡ ᒋᑭ ᔅᑐᑕᓇᐛᐤ ᒐᒋ ᐊᔭᒥᐊᔅᑐᐛᒄ ᑎᐸᔨᒋᒐᓱᐤ, ᐊᐅᒄ ᐊᓐ ᑲ ᓂᑐᐛᔨᑎᒪᒃ᙮” ᐊᑯ ᒋᓴᐅᒋᒪᐤ ᒂ ᐎᐎᑎᓴᐛᑦ ᐊᓐᑕ ᐎᒋᒡ᙮

¹² ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐃᔅᐱᒥᒡ ᒐ ᐃᓯ ᓱᐅᓂᔅᒐᐎᔨᓐ ᐊᓐᑕ ᐃᒋᑉᑦ ᐊᔅᒋᒡ ᒐᒋ ᐸᐱᔨᒡ ᒂᔅᑯᑎᓯᓯᒡ᙮ ᒋᑭ ᐊᑯᓇᐊᒧᒡ ᐊᔅᒋᔪᐤ ᑭᔭ ᒋᑭ ᒥᒍᐅᒡ ᓂᑕᐅᒋᑕᑭᓇ ᐊᓂᔭ ᑲ ᐃᔅᑯᐱᔨᒋ ᑲ ᓯᓯᑯᓂᐱᔨᒡ᙮”

¹³ ᐊᑯ ᒧᓱᔅ ᒂ ᐅᐱᑕᐧᒃ ᐅᓯᔅᑲᐅᓐ, ᑭᔭ ᑎᐸᔨᒋᒐᓱᐤ ᒂ ᐃᑐᑕᐧᒃ ᒐᒋ ᒥᔅᑎᔪᑎᓂᔨᒡ ᐊ ᐛᐱᓄᑎᓂᐱᔨᒡ ᐃᔅᑭᓐ ᒋᓯᑲᐛ ᑭᔭ ᐃᔅᑭᓐ ᑕᐱᔅᑲᐛ᙮ ᐊᑯ ᒋᓴᒋᓴᐸᔭᔨᒡ, ᓴᔅ ᒋ ᐸᑕᓱᐎᓯᐱᓂ ᒂᔅᑯᑎᓯᓴ᙮

¹⁴ ᑭᔭ ᒂᔅᑯᑎᓯᓴ ᒂ ᐊᑯᓇᒥᔨᒋ ᐃᒋᑉᑦ ᐊᔅᒋᔪᐤ᙮ ᒋᒋᐛ ᒋ ᒥᒐᑎᔨᐛ ᑲ ᑕᔨᒋ᙮ ᓇᒪ ᓂᑕ ᐛᐱᒪᑭᓄᐅᒡ ᒂᔅᑯᑎᓯᓯᒡ ᐊ ᐃᔅᐱᒐᑎᒡ᙮ ᑭᔭ ᓇᒪ ᓂᑕ ᒥᓐ ᒋᑭ ᐛᐱᒪᑭᓄᐅᒡ ᒐᒋ ᐃᔅᐱᒐᑎᒡ᙮

¹⁵ ᒋ ᐊᑯᓇᐊᒧᒡ ᒂᔅᑯᑎᓯᓯᒡ ᒥᓯᐛ ᐃᒋᑉᑦ ᐊᔅᒋᔪᐤ ᐸᑐᔅ ᑭ ᐎᐸᔪᐛ ᑲ ᐃᓯᓇᑯᑕᒡ ᒧᔅᑎᔅᑭᒥᔪᐤ᙮ ᒥᓯᐛ ᒋ ᒥᒍᐅᒡ ᒐᒂᔪᐛ ᐊᓐᑕ ᓂᑕᐅᒋᒋᑭᓂᒡ ᑭᔭ ᒥᓂᓴ ᑲ ᓂᑕᐅᒋᒋ ᐊᓐᑕ ᒥᔅᑎᑯᒡ ᑭᔭ ᐊᓂᔭ ᑲ ᐃᔅᑯᐱᔨᒋ ᑲ ᓯᓯᑯᓂᐱᔨᒡ᙮ ᓇᒪ ᒐᒂᓐ ᐅᒋ ᐃᔅᑯᐱᔪᐤ ᐊᓯᐸᑯᐅᒡ ᐊᓐᑕ ᒥᔅᑎᑯᒡ ᑭᔭ ᒪᒃ ᓂᑕᐅᒋᑕᑭᑭᓂᒡ ᐊᓐᑕ ᒥᓯᐛ ᐃᒋᑉᑦ ᐊᔅᒋᒡ᙮

¹⁶ ᒋᓴᐅᒋᒪᐤ ᒋᔅᑎᑉ ᒂ ᐎᓴᒪᑦ ᒧᓱᓴ ᑭᔭ ᐊᕋᓇ ᑭᔭ ᒂ ᐃᑕᑦ, “ᓇᒪ ᑯᐃᔅᒄ ᓂ ᐅᒋ ᐃᑐᑐᐛᐤ ᑎᐸᔨᒋᒐᓱᐤ ᒋᒋᓴᒪᓂᑐᒧᐛᐤ ᑭᔭ ᒋᔨᐛᐤ᙮

¹⁷ ᐛᐸᔨᑎᒧᐎᔾ ᓂᒥᒋᑐᑎᒧᐅᓐ ᒥᓐ ᐸᐃᒂᐤ, ᑭᔭ ᐊᔭᒥᐊᔅᑐᐤ ᑎᐸᔨᒋᒐᓱᐤ ᒋᒋᓴᒪᓂᑐᒻ ᒐᒋ ᐅᑎᓇᐧᒃ ᓂᐳᐅᓂᔪᐤ ᐅᑕ ᐃᒋᑉᑦ ᐊᔅᒋᒡ᙮”

¹⁸ ᐊᑯ ᒧᓱᔅ ᒂ ᓂᑭᑕᑦ ᒋᓴᐅᒋᒪᐛ ᑭᔭ ᒂ ᐊᔭᒥᐊᔅᑐᐛᑦ ᑎᐸᔨᒋᒐᓱᐛ᙮

¹⁹ ᑎᐸᔨᒋᒐᓱᐤ ᒂ ᒥᔅᑯᑎᓇᐧᒃ ᓇᔅᒡ ᒐᒋ ᒥᔅᑎᔪᑎᓂᔨᒡ ᐊᑎᒪᐱᓯᒧᒡ ᒐᒋ ᐃᓯ ᔪᑎᓂᔨᒡ᙮ ᒂ ᐅᐸᓯᔨᒋ ᐊᓂᔭ ᒂᔅᑯᑎᓯᓴ ᑭᔭ ᒥᒂᑭᒥ ᐎᓂᐸᑯᒡ ᒂ ᐃᑕᓯᔨᒋ᙮

²⁰ ᐊᑯ ᑎᐸᔨᒋᒐᓱᐤ ᒂ ᐃᑐᑐᐛᑦ ᒋᓴᐅᒋᒪᐛ ᒐᒋ ᒥᔅᑯᔅᑎᒂᓇᔨᒋ ᑭᔭ ᒥᓐ ᓇᒪ ᐅᒋ ᓇᐊᔨᒪᔨᐛ ᐃᔅᕋᐃᓪ ᐃᔪᐛ ᒐᒋ ᔅᑐᑕᔨᒋ᙮

ᑲ ᐊᒋᑲᒡ ᐊᓐᑕ ᐃᒋᑉᑦ ᐊᔅᒋᒡ

²¹ ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐅᐱᓂᔅᒐᔨᓐ ᒋᓯᑯᒡ ᐃᔅ, ᑭᔭ ᒥᓯᐛ ᒋᑭ ᐊᒋᑲᐤ ᐊᓐᑕ ᐃᒋᑉᑦ ᐊᔅᒋᒡ, ᐊᓐ ᒐ ᒧᓯᑕᑭᓄᐅᒡ ᐊ ᐊᒋᑲᒡ᙮”

²² ᐊᑯ ᒧᓱᔅ ᒋᓯᑯᒡ ᒂ ᐃᓯ ᐅᐱᓂᔅᒐᔨᑦ᙮ ᑭᔭ ᓇᔅᒡ ᒂ ᐊᒋᑲᔨᒡ ᒥᓯᐛ ᐃᒋᑉᑦ ᐊᔅᒋᒡ ᓂᔅᑐ ᒋᓯᑲᐛ ᐃᔅᐱᔅ᙮

²³ ᓇᒪ ᐅᒋ ᐛᐱᒥᑐᐅᒡ ᐃᒋᑉᑦ ᐃᔪᒡ, ᑭᔭ ᓇᒪ ᐅᒋ ᐎᐎᔪᐅᒡ ᐎᒋᐛᐛᒡ ᓂᔅᑐ ᒋᓯᑲᐛ ᐃᔅᐱᔅ᙮ ᒥᒄ ᒋ ᐛᔅᑕᔪᐤ ᐊᓐᑕ ᐛᒋᒡ ᐎᔨᐛᐤ ᐃᔅᕋᐃᓪ ᐃᔪᒡ᙮

²⁴ ᐊᑯ ᒋᓴᐅᒋᒪᐤ ᒂ ᐎᓴᒪᑦ ᒧᓱᓴ, ᒂ ᐃᑕᑦ, “ᒪᒋ ᔅᑐᑕᒪᒃ ᑭᔭ ᐊᔭᒥᐊᔅᑐᐛᐧᒃ ᑎᐸᔨᒋᒐᓱᐤ᙮ ᒐ ᔅᑐᑕᐊᑯᒡ ᐃᔭᐱᒡ ᐃᔎᐅᒡ ᑭᔭ ᐊᐛᓯᒡ ᒥᒄ ᒐ ᓂᑭᑕᑭᒡ ᒪᔭᑕᓂᓯᒡ ᑭᔭ ᑲ ᐱᓯᓯᒡ ᑲ ᐅᑕᔅᑭᓂᓯᒡ ᐊᐛᓯᓯᒡ ᑭᔭ ᒥᒋᑎᐧᑯᒡ᙮”

²⁵ ᒧᓱᔅ ᒂ ᐃᑕᑦ, “ᓇᒪ, ᒋᑭ ᐎ ᓇᐃᒥᓇᓐ ᐃᔭᐱᒡ ᒐᒋ ᔅᑐᑕᔨᒋᒡ ᒪᔭᑕᓂᓯᒡ ᑭᔭ ᑲ ᐱᓯᓯᒡ ᑲ ᐅᑕᔅᑭᓂᓯᒡ ᐊᐛᓯᓯᒡ ᑭᔭ ᒥᒋᑎᐧᑯᒡ ᒐᒋ ᐱᔅᑎᓂᒧᐅᒋᒡ ᑭᔭ ᒥᑐᔅᑕᐊᒧᐅᒋᒡ ᑎᐸᔨᒋᒐᓱᐤ ᓂᒋᓴᒪᓂᑐᒥᓇᓐ᙮

²⁶ ᓂᑦ ᐊᐛᓯᓯᒥᓇᒡ ᐃᔭᐱᒡ ᓂᑭ ᔅᑐᑕᐊᓇᓐᒡ᙮ ᓇᒪ ᐛᒡ ᐸᐃᒄ ᒋᑭ ᓂᑭᑕᑭᓄᐎᒡ ᒐᒋ ᑕᒡ ᐅᑕ᙮ ᒥᒄ ᐱᔅᒐ ᓂᑭ ᐅᑎᓇᓇᓐᒡ ᒐᒋ ᐊᐱᒋᔨᒋᒡ ᐊᔭᒥᐊᔅᑐᐅᒋᒐ ᑎᐸᔨᒋᒐᓱᐤ ᓂᒋᓴᒪᓂᑐᒥᓇᓐ᙮ ᑭᔭ ᓇᒪ ᓂᑭ ᒋᔅᒐᔨᒪᓇᓐᒡ ᐊᓐᒡ ᒐ ᐊᐱᒋᔨᒋᒡ ᐸᑐᔅ ᒋ ᑎᑯᓯᓂᔭᒐ ᓇᑕ ᐊ ᐎ ᐃᑐᑕᔭᒡ ᒐᒋ ᐊᔭᒥᐊᔅᑐᐅᒋᒡ ᑎᐸᔨᒋᒐᓱᐤ᙮”

²⁷ ᐊᑯ ᑎᐸᔨᒋᒐᓱᐤ ᑲ ᐃᑐᑐᐛᑦ ᒋᓴᐅᒋᒪᐛ ᒐᒋ ᒥᔅᑯᔅᑎᒂᓇᔨᒋ᙮ ᓇᒪ ᐅᒋ ᐎ ᐱᔅᑎᓇᐤ ᐃᔪᐛ ᒐᒋ ᔅᑐᑕᔨᒋ᙮

²⁸ ᒋᓴᐅᒋᒪᐤ ᒂ ᐃᑕᑦ ᒧᓱᓴ, “ᒪᒋ ᔅᑐᑕᒪ, ᑭᔭ ᓇᔅᒡ ᒐ ᐎ ᐃᑐᑎᒥᓐ ᒐ ᐊᑲ ᒋ ᒥᓐ ᐛᐱᒥᑕᓐ ! ᐊᓐ ᒋᓯᒄ ᐛᐱᒥᑕᓇ, ᐊᑯ ᒐ ᓂᐱᔨᓐ᙮”

²⁹ ᒧᓱᔅ ᒂ ᐃᑕᑦ, “ᐊᐅᑯᓐ ᒐ ᐃᓯᓇᒂᒡ ᒧᔭᒻ ᐊᔅᒋᔄᔨᓐ,” ᒧᓱᔅ ᒂ ᐃᑕᑦ ᒥᓐ, “ᓇᒪ ᓂᑕ ᒥᓐ ᓂᑭ ᐛᐸᑕᓐ ᒋᑕᔅᑎᒥᐧᒄ᙮”