ᐊᒃᓱᑕᔅ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐃᔅᕋᐃᓪ ᐃᔪᒡ ᑲ ᐱᐛᔨᒪᑭᓄᐅᒡ ᐊᓐᑕ ᐃᒋᑉᑎᒡ

¹ ᐊᐅᑯᔪᐛ ᐅᔭ ᒐᑭᑉ ᐅᑯᓴ ᑲ ᐎᒐᐅᑯᑦ ᐊᓐᑕ ᐃᒋᑉᑦ ᐊᔅᒋᒡ, ᒋ ᐸᐃᑯᓴᐳᔪᐛ ᒪᒧᐤ ᐅᑦ ᐊᐛᓯᒪ ᑲ ᐎᒐᐅᑯᑦ:

² ᕈᐱᓐ, ᓯᒥᐅᓐ, ᓕᐸᐃ, ᒍᑕ,

³ ᐃᓴᑲᕐ, ᓴᐳᓕᓐ, ᐱᓐᒋᒥᓐ,

⁴ ᑕᐊᓐ, ᓇᑉᑕᓕ, ᑲᑦ, ᐊᓱᕐ᙮

⁵ ᒐᑭᑉ ᑲ ᐃᑐᑕᑦ ᐊᓐᑕ ᐃᒋᑉᑎᒡ, ᓴᔅ ᐊᓐᑕ ᐅᑯᓴ ᒍᓯᐸ ᒋ ᑕᔪᐛ᙮ ᓂᔄᐅᑕᒡ ᑕᑐᔪᐤ ᒪᒧᐤ ᐎᐧᑲᓂᓴ ᒋ ᑕᑎᓯᔨᐛ ᒐᑭᑉ, ᑲ ᐎᒐᐅᑯᑦ ᐊᓐᑕ ᐃᒋᑉᑎᒡ᙮

⁶ ᐊᑯ ᓇᓇᒐ ᒍᓯᑉ ᑭᔭ ᒥᓯᐛ ᐎᐧᑲᓂᓴ ᒂ ᐳᓂᐱᒪᑎᓯᒡ᙮

⁷ ᐊᑯ ᐊᓂᔭ ᐎᐧᑲᓂᓯᐛᐛ ᒋ ᒥᒐᑎᔪᐛ ᐅᑦ ᐊᐛᓯᒥᔪᐛ ᑭᔭ ᒂ ᑕᔨᒋ ᐅᓯᒥᔪᐛ ᑭᔭ ᐅᑦ ᐊᓂᔅᑯᑕᐸᓂᔪᐛ᙮ ᒋᒋᐛ ᒋ ᒋᓯᐱᔨᔪᐤ ᐊ ᒥᒐᑎᔨᒋ ᒂ ᐊᑎ ᓴᑭᔅᒋᓇᔨᒋ ᐊᓐᑕ ᑯᓯᓐ ᐊᔅᒋᒡ᙮

Exodus 1.8-2.10 (Proper-16 Year A)

⁸ ᐊᑯ ᐊ ᐅᔅᒋᑦ ᒋᓴᐅᒋᒪᐊᐤ ᒋ ᑕᐤ, ᐊᓐᑕ ᐃᒋᑉᑎᒡ ᐊᑲ ᐅᒋ ᒋᔅᒐᔨᒪᑦ ᒍᓯᐸ᙮

⁹ ᒂ ᐃᑕᑦ ᐅᑦ ᐃᔨᒪ, “ᓴᔅ ᒋᒋᐛ ᒥᒐᑐᐅᒡ ᐃᔅᕋᐃᓪ ᐃᔪᒡ ᑭᔭ ᐊᑎᑐᐤ ᓴᐱᐅᒡ ᐃᔅᐱᔅ ᒋᔭᓄᐤ᙮

¹⁰ ᒐ ᐎ ᒥᔅᑲᒪᐧᒄ ᒐᒂᓐ ᒐ ᐃᑐᑐᐛᐧᑯᒡ ᒐ ᐊᑲ ᒋ ᒥᒐᑎᒡ ᐛᔅ ᒋᑭ ᐎᒐᐅᓯᐅᒡ ᓂᑐᐱᔨᓇᓄᐎᒐ ᒋᑭ ᐎᒐᐅᒡ ᐊᓂᔭ ᑲ ᐛᐧᑲᑎᔨᑕᐧᑯᐤ ᑭᔭ ᒐ ᒪᓯᐧᑲᑕᐧᑯᒡ ᑭᔭ ᒐᒃ ᒐ ᒋᑎᓯᒧᒡ ᐅᑕ ᐃᒋᑉᑎᒡ ᐅᒡ᙮”

¹¹ ᐊᑯ ᐃᒋᑉᑦ ᐃᔪᒡ ᒂ ᑎᔭᒡ ᐅᒋᒪᐤ ᐊᐱᒋᐊᑭᓇ ᐃᔅᕋᐃᓪ ᐃᔪᐛ ᐊ ᑕᔨᒋ ᒐᒋ ᓇᓇᑭᒐᔨᒋ ᑭᔭ ᒐ ᒥᔅᑎ ᐊᑐᔅᑲᐊᔨᒋ᙮ ᐃᔅᕋᐃᓪ ᐃᔪᒡ ᒂ ᐅᓯᑕᒡ ᐱᑐᒻ ᑭᔭ ᕋᒪᓯᔅ ᐅᑕᓇᐛ, ᐊᓐᑕ ᒐ ᐊᔅᑕᓱᐅᔨᒋ ᒋᓴᐅᒋᒪᐛ᙮

¹² ᒥᒄ ᐊᑎᑐᐤ ᒋ ᐊᑎ ᓇᐧᑲᒐᑭᓄᐅᒡ ᐃᔅᕋᐃᓪ ᐃᔪᒡ, ᐊᑎᑐᐤ ᒂ ᐊᑎ ᒥᒐᑎᒡ ᐸᑎᒪ ᒥᓯᐛ ᐊᓐᑕ ᐊᔅᒋᒡ ᑲᒋ ᐃᑕᒡ᙮ ᐊᑯ ᐃᒋᑉᑦ ᐃᔪᒡ ᒐᒃ ᒂ ᑯᔅᑕᒡ ᐃᔅᕋᐃᓪ ᐃᔪᐛ᙮

¹³ ᑭᔭ ᐃᒋᑉᑦ ᐃᔪᒡ ᐊᑎᑐᐤ ᒂ ᐊᑎ ᒥᔅᑎ ᐊᑐᔅᑲᐊᒡ ᐃᔅᕋᐃᓪ ᐃᔪᐛ᙮

¹⁴ ᒋᒋᐛ ᒋ ᓂᓇᐧᑲᑕᔨᑎᒧᒡ ᐃᔅᕋᐃᓪ ᐃᔪᒡ ᐊ ᒥᔅᑎ ᐊᑐᔅᒐᒡ ᐊ ᐅᓯᐊᒡ ᐊ ᑭᒋᒐᔭᐱᔅᒋᔨᒋ ᐊᓯᓂᔭ ᑭᔭ ᐊᓯᔅᒍᐛ ᑭᔭ ᒥᓯᐛ ᐊ ᐃᓯ ᐊᑐᔅᒐᒡ ᐊᓐᑕ ᓂᑕᐅᒋᒋᑭᓂᒡ᙮

¹⁵ ᐊᑯ ᐃᒋᑉᑎᒡ ᒋᓴᐅᒋᒪᐤ ᒂ ᐃᑕᑦ ᓂᓱ ᐃᑉᕈᐤ ᐃᔎᐛ, ᓯᑉᕋ ᑭᔭ ᐳᐊ ᐊ ᐃᓯᓂᐧᑲᓱᔨᒋ, ᐊᓐᒡ ᐛᒐᐅᒡ ᐊ ᐎ ᐛᐱᒪᐅᓱᔨᒋ ᐃᔎᐛ᙮

¹⁶ “ᐃᔅᐱ ᐛᒐᐊᑯ ᐃᑉᕈᐤ ᐃᔎᐤ ᐊ ᐛᐱᒪᐅᓱᑦ, ᒐ ᓂᐸᐃᒪᑯ ᓂᔭᐸᓯᐎᔨᒋ ᐅᑦ ᐊᐛᓯᒪ᙮ ᐊᑯ ᐃᔎᓯᐎᒐᓂ ᒐ ᐊᑲ ᓂᐸᐃᒪᑯ, ᒐ ᒥᔨᒪᑯ ᒐᒋ ᐱᒪᑎᓯᔨᒋ᙮”

¹⁷ ᐊᑯ ᐊᓐᒡ ᐃᔎᐅᒡ ᐛᒐᐊᒡ ᐊ ᐛᐱᒪᐅᓯᔨᒋ ᐃᔎᐛ ᒋ ᓇᓂᒋᔅᑐᐛᐅᒡ ᒋᓴᒪᓂᑐᐛ ᑭᔭ ᓇᒪ ᐅᒋ ᑕᑈᑐᐛᐅᒡ ᒋᓴᐅᒋᒪᐛ ᑲ ᐃᑎᓱᒥᑯᒡ, ᓇᒪ ᐅᒋ ᓂᐸᐊᐅᒡ ᓇᐸᓴ ᐊ ᐃᔪᔨᒋ᙮

¹⁸ ᐊᑯ ᒋᓴᐅᒋᒪᐤ ᒂ ᐎᓴᒪᑦ ᐊᓂᔭ ᐃᔎᐛ ᑭᔭ ᒂ ᐃᑕᑦ, “ᒐᒂᓐ ᐅ ᑲ ᐃᑐᑎᒪᒄ ? ᒐᒂᓐ ᐛᒋ ᓇᐊᔨᒪᑯᒡ ᒐᒋ ᐱᒪᑎᓯᒡ ᐊᓐᒡ ᓇᐸᓯᒡ ?”

¹⁹ ᐊᑯ ᐊᓐᒡ ᐃᔎᐅᒡ ᐛᒐᐊᒡ ᐊ ᐛᐱᒪᐅᓯᔨᒋ ᐃᔎᐛ, ᒂ ᐃᑕᒡ ᒋᓴᐅᒋᒪᐛ, “ᓴᔅ ᒋ ᐃᔪᐃᓯᐱᓂ ᐃᑉᕈᐤ ᐃᔎᐅᒡ ᐅᑦ ᐊᐛᓯᒧᐛᐛ ᐊᒺᔭ ᓂᑐᐛᐱᒥᑯᑥᐎ ᐃᔎᐛ ᒐ ᐛᐎᒋᐃᑯᒡ᙮”

²⁰ ᐊᑯ ᒋᓴᒪᓂᑐᐤ ᒂ ᒥᔪᑐᑐᐛᑦ ᐊᓂᔭ ᓂᓱ ᐃᔎᐛ ᐛᒐᔨᒋ ᐊ ᐛᐱᒪᐅᓱᔨᒋ ᐃᔎᐛ, ᒂ ᒥᔭᑦ ᒐᒋ ᐅᑦ ᐊᐛᓯᒥᔨᒋ ᑭᔭ ᐊᑎᑐᐤ ᒂ ᒥᒐᑎᒡ ᑭᔭ ᒂ ᓱᒋᓯᒡ ᐃᔅᕋᐃᓪ ᐃᔪᒡ᙮

²¹ ᐊᑯ ᐊᓐᒡ ᐃᔎᐅᒡ ᐊᒋ ᓇᓂᒋᔅᑐᐛᒡ ᒋᓴᒪᓂᑐᐛ, ᒋ ᓱᐛᔨᑕᑯᐃᑯᐅᒡ ᑭᔭ ᒋ ᒥᔨᑯᐅᒡ ᒐᒋ ᐸᐃᑯᔅᑲᓇᓯᒡ᙮

²² ᐊᑯ ᒋᓴᐅᒋᒪᐤ ᒂ ᐃᑎᓱᒪᑦ ᐅᑦ ᐃᔨᒪ, “ᒥᓯᐛ ᑕᑐᐤ ᐃᑉᕈᐤ ᓇᐸᓯᒡ ᐊ ᐃᔪᑥᐎ, ᓇᐃᔭᓪ ᓯᐱᒡ ᐊᓐᑕ ᒐ ᐱᑭᔅᑐᐛᐱᓇᑯᒡ, ᐊᑯ ᐊᓐᒡ ᐊ ᐃᔎᓯᐅᒡ ᒐ ᐊᑲ ᓂᐸᐊᑯᒡ᙮”