ᐃᐱᓯᔭᓇ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐱᒪᑎᓯᐅᓂᒡ ᐊ ᐃᓯ ᐊᓱᐤ ᐱᔅᑎᓇᑭᓄᐅᑦ ᐊᐛᓐ ᓂᐳᐅᓂᒡ ᐅᒋ Ephesians 2.1-10 (Lent-4 Year B)

¹ ᒋᔨᐛᐤ ᒪᒃ ᐊ ᓂᐱᔭᒄ ᔅᒋ ᐃᓯᓇᑯᓯᓇᐛᐤ ᐊᔅᒄ ᐊᑲ ᐅᒋ ᐱᒪᒋᐃᑕᒄ ᒋᓴᒪᓂᑐᐤ᙮ ᔅᒋ ᒥᒐᑎᓯᓇᐛᐤ ᑭᔭ ᓇᒪ ᒋ ᐅᒋ ᓂᓇᐃᑐᐛᐛᐤ ᒋᓴᒪᓂᑐᐤ᙮

² ᐊᐅᑯᓐ ᑲ ᐃᓯ ᐱᒪᑎᓯᔭᒄ ᐊᔅᒄ ᐊᒋ ᓇᓴᐊᒪᒄ ᑕᓐ ᐊ ᐃᑎᓇᓄᐅᒡ ᐅᑕ ᐊᔅᒋᒡ ᑭᔭ ᐊᔅᒄ ᐊᒋ ᓇᓴᐛᒄ ᐊᓐ ᑲ ᐅᒋᒪᐧᑲᑕᐧᒃ ᒋᓯᑯᔪᐤ, ᐊᓐ ᐊᒐᐧᒄ ᑲ ᐃᓯ ᐊᑐᔅᒐᑦ ᐊ ᐱᒋᔅᑯᐛᑦ ᐊᓂᔭᔪᐛ ᐊᐛᔪᐛ ᐊᑲ ᓂᓇᐃᑐᐛᔨᒋ ᒋᓴᒪᓂᑐᐛ᙮

³ ᐊᐅᒄ ᒪᒃ ᐸᐃᒂᐤ ᒥᓯᐛ ᑲ ᐃᓯᓇᑯᓯᔭᐧᒄ ᑭᔭ ᒋᔭᓄᐤ, ᒥᒄ ᑕᓐ ᐛ ᐃᑎᔭᐧᒄ ᔅᒋ ᐃᑎᓇᓄᐤ᙮ ᔅᒋ ᑐᑕᓇᓄᐤ ᒥᒄ ᑕᓐ ᐊ ᐃᓯ ᓂᑐᐛᔨᑎᒧᒥᑲᒋ ᒋᔭᓯᓄᐛ ᑭᔭ ᒋᒥᑐᓇᔨᒋᑭᓄᐛ᙮ ᐊᓐ ᒪᒃ ᑲ ᐃᔅᐱᔅ ᒋ ᒥᒐᑎᓯᔭᐧᒄ ᒋ ᐃᑕᔨᑕᑯᓂᑯᐱᓇ ᑕᑈ ᑭᔭ ᒋᔭᓄᐤ ᒐᒋ ᐛᐛᓯᐃᑕᐧᒄ ᒋᓴᒪᓂᑐᐤ᙮

⁴ ᒥᒄ ᒪᒃ ᐊᓂᔭ ᓇᔅᒡ ᐊ ᒥᓴᔨᒡ ᒋᓴᒪᓂᑐᐤ ᐅᒋᓴᐛᑎᓯᐅᓐ, ᑭᔭ ᐊᓂᔭ ᐊ ᐃᔅᐱᔅ ᒥᔅᑎ ᓴᒋᐃᑕᐧᒄ,

⁵ ᐊᑎ ᐊᔅᒄ ᒪᒂᒡ ᐊ ᓂᐱᔭᐧᒄ ᐊᒋ ᐃᓯᓇᑯᓯᔭᐧᒄ ᐊᑲ ᐅᒋ ᓂᓇᐃᑐᐛᐧᒄ, ᔅᒋ ᑐᑕᑯᓄᐤ ᒐᒋ ᐎᒋ ᐱᒪᑎᓯᒪᐧᑯ ᙭ᑕ᙮ ᒋᓴᒪᓂᑐᐤ ᔅᒋ ᐱᒪᒋᐃᑯᐛᐤ ᐊᒋ ᐎ ᓱᐛᔨᒥᑕᒄ ᐊᑎ ᐊᑲ ᐅᒋ ᒋᔅᑕᔨᑕᑯᓯᔭᒄ᙮

⁶ ᐊᓐᑕ ᒪᒃ ᑲ ᐅᓂᔅᑲᓇᑦ ᒋᓴᓴ ᑭᔭ ᒋᔭᓄᐤ ᔅᒋ ᐅᓂᔅᑲᓂᑯᓄᐤ᙮ ᐊᑯ ᐊᓐᑕ ᑲ ᐛᐛᔨᐱᐃᑕᐧᒄ ᒋᒋᒋᓯᑯᒡ ᐊᓐᑕ ᑲ ᐃᓯ ᐛᐛᔨᐱᐊᑦ ᙭ᑕ,

⁷ ᐊᓐᑕ ᓂᑲᓐ ᒐᒋ ᓄᑯᑕᑦ ᐊᔅᐱᔅ ᓇᔅᒡ ᒥᓴᔨᒡ ᐅᓱᐛᔨᒋᒐᐅᓐ ᐊ ᒥᔪᑐᑎᒪᑕᐧᒄ ᙭ ᒋᓴᓴ ᐅᒋ᙮

⁸ ᒋᓴᒪᓂᑐᐤ ᓴᒐᔾ ᔅᒋ ᓱᐛᔨᒥᑯᐛᐤ ᑲ ᐱᒪᒋᐃᑕᒄ ᐊᓐ ᐊ ᑕᑈᑎᒪᒄ ᐅᒡ᙮ ᓇᒪᐎᔾ ᐎ ᒋᔨᐛᐤ ᐅᒋ ᑲ ᐅᒋᐱᔨᒡ ᒐᒋ ᐱᒪᒋᐅᔭᒄ᙮ ᒋᓴᒪᓂᑐᐤ ᐅᔭ ᐅᒥᔨᐛᐅᓐ᙮

⁹ ᓇᒪ ᐊᐛᓐ ᒋᑭ ᒋ ᒪᒥᒋᒧᐤ ᒐᒋ ᐃᔅᒋᔄᑦ ᐎᔾ ᐊᒋ ᐱᒪᒋᐃᓱᑦ ᐊᓂᔭ ᐊᒋ ᒪᒥᔪᑐᑕᐧᒃ ᐅᒡ᙮

¹⁰ ᐛᔅ ᐎᔾ ᒋᓴᒪᓂᑐᐤ ᔅᒋ ᑐᑕᑯᓄᐤ ᒐᒋ ᑯᐃᔅᑯᓇᑯᓯᔭᐧᒄ ᐊᓂᔭ ᐅᒋ ᑕᓐ ᑲ ᐃᑐᑎᒥᔨᒋ ᙭ ᒋᓴᓴ᙮ ᙭ᑕ ᒪᒃ ᐊ ᐎᒐᐅᒪᐧᑯ, ᒋᓴᒪᓂᑐᐤ ᔅᒋ ᐃᑕᔨᑕᑯᐃᑯᓄᐤ ᒐᒋ ᒪᒥᔪᑐᑎᒪᐧᑯ ᐊᐛᔪᐛ, ᐛᔅ ᐊᔪᐅᒄ ᐅᔭ ᓴᔅ ᐊᓐᑕ ᐛᔅᑭᒡ ᓂᑲᓐ ᑲ ᐃᓯ ᐎᔭᔨᑕᐧᒃ ᒐ ᐃᑐᐛᐧᒄ᙮

ᐸᐃᑯᓄᒡ ᒋᑦ ᐃᓯᓇᑯᓯᓇᓄᐤ ᙭ ᐊ ᑕᑦ Ephesians 2.11-22 (Proper-11 Year B)

¹¹ ᒋᔅᒋᓯᒄ ᒪ ᐅ ᒋᔨᐛᐤ ᐊᑲ ᒍᐤ ᐃᑎᔅᑲᓇᓯᔭᒄ ᑕᓐ ᑲ ᐸᒋ ᐃᓯᓇᑯᓯᔭᒄ ᐊᓐᑕ ᐸᒡ, ᒋᔨᐛᐤ “ᐊᑲ ᒋᔅᒋᓄᐛᒋᔄᑭᓄᐎᒡ” ᑲ ᐃᓯᓂᐧᑲᑎᑕᑯᒡ ᐊᓐᒡ ᓇᔅᒡ ᒋᒋᐛ ᑲ ᐃᑕᔨᑎᒥᐃᑯᒡ ᐊᒋ ᒋᔅᒋᓄᐛᒋᔄᑭᓄᐎᒡ, ᐎᔪᐛᒡ ᑲ ᒪᑎᓱᑯᒡ ᑯᑎᑲ ᐊᐛᔪᐛ;

¹² ᐊᓐᑕ ᐊᓐ ᒪᒂᒡ ᓇᒪ ᒋ ᐅᒋ ᐎᒐᐛᐛᐤ ᙭᙮ ᔅᒋ ᒪᓐᑕᐅᓇᐛᐤ ᐊᑲ ᐅᒋ ᐊᔅᑎᓯᓇᓱᔭᒄ ᐊᓐᑕ ᒋᓴᒪᓂᑐᐤ ᐅᑦ ᐃᔨᒪ ᐊ ᑕᔨᒋ᙮ ᓇᒪ ᒋ ᐅᒋ ᐊᔅᑎᓯᓇᓱᓇᐛᐤ ᓂᔅᑯᒧᐅᓂᒡ, ᐊᓂᔭᔪᐛ ᑲ ᐅᓯᑕᑭᓄᐅᒋ ᐊᓐᑕ ᐅᒋ ᐊᓂᔭ ᑕᓐ ᑲ ᐃᔅᒋᔄᑦ ᒋᓴᒪᓂᑐᐤ ᒐᔅᑎᓇᔅ ᒐ ᐃᑐᑎᒧᐛᑦ ᐅᑦ ᐃᔨᒪ᙮ ᑭᔭ ᔅᒋ ᐱᒪᑎᓯᓇᐛᐤ ᐅᑕ ᐊᔅᒋᒡ ᐊᑲ ᐅᒋ ᐊᔭᔭᒄ ᐊᔅᐸᔨᒧᐅᓐ ᑭᔭ ᓇᒪ ᒋ ᐅᒋ ᒋᔅᒐᔨᒪᐛᐤ ᒋᓴᒪᓂᑐᐤ᙮

¹³ ᒋᔨᐛᐤ ᑲᒋ ᐊᔭᐛᐱᒪᒄ ᒋᓴᒪᓂᑐᐤ, ᐊᒋ ᓂᐸᐊᑭᓄᐅᑦ ᒋᓴᔅ ᙭ ᐊᑯᑕ ᑲ ᐅᒋ ᐃᑐᑕᑕᒄ ᒋᓴᒪᓂᑐᐤ ᒐᒋ ᐸᓱᐛᐱᒪᒄ ᐊᓂᔭ ᐅᒋ ᐊ ᐎᒐᐛᒄ ᐊᑯ ᙭᙮

¹⁴ ᐛᔅ ᙭ ᔅᒋ ᐸᑥᑯᓄᐤ ᒋᔭᒪᔨᑎᒧᐅᓂᔪᐤ᙮ ᒋ ᐃᑐᑐᐛᐤ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᑭᔭ ᐊᓂᔭ ᐊᑲ ᒍᐤ ᐃᑎᔅᑲᓇᓯᔨᒋ ᐸᐃᑯᑕᓇᐤ ᒐᒋ ᐃᓯᓇᑯᓯᔨᒋ᙮ ᒋ ᐱᑯᓂᒺᐤ ᐊᓂᔭ ᑕᓐ ᑲᒋ ᐃᓯ ᐛᐧᑲᑎᑐᑐᔨᒋ᙮

¹⁵ ᙭ ᒪᒃ ᒋ ᐃᑐᑎᒻ ᒐ ᐊᑲ ᒋ ᐊᐱᑎᓂᔨᒋ ᑕᓐ ᐊ ᐃᓯ ᓂᓇᐧᑯᐤ ᑎᑯᓂᔨᒋ ᐃᑎᓱᐛᐅᓇ ᐊᓐᑕ ᐎᓱᐛᐅᓂᒡ᙮ ᐊᔪᐅᒄ ᐅᔭ ᑲ ᐃᑎᑦ ᒐᒋ ᒥᔪ ᐎᒐᐅᑐᔨᒋ ᒍᐤ ᐃᔪᐛ ᑭᔭ ᐊᑲ ᒍᐤ ᐃᑎᔅᑲᓇᓯᔨᒋ᙮ ᐃᑐᑐᐛᐤ ᐸᐃᑯᑕᓇᐤ ᒐᒋ ᐃᓯᓇᑯᓯᔨᒋ ᐊᑎ ᐃᔭᒡ ᐊ ᐃᑎᔅᑲᓇᓯᔨᒋ, ᓇᓴᐅᑯᒐ᙮

¹⁶ ᒋᐱᔭᑎᑯᒡ ᑲ ᓂᐸᐊᑭᓄᐅᑦ ᐊᑯᑕ ᑲ ᐅᒋ ᐃᓯᓇᑯᐊᑦ ᐸᐃᑯᑕᓇᐤ ᒐᒋ ᐃᓯᓇᑯᓯᔨᒋ ᑲᐤ ᐊᒋ ᐸᓱᐛᑦ ᒋᓴᒪᓂᑐᐛ ᒐᒋ ᒥᔪ ᐎᒐᐛᔨᒋ ᑭᔭ ᐊᑯᑕ ᑲ ᐅᒋ ᐃᑐᑐᐛᑦ ᒐᒋ ᐳᓂᔨᒋ ᐊ ᐛᐧᑲᑐᑐᔨᒋ᙮

¹⁷ ᐊᑯ ᒪᒃ ᙭ ᑲ ᑎᑯᓯᐧᒃ, ᐊ ᑭᒐᔅᒋᒧᑦ ᒋᔭᒪᔨᑎᒧᐅᓂᔪᐤ ᐊ ᐊᔨᒧᑕᐧᒃ ᐊᓐᑕ ᒐᒋ ᐅᒋ ᓂᓇᐊᔨᒥᑐᔨᒋ ᐊᓂᔭ ᑲ ᐸᓱᐛᐱᒪᔨᒋ ᒋᓴᒪᓂᑐᐛ ᑭᔭ ᐊᓂᔭᔪᐛ ᑲ ᐊᔭᐛᐱᒪᔨᒋ ᒋᓴᒪᓂᑐᐛ᙮

¹⁸ ᐛᔅ ᐎᔾ ᐊ ᐎᒐᐛᐧᒄ ᐊᑯᑕ ᓂᔭᐃᐱᔨᑕᑦ ᑕᐱᔅᑯᓐ ᒐᒋ ᓇᑕᐧᒄ ᒋᓴᒪᓂᑐᐤ ᐸᐃᒄ ᐊᒐᐧᑯᐅᓂᒡ ᐅᒋ᙮

¹⁹ ᐊᑯ ᒪᒃ ᒋᔨᐛᐤ ᐊᑲ ᒍᐤ ᐃᑎᔅᑲᓇᓯᔭᒄ ᓇᒪ ᐊᑯ ᒋ ᒪᓐᑕᐅᓇᐛᐤ ᒋᓴᒪᓂᑐᐤ ᐊ ᑕᑦ᙮ ᑲ ᑕᑈᑕᒡ ᐊ ᑕᒡ ᒋ ᐊᑎ ᐃᓯ ᒥᓯᓇᓱᓇᐛᐤ ᑭᔭ ᒋᔨᐛᐤ ᑭᔭ ᒋᓴᒪᓂᑐᐤ ᒋ ᐅᑦ ᐃᔨᒥᑐᑕᑯᐛᐤ᙮

²⁰ ᐊᓂᔭ ᑕᓐ ᑲ ᐃᓯ ᐎᑎᒪᑕᑯᒡ ᒥᔽᒋᒧᐅᓂᔪᐤ ᐊᑈᔅᑕᓇᒡ ᑭᔭ ᐅᒋᔅᒋᐛᐃᒐᓱᒡ ᐊᐅᒄ ᑲ ᐎᑲᐳᐃᑯᔭᒄ᙮ ᒋᓴᔅ ᙭ ᒪᒃ ᐊᐅᒄ ᒋᒋᐛ ᒪᔪ ᐊᔨᒋᑲᐳᐃᑕᒄ,

²¹ ᐛᔅ ᐎᔾ ᐃᑐᑐᐛᐤ ᐊᔭᔅᒃ ᒐᒋ ᐊᑎ ᐊᔨᒋᑲᐳᔨᒋ ᒥᓯᐛ ᐊᓂᔭᔪᐛ ᑲ ᑕᑈᔭᔨᒥᑯᑦ ᑭᔭ ᒐᒋ ᐊᑎ ᐸᔭᒋᓯᔨᒋ ᐅᑎᐸᔨᒋᒐᐛ ᐃᔅ ᐊ ᑕᔨᒋ, ᒧᔭᒻ ᒋᓴᐊᔭᒥᐊᐅᒋᐛᑉ ᐊ ᐎᔨᑲᐳᐅᑕᑭᓄᐅᒡ ᒐᒋ ᐃᓯᓇᑯᓯᔨᒋ᙮

²² ᑭᔭ ᒋᔨᐛᐤ ᐊᑯᑕ ᐊ ᐊᓯᒡ ᐅᐱᑲᐳᐃᑯᐅᔭᒄ ᐊᓐᑕ ᒐ ᑕᔨᒋ ᒋᓴᒪᓂᑐᐤ ᐅᑦ ᐊᒐᒂ᙮