ᐃᐱᓯᔭᓇ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐊᑈᔅᑕᓐ ᑈᓪ ᓂᔾ, ᒋᓴᒪᓂᑐᐤ ᓂᒋ ᐅᑎᓂᒄ ᒐᒋ ᑎᐸᒋᒥᒋ ᙭ ᒋᓴᓴ᙮ ᒋ ᒥᓯᓇᐊᒪᑎᓇᐛᐤ ᒋᔨᐛᐤ ᑲ ᑕᑈᑎᒪᒄ ᐊᓐᑕ ᐃᐱᓴᔅ ᐊ ᑕᔭᒄ, ᒋᔨᐛᐤ ᒧᔅ ᑲ ᑕᑈᐅᒐᔨᑕᑯᓯᔭᒄ ᐊ ᐎᒐᐛᒄ ᙭ ᒋᓴᔅ᙮ 2 ᒋᑦ ᐊᔭᒥᐊᔅᑎᒪᑎᓇᐛᐤ ᒐᒋ ᓱᐛᔨᒥᑕᑯᒡ ᒋᓴᒪᓂᑐᐤ ᒍᑕᐎᓄᐤ ᑭᔭ ᐅᑎᐸᔨᒋᒐᐤ ᒋᓴᔅ ᙭ ᑭᔭ ᒐᒋ ᒥᔨᑕᑯᒡ ᒋᔭᒪᔨᑎᒧᐅᓂᔪᐤ᙮ ᐊ ᐃᓯ ᓱᐛᔨᒥᑯᐅᔭᐧᒄ ᙭ ᐅᒋ Ephesians 1.3-14 (Proper-10 Year B) Ephesians 1.3-14 (Christmas-2 Year B) 3 ᓂᓇᔅᑯᒪᑕᐤ ᒋᓴᒪᓂᑐᐤ, ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᑕᐎᔭ᙮ ᐊᓂᔭ ᐊ ᐎᒐᐅᒪᐧᑯ ᙭ᑕ, ᒋᓴᒪᓂᑐᐤ ᔅᒋ ᓱᐛᔨᒥᑯᓄᐤ ᐊᒋ ᒥᔨᑕᐧᒄ ᒥᓯᐛ ᐊᒐᐧᒄ ᓱᐛᔨᒋᒐᐅᓇ ᑕᓐ ᐊ ᐃᓯ ᑎᒂᒋ ᒋᒋᒋᓯᑯᒡ᙮ 4 ᐊᔅᒄ ᐊᑲ ᐛᐛᒡ ᐅᒋ ᐅᓯᑕᑭᓄᐅᒡ ᐅ ᐊᔅᒋᔾ, ᓴᔅ ᔅᒋ ᐅᑎᓂᑯᓄᐤ ᒋᓴᒪᓂᑐᐤ ᐎᔾ ᒐ ᐊᔭᐅᑕᐧᒄ ᐊᓂᔭ ᐅᒋ ᙭ᑕ ᐊ ᐎᒐᐅᒪᐧᑯ᙮ ᔅᒋ ᐅᑎᓂᑯᓄᐤ ᒐᒋ ᐸᔭᒋᓯᐛᐧᒄ ᑭᔭ ᐊᑲ ᓇᔅᒡ ᒐᒂᓐ ᒐᒋ ᑎᒂᒡ ᒐ ᐃᓯ ᐊᑕᒪᔨᑕᑯᓯᔭᐧᒄ ᒋᓴᒪᓂᑐᐤ ᐃᔅ ᐊ ᑕᑦ᙮ 5 ᐊ ᓴᒋᐃᑕᐧᒄ ᒋᓴᒪᓂᑐᐤ ᐊᔪᐅᒄ ᐅᔭ ᐛᒋ ᐃᑕᔨᒥᑕᐧᒄ ᐎᔾ ᒐᒋ ᐅᑦ ᐊᐛᓯᒥᑐᑕᑕᐧᒄ ᒋᓴᔅ ᙭ᑕ ᐊ ᑕᔨᒋ ᐅᒡ᙮ ᐊᔪᐅᒄ ᐅᔭ ᑲ ᐃᓯ ᓇᐊᔨᑎᒥᐃᑯᑦ ᒐᒋ ᐃᑎᑦ ᑭᔭ ᐊᔪᐅᒄ ᐅᔭ ᑲ ᐎ ᐃᑎᑦ᙮ 6 ᐃᑕᔨᑕᑯᓂᔪᐤ ᒪᒃ ᒐᒋ ᒪᒥᒋᒪᑭᓄᐅᑦ ᐊ ᒋᔅᑕᔨᑕᑯᓂᔨᒡ ᑕᓐ ᐊᔅᐱᔅ ᓱᐛᔨᒥᑕᐧᒄ᙮ ᒪᒥᒋᒪᑕᐤ ᓴᒐᔾ ᐊᒋ ᒥᔨᑕᐧᒄ ᐅᑯᓴ ᓇᔅᒡ ᑲ ᓴᒋᐊᑦ᙮ 7 ᐛᔅ ᙭ ᑲ ᓂᐱᔅᑎᒪᑕᐧᒄ ᒋᐱᔭᑎᑯᒡ, ᐊᑯᑕ ᑲ ᐅᒋ ᐊᐱᐧᑯᓂᑯᐅᔭᐧᒄ, ᒋᒥᒋᑥᐅᓄᐛ ᔅᒋ ᐛᐸᔨᑎᒪᑯᓇᓄᐤ᙮ ᑕᑈ ᒥᓴᔪᐤ ᒋᓴᒪᓂᑐᐤ ᐅᓱᐛᔨᒋᒐᐅᓐ᙮ 8 ᐊᔪᐛᒡ ᑕᑈ ᒥᔅᑎ ᔅᒋ ᓱᐛᔨᒥᑯᓄᐤ᙮ 9 ᒋ ᐃᑐᑎᒻ ᒋᓴᒪᓂᑐᐤ ᐊᓂᔭ ᑲ ᐎ ᐃᑐᑕᐧᒃ, ᔅᒋ ᒥᔨᑯᓄᐤ ᒐᒋ ᒋᔅᒐᔨᑎᒺᐧᒄ ᐊᓂᔭ ᑕᓐ ᓴᔅ ᑲ ᐃᓯ ᐎᔭᔨᑕᐧᒃ ᐊᑲ ᐅᒋ ᒋᔅᒐᔨᑎᒥᔨᒋ ᐊᐛᔪᐛ᙮ ᒋᑭ ᐃᑐᑎᒻ ᒪᒃ ᐊᓂᔭ ᑕᓐ ᐛ ᐃᑐᑕᐧᒃ ᙭ᑕ ᐊ ᑕᔨᒋ ᐅᒡ᙮ 10 ᐃᔅᐱ ᒪᒃ ᐅᑎᒋᐱᔨᒐ ᐊᓐᑕ ᒐ ᑎᐸᐱᔨᒡ ᐊᓂᔭ ᑲ ᐎ ᐃᑐᑕᐧᒃ ᒋᓴᒪᓂᑐᐤ ᒋᑭ ᒪᒧᐅᓂᒻ ᒥᓯᐛ ᒐᒂᔪᐤ ᙭ᑕ ᒐ ᓂᑲᓂᔅᑭᒥᔨᒋ, ᒥᓯᐛ ᑕᓐ ᐊ ᐃᓯ ᑎᑯᓂᔨᒡ ᒋᒋᒋᓯᑯᒡ ᑭᔭ ᐅᑕ ᐊᔅᒋᒡ᙮ 11 ᒧᔅ ᐃᑐᑎᒻ ᒋᓴᒪᓂᑐᐤ ᑕᓐ ᑲ ᐃᓯ ᐎᔭᔨᑕᐧᒃ ᒐ ᐃᑐᑕᐧᒃ᙮ ᙭ᑕ ᒪᒃ ᐊ ᐎᒐᐅᒪᐧᑯ ᐊᑯᑕ ᑲ ᐅᒋ ᐅᑎᓂᑕᐧᒄ ᒋᓴᒪᓂᑐᐤ ᐛᔅ ᐊᔪᐅᒄ ᐅᔭ ᑲ ᐃᓯ ᐎᔭᔨᑕᐧᒃ ᓴᔅ ᐊᓐᑕ ᐛᔅᑭᒡ᙮ 12 ᒋᔭᓄᐤ ᒪᒃ ᓂᔅᑎᒻ ᑲ ᐊᔅᐸᔨᒧᑐᑐᐛᐧᒄ ᙭, ᒪᒥᒋᒪᑕᐤ ᒋᓴᒪᓂᑐᐤ ᐊ ᒋᔅᑕᔨᑕᑯᓯᑦ᙮ 13 ᒋᔨᐛᐤ ᒪᒃ ᑭᔭ ᐊᓐᑕ ᐃᐱᓴᔅ ᐊ ᑕᔭᒄ, ᒋᓴᒪᓂᑐᐤ ᔅᒋ ᐅᑦ ᐃᔨᒥᑐᑕᑯᐛᐤ ᐅᔅᑭᒡ ᑲ ᐸᑎᒪᒄ ᐊᓐ ᑲ ᑕᑈᒥᑲᒡ ᐃᔨᒧᐅᓐ, ᐊᐅᒄ ᒥᔽᒋᒧᐅᓐ ᑲ ᐱᒪᒋᐃᑯᔭᒄ᙮ ᙭ ᔅᒋ ᑕᑈᔭᔨᒪᐛᐤ, ᑭᔭ ᑲ ᒋᔅᒋᓄᐛᒋᐃᑕᒄ ᒋᓴᒪᓂᑐᐤ ᐎᔾ ᐊ ᐊᔭᐅᑕᒄ, ᑲ ᐸᔭᒋᓯᔨᒋ ᐊᒐᒂ ᐊᒋ ᒥᔨᑕᒄ ᐊᓂᔭ ᑲ ᐃᔅᒋᔄᑦ ᒐᔅᑎᓇᔅ ᒐ ᒥᔨᐛᑦ᙮ 14 ᐅ ᒪᒃ ᑲ ᐸᔭᒋᓯᑦ ᐊᒐᐧᒄ ᐊᒋ ᒥᔨᑯᐅᔭᐧᒄ ᐊᑯᑕ ᐛᒋ ᒐᔅᑎᓇᐅᔭᐧᒄ ᒋᓴᒪᓂᑐᐤ ᑕᑈ ᒐ ᒥᔭᑦ ᐅᑦ ᐃᔨᒪ ᐊᓂᔭ ᑕᓐ ᑲ ᐃᑕᑦ ᒐ ᒥᔭᑦ᙮ ᒋ ᒐᔅᑎᓇᐅᓇᓄᐤ ᓇᔅᒡ ᒐ ᐊᐱᐧᑯᓇᑦ ᒋᓴᒪᓂᑐᐤ ᒥᓯᐛ ᐊᓂᔭ ᑲ ᐅᑦ ᐃᔨᒥᑦ᙮ ᐊᔪᐅᒄ ᐅᔭ ᒐ ᐃᓯ ᐃᑐᑎᒧᐛᑦ ᒐᒋ ᐅᒋ ᒪᒥᒋᒪᑭᓄᐅᑦ ᐊ ᒋᔅᑕᔨᑕᑯᓯᑦ᙮ ᑈᓪ ᑲ ᐃᓯ ᐊᔭᒥᐊᔅᑎᒧᐛᑦ ᐊᓂᔭ ᐃᔪᐛ ᐊᓐᑕ ᐃᐱᓴᔅ ᐊ ᑕᔨᒋ Ephesians 1.15-23 (Proper-29 Year A) 15 ᓂᒋ ᐸᑕᓐ ᐊ ᑕᑈᔭᔨᒪᒄ ᒋᓴᔅ ᒋᑎᐸᔨᒋᒐᓯᒥᓄᐤ ᑭᔭ ᐊ ᓴᒋᐊᑯᒡ ᒥᓯᐛ ᐊᐛᓐᒋ ᑲ ᑕᑈᑕᒡ᙮ 16 ᐊᐅᒄ ᒪᒃ ᐅ ᐛᒋ ᐊᑲ ᐳᓂᔭᓐ ᐊ ᓂᓇᔅᑯᒧᔭᓐ ᐊ ᒋᔅᒋᓯᑕᑎᑯᒡ ᑕᑥᐤ ᐊ ᐊᔭᒥᐊᔭᓐ᙮ 17 ᓇᓂᑐᑎᒧᐛᐤ ᒋᓴᒪᓂᑐᐤ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᑕᐎᔭ ᐊᓐ ᒪᐅᒡ ᑲ ᒋᔅᑕᔨᑕᑯᓯᑦ ᒐᒋ ᒥᔨᑕᒄ ᐅᑦ ᐊᒐᒂ ᐊᓂᔭᔪᐛ ᒐ ᑭᒐᑕᐛᔨᑎᒥᐃᑕᑯ ᑭᔭ ᒐ ᒋᔅᒐᔨᑎᒥᐃᑕᑯ ᑕᓐᑕ ᒐᒋ ᐅᒋ ᒋᔅᒐᔨᒪᒄ ᒋᓴᒪᓂᑐᐤ᙮ 18 ᓂ ᓂᑐᑎᒪᓐ ᑭᔭ ᒐᒋ ᒋᔅᒐᔨᑎᒺᒄ ᒐᒂᔪᐤ ᐊᓂᔭ ᑲ ᒥᔨᑕᒄ ᒋᓴᒪᓂᑐᐤ ᒐᒋ ᐊᔅᐸᔨᒧᑐᑎᒺᒄ ᐃᔅᐱ ᑲ ᐅᑎᓂᑕᒄ᙮ ᑭᔭ ᒐᒋ ᒋᔅᒐᔨᑎᒪᒄ ᑕᓐ ᐊᔅᐱᔅ ᐛᔪᑎᓂᔨᒋ ᐊ ᒋᔅᑕᔨᑕᑯᓂᔨᒋ ᒥᔪ ᒥᔨᐛᐅᓇ ᑕᓐ ᐊ ᐃᓯ ᐊᔭᔅᑯᔅᑎᒧᐛᑦ ᑲ ᑕᑈᑎᒥᔨᒋ ᒐ ᒥᔭᑦ᙮ 19 ᓂᑐᑎᒧᐛᐤ ᑭᔭ ᒐᒋ ᓂᔅᑐᑎᒪᒄ ᐊᔅᐱᔅ ᓱᒐᔨᑕᑯᓂᔨᒡ ᐊᓂᔭ ᐅᒥᔅᑯᓯᐅᓐ ᒋᓴᒪᓂᑐᐤ ᑲ ᐊᑐᔅᒐᒥᑭᓂᔨᒡ ᐱᒡ ᐊ ᐃᑕᐛᐧᒄ, ᒋᔭᓄᐤ ᑲ ᑕᑈᑎᒪᐧᒄ᙮ 20 ᐊᔪᐅᒄ ᐅᔭ ᐊ ᐸᐃᑯᓂᔨᒡ ᐊ ᓱᒐᔨᑕᑯᓂᔨᒡ ᒥᔅᑯᓯᐅᓂᔪᐤ ᑲ ᐊᐱᒋᑕᑦ ᒋᓴᒪᓂᑐᐤ ᑲ ᐅᓂᔅᑲᓇᑦ ᙭ᑕ ᓂᐳᐅᓂᒡ ᐅᒋ ᑭᔭ ᑲ ᐊᔭᑦ ᐊᓐᑕ ᐅᒥᔪᐅᓂᒡ ᐃᑕᒐ ᐊᓐᑕ ᒋᒋᒋᓯᑯᒡ᙮ 21 ᐎᔾ ᙭ ᐃᐛᒃ ᐃᑕᔨᑕᑯᓂᔪᐤ ᐅᑎᐸᔨᒋᒐᐅᓐ ᐃᔅᐱᔅ ᐊᓂᔭᔪᐛ ᑲ ᐅᒋᒪᐎᔨᒋ, ᑲ ᑎᐸᔨᒋᒐᔨᒋ, ᑲ ᓱᐧᑲᑎᓯᔨᒋ, ᑭᔭ ᑲ ᓂᑲᓄᐱᔨᒋ᙮ ᐎᔾ ᐃᐛᒃ ᐃᑕᔨᑕᑯᓂᔪᐤ ᐅᑦ ᐃᓯᓂᐧᑲᓱᐅᓐ ᐊ ᐃᑕᔨᑕᑯᓂᔨᒡ ᑯᑎᒃ ᐊᐛᓐ ᐅᑦ ᐃᓯᓂᐧᑲᓱᐅᓐ ᐊᓄᒡ ᑭᔭ ᐊᓐᑕ ᓂᑲᓐ᙮ 22 ᒋᓴᒪᓂᑐᐤ ᒋ ᒥᔭᐤ ᙭ᑕ ᒥᓯᐛ ᒐᒂᔪᐤ ᒐᒋ ᐅᒋᒪᐅᔨᒋ ᑭᔭ ᐊᓐᑕ ᒋ ᐃᓯ ᐱᔅᑎᓇᐤ ᐅᒪᒧᐊᔭᒥᐊᐛ ᐊ ᑕᔨᒋ ᐎᔾ ᒥᓯᐛ ᒐᒂᔪᐤ ᒐᒋ ᓂᑲᓂᔅᑭᒥᔨᒋ᙮ 23 ᐅᔭ ᒪᒃ ᐅᒪᒧᐊᔭᒥᐊᐛ, ᐊᔪᐅᒄ ᐊᓂᔭ ᙭ ᐎᔪᐤ᙮ ᐊᓐᑕ ᒪᒃ ᐅᐱᒪᑎᓯᐅᓄᐛᒡ ᓇᒪ ᒐᒂᔪᐤ ᓄᑕᐱᔪᐅᒡ ᐛᔅ ᙭ᑕ ᒥᔨᑯᐅᒡ ᒥᓯᐛ ᒐᒂᔪᐤ ᑕᓐ ᐊ ᐃᓯ ᓄᑕᐱᔨᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.