ᑯᓚᓯᔭᓇ 4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᔨᐛᐤ ᑲ ᐅᒋᒪᐎᔭᒄ ᒥᓯᐛ ᑕᐱᑐᐤ ᐃᓯ ᑭᓄᐛᐱᒪᐧᑯᒡ ᒋᑦ ᐊᐱᒋᐊᑭᓄᐛᐅᒡ ᑕᓐ ᐊ ᐃᑐᑐᐛᑯᒡ ᑭᔭ ᑯᐃᔅᒄ ᐃᑐᑐᐛᐧᑯᒡ᙮ ᒋᔅᒋᓯᒄ ᑭᔭ ᒋᔨᐛᐤ ᐊ ᑕᑦ ᐊᐛᓐ ᒋᒋᒋᓯᑯᒡ ᐛᒋᒪᒥᔭᒄ᙮ ᒋᔅᑯᑎᒪᒐᐅᓇ 2 ᒧᓯᓇᐤ ᐊᔭᒥᐊᒄ᙮ ᐊ ᐊᔭᒥᐊᔭᒄ ᒪᒃ ᓱᒃ ᐎ ᐱᔭᑭᔅᒐᔨᑎᒧᒄ ᑭᔭ ᓂᓇᔅᑯᒪᐧᒄ ᒋᓴᒪᓂᑐᐤ᙮ 3 ᑭᔭ ᓂᔭᓐ ᐊᔭᒥᐊᔅᑎᒧᐅᓇᓐ ᒋᓴᒪᓂᑐᐤ ᒐᒋ ᑕᐅᐱᔨᑐᔨᒥᑦ ᒐᒋ ᐛᐎᑎᒪᒡ ᒥᔽᒋᒧᐅᓐ ᐊᓐᑕ ᐃᔭᔨᒧᒪᑭᓄᐅᑦ ᙭, ᐊᓐ ᐊᑲ ᐅᒋ ᒋᔅᒐᔨᒪᑭᓄᐅᑦ ᐊᓐᑕ ᐅᑕᒡ᙮ ᐊᐅᒄ ᐊᓐ ᐛᒋ ᒋᐸᐅᑯᐅᔭᓐ ᐊᓄᒡ, ᐅ ᐊᒋ ᐃᓯ ᐛᐎᑎᒪᓐ᙮ 4 ᐊᔭᒥᐊᔅᑎᒧᐅᒄ ᒐᒋ ᐱᔭᑭᔅᒋᑕᑯᓯᔭᓐ ᐊ ᐛᐎᑎᒪᓐ ᒥᔽᒋᒧᐅᓐ ᐛᔅ ᐊᐅᑯᓐ ᓂᐸ ᐃᑎᓐ᙮ 5 ᓱᒃ ᐎ ᑭᒐᑕᐛᔨᑎᒧᒄ ᑕᓐ ᐊ ᐃᓯ ᐱᒪᑎᓯᔭᒄ ᒪᒂᒡ ᐊᓐᑕ ᐊᓐᒡ ᐊᑲ ᑕᑈᑕᒡ ᐊ ᐱᒪᑎᓯᔭᒄ᙮ ᒧᔅ ᐅᑎᓂᒪᓱᒄ ᑕᓐᑕ ᑎᔭᐅᐱᔨᒡ ᒪᓐ ᒐᒋ ᐃᔨᒪᐊᑯᒡ ᐊᓐᒡ ᐊᑲ ᑕᑈᑕᒡ᙮ 6 ᒧᔅ ᒋᐸ ᒥᔪᑕᑯᓯᓇᐛᐤ ᑭᔭ ᒋᐸ ᐃᑈᐧᑲᑕᑯᓯᓇᐛᐤ ᐊ ᐃᔨᒥᔭᒄ ᑭᔭ ᒐ ᒋᔅᒐᔨᑎᒪᒄ ᑕᓐ ᒐ ᐃᓯ ᐎᑎᒧᐛᐧᒄ ᐊᐛᓐ ᐊ ᐎ ᓇᓂᑐ ᑭᒐᔅᒐᔨᑕᐧᒄ ᑕᓐ ᐊ ᐃᓯ ᑕᑈᑎᒪᒄ᙮ ᒪᔅᑕᔾ ᐊ ᐃᑎᓯᓇᐊᒧᐛᑦ ᑈᓪ ᐊᓂᔭᔪᐛ ᑲ ᒥᓯᓇᐊᒧᐛᑦ 7 ᒋᐧᑲᓂᓯᓄᐤ ᑕᐃᑭᑲᔅ ᓇᔅᒡ ᑲ ᓴᒋᒋᒡ ᑭᔭ ᒧᔅ ᑯᐃᔅᒄ ᑲ ᐃᑎᑦ ᐊᔭᒥᐊᐤ ᐊᐱᒋᐊᑭᓐ ᓂ ᐎᒋ ᐊᑐᔅᒐᒥᑯᓇᓐ ᐊ ᐊᑐᔅᒐᔅᑐᐅᒥᒋᒋ ᐅᑎᐸᔨᒋᒐᐛ᙮ ᐎᔾ ᒋᑭ ᑎᐸᒋᒧᔅᑕᑯᐛᐤ ᑕᓐ ᐊ ᐃᑐᐅᒋᒡ᙮ 8 ᐊᐅᒄ ᐛᒋ ᐃᑎᓴᐅᒃ ᒐᒋ ᐎᑎᒪᑕᒄ ᑕᓐ ᐊ ᐃᑐᐅᒋᒡ ᐊᓐᑕ ᒐ ᐊᑲ ᐅᒋ ᓂᑕᔨᑎᒪᒄ ᐊ ᒪᒥᑐᓇᔨᒥᔭᒡ᙮ 9 ᐅᓂᓯᒪᔅ ᑲ ᐃᓯᓂᐧᑲᓱᔨᒋ ᒋᑭ ᐎᒐᐅᑯᐤ᙮ ᐊᐅᒄ ᒋᐧᑲᓂᓯᓄᐤ ᑯᐃᔅᒄ ᑲ ᐃᑎᑦ ᑭᔭ ᑲ ᓴᒋᐃᔨᒋᒡ ᐊᓐᑕ ᐊ ᑕᐛᒄ ᑲ ᐅᒋᑦ᙮ ᒥᓯᐛ ᒋᑭ ᐎᑎᒪᑯᐛᐅᒡ ᑕᓐ ᐊ ᐃᑎᓇᓄᐎᒡ ᐅᑕ᙮ 10 ᐊᕆᔅᑕᕐᑲᔅ ᑭᔭ ᐎᔾ ᒋᐸᐛᑭᓄᐤ ᐅᑕ ᑲ ᒋᐸᐅᑯᐅᒡ᙮ ᒋ ᐛᒋᔭᒥᑯᐛᐤ ᑭᔭ ᐎᔾ᙮ ᑭᔭ ᒪᕐᒃ ᒋ ᐛᒋᔭᒥᑯᐛᐤ᙮ ᐸᕐᓇᐸᔅ ᐅᔭ ᐎᐧᑲᓂᓴ᙮ ᓴᔅ ᔅᒋ ᐎᑎᒪᑯᓇᐛᐤ ᒐ ᒥᔪᐧᑯᐛᒄ ᒪᕐᒃ ᐅᑎᑎᑕᒂ᙮ 11 ᒐᓱᐛ ᑭᔭ ᐎᔾ ᒋ ᐛᒋᔭᒥᑯᐛᐤ᙮ ᒐᔅᑕᔅ ᐛᔅ ᐊᓐ ᐊᔪᐤ ᐅ ᐃᓯᓂᐧᑲᑕᑭᓄᐤ᙮ ᐅᒡ ᐊ ᓂᔅᑎᒡ ᐊᐅᑯᓐᒡ ᒥᒄ ᐅᒡ ᒍᐤ ᐃᔪᒡ ᐊ ᑕᑈᑕᒡ ᐛᒋ ᐊᑐᔅᒐᒥᒡ ᒋᓴᒪᓂᑐᐛ ᐊ ᐊᑐᔅᑯᐅᒥᒋ᙮ ᒥᔅᑎ ᓂᒋ ᐸᒋ ᒥᔽᔨᒧᐃᑯᒡ᙮ 12 ᒥᓐ ᑯᑎᒃ ᐊᐛᓐ ᐊ ᑕᔭᒄ ᐊ ᐅᒋᑦ ᒋ ᐛᒋᔭᒥᑯᐛᐤ ᐊᐅᒄ ᐅ ᐊᐸᑉᕋᔅ᙮ ᑭᔭ ᐎᔾ ᐊᑐᔅᑯᐛᐤ ᙭ ᒋᓴᓴ᙮ ᒧᔅ ᓱᒃ ᒋᑦ ᐊᔭᒥᐊᔅᑎᒪᑯᐛᐤ ᐊ ᓂᑐᑎᒧᐛᑦ ᒋᓴᒪᓂᑐᐛ ᒐᒋ ᐊᔨᒋᑲᐳᐃᑕᑯ ᓇᔅᒡ ᐊ ᓂᓇᐃᑎᒺᑦ ᐅᑦ ᐃᑕᔨᑎᒧᐅᓂᔪᐤ ᒧᔭᒻ ᐊ ᐃᑎᒡ ᐊᓐᒡ ᑲᒋ ᐃᓯ ᓂᑕᐅᒋᒡ ᑭᔭ ᓇᔅᒡ ᑲ ᑕᑈᔭᔨᒪᒡ ᒋᓴᓴ᙮ 13 ᓂᔾ ᑎᐱᔨᐛ ᓂᑭ ᒋ ᑎᐸᒋᒧᐛᓐ ᐊ ᐃᔅᐱᔅ ᒥᔅᑎ ᐊᑐᔅᒐᑦ ᒋᔨᐛᐤ ᐊ ᐎ ᐎᒋᐃᑕᒄ ᑭᔭ ᐊᓂᔭᔪᐛ ᐊᐛᔪᐛ ᓚᐅᑎᓯᔭ ᑭᔭ ᐃᕋᐳᓕᔅ ᑲ ᐃᓯᓂᐧᑲᑕᔨᒋ ᐅᑕᓇᐛ ᐊ ᑕᔨᒋ᙮ 14 ᓗᒃ ᓇᔅᒡ ᑲ ᓴᒋᐃᒃ ᓂᑐᐧᑯᐃᔨᔅ ᑭᔭ ᑎᒪᔅ ᒋ ᐛᒋᔭᒥᑯᐛᐅᒡ ᑭᔭ ᐎᔨᐛᐤ᙮ 15 ᐎᑎᒧᐛᐧᑯᒡ ᐊ ᐛᒋᔭᒥᒂᐤ ᒋᐧᑲᓂᓯᓄᐅᒡ ᓚᐅᑎᓯᔭ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᐊ ᑕᒡ᙮ ᓂᒻᐸ ᑭᔭ ᐛᒋᔭᒪᐧᒄ ᑭᔭ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᓂᒻᐸᔨᒋ ᐎᒋᔨᒡ ᑲ ᐊᔭᒥᐊᒡ ᒪᓐ᙮ 16 ᐃᔅᐱ ᒋ ᐃᔨᒥᑕᔭᒂ ᐅ ᒥᓯᓇᐃᑭᓐ ᔭᐃᑕᔾ ᒐ ᐃᔨᒥᑐᐛᑯᒡ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᓚᐅᑎᓯᔭ ᑲ ᐃᓯᓂᐧᑲᑕᔨᒡ ᐊ ᑕᒡ᙮ ᔭᐃᑕᔾ ᑭᔭ ᒐ ᐃᔨᒥᑕᔭᒄ ᐊᓐ ᒥᓯᓇᐃᑭᓐ ᒐ ᐸᑥᑯᐅᔭᒄ ᐊᓐᑕ ᓚᐅᑎᓯᔭ ᐊ ᑕᒡ ᒪᒧᐤ ᑲ ᐊᔭᒥᐊᐛᑎᓯᒡ᙮ 17 ᑭᔭ ᒐ ᐃᑕᒄ ᐊᕐᑭᐸᔅ ᒐᒋ ᒋᔅᑕᑦ ᐊᓂᔭ ᑲ ᒥᔭᑭᓄᐅᑦ ᒐ ᐃᓯ ᐊᑐᔅᑯᐛᑦ ᐅᑎᐸᔨᒋᒐᐛ᙮ 18 ᓂᔾ ᑎᐱᔨᐛ ᑈᓪ ᐊᐅᑯᐤ ᒪᓯᓇᐃᒐᔭᓐ ᐅ ᐊ ᐛᒋᔭᒥᑎᑯᒡ᙮ ᐊᑲᐎᔾ ᐅᓂᒋᔅᒋᓯᒄ ᑲᒪᑯᓄᐛᓯᐅᒋᐛᐱᒡ ᐊ ᑕᔭᓐ᙮ ᓂᑦ ᐊᔭᒥᐊᐤ ᒋᓴᒪᓂᑐᐤ ᒐᒋ ᒋᓴᐛᑐᑕᑕᒄ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.