ᐊᑈᔅᑕᓇᒡ 6 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᓂᔄᐅᑕᒡ ᓇᐸᐅᒡ ᑲ ᐎᔭᔨᒪᑭᓄᐎᒡ ᒐᒋ ᐎᒋᐃᐛᒡ ᐊᔭᒥᐊᐅᒋᐛᐱᒡ

¹ ᐃᔅᐱ ᒪᒃ ᐊᑐᐎᔅ ᐊ ᐊᑎ ᒥᒐᑎᒡ ᐃᔪᒡ ᐊ ᑕᑈᔭᔨᒪᒡ ᒋᓴᓴ, ᐊᓐᒡ ᒍᐤ ᐃᔪᒡ ᑯᕆᒃ ᑲ ᐃᓯ ᐃᔨᒥᒡ ᒋ ᒥᒋᐱᔭᐊᐅᒡ ᐊᓂᔭᔪᐛ ᒍᐤ ᐃᔪᐛ ᐃᑉᕈᐤ ᑲ ᐃᓯ ᐃᔨᒥᔨᒋ ᐊᒋ ᐃᔅᒋᔄᒡ ᐊᓂᔭᔪᐛ ᑲ ᐸᐃᑯᓯᔨᒋ ᐃᔎᐛ ᐊᓐᑕ ᐊ ᑕᒡ ᐊᑲ ᐅᒋ ᐃᔅᐱᔅ ᐊᓯᒪᑭᓄᔨᒋ ᒥᒋᒥᔪᐤ ᐊᓂᔭ ᑲᒋ ᒪᑎᓂᒧᐛᑭᓄᔨᒋ ᑲ ᐸᐃᑯᓯᔨᒋ ᐃᔎᐛ ᐊᓯᑯᒻ ᒋᓯᑲᐛ᙮

² ᐊᑯ ᒪᒃ ᐊᓐᒡ ᓂᓱᓴᑉ ᐊᑈᔅᑕᓇᒡ ᒋ ᐎᓴᒪᐅᒡ ᒥᓯᐛ ᐊᓂᔭ ᐊᐛᔪᐛ ᑲ ᑕᑈᔭᔨᒪᔨᒋ ᒋᓴᓴ, ᐊᑯ ᒂ ᐃᑕᒡ, “ᓇᒪ ᑯᐃᔅᑯᓇᑯᓐ ᐊᑲ ᐃᔭᔅᐱᓯᔭᒡ ᒐᒋ ᑭᒐᔅᒋᒧᔭᒡ ᒋᓴᒪᓂᑐᐤ ᐅᑦ ᐃᔨᒧᐅᓐ ᓂᔭᓐ ᐊ ᓂᓇᑭᑐᐛᔨᑎᒪᒡ ᒐᒋ ᒥᔪ ᐊᓯᒪᑭᓄᐎᒡ ᐊᓐᒡ ᑲ ᐸᐃᑯᓯᒡ ᐃᔎᐅᒡ᙮

³ ᒋᔨᐛᐤ ᓂᐧᑲᓂᓯᑐᒄ, ᐅᑎᓇᐧᑯᒡ ᓂᔄᐅᑕᒡ ᓇᐸᐅᒡ ᐊᓐᑕ ᐊ ᑎᓯᔭᒄ ᐊᓐᒡ ᐊ ᒥᔽᒋᒪᑭᓄᐎᒡ ᐊᓂᔭ ᐅᒋ ᐊ ᑯᐃᔅᑯᑕᑎᓯᒡ ᑭᔭ ᓇᔅᒡ ᐊ ᑭᒐᑕᐛᔨᑕᒡ ᑭᔭ ᐊ ᓴᑭᔅᒋᓇᔅᑲᑯᒡ ᑲ ᐸᔭᒋᓯᔨᒋ ᐊᒐᒂ᙮ ᐊᐅᑯᓐᒡ ᐅᒡ ᒐ ᒥᔭᑯᒡ ᐅᔭ ᐊᑐᔅᒐᐅᓂᔪᐤ ᐊ ᓂᓇᑭᑐᐛᔨᒪᒡ ᑲ ᐸᐸᐃᑯᓯᔨᒋ ᐃᔎᐛ᙮

⁴ ᐊᑯ ᒪᒃ ᓂᔭᓐ ᒐ ᐃᔅᐱᓯᔭᒡ ᒐᒋ ᐊᔭᒥᐊᔭᒡ ᑭᔭ ᐊ ᑭᒐᔅᒋᒧᔭᒡ᙮”

⁵ ᒥᓯᐛ ᒪᒃ ᒋ ᓇᐊᔨᑎᒧᒡ ᐊᓐᑕ ᐊ ᑎᓯᒡ ᐊᓂᔭ ᑲ ᐃᔅᒋᔄᔨᒋ ᐊᓂᔭᔪᐛ ᐊᑈᔅᑕᓇ᙮ ᐊᑯ ᑲ ᐅᑎᓇᑭᓄᐅᑦ ᔅᑎᐱᓐ᙮ ᔅᑎᐱᓐ ᒪᒃ ᐅᑕᑈᑎᒧᐅᓐ ᓇᔅᒡ ᒋ ᓱᒐᔨᑕᑯᓂᔪᐤ, ᑭᔭ ᒋ ᓴᑭᔅᒋᓇᔅᑲᑯᐤ ᑲ ᐸᔭᒋᓯᔨᒋ ᐊᒐᒂ᙮ ᑭᔭ ᐱᓕᐸ ᒋ ᐅᑎᓇᐅᒡ ᑭᔭ ᐳᕈᑯᕋᓴ, ᑭᔭ ᓂᑲᓄᕋ, ᑭᔭ ᑎᒧᓇ, ᑭᔭ ᐸᕐᒪᓇᓴ, ᑭᔭ ᓂᑯᓚᓴ᙮ ᐅ ᓂᑯᓚᔅ ᐊᓐᑕ ᐊᓐᑎᔭᒃ ᐎᔾ ᒋ ᐅᒋᐤ, ᐊᑎ ᒪᒃ ᐊᑲ ᒍᐤ ᐅᒋ ᐃᑎᔅᑲᓇᓯᑦ ᐃᔭᐱᒡ ᒪᒃ ᒋ ᑕᑈᑎᒻ ᑕᓐ ᐊ ᐃᓯ ᑕᑈᑎᒥᔨᒋ ᒍᐤ ᐃᔪᐛ᙮

⁶ ᐊᑯ ᒪᒃ ᐊᓐᒡ ᑲ ᑕᑈᑕᒡ ᒂ ᐃᑐᑕᐊᒡ ᐊᓂᔭᔪᐛ ᑲ ᐅᑎᓇᒡ ᓇᐸᐛ ᐊᓐᑕ ᐊᓂᔭᔪᐛ ᐊᑈᔅᑕᓇ ᐊ ᑕᔨᒋ᙮ ᐊᑯ ᒪᒃ ᐊᓐᒡ ᐊᑈᔅᑕᓇᒡ ᒂ ᑕᒋᓇᒡ ᑭᔭ ᑲ ᐊᔭᒥᐊᔅᑎᒧᐛᒡ ᐊᓂᔭᔪᐛ ᓇᐸᐛ᙮

⁷ ᒋᓴᒪᓂᑐᐤ ᒪᒃ ᐅᑦ ᐃᔨᒧᐅᓐ ᒋ ᒥᓯᑕᐱᔪᐤ᙮ ᐊᔭᔅᒃ ᒥᒐᑦ ᐃᔪᒡ ᐊᓐᑕ ᒋᕈᓯᓕᒥᒡ ᑲ ᑕᒡ ᒋ ᑕᑈᑎᒧᒡ, ᑭᔭ ᒥᒐᑦ ᐊᔭᒥᐊᐅᒋᒪᐅᒡ ᒋ ᑕᑈᑎᒧᒡ ᑭᔭ ᒋ ᓂᓇᐃᑎᒧᒡ ᒥᔽᒋᒧᐅᓂᔪᐤ᙮

ᔅᑎᐱᓐ ᑲ ᒪᑯᓇᑭᓄᐅᑦ

⁸ ᔅᑎᐱᓐ ᒪᒃ ᐊᓐ ᐊᐛᓐ ᑲ ᓴᒋᔅᒋᓇᔅᑲᑯᑦ ᒋᓴᒪᓂᑐᐛ ᐅᓱᐛᔨᒋᒐᐅᓂᔪᐤ ᑭᔭ ᐅᓱᐧᑲᑎᓯᐅᓂᔪᐤ ᒋ ᐃᑕᔨᑕᑯᓱᐤ, ᒋ ᐃᑐᑎᒻ ᒪᒃ ᓂᓇᐧᑯᐤ ᒪᒥᔅᑲᒡ ᒐᒂᔪᐛ ᑭᔭ ᓂᓇᐧᑯᐤ ᒋ ᐃᓯ ᒪᒥᔅᑲᒡ ᐛᐸᑎᔨᐛᐤ ᐊᓐᑕ ᐃᔪᐛ ᐊ ᑕᔨᒋ᙮

⁹ ᒋ ᑕᐅᒡ ᓇᐸᐅᒡ ᐊᑲ ᐅᒋ ᓇᐊᔨᒪᒡ ᔅᑎᐱᓇ, ᐊᓐᒡ ᐊᓐᑕ ᑲᒋ ᐃᓯ ᓇᒋ ᐊᔭᒥᐊᒡ ᐊᓂᔭ ᒍᐤ ᐊᔭᒥᐊᐅᒋᐛᐱᔪᐤ ᑲ ᐊᐱᐧᑯᓇᑭᓄᐎᒡ ᓇᐸᐅᒡ, ᑲ ᐃᓯᓂᐧᑲᑕᔨᒡ᙮ ᓂᓇᐧᑯᐤ ᐃᑕᐅᓂᒡ ᒋ ᐅᒋᐅᒡ ᓴᐃᕆᓐ ᑭᔭ ᐊᓕᒃᓴᓐᑕᕆᔭ ᑲ ᐃᓯᓂᐧᑲᑕᔨᒋ᙮ ᑯᑎᑭᒡ ᒪᒃ ᐊᓐᑕ ᓯᓕᓯᔭ ᑭᔭ ᐊᐃᓴ ᐊᔅᒋᒡ ᒋ ᐅᒋᐅᒡ᙮ ᐊᐅᑯᓐ ᒪᒃ ᐅᔭ ᓇᐸᐛ ᑲ ᒥᒋᐱᔨᐃᑯᑦ ᔅᑎᐱᓐ᙮

¹⁰ ᓇᒪ ᒪᒃ ᒐᒂᔪᐤ ᐅᒋ ᐃᑎᑯᐤ ᐅᔭ ᔅᑎᐱᓐ ᐛᔅ ᑲ ᐸᔭᒋᓯᔨᒋ ᐊᒐᒂ ᒋ ᒥᔨᑯᐤ ᑭᒐᑕᐛᔨᑎᒧᐅᓂᔪᐤ ᒐᒋ ᑭᔅᒋᐅᑦ ᐊ ᐃᔨᒥᑦ᙮

¹¹ ᐊᑯ ᒪᒃ ᒋᒧᑦ ᑲ ᐊᐱᒋᐊᒡ ᓇᐸᐛ ᒐᒋ ᑭᑭᒋᔭᒪᔨᒋ ᔅᑎᐱᓇ ᐊ ᐃᔅᒋᔄᒡ, “ᓂᒋ ᐸᑐᐛᓇᓐ ᔅᑎᐱᓐ ᐊ ᒥᒐᒋᒪᑦ ᒧᓱᓴ ᑭᔭ ᒋᓴᒪᓂᑐᐛ᙮”

¹² ᐅᔭ ᒪᒃ ᐊᒋ ᐃᑎᒡ ᒋ ᐃᑐᑐᐛᐅᒡ ᐊᓂᔭᔪᐛ ᑲ ᓂᑲᓂᐱᔨᒋ ᑭᔭ ᑲ ᒋᔅᑯᑎᒪᒐᔨᒋ ᐎᓱᐛᐅᓂᔪᐤ ᑭᔭ ᐃᔪᐛ ᒐᒋ ᒋᔄᐃᑯᒡ ᐊᓂᔭ ᔅᑎᐱᓇ᙮ ᐊᓐᒡ ᒪᒃ ᑲ ᓂᑲᓂᐱᒡ ᒋ ᐃᑎᓱᐛᐅᒡ ᒐᒋ ᒪᑯᓇᑭᓄᔨᒋ ᔅᑎᐱᓇ ᑭᔭ ᒐᒋ ᐃᑐᑕᐊᑭᓄᔨᒋ ᐊᓐᑕ ᐊ ᒪᒧᐎᔨᒋ ᐊᓂᔭᔪᐛ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ᙮

¹³ ᑭᔭ ᒋ ᐎᓴᒪᐅᒡ ᓇᐸᐛ ᒐᒋ ᓂᑐᐎ ᐃᑕᒋᒪᔨᒋ ᔅᑎᐱᓇ ᐊᓐᑕ ᐊ ᒪᒧᐎᓇᓄᐎᒡ᙮ ᒋ ᐃᔅᒋᔄᔪᐛ ᒪᒃ, “ᐅ ᓇᐸᐤ, ᓇᒪ ᒋᐱᑐᐛᐤ ᐊ ᒥᒪᔭᔨᑕᐧᒃ ᐅᔭ ᒪᐅᒡ ᑲ ᐸᔭᐧᑭᓂᔨᒡ ᑭᔭ ᐊᓂᔭ ᐎᓱᐛᐅᓂᔪᐤ ᒋᓴᒪᓂᑐᐛ ᑲ ᒥᔭᔨᒋ ᐊᓂᔭᐧᑲ ᒧᓱᓴ᙮

¹⁴ ᐛᔅ ᓂᒋ ᐸᑐᐛᓇᓐ ᐊ ᐃᔅᒋᔄᑦ, ᐅᔭ ᒋᓴᓴ, ᓇᓴᕆᑦ ᑲ ᐅᒋᔨᒋ ᒐ ᓂᓱᐅᓇᒋᑕᔨᒋ ᐅᔭ ᒍᐤ ᐊᔭᒥᐊᐅᒋᐛᐱᔪᐤ, ᑭᔭ ᒐ ᒂᔅᑎᓇᐧᒃ ᐊᓂᔭᔪᐛ ᒍᐤ ᐃᔪᐤ ᐃᑐᐅᓇ ᐊᓂᔭᐧᑲ ᒧᓱᓴ ᑲ ᐃᑎᓱᐛᔨᒂᓂ ᒐ ᐃᑐᑕᑭᓄᔨᒋ᙮” ᐊᐅᒄ ᐅᔭ ᑲ ᐃᑕᒋᒧᒡ ᐊᓐᒡ ᓇᐸᐅᒡ᙮

¹⁵ ᒥᓯᐛ ᒪᒃ ᐊᓐᒡ ᐊᓐᑕ ᑲ ᒪᒧᐱᔅᑕᒡ ᑎᐸᔅᑯᓂᒐᐅᓂᔪᐤ ᓇᔅᒡ ᒋ ᑭᓄᐛᐱᒪᐅᒡ ᔅᑎᐱᓇ ᐊ ᐛᐸᑎᒺᒡ ᐅᑕᔅᑎᒥᐧᑯᔪᐤ ᒧᔭᒻ ᐊᓐᒋᓐ ᐅᑕᔅᑎᒥᐧᒄ ᐊ ᐃᓯᓇᑯᓂᔨᒡ᙮