ᐊᑈᔅᑕᓇᒡ 28 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒪᓪᑕ ᑲ ᑕᔭᒡ 1 ᐃᔅᐱ ᒥᓯᐛ ᑲᒋ ᑭᐸᔭᒡ, ᐊᑯ ᒂ ᐅᒋ ᒋᔅᒐᔨᑎᒪᒡ ᒪᓪᑕ ᑲ ᐃᓯᓂᐧᑲᑕᒡ ᒥᓂᔅᑎᒄ ᐊ ᑕᔭᒡ᙮ 2 ᐊᓐᒡ ᒪᒃ ᐃᔪᒡ ᐊᓐᑕ ᑲ ᑕᒡ, ᓇᔅᒡ ᓂᒋ ᒥᔪᑐᑕᑯᓇᓂᒡ᙮ ᒋ ᒋᑐᐅᑕᓂᔪᐤ ᒧᔭᒻ, ᐊᑯ ᒂ ᐎ ᑕᐧᑲᔭᒡ, ᑲ ᑯᑐᐛᓯᔨᒥᒡ ᐊᓐᑕ᙮ 3 ᑈᓪ ᒪᒃ ᒋ ᒪᒧᓴᒋᓂᒻ ᒥᔅᑎᒂ ᒂ ᒥᑐᔅᑕᐊᒃ᙮ ᑲ ᐅᒋ ᒧᔅᒋᔨᒋ ᒋᓇᐱᒂ ᐊᓐᑕ ᐊᓂᔭ ᒥᔅᑎᒂ ᐊ ᐃᑎᔅᑕᔨᒋ, ᐊᓂᔭ ᑭᑈ ᐊ ᒧᓯᑕᔨᒋ ᐊ ᒋᓯᑕᔨᒡ, ᐊᑯ ᑲ ᒋᑭᒧᔨᒋ ᑈᓪ ᐅᑎᒋᒡ, ᓇᒪ ᒪᒃ ᐅᒋ ᒥᔅᑎᒪᑯᒥᑯᐤ ᐊᓂᔭ ᒋᓇᐱᒂ᙮ 4 ᐊᑯ ᐊᓐᒡ ᐃᔪᒡ ᐃᔅᐱ ᐎᔭᐱᒪᒡ ᐊᓂᔭ ᒋᓇᐱᒂ ᐊ ᒋᑭᒧᔨᒋ ᐊᓐᑕ ᑈᓚ ᐅᑎᒋᔨᒡ ᒂ ᐃᔅᒋᔄᒡ, “ᒋ ᓂᐸᐃᔨᐛᒐ ᐊᓐ ᐅ ᓇᐸᐤ, ᑭᔭ ᐊᑎ ᐊᒋ ᒋᑎᓯᒧᑦ ᐊᓐᑕ ᐎᓂᐸᑯᒡ ᐅᒋ, ᐃᔭᐱᒡ ᐅᑎᑕᐅᑯᐤ ᒐᒋ ᐛᐛᓯᐊᑭᓄᐅᑦ᙮ ᐊᐅᒄ ᐊᓂᔭ ᐛᒋ ᒪᑯᒥᑯᑦ ᐊᓂᔭ ᒋᓇᐱᒂ᙮” 5 ᐊᑯ ᑈᓪ ᒥᒄ ᒋᔭᒻ ᑲ ᒥᑐᔅᑕᐛᐱᓇᑦ ᐊᓂᔭ ᒋᓇᐱᒂ ᐊᓐᑕ ᐃᔅᑯᑕᒡ ᐊᑲ ᓇᔅᒡ ᒐᒂᔪᐤ ᐅᒋ ᐃᑐᑕᑯᑦ᙮ 6 ᐊᑯ ᐊᓐᒡ ᐃᔪᒡ ᒋ ᓂᓇᑭᑐᐛᔨᒪᐅᒡ ᒐᒋ ᐸᒋᐱᔨᒋ ᐊᓂᔭ ᑈᓚ ᑭᔭ ᒪᒃ ᒐᒋ ᓂᐱᔨᒋ᙮ ᓇᒪ ᒪᒃ ᓇᔅᒡ ᐅᒋ ᒐᒂᔪᐤ ᐃᑎᔪᐛ᙮ ᐃᔅᐱ ᒪᒃ ᐎᔭᐱᒪᒡ ᐊᑲ ᓇᔅᒡ ᒐᒂᔪᐤ ᑎᔨᒋ ᐊᑯ ᑲ ᐃᔅᒋᔄᒡ, “ᒐᔅᑎᓇᔅ ᒋᓴᒪᓂᑐᐎᒐ ᐅ ᓇᐸᐤ᙮” 7 ᓇᒪ ᐛᔪᐤ ᐊᓐᑕ ᐊᓂᔭ ᑲ ᑕᒡ ᒋ ᑎᑯᓐ ᓂᑕᐅᒋᑕᑭᓐ ᐊᔅᒋᔾ᙮ ᐳᐱᓕᔭᔅ ᒋ ᐃᓯᓂᐧᑲᓱᐤ ᐊᓐ ᑲ ᐅᒋᒪᐅᑦ ᐊᓐᑕ ᐊᓂᔭ ᒥᓂᔅᑎᑯᔪᐤ᙮ ᐊᐅᒄ ᒪᒃ ᐅ ᑲ ᑎᐱᔨᐛᐅᓯᑦ ᐊᓂᔭ ᓂᑕᐅᒋᑕᑭᓐ ᐊᔅᒋᔪᐤ᙮ ᓇᔅᒡ ᓂᒋ ᒥᔪᑐᑕᑯᓇᓐ ᐅ ᓇᐸᐤ᙮ ᓂᔅᑐ ᒋᓯᑲᐛ ᓂᒋ ᐃᔅᐱᔅ ᐃᑕᐛᓇᓐ ᐊᓐᑕ ᐊ ᑕᑦ᙮ 8 ᐅ ᒪᒃ ᐳᐱᓕᔭᔅ ᐅᑕᐎᔭ ᒋ ᐊᐧᑯᓯᔪᐛ, ᐊ ᒋᓯᑕᐅᐱᔨᒋ ᑭᔭ ᐊ ᓱᐎᒂᔨᒡ ᐊ ᒥᓯᔨᒋ᙮ ᐊᑯ ᑈᓪ ᒂ ᐱᒐᐛᑦ ᐊᓐᑕ ᑲᐃᐱᓇᓄᐅᒡ, ᒂ ᑕᒋᓇᑦ ᐊ ᐊᔭᒥᐊᔅᑎᒧᐛᑦ, ᒂ ᒥᓏᒋᐊᑦ᙮ 9 ᐃᔅᐱ ᒪᒃ ᐅᔭ ᑲ ᐃᔅᐱᔨᒡ, ᐊᑯ ᒥᓯᐛ ᐊᓐᒡ ᑲ ᐊᐧᑯᓯᒡ ᐊᓐᑕ ᒥᓂᔅᑎᑯᒡ ᑲ ᑕᒡ ᒋ ᑎᑯᓯᓄᐅᒡ ᑭᔭ ᐎᔨᐛᐤ, ᑭᔭ ᐎᔨᐛᐤ ᒋ ᒥᓏᑎᓯᐅ14A1᙮ 10 ᒥᒐᑦ ᒐᒂᔪᐛ ᓂᒋ ᒥᔨᑯᓇᓂᒡ᙮ ᐃᔅᐱ ᒪᒃ ᒥᓐ ᐊ ᐳᓱᐎᒋᑦ, ᒋ ᐳᓯᑕᐅᒡ ᓂᓇᐧᑯᐤ ᒐᒂᔪᐛ ᒐ ᐃᓯ ᓂᑐᐛᔨᑎᒧᒋᑦ᙮ ᕈᒥᒡ ᑲ ᒥᓯᑲᔭᒡ 11 ᓂᔅᑐ ᐱᓯᒺ ᒪᒃ ᐃᔅᐱᔅ ᐊᑯ ᒥᓐ ᑯᑎᒡ ᐊ ᒥᓴᒡ ᐅᐤᑦ ᒂ ᒋᑕᓯᔭᒡ ᐊᓕᒃᓴᓐᑕᕆᔭ ᐊ ᐅᒋᒥᑲᒡ᙮ ᒋ ᑎᑯᓐ ᑕᓐ ᑲ ᐃᓯᓂᐧᑲᑕᒡ ᐊᓐ ᐊ ᒥᓴᒡ ᐅᐤᑦ, “ᑲ ᓂᓯᒡ ᒥᓂᑐᐧᑲᓐᒡ” ᒋ ᐃᓯᓂᐧᑲᑕᐤ᙮ ᐊᑯᑕ ᐊᓐᑕ ᒥᓂᔅᑎᑯᒡ ᑲ ᑎᑯᓂᒂ ᐃᔅᑭᓐ ᐱᐳᓇ᙮ 12 ᐊᓐᑕ ᒪᒃ ᓯᕋᑭᔪᔅ ᑲ ᐃᓯᓂᐧᑲᑕᒡ ᐅᑕᓇᐤ ᐊᑯᑕ ᑲ ᒥᓯᑲᔭᒡ᙮ ᓂᔅᑐ ᒋᓯᑲᐛ ᓂᒋ ᑕᓇᓐ ᐊᓐᑕ᙮ 13 ᐊᑯ ᒥᓐ ᐊᓐᑕ ᒂ ᐅᒋ ᐳᓯᔭᒡ, ᕋᑭᔭᒻ ᑲ ᐃᓯᓂᐧᑲᑕᒡ ᐅᑕᓇᐤ ᐊᑯᑕ ᑲ ᒥᓯᑲᔭᒡ᙮ ᒥᓐ ᒪᒃ ᐎᔭᐸᒡ ᓴᐅᓄᒡ ᒋ ᔪᑎᓐ᙮ ᐊᑯ ᒥᓐ ᐊᓇ ᐊ ᐊᑎ ᒋᓯᑲᒡ ᐳᑎᐅᓕ ᑲ ᐃᓯᓂᐧᑲᑕᒡ ᐅᑕᓇᐤ ᐊᐅᑯᓐ ᐊᓐ ᒂ ᐅᑎᑕᐊᒪᒡ᙮ 14 ᐊᑯᑕ ᐅ ᑲ ᐛᐱᒥᒋᒡ ᑲᑕᑈᔭᔨᑕᒡ᙮ ᐊᑯ ᑲ ᐎᓴᒥᔨᒥᒡ ᐸᐃᒄ ᒥᓇᔅᑕᑭᓐ ᒐᒋ ᑕᐅᒋᒡ ᐊᓐᑕ ᐊ ᑕᒡ᙮ ᐊᑯ ᒥᓐ ᕈᒻ ᑲ ᐅᑎᑕᐊᒪᒡ᙮ 15 ᐊᑯ ᐊᓐᒡ ᑲᑕᑈᔭᔨᑕᒡ ᐊᓐᑕ ᕈᒥᒡ ᑲ ᑕᒡ ᑲ ᐸᑕᒡ ᐊᒋ ᒥᓯᑲᐎᒋᑦ᙮ ᐱᔅᒐ ᐛᔪᐎᔅ ᒋ ᐅᑐᑕᐅᒡ ᐊᓐᑕ ᐊᓂᔭ ᐊᐱᔭᔅ ᑲ ᐃᓯᓂᐧᑲᑕᒡ ᑲᒋ ᒪᐅᒋᐃᑐᓇᓄᐎᒡ ᑭᔭ ᐱᔅᒐ ᐊᓐᑕ ᑲ ᓂᔅᑎᔨᒋ ᑲᒥᓇᓄᒋ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᒋ ᐅᑐᑕᐅᒡ ᐊ ᐎ ᐸᒋ ᓂᒋᔅᑯᔨᒥᒡ᙮ ᐃᔅᐱ ᒪᒃ ᑈᓪ ᐎᔭᐱᒪᑦ ᐊᓂᔭ, ᒋ ᓂᓇᔅᑯᒪᐤ ᒋᓴᒪᓂᑐᐛ, ᐛᔅ ᓇᔅᒡ ᒋ ᐅᐱᓂᑯᐤ ᐊᓂᔭ ᐊ ᐛᐱᒪᑦ᙮ ᑈᓪ ᑲ ᑭᒐᔅᒋᒧᑦ ᕈᒥᒡ 16 ᑲ ᒥᓯᑲᔭᒡ ᐊᓐᑕ ᕈᒥᒡ, ᑈᓪ ᒋ ᐱᔅᑎᓇᑭᓄᐤ ᑎᐸᓐ ᐊᓐᑕ ᒥᒋᐛᐱᔪᐤ ᒐᒋ ᐎᒋᑦ᙮ ᐊᑯ ᒥᒄ ᐃᔭᐱᒡ ᐊᓯᒪᑭᓂᓴ ᒋ ᑕᔪᐛ ᐊ ᓂᓇᑭᑐᐛᔨᒥᑯᑦ᙮ 17 ᓂᔅᑐ ᒋᓯᑲᐛ ᒪᒃ ᐃᔅᐱᔅ, ᐊᑯ ᒂ ᐎᓴᒪᑦ ᑈᓪ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ᙮ ᐃᔅᐱ ᒪᒃ ᒥᔭᒧᐎᔨᒋ ᒋ ᐃᔅᒋᔄᐤ, “ᓂᐧᑲᓂᓯᑐᒄ, ᓂᒋ ᒪᑯᓂᑯᐅᓐ ᐊᓐᑕ ᒋᕈᓯᓕᒥᒡ ᐊᑯ ᐊᓐᑕ ᕈᒻ ᐃᔪᒡ ᐊ ᑕᒡ ᒂ ᐃᓯ ᐱᔅᑎᓂᑯᐅᔭᓐ ᒐᒋ ᐃᓯ ᒪᒪᒋᑯᓂᑯᐅᔭᓐ᙮ ᐊᐅᒄ ᐅ ᑲ ᐃᑐᑕᑯᐅᔭᓐ ᐊᑎ ᐊᑲ ᐅᒋ ᒥᒋᑐᑐᐅᒂᐤ ᒋᑦ ᐃᔨᒥᓄᒡ ᑭᔭ ᐊᑲ ᐅᒋ ᐅᓂᑐᑎᒪᓐ ᐊᓂᔭᔪᐛ ᐃᑐᐅᓇ ᐊᓂᔅᒐ ᒋᐛᐧᑯᒪᑭᓄᐎᒡ ᑲ ᒥᔨᑕᐧᑯᒡ᙮ 18 ᒋ ᐎ ᓂᑐ ᒋᔅᒐᔨᑎᒧᒡ ᒪᒃ ᐊᓐᒡ ᕈᒻ ᐃᔪᒡ ᑕᓐ ᑲ ᐃᓯ ᐅᓂᐱᔪᒡ᙮ ᓇᒪ ᒪᒃ ᒐᒂᔪᐤ ᐅᒋ ᒥᔅᑭᒧᒡ ᒐᒋ ᐃᓯ ᐅᓂᐱᔪᒡ᙮ ᓴᔅ ᒪᒃ ᓂᒋ ᐎ ᐱᔅᑎᓂᑯᒡ ᐛᔅ ᓇᒪ ᐅᒋ ᒥᔅᑭᒧᒡ ᑕᓐ ᑲ ᐃᓯ ᐅᓂᑐᑎᒧᒡ᙮ 19 ᐊᑯ ᒥᒄ ᐊᓐᒡ ᒍᐤ ᐃᔪᒡ ᓇᒪ ᐅᒋ ᓇᐊᔨᑎᒧᒡ, ᐊᑯ ᑎᐛᒡ ᑲ ᐃᔅᒋᔄᔭᓐ ᒐᒋ ᐛᐱᒥᒃ ᒪᐅᒡ ᓂᑲᓐ ᒋᓴᐅᒋᒪᐤ ᓯᓴᕐ ᑲ ᐃᓯᓂᐧᑲᑕᑭᓄᐅᑦ, ᐎᔾ ᒐᒋ ᐅᑎᔅᑯᑲᐳᔅᑎᐅᒃ᙮ ᓇᒪᔭᐤ ᑭᑈ ᐎ ᐊᒋ ᐃᑕᔨᑎᒪᓐ ᓂᑐᐎᔾ ᒐᒋ ᐃᓯ ᒪᒥᓯᒥᒂᐤ ᓂᑦ ᐃᔨᒥᒡ᙮ 20 ᐊᐅᒄ ᐅ ᐛᒋ ᐎᓴᒥᑎᑯᒡ᙮ ᔅᒋ ᐎ ᐎᑎᒪᑎᓇᐛᐤ ᒐᒂᓐ ᐛᒋ ᒪᑯᓂᑯᐅᔭᓐ, ᐊᐅᒄ ᐅ ᐊ ᐊᑐᔅᑯᐅᒃ ᙭ ᐊᓂᔭ ᐃᔅᕋᐃᓪ ᐃᔪᒡ ᑲ ᐊᔅᐸᔨᒧᑐᑐᐛᒡ᙮” 21 ᐊᑯ ᒂ ᐃᑎᑯᑦ, “ᓇᒪᐎᔾ ᑭᑈ ᐎ ᓂᔭᓐ ᓂ ᐅᒋ ᒥᔅᑲᓇᓐ ᒐᒋ ᒥᓯᓇᐊᒪᑯᐅᔭᒡ ᐊᓐᑕ ᒍᑎᔭ ᐅᒋ, ᒐᒋ ᐊᔨᒧᒥᑯᔨᓐ ᐊᓐᑕ᙮ ᑭᔭ ᐊᓐᒡ ᒋᐧᑲᓂᓯᓄᐅᒡ ᐊᓐᑕ ᑲ ᐅᑐᑕᒡ ᓇᒪ ᒐᒂᔪᐤ ᒋ ᐅᒋ ᐃᑕᒋᒥᑯᒡ ᒪᒃ ᒐᒋ ᒪᔭᒋᒥᔅᒡ᙮ 22 ᒥᒄ ᒪᒃ ᒋ ᐎ ᒋᔅᒐᔨᒥᑎᓇᓐ ᑕᓐ ᐊ ᐃᑕᔨᑎᒥᐃᑯᔨᓐ ᒋᔾ, ᐛᔅ ᒥᒐᑦ ᐊᐛᓐᒋ ᒥᓯᑕ ᐅ ᐊᔅᒋᔾ ᓇᒪ ᒥᔪᓯᓇᐊᒧᒡ ᐅᔭ ᑲ ᐃᓯ ᑕᑈᑎᒺᒄ᙮” 23 ᐊᑯ ᐊᓐᒡ ᒍᐤ ᐃᔪᒡ ᒂ ᐎᔅᑕᐛᒡ ᐊᓂᔭ ᑈᓚ ᐊᓐᑕ ᐊ ᒋᓯᑲᔨᒡ ᒐᒋ ᒪᒧᐎᒡ ᒐᒋ ᓂᑐᑐᐛᒡ ᑕᓐ ᒐ ᐃᔅᒋᔄᔨᒋ᙮ ᐛᑎᒋᐱᔨᒡ ᒪᒃ ᐊᓂᔭ ᐊ ᒋᓯᑲᔨᒡ ᐊᓐᑕ ᑲ ᓂᔅᑯᒧᒡ ᒐᒋ ᒪᒧᐎᒡ ᒥᒐᑦ ᐊᐛᓐᒋ ᒋ ᑎᑯᓯᓄᐅᒡ ᐊᓐᑕ ᑈᓚ ᐊ ᑕᔨᒋ᙮ ᐊ ᒐᒋᓴᐸᔭᔨᒡ ᐱᐃᒻ ᐊ ᐊᑎ ᑎᐱᔅᑲᔨᒡ, ᑈᓪ ᒋ ᐛᐎᑎᒧᐛᐤ ᐊᓂᔭ ᒍᐤ ᐃᔪᐛ ᑕᓐ ᐊ ᐃᑕᔨᑕᑯᓂᔨᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ᙮ ᑭᔭ ᒋ ᑭᒐᔅᒋᒪᐤ ᐊ ᐎ ᓯᒋᒪᑦ ᒐᒋ ᑕᑈᑎᒥᔨᒋ ᒋᓴᓴ ᐊ ᐊᐎᔨᒋ ᙭ᑕ ᐊᓐ ᑲ ᐊᔨᒧᒪᑭᓄᐅᑦ ᐊᓐᑕ ᒧᓱᓴ ᐅᐎᓱᐛᐅᓂᒡ ᑭᔭ ᐊᓂᔭᐧᑲ ᐅᒋᔅᒋᐛᐃᒐᓱᐛ ᐅᒥᓯᓇᐃᑭᓂᔨᒡ᙮ 24 ᐱᔅᒐ ᒪᒃ ᒋ ᑕᑈᑕᑯᐤ, ᑯᑎᑲ ᓇᒪ ᐅᒋ ᑕᑈᑎᒥᔪᐛ᙮ 25 ᒋ ᒥᒋᐱᔨᐃᑐᔪᐛ ᒐᒃ ᐅᔭ ᐊᑲ ᑕᑈᑎᒥᔨᒋ, ᐊᑯ ᒂ ᐊᑎ ᔅᑐᑕᔨᒋ ᐃᔅᐱ ᐅᔭ ᑲ ᐃᔅᒋᔄᑦ ᑈᓪ, “ᑕᑈ ᒧᔭᒻ ᒋ ᐃᓯ ᐎᑎᒧᑯᐱᓇ ᑲ ᐸᔭᒋᓯᑦ ᐊᒐᐧᒄ ᑕᓐ ᑲ ᐃᑕᑦ ᒋᑦ ᐃᔨᒧᐛᐛ ᐊᓂᔭᔪᐛ ᐅᒋᔅᒋᐛᐃᒐᓱᐤ ᐊᐃᓴᔭ ᐊᒋ ᐊᐱᒋᐊᑦ ᒐᒋ ᐃᓯ ᐎᑎᒧᐛᔨᒋ, 26 ᐃᔅᒋᔄᐤ ᒋᓴᒪᓂᑐᐤ, ‘ᐃᓯᒡ ᐊᓐᒡ ᐃᔪᒡ, ᒧᔅ ᒋᑭ ᐸᑕᓇᐛᐤ ᒥᒄ ᓇᒪ ᒋᑭ ᐅᒋ ᓂᔅᑐᑕᓇᐛᐤ ᑭᔭ ᐊᑎ ᐃᑕᐱᔭᒂ ᓇᒪ ᒋᑭ ᐅᒋ ᓂᔅᑐᓇᓇᐛᐤ᙮ 27 ᐛᔅ ᐊᓐᒡ ᐅᒡ ᐃᔪᒡ ᓇᔅᒡ ᑕᑈ ᓯᐱᑎᒧᒡ, ᓇᒪ ᐎ ᑕᑈᑎᒧᒡ, ᒧᔭᒻ ᐊ ᒋᐳᓇᒡ ᐎᑐᑭᐛᐛ ᑭᔭ ᐅᔅᒋᓯᑯᐛᐛ ᐊᐅᑯᓐ ᐊ ᐃᓯᓇᑯᓯᒡ᙮ ᐊᑲ ᒪᒃ ᐅᔭ ᐃᑎᒡ ᒋᐸ ᐛᐸᑎᒧᒡ ᑭᔭ ᒋᐸ ᐸᑎᒧᒡ ᑭᔭ ᒋᐸ ᓂᔅᑐᑎᒧᒡ ᐊᓂᔭ ᑕᓐ ᐊ ᐃᓯ ᓂᑐᐛᔨᒥᒂᐤ᙮ ᓂᐸ ᐸᒋ ᓂᑐᐛᐱᒥᑯᒡ ᒪᒃ ᑭᔭ ᓂᐸ ᐱᒪᒋᐊᐅᒡ᙮’ ” 28 ᐊᑯ ᑈᓪ ᒂ ᐃᔅᒋᔄᑦ, “ᒐ ᐎ ᒋᔅᒐᔨᑎᒪᒄ ᒪᒃ ᒋᓴᒪᓂᑐᐤ ᐊ ᐃᑎᓴᐅᑯᔭᒡ ᒐᒋ ᐛᐎᑎᒪᒡ ᒐᒋ ᐱᒪᒋᐊᑭᓄᐎᒡ ᑭᔭ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᐊᐛᓐᒋ᙮ ᒋᑭ ᓂᑐᑎᒧᒡ ᒪᒃ ᐅᒡ ᐎ᙮” 29 ᐃᔅᐱ ᒪᒃ ᑈᓪ ᑲ ᐃᔅᒋᔄᑦ ᐅᔭ, ᒋ ᐎᐎᔪᒡ ᐊᓐᒡ ᒍᐤ ᐃᔪᒡ ᐊ ᒥᒋᐱᔨᐃᑐᒡ᙮ 30 ᓂᓱ ᐱᐳᓇ ᒪᒃ ᒋ ᑕᐤ ᑈᓪ ᐊᓐᑕ ᐊᓂᔭ ᒥᒋᐛᐱᔪᐤ᙮ ᐎᔾ ᒋ ᐱᒥᐱᔨᐃᓱᐤ ᓱᓇᔭᔪᐤ᙮ ᒋ ᒥᔽᔨᑎᒻ ᐊ ᒧᐱᔅᑐᐛᑭᓄᐅᑦ᙮ 31 ᒋ ᐊᔨᒧᑎᒧᐛᐤ ᒪᒃ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ, ᑭᔭ ᒋ ᒋᔅᑯᑎᒪᒐᐤ ᐅᑎᐸᔨᒋᒐᐛ ᒋᓴᔅ ᙭ᑕ ᐊ ᐊᔨᒧᒪᑦ᙮ ᒋ ᓱᒋᑕᐊᐤ ᒪᒃ ᓇᔅᒡ ᑭᔭ ᓇᒪ ᐅᒋ ᒋᑕᐊᒧᐛᑭᓄᐤ ᐅᔭ ᐊ ᐃᑎᑦ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.