ᐊᑈᔅᑕᓇᒡ 22 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᑈᓪ ᒋ ᐃᑕᐤ, “ᓂᐧᑲᓂᓯᑐᒄ ᑭᔭ ᒋᔨᐛᐤ ᒋᓴᐃᔪᑎᒄ, ᐸᒋ ᓂᑐᑐᐅᒄ ᑯᐃᔅᒄ ᐊ ᐎ ᐎᑎᒪᓐ ᐊᑲ ᓄᓴᒻ ᐃᓯ ᐊᑕᒪᔨᑕᑯᓯᔭᓐ᙮”

² ᐃᔅᐱ ᒪᒃ ᐱᔭᑐᐛᒡ ᐊᓐᒡ ᐃᔪᒡ ᐃᑉᕈᐤ ᐊ ᐃᓯ ᐃᔨᒥᔨᒋ ᑈᓚ, ᐊᓂᔭ ᑭᑈ ᐊ ᐃᓯ ᐃᔨᒥᒡ, ᐊᑯ ᐊᑐᐎᔅ ᓇᒪ ᐅᒋ ᔅᑐᐅᒡ᙮ ᐊᑯ ᑈᓪ ᒂ ᐊᑎ ᐃᔅᒋᔄᑦ,

³ “ᒍᐤ ᓂᑦ ᐃᑎᔅᑲᓇᓯᓐ᙮ ᑕᕐᓯᔅ ᑲ ᐃᓯᓂᐧᑲᑕᒡ ᐅᑕᓇᐤ ᐊᓐᑕ ᓯᓕᓯᔭ ᐊᔅᒋᒡ ᑲ ᑎᒂᒡ ᐊᑯᑕ ᑲ ᐱᒪᑎᓯᔭᓐ᙮ ᐊᑯ ᒥᒄ ᐅᑕ ᒋᕈᓯᓕᒥᒡ ᑲ ᓂᑕᐅᒋᓂᑯᐅᔭᓐ᙮ ᐊᓂᔭ ᒪᒃ ᑲᒪᓕᔭᓪ ᑲ ᐃᓯᓂᐧᑲᓱᑦ ᒋᓴᒪᓂᑐᐛ ᐅᐎᓱᐛᐅᓂᔪᐤ ᑲᒋ ᒋᔅᑯᑎᒪᒐᑦ ᐊᑯᑕ ᐊᓐ ᑭᔭ ᓂᔾ ᐃᔭᒂ ᑲ ᐃᓯ ᒋᔅᑯᑎᒪᑯᐅᔭᓐ ᐊᓂᔭᐧᑲ ᒋᐧᑲᓂᓯᓄᐅᒡ ᐅᐎᓱᐛᐅᓄᐛᐛ᙮ ᑭᔭ ᓂᔾ ᓇᔅᒡ ᓂᒋ ᐎ ᓂᓇᐃᑐᐛᐤ ᒋᓴᒪᓂᑐᐤ ᒧᔭᒻ ᐊ ᐃᑎᔭᒄ ᑭᔭ ᒋᔨᐛᐤ ᐅᑕ ᐊᓄᒡ᙮

⁴ ᓇᔅᒡ ᓂᒋ ᐎ ᓂᓇᐧᑲᒋᐊᐅᒡ ᐊᓐᒡ ᑲ ᑕᑈᑕᒡ ᒋᓴᓴ ᐅᒋ ᐊ ᐅᒋ ᐱᒪᒋᐅᓇᓄᐅᒡ᙮ ᐊᑯᔅ ᒥᓯᐛ ᓂᐸᐊᑭᓄᑥᐛ ᓂᒋ ᐃᑕᔨᑕᓐ᙮ ᓂᒋ ᒪᑯᓇᐅᒡ ᑕᐱᔅᑯᓐ ᓇᐸᐅᒡ ᑭᔭ ᐃᔎᐅᒡ, ᐛᐛᒡ ᓂᒋ ᐃᑐᑐᐛᐅᒡ ᒐᒋ ᒋᐸᐛᑭᓄᐎᒡ᙮

⁵ ᐅ ᒪᒃ ᒋᓴᐊᔭᒥᐊᐅᒋᒪᐤ ᑭᔭ ᐊᓐᒡ ᒍᐤ ᐃᔪᒡ ᑲ ᒪᒧᐱᔅᑕᒡ ᑎᐸᔅᑯᓂᒐᐅᓂᔪᐤ ᒋᑭ ᒋ ᐎᑎᒪᑯᐛᐅᒡ ᐊ ᑕᑈᐅᒡ ᐅᔭ ᑲ ᐃᔅᒋᔄᐅᒡ᙮ ᓂᒋ ᒥᔨᑯᒡ ᒥᓯᓇᐃᑭᓇ ᒐᒋ ᐃᑐᑐᒥᒋ ᐎᐧᑲᓂᓯᒪᐛ ᐊᓐᑕ ᑕᒪᔅᑲᓯᒡ ᑲ ᑕᔨᒋ᙮ ᒋ ᒥᓯᓇᑕᔪᐤ ᐊᓐᑕ ᐊ ᐃᑎᓱᒥᒡ ᒐᒋ ᒪᑯᓂᒥᒋ ᑭᔭ ᒐᒋ ᒪᒋᒂᐱᐧᑲᑕᒥᒋ ᐊᓂᔭ ᑲ ᑕᑈᔭᔨᒪᔨᒋ ᒋᓴᓴ ᐊᓐᑕ ᑕᒪᔅᑲᓯᒡ ᑲ ᑕᔨᒋ ᑭᔭ ᒐᒋ ᐸᓱᒥᒋ ᐅᑕ ᒋᕈᓯᓕᒥᒡ ᒐᒋ ᐛᐛᓯᐊᑭᓄᔨᒋ᙮”

ᑈᓪ ᑲ ᐎᑕᐧᒃ ᑕᓐ ᑲ ᐃᔅᐱᔨᑦ ᐊᓐᑕ ᑲ ᐅᒋ ᑕᑈᑕᐧᒃ

⁶ “ᐸᐃᒂᐤ ᒪᒂᒡ ᐊ ᐱᒧᑕᔭᓐ ᐊ ᐊᑎ ᐸᓱᐛᐸᑎᒪᓐ ᑕᒪᔅᑲᔅ, ᓴᓯᑲᓐ ᐊ ᐊᐱᑕᒋᓯᑲᒡ, ᓯᔅᒋᑯᒡ ᒋ ᐅᒋ ᒥᔅᑎ ᐛᔅᑕᐤ ᐊᓐᑕ ᐛᔅᑲ ᐊ ᑕᔭᓐ ᐊᓐᑕ ᐅᒋ ᒋᒋᒋᓯᑯᒡ ᐊ ᐅᒋ ᐛᔅᑕᒡ᙮

⁷ ᓇᔅᒡ ᒪᒃ ᓂᒋ ᐊᑎ ᐸᒋᓯᓐ ᐊᓐᑕ ᐊᔅᒋᒡ ᐊᑯ ᒂ ᐸᑐᐅᒃ ᐊᐛᓐ ᐊ ᐃᓯᑦ, ‘ᓴᓪ, ᓴᓪ, ᒐᒂᓐ ᐛᒋ ᑯᒂᒋᐃᔨᓐ ?’ ”

⁸ “ᐊᑯ ᒂ ᐃᑎᒃ, ‘ᐊᐛᓐ ᒪᒃ ᒋᔾ, ᐅᑎᐸᔨᒋᒐᐤ ?’ ” “ᐊᑯ ᒂ ᐃᓯᑦ, ‘ᐊᐅᒄ ᓂᔾ ᒋᓴᔅ, ᓇᓴᕆᑎᒡ ᑲ ᐅᒋᔭᓐ, ᐊᓐ ᐊᐛᓐ ᑲ ᑯᒂᒋᐃᑦ᙮’

⁹ ᐊᓐᒡ ᒪᒃ ᓇᐸᐅᒡ ᑲ ᐎᒐᐅᒡ ᒋ ᐛᐸᑎᒧᒡ ᐊᓂᔭ ᑲ ᒋᐧᑲᔭᔅᑕᔨᒡ, ᓇᒪ ᒥᒄ ᐅᒋ ᐸᑐᐛᐅᒡ ᐊᓂᔭ ᑲ ᐸᒋ ᐃᔨᒥᔨᒋ᙮”

¹⁰ “ᐊᑯ ᒂ ᐃᑎᒃ, ‘ᐅᑎᐸᔨᒋᒐᐤ, ᑕᓐ ᐊ ᐃᓯ ᓂᑐᐛᔨᒥᔨᓐ ᒪᒃ ᒐ ᐃᑎᔭᓐ ?’ ᐊᑯ ᒂ ᐃᓯᑦ, ‘ᐱᓯᑯ ᒪᒃ, ᒐ ᐃᑐᑕᔨᓐ ᐊᓐᑕ ᑕᒪᔅᑲᓯᒡ᙮ ᐊᑯᑕ ᒪᒃ ᒐ ᐎᑎᒪᑯᔨᓐ ᒥᓯᐛ ᑕᓐ ᐊ ᐃᑎᓱᒥᔅᒃ ᒋᓴᒪᓂᑐᐤ ᒐ ᐃᑕᐱᑎᓯᐅᑦ᙮’

¹¹ ᓇᒪ ᒪᒃ ᓂ ᐅᒋ ᐛᐸᑕᓐ ᑲ ᐃᔅᐱᔅ ᒋ ᒋᐧᑲᔭᔅᑕᒡ ᐊᓐ ᑲ ᐛᔅᑕᒡ᙮ ᐊᑯ ᐊᓐᒡ ᓂᐎᒐᐛᑭᓂᒡ ᒂ ᐸᒋ ᓯᑎᓂᔅᒐᑕᔨᒡ ᐊᓐᑕ ᑕᒪᔅᑲᓯᒡ ᑲ ᐃᑐᑕᐃᒡ᙮”

¹² “ᒋ ᑕᐤ ᒪᒃ ᓇᐸᐤ ᓇᓂᑎᒻ ᐊᓐᑕ ᑕᒪᔅᑲᔅ ᐊᒋ ᐎᒋᑦ ᐊᓇᓇᔭᔅ ᐊ ᐃᓯᓂᐧᑲᓱᑦ᙮ ᒋ ᑕᑈᔭᔨᒪᐤ ᒋᓴᒪᓂᑐᐛ ᐅ ᓇᐸᐤ ᑭᔭ ᓇᔅᒡ ᐃᔭᒂ ᒋ ᐃᓯ ᓂᓇᑭᑐᐛᔨᑎᒥᐃᑯᐤ ᒍᐤ ᐊᔭᒥᐊᐎᓱᐛᐅᓂᔪᐤ᙮ ᓇᔅᒡ ᒪᒃ ᒋ ᒋᔅᑕᔨᒥᑯᐤ ᒥᓯᐛ ᐊᓂᔭᔪᐛ ᒍᐤ ᐃᔪᐛ ᐊᓐᑕ ᑕᒪᔅᑲᓯᒡ ᑲ ᑕᔨᒋ᙮

¹³ ᐊᐅᒄ ᐅ ᓇᐸᐤ ᑲ ᐸᒋ ᓂᑐᐛᐱᒥᑦ, ᑲ ᐸᒋ ᐅᑎᔅᑯᑲᐳᔅᑐᐅᑦ, ᐊᑯ ᒂ ᐃᓯᑦ, ‘ᓂᐧᑲᓂᔅ ᓴᓪ, ᑲᐤ ᒥᓐ ᐛᐸᑕ᙮’ ᐃᔅᐱ ᒪᒃ ᑲ ᐃᓯᑦ ᐊᓂᔭ ᑎᐛᒡ ᒥᓐ ᓂᒋ ᐛᐸᑎᒺᓐ᙮ ᒂ ᑭᓄᐛᐱᒥᒃ,

¹⁴ ᐊᑯ ᒂ ᐃᓯᑦ, ‘ᐊᓂᔭᔪᐛ ᒋᓴᒪᓂᑐᐛ ᑲ ᑕᑈᔭᔨᒪᒡ ᐊᓂᔭᐧᑲ ᒋᒧᓱᒥᓄᐅᒡ, ᔅᒋ ᐅᑎᓂᒄ ᒐᒋ ᒋᔅᒐᔨᑎᒧᑦ ᑕᓐ ᐊ ᐃᓯ ᓂᑐᐛᔨᑕᐧᒃ ᒐ ᐃᑎᓇᓄᐎᒡ ᐅᑕ ᐊᔅᒋᒡ, ᑭᔭ ᒐᒋ ᐛᐱᒥᑎ ᐊᓂᔭ ᙭ᑕ ᑲ ᑯᐃᔅᑯᑕᑎᓯᔨᒋ ᑭᔭ ᒐᒋ ᐸᑎᒧᑦ ᐊ ᐃᔨᒥᐃᔅᒃ᙮

¹⁵ ᒥᓯᐛ ᒪᒃ ᐊᐛᓐᒋ ᒋᑭ ᐎᑎᒧᐛᐅᒡ ᑕᓐ ᑲ ᐃᓯ ᐛᐸᑎᒥᓐ ᑭᔭ ᑲ ᐃᓯ ᐸᑎᒥᓐ ᐊ ᐃᑕᒋᒪᑭᓄᐅᑦ᙮

¹⁶ ᒪᒋ ᒪᒃ, ᐊᑲᐎᔾ ᓂᓇᐧᑲᐎᔾ᙮ ᐱᓯᑯ, ᒐ ᓯᑲᐃᑕᑯᔨᓐ, ᑭᔭ ᒐ ᐛᐸᔨᑎᒪᑯᔨᓐ ᒋᒥᒋᑥᐅᓇ ᐊ ᑕᑈᑎᑦ ᐅᑎᐸᔨᒋᒐᐤ ᒐᒋ ᐛᐸᔨᑎᒪᔅᒃ᙮’ ”

ᐅᑎᐸᔨᒋᒐᐤ ᑲ ᐃᑕᑦ ᑈᓚ ᒐ ᐎᑎᒧᐛᔨᒋ ᒥᔽᒋᒧᐅᓂᔪᐤ ᐊᓂᔭᔪᐛ ᐃᔪᐛ ᐊᑲ ᒍᐤ ᐃᑎᔅᑲᓇᓯᔨᒋ

¹⁷ “ᐊᑯ ᒥᓐ ᑲᐤ ᒋᕈᓯᓕᒥᒡ ᒂ ᐃᑐᑕᔭᓐ᙮ ᒪᒂᒡ ᒪᒃ ᐊ ᐊᔭᒥᐊᔭᓐ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᒋ ᑎᑯᓐ ᑕᓐ ᑲ ᐃᓯ ᐛᐸᑎᔨᑯᐅᔭᓐ᙮

¹⁸ ᓂᒋ ᐛᐱᒪᐤ ᐅᑎᐸᔨᒋᒐᐤ ᐊ ᐸᒋ ᐃᓯᑦ, ‘ᒋᐱᔾ, ᓂᑭᑕ ᐅ ᒋᕈᓯᓕᒻ ᐊᓄᒡ, ᑕᐸ ᐛᔅ ᐊᓐ ᒋᑭ ᐅᒋ ᑕᑈᑕᑯᒡ ᐅᒡ ᐃᔪᒡ ᐅᑕ ᑕᓐ ᒐ ᐃᑕᒋᒥᔨᓐ᙮’ ”

¹⁹ “ᐊᑯ ᒂ ᐃᑎᒃ, ‘ᐅᑎᐸᔨᒋᒐᐤ, ᒋᔅᒐᔨᑎᒧᒡ ᐅᒡ ᐃᔪᒡ ᒥᒄ ᐊᒋ ᐊᔭᓱᐤ ᓇᑕᒪᓐ ᐅᔭ ᒍᐤ ᐊᔭᒥᐊᐅᒋᐛᐸ ᒐᒋ ᒪᑯᓇᒂᐤ ᐅᒡ ᑲ ᑕᑈᔭᔨᒥᔅᒡ ᑭᔭ ᐊᒋ ᐃᑐᑐᐅᒂᐤ ᒐᒋ ᐸᐱᓯᔅᑕᐛᑭᓄᐎᒡ᙮

²⁰ ᑭᔭ ᐃᔅᐱ ᑲ ᓂᐸᐊᑭᓄᐅᑦ ᔅᑎᐱᓐ ᐊᓂᔭ ᐊ ᑎᐸᒋᒥᔅᒃ ᐅᒋ, ᑭᔭ ᓂᔾ ᓂᒋ ᑕᓐ ᐊᓐᑕ᙮ ᓂᒋ ᓇᐊᔨᑕᓐ ᐊᓂᔭ ᐊᒋ ᐃᑐᑐᐛᑭᓄᐅᑦ ᑭᔭ ᓂᒋ ᑭᓄᐛᔨᑎᒺᓐ ᐅᑦ ᐊᑯᐳᐛᐛ ᐊᓐᒡ ᑲ ᓂᐸᐊᒡ ᔅᑎᐱᓇ᙮’ ”

²¹ “ᐊᑯ ᒂ ᐃᓯᑦ ᐅᑎᐸᔨᒋᒐᐤ, ‘ᒪᒋ ᐃᔭᐱᒡ ᐛᔅ ᐛᔪᐤ ᒋᑭ ᐃᑎᓴᐅᑎᓐ ᐊᓐᑕ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᐊ ᑕᒡ᙮’ ”

²² ᐃᔅᐱ ᒪᒃ ᐅᔭ ᐊ ᐃᓯ ᐃᔨᒥᔨᒋ ᐊᓂᔭᔪᐛ ᑈᓚ, ᐊᓂᔭ ᑭᑈ ᐊ ᐃᑕᒋᒧᔨᒋ ᒋᓴᒪᓂᑐᐛ ᐊᒋ ᐃᑎᓴᐅᑯᔨᒋ ᐊᓐᑕ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᐊ ᑕᔨᒋ, ᐊᑯᓐ ᑲ ᐃᔅᐱᔅ ᓂᑐᑐᐛᒡ ᐊᓐᒡ ᐃᔪᒡ᙮ ᒋ ᒋᒋ ᐊᓯᒂᐅᒡ ᐊ ᐃᔅᒋᔄᒡ, “ᓂᐸᐊᐧᒄ ᐅ ᓇᐸᐤ, ᓇᒪ ᐃᑕᔨᑕᑯᓱᐤ ᒐᒋ ᐱᒪᑎᓯᑦ ᐅᑕ ᐊᔅᒋᒡ᙮”

²³ ᒋ ᐊᓯᒂᐅᒡ ᒪᒃ ᐊ ᐛᐛᐱᔨᑕᒡ ᐅᑦ ᐊᐱᒋᑕᐅᓄᐛᐛ, ᑭᔭ ᐃᔭᑲᔪᐤ ᐊ ᐃᔅᐸᒐᐛᐱᓇᒡ ᑲ ᐃᔅᐱᔅ ᒋ ᒥᔅᑎ ᒋᔄᓯᒡ᙮

²⁴ ᐊᑯ ᐊᓐ ᕈᒻ ᓂᑐᐱᔪᐅ-ᐅᒋᒪᐤ ᒂ ᐃᑕᑦ ᐊᓂᔭ ᐅᑦ ᐊᓯᒪᑭᓂᓯᒪ ᒐᒋ ᐱᑎᑲᐊᔨᒋ ᑈᓚ ᐊᓐᑕ ᐊᓯᒪᑭᓂᓯᐅᒋᐛᐱᒡ᙮ ᐊᑯ ᒂ ᐃᑎᓱᐛᑦ ᒐᒋ ᐸᐱᓯᔅᑕᐛᑭᓄᔨᒋ᙮ ᒋ ᐱᑯᓴᔨᑎᒻ ᑭᑈ ᒐᒃ ᐊᓐᑕ ᐊᓂᔭ ᐊ ᐸᐱᓯᔅᑕᐛᑭᓄᔨᒋ ᒐᒋ ᐅᒋ ᐎᑎᒥᔨᒋ ᑕᓐ ᑲ ᐃᓯ ᐅᓂᐱᓱᔨᒋ ᐛᒋ ᐃᔅᐱᔅ ᐛᓴ ᒋᔄᐊᔨᒋ ᐊᓂᔭᔪᐛ ᒍᐤ ᐃᔪᐛ᙮

²⁵ ᐃᔅᐱ ᒪᒃ ᑲ ᐎᔭᐱᐧᑲᑕᒡ ᒐ ᐸᐱᓯᔅᑕᐛᒡ, ᐊᓐ ᐊᓯᒪᑭᓂᓯᐤ ᐅᒋᒪᐤ ᒋ ᐃᓯ ᑯᒂᒋᒥᑯᐤ ᐊᓂᔭ ᑈᓚ, “ᑯᐃᔅᑯᓇᑯᓐ ᐊ ᒐᒋ ᐸᐱᓯᔅᑕᐛᒄ ᐊᐛᓐ ᕈᒻ ᐊ ᐃᓯ ᒥᓯᓇᓱᑦ ᑭᔭ ᐊᑲ ᐊᔅᒄ ᐅᒋ ᑎᐸᔅᑯᓇᑭᓄᐅᑦ ?”

²⁶ ᐃᔅᐱ ᒪᒃ ᐱᔭᑕᐧᒃ ᐅᔭ ᐊᓐ ᑲ ᓂᑲᓂᔅᑯᐛᑦ ᐊᓯᒪᑭᓂᓴ, ᒋ ᓂᑐᐛᐱᒪᐤ ᐊᓂᔭ ᐊᓯᒪᑭᓂᓯᐤ ᐅᒋᒪᐛ, ᐊᑯ ᒂ ᐃᑕᑦ, “ᒋ ᒋᔅᒐᔨᑕᓐ ᐊ ᑕᓐ ᐅ ᐊ ᐃᑎᔭᐧᒄ ? ᕈᒻ ᐃᔪᐤ ᐊᓐ ᐃᑎᔅᑲᓇᓱᐤ ᐅ ᓇᐸᐤ ᑲ ᐃᑐᑐᐛᐧᒄ᙮”

²⁷ ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᓂᑐᐛᐱᒪᑦ ᐊᓂᔭ ᑈᓚ, ᒂ ᐃᑕᑦ, “ᑕᑈ ᐊ ᕈᒻ ᒋᑦ ᐃᑎᓯᓇᓱᓐ ?” ᑈᓪ ᒂ ᐃᑕᑦ, “ᓂᐦᐃ᙮”

²⁸ ᐊᑯ ᐊᓂᔭ ᓂᑐᐱᔪᐅ-ᐅᒋᒪᐛ ᒂ ᐃᑎᑯᑦ, “ᐊᔪᐛᒡ ᒥᔅᑎ ᓱᓇᔭᐤ ᓂᒋ ᒪᔅᑎᓂᑯᓐ ᕈᒥᒡ ᒐᒋ ᐃᓯ ᒥᓯᓇᓱᔭᓐ᙮” ᐊᑯ ᑈᓪ ᒂ ᐃᑕᑦ, “ᑲ ᐱᒪᑎᓯᔭᓐ ᓂᔾ ᓴᔅ ᕈᒻ ᓂᒋ ᐃᑎᓯᓇᓱᓐ᙮”

²⁹ ᐱᔭᑕᒡ ᒪᒃ ᐅᔭ ᐊ ᐃᔅᒋᔄᔨᒋ ᑈᓚ ᐊᓐᒡ ᑲ ᐎ ᓂᑐ ᒋᔅᒐᔨᒪᒡ ᑕᓐ ᑲ ᐃᓯ ᐅᓂᑐᑎᒥᔨᒋ ᒋ ᐊᑎ ᐊᓴᑲᐳᐎᒡ᙮ ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᓯᓴᒋᓯᑦ ᐃᔅᐱᔅ ᑲ ᒋᔅᒐᔨᒪᑦ ᑈᓚ ᑕᑈ ᕈᒻ ᐊ ᐃᑎᓯᓇᓱᔨᒋ, ᑭᔭ ᐊᓂᔭ ᐊᒋ ᒪᑯᐱᑕᑦ ᐃᓴᒂᔭᐱᔪᐤ ᐊ ᐊᐱᒋᑕᑦ᙮

ᑈᓪ ᑲ ᐅᑎᔅᑯᑲᐳᔅᑐᐛᑦ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐅᒋᒪᐛ

³⁰ ᐎᔭᐱᓂᔨᒡ ᒪᒃ, ᐊᓂᔭ ᐊ ᐎ ᓂᑐ ᒋᔅᒐᔨᑕᐧᒃ ᒐᒂᔪᐤ ᐊᓐ ᐛᒋ ᓂᑐᐛᔨᒪᑭᓄᔨᒋ ᐊᓂᔭ ᑈᓚ ᒐᒋ ᓂᐸᐊᑭᓄᔨᒋ, ᒋ ᐃᑎᓱᐛᐤ ᒐᒋ ᐱᔅᑎᓇᑭᓄᔨᒋ, ᐊᑯ ᑲ ᐃᑕᑦ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᒍᐤ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ ᒐᒋ ᒪᒧᐎᔨᒋ᙮ ᒂ ᐃᑐᑕᐊᑦ ᐊᓐᑕ ᑈᓚ, ᐊᑯ ᒂ ᐅᑎᔅᑯᑲᐳᐊᑦ ᐊᓐᑕ ᐊᓂᔭ ᐊ ᒪᒧᐎᓇᓄᐎᒡ᙮