ᐊᑈᔅᑕᓇᒡ 21 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑈᓪ ᑲ ᐃᑐᑕᑦ ᒋᕈᓯᓕᒥᒡ 1 ᐃᔅᐱ ᒪᒃ ᑲ ᐛᒋᔭᒥᒋᒡ, ᐊᑯ ᒥᓐ ᑲ ᒋᑕᓯᔭᒡ ᐊ ᒥᓴᒡ ᐅᐤᑦ ᐊᓐᑕ ᐅᒋ, ᐊᑯ ᐊᓐᑕ ᑯᔅ ᑲ ᐃᓯᓂᐧᑲᑕᒡ ᐅᑕᓇᐤ ᑲ ᐃᑕᓯᔭᒡ, ᒐᒃ ᑲ ᐊᑎ ᐅᑎᑕᐊᒪᒡ᙮ ᒥᓐ ᒪᒃ ᐎᔭᐸᒡ ᐊᑯ ᐊᓐᑕ ᕈᑎᓯᒡ ᑲ ᒥᓯᑲᔭᒡ, ᐊᑯ ᐊᓐᑕ ᐅᒋ ᐊᓐᑕ ᐸᑕᕋ ᒂ ᐃᑕᔅᑎᒥᑎᓱᔭᒡ᙮ 2 ᐊᓐᑕ ᒪᒃ ᐊᓐ ᐸᑕᕋ ᑲ ᐃᓯᓂᐧᑲᑕᒡ ᐅᑕᓇᐤ ᐊᑯᑕ ᑲ ᑎᒂᒡ ᐊ ᒥᓴᒡ ᐅᐤᑦ ᐊᓐᑕ ᐳᓂᓯᔭ ᑲ ᐃᓯᓂᐧᑲᑕᒡ ᐊᔅᒋᔾ ᒐ ᐎ ᐃᑕᔅᑎᑕᑭᓄᐅᒡ᙮ ᒂ ᐳᓯᔭᒡ ᐊᓐ ᐊ ᒥᓴᒡ ᐅᐤᑦ᙮ ᐊᑯ ᒥᓐ ᒂ ᒋᑕᓯᔭᒡ᙮ 3 ᐃᔅᐱ ᒪᒃ ᐎᔭᐸᑎᒪᒡ ᐊᓐ ᒥᓂᔅᑎᒄ ᓴᐃᐳᕋᔅ ᑲ ᐃᓯᓂᐧᑲᑕᒡ ᓴᐅᓄᒡ ᐃᑕᒐ ᓂᒋ ᐃᓯ ᐎᒪᐊᓇᓐ ᐊᑯ ᑯᐃᔅᒄ ᐊᓐᑕ ᓯᕆᔭ ᐊᔅᒋᒡ ᐊᑯᑕ ᒂ ᐃᑕᔅᑎᒥᑎᓱᔭᒡ᙮ ᐊᓐ ᒪᒃ ᐅᑕᓇᐤ ᑕᐃᕋ ᑲ ᐃᓯᓂᐧᑲᑕᒡ ᐊᓐᑕ ᓯᕆᔭ ᐊᔅᒋᒡ ᑲ ᑎᒂᒡ ᐊᑯᑕ ᑲ ᓇᑎᑭᒪᐊᒪᒡ ᐊᑯᑕ ᑭᔭ ᑲ ᐊᒂᓇᓱᓇᓄᐅᒡ᙮ 4 ᐊᑯ ᒂ ᓂᑐᐛᐱᒥᒋᒡ ᐊᓐᒡ ᑲ ᑕᑈᔭᔨᒪᒡ ᒋᓴᓴ ᐊᓐᑕ ᑲ ᑕᒡ᙮ ᐸᐃᒄ ᒥᓇᔅᑕᑭᓇ ᒪᒃ ᓂᒋ ᐃᑕᐛᓇᓐ ᐊᓐᑕ ᐊ ᑕᒡ᙮ ᐊᓐᒡ ᒪᒃ ᑲ ᑕᑈᑕᒡ ᑲ ᐸᔭᒋᓯᔨᒋ ᐊᒐᒂ ᒋ ᐃᑐᑕᑯᐅᒡ ᒐᒋ ᐃᔭᒂᒥᒪᒡ ᑈᓚ ᒐ ᐊᑲ ᒋ ᐃᑐᑕᔨᒋ ᐊᓐᑕ ᒋᕈᓯᓕᒥᒡ᙮ 5 ᒥᒄ ᒪᒃ ᐃᔅᐱ ᐛᑎᒋᐱᔨᒡ ᒐ ᔅᑐᑕᔭᒡ, ᒥᒄ ᓂᒋ ᐃᓯ ᔅᑐᑕᓇᓐ᙮ ᒥᓯᐛ ᒪᒃ ᐊᓐᒡ ᑲ ᑕᑈᑕᒡ ᑭᔭ ᐎᐛᐛ ᑭᔭ ᐅᑦ ᐊᐛᓯᒧᐛᐛ ᓂᒋ ᐎᒐᐅᑯᓇᓂ ᐊ ᓇᓯᐸᐎᒋᑦ᙮ ᐊᑯ ᒥᓯᐛ ᒂ ᓂᐱᔅᑯᐱᔭᒡ ᐊᓐᑕ ᓯᓱᒡ ᐊ ᐊᔭᒥᐊᔭᒡ᙮ 6 ᐃᔅᐱ ᒪᒃ ᑲ ᐛᒋᔭᒥᑐᔭᒡ, ᐊᑯ ᒂ ᐳᓯᔭᒡ ᓂᔭᓐ ᐊᓐ ᐊ ᒥᓴᒡ ᐅᐤᑦ, ᐊᑯ ᒂ ᒋᐛᒡ ᐎᔨᐛᐤ᙮ 7 ᐊᓐᑕ ᒪᒃ ᐊᓐ ᑕᐃᕋ ᑲ ᐃᓯᓂᐧᑲᑕᒡ ᐅᒋ ᐊᑯ ᐱᑥᓚᒪᐃᔅ ᑲ ᐃᓯᓂᐧᑲᑕᒡ ᐅᑕᓇᐤ ᒂ ᑭᐸᔭᒡ, ᒂ ᐊᑎ ᓂᑐᐛᐱᒥᒋᒡ ᐊᓐᒡ ᐎᐧᑲᓂᓯᒪᐅᒡ᙮ ᐸᐃᒄ ᒋᓯᑲᐛ ᓂᒋ ᐃᑕᐛᓇᓐ ᐊᓐᑕ ᐊ ᑕᒡ᙮ 8 ᐊᑯ ᒪᒃ ᐎᔭᐸᒡ ᐊᑯ ᒂ ᔅᑐᑕᔭᒡ ᐊᓐᑕ ᐊᓐ ᐅᑕᓇᐤ ᓯᓴᕆᔭ ᒂ ᐃᓯᓂᐧᑲᑕᒡ ᑲ ᐃᑐᑕᔭᒡ᙮ ᐱᓕᑉ ᒪᒃ ᐊ ᐃᓯᓂᐧᑲᓱᑦ ᓇᐸᐤ ᐊᓐᑕ ᐊ ᑕᑦ ᐊᐅᒄ ᐅ ᐎᒋᒡ ᑲ ᐃᑕᐅᒋᑦ᙮ ᑲ ᑭᒐᔅᒋᒧᑦ ᒋ ᐃᑕᐱᑎᓯᐤ ᐅ ᐱᓕᑉ ᑭᔭ ᐊᐅᒄ ᐅ ᐸᐃᒄ ᐊᓐᒡ ᓂᔄᐅᑕᒡ ᑲ ᑎᓯᒡ ᑲ ᐅᑎᓇᑭᓄᐎᒡ ᒐᒋ ᓇᑕᒪᒐᒡ ᐊᓐᑕ ᐊᔭᒥᐊᐅᒋᐛᐱᒡ ᒋᕈᓯᓕᒥᒡ᙮ 9 ᒋ ᓇᐎᔪᐛ ᐅᑕᓂᓴ ᐊᔅᒄ ᐊᑲ ᓂᐳᔨᒋ ᑭᔭ ᒋ ᐅᒋᔅᒋᐛᐃᒐᔪᐛ᙮ 10 ᐛᐃᐱᔅᒋᔅ ᒪᒃ ᑲ ᑕᔭᒡ ᐊᓐᑕ, ᐊᑯ ᒂ ᑎᑯᓯᐧᒃ ᓇᐸᐤ ᑲ ᐅᒋᔅᒋᐛᐃᒐᓱᐅᑦ᙮ ᐊᑲᐸᔅ ᒋ ᐃᓯᓂᐧᑲᓱᐤ᙮ ᒍᑎᔭ ᐊᔅᒋᒡ ᒋ ᐅᑐᑕᐤ᙮ 11 ᐊᑯ ᒂ ᐸᒋ ᓂᑐᐛᐱᒥᔨᒥᑦ ᐅ ᓇᐸᐤ, ᒂ ᐅᑎᓂᒺᑦ ᑈᓚ ᐅᐱᒂᑕᐅᓂᔪᐤ, ᒂ ᒪᑯᐱᑕᐧᒃ ᐅᓯᑕ ᑭᔭ ᐅᑎᒋᔭ ᐊᑯ ᑲ ᐃᔅᒋᔄᑦ, “ᒪᐅ ᐊ ᐃᔅᒋᔄᑦ ᑲ ᐸᔭᒋᓯᑦ ᐊᒐᐧᒄ, ᐊᐅᑯᓐ ᒐ ᐃᑕᐱᒂᑎᑯᑦ ᐊᓂᔭ ᒍᐤ ᐃᔪᐛ ᒋᕈᓯᓕᒥᒡ ᑲ ᑕᔨᒋ ᐊᓐ ᐊᐛᓐ ᑕᐱᔨᐛᐅᓯᑦ ᐅᔭ ᐱᒂᑕᐅᓂᔪᐤ᙮ ᒋᑭ ᐃᓯ ᐱᔅᑎᓱᐛᑎᑯᐤ ᑭᔭ ᐅᔭ ᐃᔪᐛ ᐊᓐᑕ ᐊᑲ ᒍᐤ ᐃᑎᔅᑲᓇᓯᔨᒋ ᐊ ᑕᔨᒋ᙮” 12 ᐃᔅᐱ ᒪᒃ ᐱᔭᑎᒪᒡ ᐊᓂᔭ ᐊ ᐃᔅᒋᔄᑦ, ᓂᔭᓐ ᑭᔭ ᐊᓐᒡ ᑯᑎᑭᒡ ᐊᓐᑕ ᑲ ᑕᒡ, ᓂᒋ ᐎ ᒋᑕᐊᒧᐛᓇᓐ ᑈᓪ ᒐᒋ ᐃᑐᑕᑦ ᒋᕈᓯᓕᒥᒡ᙮ 13 ᒥᒄ ᒪᒃ ᓂᒋ ᐃᑎᑯᓇᓐ, “ᒐᒂᓐ ᐛᒋ ᒪᔭᒄ, ᓂ ᑯᓯᑯᑕᐊᓐ ᐊ ᒪᔭᒄ᙮ ᐃᔭᐱᒡ ᐛᔅ ᓂᑭ ᐃᑐᑕᓐ ᐊᓐᑕ ᒋᕈᓯᓕᒥᒡ᙮ ᓴᔅ ᐛᔅ ᐊᓐ ᓂᑦ ᐊᔭᔅᑯᔨᓐ ᓇᒪ ᒥᒄ ᒐᒋ ᒋᐸᐅᑯᔭᓐ ᐅᑎᐸᔨᒋᒐᐤ ᒋᓴᔅ ᐅᑦ ᐃᓯᓂᐧᑲᓱᐅᓐ ᐅᒋ, ᓂᑦ ᐊᔭᔅᑯᔨᓐ ᑭᔭ ᒐ ᐎ ᓂᐸᐃᑯᐛᓇ ᐎᔾ ᐅᒡ᙮” 14 ᓇᒪ ᒪᒃ ᓂ ᐅᒋ ᓂᑲᓇᓇᓐ, ᐊᑯ ᒥᒄ ᒂ ᑎᒋᑦ, “ᐊᑯᑕ ᑭᑈ ᒂᔄᓐ ᒐ ᐃᓯᓇᒂᒡ᙮ ᐃᔭᐱᒡ ᒪᒃ ᒧᔅ ᐅᑎᐸᔨᒋᒐᐤ ᐅᑦ ᐃᑕᔨᑎᒧᐅᓐ ᐃᔅᐱᔨᒐ᙮” 15 ᐛᐃᐱᔅᒋᔅ ᒪᒃ ᓂᒋ ᑕᓇᓐ ᐊᓐᑕ, ᐊᑯ ᒂ ᐊᔭᔅᑯᐎᔭᒡ ᐊᓐᑕ ᒋᕈᓯᓕᒥᒡ ᒐ ᐃᑐᑕᔭᒡ᙮ 16 ᐱᔅᒐ ᒪᒃ ᐊᓐᒡ ᑲ ᑕᑈᔭᔨᒪᒡ ᒋᓴᓴ ᐊᓐᑕ ᓯᓴᕆᔭ ᑲ ᐅᒋᒡ ᓂᒋ ᐎᒐᐅᑯᓇᓂᒡ, ᐊᑯ ᒂ ᐃᑐᑕᐃᔨᒥᒡ ᐊᓐᑕ ᓇᐸᐛ ᒥᓇᓱᓐ ᐊ ᐃᓯᓂᐧᑲᓱᔨᒋ ᐊ ᑕᔨᒋ᙮ ᐊᑯᑕ ᐊᓐ ᓂᐸ ᐃᑕᐛᓇᓐ ᐎᒋᒡ᙮ ᐊᓐᑕ ᓴᐃᐳᕋᔅ ᒋ ᐅᒋᐤ ᐅ ᒥᓇᓱᓐ᙮ ᓴᔅ ᐛᔅᑭᒡ ᒋ ᑕᑈᔭᔨᒪᐤ ᐎᔾ ᒋᓴᓴ᙮ ᑈᓪ ᑲ ᒧᐱᔅᑐᐛᑦ ᒋᒥᓴ 17 ᐃᔅᐱᔅ ᑕᑯᓯᓂᔭᒡ ᐊᓐᑕ ᒋᕈᓯᓕᒥᒡ, ᓇᔅᒡ ᒋ ᒥᔽᔨᑎᒧᒡ ᐊᓐᒡ ᐎᐧᑲᓂᓯᒪᐅᒡ ᐃᔅᐱᔅ ᐎᔭᐱᒥᔨᒥᒡ᙮ 18 ᒥᓐ ᒪᒃ ᐎᔭᐸᒡ ᓂᒋ ᓂᑐᐛᐱᒪᓇᓐ ᒋᒥᔅ ᒥᓯᐛ ᐊᓐᑕ ᐊ ᑎᓯᔭᒡ᙮ ᑈᓪ ᑭᔭ ᓂᒋ ᐎᒐᐅᑯᓇᓐ᙮ ᒥᓯᐛ ᐊᓐᒡ ᑲ ᓂᑲᓂᔅᑯᐛᒡ ᐊᓂᔭ ᑲ ᑕᑈᑎᒥᔨᒋ ᐊᓐᑕ ᒋᕈᓯᓕᒥᒡ ᑲ ᑕᔨᒋ ᒋ ᑕᐅᒡ ᐊᓐᑕ ᒋᒥᓴ ᐊ ᑕᔨᒋ᙮ 19 ᑈᓪ ᒪᒃ ᒋ ᐊᑎ ᐛᒋᔭᒪᐤ ᒥᓯᐛ, ᐊᑯ ᒂ ᐊᑎ ᐛᐎᑎᒧᐛᑦ ᒥᓯᐛ ᐊᓂᔭ ᑕᓐ ᑲ ᐃᓯ ᐃᑐᑎᒪᑯᔨᒋ ᒋᓴᒪᓂᑐᐛ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᒪᒂᒡ ᑲ ᐛᐎᑕᐧᒃ ᒥᔽᒋᒧᐅᓂᔪᐤ ᐊᓐᑕ ᐊ ᑕᔨᒋ᙮ 20 ᐃᔅᐱ ᒪᒃ ᐱᔭᑐᐛᒡ ᐅᒡ ᑕᓐ ᐊ ᐃᑕᒋᒧᔨᒋ ᑈᓚ, ᒥᓯᐛ ᒋ ᒪᒥᒋᒪᐅᒡ ᒋᓴᒪᓂᑐᐛ᙮ ᒐᒃ ᒪᒃ ᐊ ᐃᑕᒡ ᐊᓂᔭ ᑈᓚ, “ᓂᐧᑲᓂᓯᓇᓐ, ᒋ ᐛᐸᑕᓐ ᑕᓐ ᐊ ᐃᔅᐱᒐᑎᒡ ᐊᑯ ᒍᐤ ᐃᔪᒡ ᐊ ᑕᑈᔭᔨᒪᒡ ᒋᓴᓴ ᐅᑕ ᒋᕈᓯᓕᒥᒡ, ᒥᒐᑦ ᒐᓯᐱᔪᐤ ᐊ ᑎᓯᒡ᙮ ᒥᓯᐛ ᒪᒃ ᐊᔅᒄ ᓇᔅᒡ ᓂᓇᑭᑐᐛᔨᑎᒧᐛᐅᒡ ᒧᓱᓴ ᐅᐎᓱᐛᐅᓂᔪᐤ᙮ 21 ᒋ ᐃᑕᒋᒧᔅᑐᐛᑭᓄᐎᒡ ᒪᒃ ᐊ ᒋᔅᑯᑎᒪᒥᑎ ᐊᓂᔭᔪᐛ ᒍᐤ ᑲ ᐎᒋᔨᒋ ᐊᓐᑕ ᐊᑲ ᒍᐤ ᐃᑎᔅᑲᓇᓯᔨᒋ ᐊ ᑕᔨᒋ ᒐ ᐊᑲ ᒋ ᐊᐱᑕᔨᑎᒥᐃᑯᒡ ᒧᓱᓴ ᐅᐎᓱᐛᐅᓂᔪᐤ, ᐊ ᐃᑎᑥᐤ ᒐ ᐊᑲ ᒋ ᒋᔅᒋᓄᐛᒋᔄᒡ ᐅᑦ ᐊᐛᓯᒧᐛᐛ ᑭᔭ ᒐ ᐊᑲ ᒋ ᐊᐱᑕᔨᑕᒡ ᒍᐤ ᐃᑐᐅᓇ᙮ 22 ᐅᒡ ᒪᒃ ᒍᐤ ᐃᔪᒡ ᓇᔅᒡ ᑲ ᓂᓇᑭᑐᐛᔨᑎᒺᒡ ᒧᓱᓴ ᐅᐎᓱᐛᐅᓂᔪᐤ ᒐᔅᑎᓇᔅ ᒋᑭ ᐸᑎᒧᒡ ᐊᒋ ᑎᑯᓯᓄᐅᑦ᙮ ᑕᓐ ᒐ ᐃᑎᔭᐧᒄ ᒪᒃ᙮ ᒋᑭ ᐎᑎᒪᑎᓇᓐ ᑕᓐ ᑲ ᐃᑕᔨᑎᒥᐃᑯᐅᔭᒡ ᒋᐸ ᐃᑎᓇᓄᐤ᙮ 23 ᐃᑐᑕ ᒪᒃ ᐅ ᒐ ᐃᑎᑕᒡ᙮ ᓇᐅᒡ ᓇᐸᐅᒡ ᐅᑕ ᐊ ᑕᒡ ᐊ ᑎᑯᓂᔨᒡ ᑕᓐ ᐛ ᐃᓯ ᒐᔅᑎᓇᔅ ᑎᐸᑐᑕᒡ ᐸᐃᒄ ᐊᓂᔭ ᒍᐤ ᐊᔭᒥᐊᐅᓐ ᐃᑐᐅᓂᔪᐤ, ᑕᓐ ᐊ ᐃᓯ ᓂᑐᐛᔨᑕᑯᓂᔨᒡ ᐊᓐᑕ ᒧᓱᓴ ᐅᐎᓱᐛᐅᓂᒡ ᒋᐸ ᐃᑐᑕᑭᓄᐎᔪᐤ᙮ 24 ᐎᒐᐅᒡ ᒪᒃ ᐅᒡ ᓇᐸᐅᒡ ᐊᓐᑕ ᒍᐤ ᒋᓴᐊᔭᒥᐊᐅᒋᐛᐱᒡ ᐊ ᐸᔭᒋᐃᓱᒡ, ᒐ ᒋᓯᐧᑭᒧᑦ ᐊᓂᔭ ᒋᐸ ᐃᔅᐱᔅ ᒋᓯᐧᑲᓱᐅᒡ, ᑭᔭ ᒋᐸ ᒧᓯᑭᓄᐎᔪᐤ ᐅᔅᑎᒂᓄᐛᐛ᙮ ᐊᑯ ᒪᒃ ᒐ ᐛᐸᑎᔨᐛᔨᓐ ᒋᐱᒪᑎᓯᐅᓂᒡ ᐊᔅᒄ ᐊ ᒋᔅᑕᔨᑎᒧᑦ ᒧᓱᔅ ᐅᐎᓱᐛᐅᓐ ᑭᔭ ᒐ ᒋᔅᒐᔨᑕᒂᒡ ᐊᒋ ᑭᑭᒋᔭᐛᑕᒋᒧᐅᓇᓄᐅᒡ ᐊᓐ ᑲ ᐃᑕᒋᒥᑯᔨᓐ ᐊᑲ ᐊᐱᑕᔨᑎᒧᑦ ᒧᓱᔅ ᐅᐎᓱᐛᐅᓐ᙮ 25 ᐊᑯ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᑲ ᑕᑈᑕᒡ ᓇᒪ ᓂᑐᐛᔨᑕᑯᓱᐅᒡ ᒥᓯᐛ ᒐᒋ ᐃᓯ ᓂᓇᑭᑐᐛᔨᑕᒡ ᑕᓐ ᐊ ᐃᑎᔅᑕᔨᒡ ᒧᓱᓴ ᐅᐎᓱᐛᐅᓂᔪᐤ᙮ ᓂᒋ ᒥᓯᓇᐊᒺᓇᓐᒡ ᒪᒃ ᐊ ᐎᑎᒧᐅᒋᒡ ᑕᓐ ᑲ ᐃᓯ ᐎᔭᔨᑎᒧᐎᒋᑦ ᒐᒋ ᐃᓯ ᓂᓇᑭᑐᐛᔨᑕᒡ, ᐊᐅᒄ ᐊᓂᔭ ᒐ ᐊᑲ ᒋ ᒥᒋᒡ ᒐᒂᔪᐤ ᐊ ᐃᔅᑯᐱᔨᒡ ᐊᒋ ᒥᑐᔅᑕᐊᒧᐛᑭᓄᔨᒋ ᒥᓂᑐᐧᑲᓐ, ᑭᔭ ᒐ ᐊᑲ ᒋ ᒥᒋᒡ ᒥᐧᑯᔪᐤ ᑭᔭ ᒐ ᐊᑲ ᒋ ᒧᐛᒡ ᐊᐛᓯᓴ ᐊᒋ ᒋᐳᑕᒪᐱᐧᑲᑕᑭᓄᔨᒋ ᑭᔭ ᒐ ᐊᑲ ᒋ ᐱᓯᒂᑎᓯᒡ᙮” 26 ᑈᓪ ᒪᒃ ᒋ ᑕᑈᑎᒻ ᐊᓂᔭ ᑲ ᐃᑎᓱᒪᑭᓄᐅᑦ᙮ ᒥᓐ ᐎᔭᐱᓂᔨᒡ ᒋ ᐎᒐᐛᐤ ᐊᓂᔭ ᓇᐅᐤ ᓇᐸᐛ ᒐᒋ ᐸᔭᒋᐊᑭᓄᔨᒋ ᐛᔅ ᐊᐅᒄ ᐅᔭ ᑲ ᐃᓯ ᐎᑕᑭᓄᐎᒡ ᒐᒋ ᐃᑐᑎᒧᐛᑭᓄᐅᒡ ᐊᓐᑕ ᒍᐤ ᐊᔭᒥᐊᐅᒥᓯᓇᐃᑭᓂᒡ᙮ ᒋ ᐃᑐᑕᐤ ᑭᔭ ᐎᔾ ᑈᓪ ᐊᓐᑕ ᒍᐤ ᐃᔪᐛ ᐅᒋᓴᐊᔭᒥᐊᐅᒋᐛᐱᒡ᙮ ᐃᔅᐱ ᒪᒃ ᑲᒋ ᐃᓯ ᐊᐃᑎᒡ ᑕᓐ ᐊᓂᔭᔪᐤ ᑲ ᐎ ᐃᑎᒡ, ᐊᑯ ᒂ ᐎᑎᒧᐛᑦ ᑈᓪ ᐊᓂᔭ ᐊᓐᑕ ᐊᔭᒥᐊᐅᒋᐛᐱᒡ ᑲ ᐊᐱᑎᓯᔨᒋ ᑕᓐ ᑕᑐᐤ ᒋᓯᑲᐛ ᐃᔭᒄ ᒋᒋᐛ ᒋᐸ ᒋᔅᑕᐱᔪᐤ ᐊᓂᔭ ᑲ ᐎ ᐃᓯ ᓂᓇᑭᑐᐛᔨᑎᒥᐃᑯᒡ ᒐᒋ ᐃᑎᒡ᙮ ᑭᔭ ᐊᑯᑕ ᐊᓐ ᒋᐸ ᑎᑯᓂᔪᐤ ᑕᓐ ᒋᐸ ᐃᓯ ᒥᑐᔅᑕᐊᒪᐅᒡ ᒐᒂᔪᐤ ᒥᓯᐛ ᐊᓐᑕ ᐊ ᑎᓯᒡ, ᑈᓪ ᑭᔭ ᐊᓂᔭ ᑲ ᐸᒋ ᐎᒐᐛᑦ᙮ ᑈᓪ ᑲ ᒪᑯᓇᑭᓄᐅᑦ ᐊᓐᑕ ᒋᓴᐊᔭᒥᐊᐅᒋᐛᐱᒡ 27 ᓂᔄᐅᑕᒡ ᑕᑐᐤ ᒋᓯᑲᐛ ᒪᒃ ᐸᑎᒪ ᒍᐤ ᑲ ᐃᑎᔅᑲᓇᓯᒡ ᐊᓐᑕ ᐊᐃᓴ ᐊ ᐅᒋᒡ ᒋ ᐛᐱᒪᐅᒡ ᑈᓚ ᐊᓐᑕ ᒍᐤ ᒋᓴᐊᔭᒥᐊᐅᒋᐛᐱᒡ᙮ ᐊᑯ ᒂ ᐃᑐᑐᐛᒡ ᐊᓂᔭ ᐃᔪᐛ ᒐᒋ ᒋᔄᓯᔅᑐᐛᔨᒋ ᐊᓂᔭ ᑈᓚ, ᐊᑯ ᒂ ᒪᑯᓇᒡ᙮ 28 ᒋ ᐃᓯ ᑕᑈᐅᒡ ᒪᒃ, “ᒋᔨᐛᐤ ᓇᐸᑐᒄ ᐃᔅᕋᐃᓪ ᑲ ᐅᒋᔭᒄ, ᐸᒋ ᐎᒋᐃᓇᓐ, ᐊᐅᒄ ᐅ ᓇᐸᐤ ᒥᓯᐛ ᑲ ᐃᑐᑕᑦ ᐊ ᒋᔅᑯᑎᒧᐛᑦ ᒥᓯᐛ ᐊᐛᔪᐛ ᒐ ᐊᑲ ᒋ ᐊᐱᑕᔨᒪᔨᒋ ᐃᔅᕋᐃᓪ ᐃᔪᐛ, ᑭᔭ ᒧᓱᓴ ᐅᐎᓱᐛᐅᓂᔪᐤ ᑭᔭ ᐅᔭ ᒋᓴᐊᔭᒥᐊᐅᒋᐛᐱᔪᐤ ᓇᒪ ᐊᐱᑕᔨᑎᒻ᙮ ᐛᐛᒡ ᑭᔭ ᒋ ᐸᒋ ᐱᑎᑲᐊᐤ ᒪᓐᑕᐛ ᐊᑲ ᒍᐤ ᐃᑎᔅᑲᓇᓯᔨᒋ ᐅᑕ ᒋᓴᐊᔭᒥᐊᐅᒋᐛᐱᒡ ᐊᓂᔭ ᒋᐸ ᐅᒋ ᐊᑲ ᐱᒐᔪᐛ ᐅᑕ᙮ ᐅᔭᔪᐤ ᒪᒃ ᑲ ᐃᑎᑦ ᓇᔅᒡ ᒪᔭᔨᑎᒻ ᐊᓂᔭ ᐊᓐᑕ ᒪᐅᒡ ᑲ ᐸᔭᐧᑭᓂᔨᒡ᙮” 29 ᐊᐅᒄ ᐛᒋ ᐃᔅᒋᔄᒡ ᐅᔭ ᐛᔅ ᒋ ᐛᐱᒪᐅᒡ ᒪᓐᑕᐛ ᐊᑲ ᒍᐤ ᐃᑎᔅᑲᓇᓯᔨᒋ ᑐᕈᐱᒪᔅ ᐊ ᐃᓯᓂᐧᑲᓱᔨᒋ ᐊᓐᑕ ᐃᐱᓴᔅ ᐊ ᐅᒋᔨᒋ ᐊ ᐎᒐᐛᔨᒋ ᐊᓂᔭ ᑈᓚ ᐊᓐᑕ ᐅᑕᓇᒡ ᐊᑯ ᑲ ᐃᑕᔨᒪᒡ ᐊᓂᔭ ᑈᓚ ᐊ ᐱᑎᑲᐊᔨᒋ ᐊᓂᔭ ᒪᓐᑕᐛ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᐊᑲ ᒪᒃ ᐅᒋ ᐱᑎᑲᐊᔨᒋ᙮ 30 ᒧᔭᒻ ᒪᒃ ᒥᓯᐛ ᐊᐛᓐ ᐊᓐᑕ ᒋᕈᓯᓕᒥᒡ ᐊ ᐛᐛᓇᔨᑕᐧᒃ ᒋ ᐃᑕᔨᑕᑯᓐ᙮ ᓂᓇᐧᑯᐤ ᒋ ᐅᒋᐸᔨᑐᐅᒡ ᐊᐛᓐᒋ᙮ ᐊᑯ ᒂ ᒪᑯᓇᑭᓄᐅᑦ ᑈᓪ, ᒂ ᐎᐎᑕᐸᑕᑭᓄᐅᑦ ᐊᓐᑕ ᐊᔭᒥᐊᐅᒋᐛᐱᒡ᙮ ᑎᐛᒡ ᒪᒃ ᒋ ᐊᑎ ᒋᐸᐛᑭᓄᐎᒡ ᐊᓐᒡ ᒋᓴᐊᔭᒥᐊᐅᒋᐛᑉ ᔅᑐᐧᑭᓂᒡ᙮ 31 ᐊᓐᒡ ᒪᒃ ᐃᔪᒡ ᑲ ᒪᑯᓇᒡ ᑈᓚ, ᐊᑯᑕ ᑲ ᐎ ᐊᑎ ᓂᐸᐊᒡ ᐊᓂᔭ ᑈᓚ᙮ ᒪᒂᒡ ᒪᒃ ᐊ ᐃᔅᐱᓯᑯᐛᒡ ᐊᓂᔭ ᐊ ᐎ ᓂᐸᐊᒡ, ᐊᓐ ᕈᒻ ᓂᑐᐱᔪᐅ-ᐅᒋᒪᐤ ᒋ ᐸᑎᒻ ᑕᓐ ᐊ ᐃᓯ ᒥᒋᐱᔨᓇᓄᐎᒡ ᐊᓐᑕ ᒋᕈᓯᓕᒥᒡ᙮ 32 ᑎᐛᒡ ᒪᒃ ᒋ ᐃᑐᑕᐊᐤ ᐊᓯᒪᑭᓂᓯᐤ ᐅᒋᒪᐛ ᑭᔭ ᐊᓯᒪᑭᓂᓴ ᒐᒋ ᓂᑐᐛᐸᑕᒡ ᑕᓐ ᐊᓐ ᐊ ᐃᑎᓇᓄᐎᒡ᙮ ᐃᔅᐱ ᒪᒃ ᐎᔭᐱᒥᑯᒡ ᐊᓂᔭᔪᐛ ᐃᔪᐛ ᒋ ᐳᓂᔪᐛ ᐊ ᒪᓯᐧᑯᐛᔨᒋ ᐊᓂᔭ ᑈᓚ᙮ 33 ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᓂᑐᐛᐱᒪᑦ ᐊᓂᔭ ᑈᓚ, ᐊᑯ ᒂ ᒪᑯᓇᑦ᙮ ᒂ ᐃᑎᓱᐛᑦ ᒐᒋ ᒪᒋᒂᐱᐧᑲᑕᑭᓄᔨᒋ, ᓂᓱ ᐃᓴᒂᔭᐱᔭ ᐊ ᐊᐱᑎᓂᔨᒋ᙮ ᐊᑯ ᒂ ᐃᔅᒋᔄᑦ, “ᒐᒄ ᓇᐸᐤ ᐅ, ᑕᓐ ᑲ ᐃᑎᑦ ?” 34 ᐊᓐᒡ ᒪᒃ ᐃᔪᒡ ᐊᓐᑕ ᑲ ᑕᒡ ᒋ ᓂᔎᐅᓯᐊᐅᒡ᙮ ᐊᑯ ᒥᒄ ᓇᒪ ᐸᐃᑯᓄᒡ ᐅᒋ ᐃᔅᒋᔄᐅᒡ, ᑯᑎᑭᒡ ᐃᔭᒡ ᐊ ᐃᔅᒋᔄᒡ ᑕᓐ ᐊ ᐃᔅᒋᔄᔨᒋ ᐊᓂᔭᔪᐛ ᑯᑎᑲ᙮ ᐊᑯ ᑭᑈ ᓇᒪ ᐅᒋ ᓂᔅᑐᑎᒻ ᐊᓐ ᓂᑐᐱᔪᐅ-ᐅᒋᒪᐤ ᑕᓐ ᐊᓐ ᑲ ᐃᑎᓇᓄᐎᒡ, ᐊᑯ ᒥᒄ ᑲ ᐃᑎᓱᐛᑦ ᒐᒋ ᐱᑎᑲᐊᑭᓄᔨᒋ ᑈᓚ ᐊᓐᑕ ᐊᓯᒪᑭᓂᓯᐅᒋᐛᐱᒡ᙮ 35 ᐊᓐᒡ ᒪᒃ ᐊᓯᒪᑭᓂᓯᒡ ᐃᔅᐱᔅ ᒐ ᐊᑎ ᓴᑭᒋᐛᒡ ᒐᒋ ᐱᑎᑲᐊᒡ ᑈᓚ ᐊᓐᑕ, ᒐᒃ ᓂᑕᒡ ᒋ ᐅᐱᓇᐅᒡ ᑲ ᐃᔅᐱᔅ ᐊᔭᔅᒃ ᒋ ᐊᒂᑕᔨᑕᑯᓯᔨᒋ ᐊᓂᔭᔪᐛ ᐃᔪᐛ᙮ 36 ᐊᓐᑕ ᐅᑕᒡ ᒋ ᐸᒋ ᑕᐅᒡ ᐊᓐᒡ ᐃᔪᒡ ᐊ ᑕᑈᒡ ᐊ ᐃᔅᒋᔄᒡ, “ᓂᐸᐊᐧᒄ ᐊᓐ ᓇᐸᐤ᙮ ᓂᐸᐊᐧᒄ᙮” ᑈᓪ ᑲ ᐎᑕᐧᒃ ᐊᑲ ᒐᒂᔪᐤ ᐅᒋ ᐃᑎᑦ 37 ᒪᒂᒡ ᒪᒃ ᐊᓂᔭ ᐊ ᐎ ᐱᑎᑲᐊᑭᓄᐅᑦ ᑈᓪ ᐊᓐᑕ ᑲᒪᑯᓄᐛᓯᐅᒋᐛᐱᒡ ᒋ ᐃᑕᐤ ᐊᓂᔭ ᓂᑐᐱᔪᐅ-ᐅᒋᒪᐛ, “ᒋᑭ ᒋ ᐃᑎᑎᓐ ᐊ ᒐᒂᓐ ?” ᐊᑯ ᒂ ᐃᑎᑯᑦ, “ᑯᕆᒃ ᐊ ᒋ ᐊᑎ ᐃᓯ ᐃᔨᒥᓐ ? 38 ᓇᒪᔭᐤ ᐊ ᒋᔾ ᐊᓐ ᓇᐸᐤ ᐃᒋᑉᑦ ᑲ ᐃᑎᔅᑲᓇᓯᑦ ᑲ ᒋᒋᐱᔨᑕᑦ ᐊ ᒥᒋᐱᔭᐊᑭᓄᔨᒋ ᒋᓴᐅᒋᒪᐛ ᑭᔭ ᑲ ᓂᑲᓂᔅᑯᐛᑦ ᓇᐛᐤ ᒐᓯᐱᔪᐤ ᒥᒋ ᐊᓯᒪᑭᓂᓴ, ᐊᓐᑕ ᒪᒃ ᐸᐧᑯᑎᔅᑭᒥᑲᒡ ᑲ ᐃᑐᑕᐊᑦ ?” 39 ᐊᑯ ᑈᓪ ᑲ ᐃᑕᑦ, “ᓇᒪᔭᐤ ᓂᔾ᙮ ᒍᐤ ᓂᑦ ᐃᑎᔅᑲᓇᓯᓐ ᓂᔾ ᐎ, ᓯᓕᓯᔭ ᑲ ᐃᓯᓂᐧᑲᑕᒡ ᐊᔅᒋᔾ ᓂ ᐅᒋᓐ ᐊᓐᑕ ᑕᕐᓯᔅ ᑲ ᐃᓯᓂᐧᑲᑕᒡ ᐅᑕᓇᐤ ᐊᑯᑕ ᒪᓯᓇᓱᔭᓐ ᒋᒋᐛ ᐊ ᐅᒋᔭᓐ᙮ ᒋᒋᐛ ᐅᑕᓇᐤ ᐃᓯ ᑭᓄᐛᐸᑕᑭᓄᐤ ᑕᕐᓯᔅ᙮ ᐸᒋ ᒥᔾ ᒪ ᒐᒋ ᐃᔨᒥᐃᒂᐤ ᐅᒡ ᐃᔪᒡ᙮” 40 ᐊᑯ ᒂ ᐱᔅᑎᓂᑯᑦ ᐊᓂᔭ ᓂᑐᐱᔪᐅ-ᐅᒋᒪᐛ ᒐᒋ ᐃᔨᒥᑦ᙮ ᐊᑯ ᑈᓪ ᒂ ᑕᐧᑯᓯᑲᐳᐅᑦ ᐊᓐᑕ ᑕᑕᐧᑯᔅᑲᓇᓂᒡ᙮ ᒂ ᐅᐱᓂᔅᒐᔨᑦ ᐊ ᓂᑐᐛᔨᒪᑦ ᐊᓂᔭᔪᐛ ᐃᔪᐛ ᒐ ᐊᑲ ᒋ ᒋᔅᑐᔨᒋ᙮ ᐃᔅᐱ ᒪᒃ ᐊᑲ ᒐᔅᑐᔨᒋ, ᐊᑯ ᒂ ᐃᔨᒪᐊᑦ ᐃᑉᕈᐤ ᐊ ᐃᓯ ᐃᔨᒥᑦ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.