ᐊᑈᔅᑕᓇᒡ 18 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑈᓪ ᑲ ᐃᑐᑕᑦ ᐊᓐᑕ ᑯᕆᓐᑦ ᑲ ᐃᓯᓂᐧᑲᑕᔨᒡ ᐅᑕᓇᔪᐤ 1 ᐸᑎᒪ ᒪᒃ ᒋ ᔅᑐᑕᐤ ᑈᓪ ᐊᓐᑕ ᐅᒋ ᐊᑕᓐᓯᒡ, ᐊᑯ ᐊᓐᑕ ᑯᕆᓐᑦ ᒂ ᐃᑐᑕᑦ᙮ 2 ᐊᑯᑕ ᒪᒃ ᐅᑕ ᑲ ᐅᒋ ᒋᔅᒐᔨᒪᑦ ᐊᓂᔭ ᒍᐤ ᐃᔪᐛ ᐊᑯᐎᓚ ᑲ ᐃᓯᓂᐧᑲᓱᔨᒋ ᐊᓐᑕ ᑈᓐᑕᔅ ᑲ ᐃᓯᓂᐧᑲᑕᔨᒡ ᐅᑕᓇᐤ ᐊᓐᑕ ᐃᑕᓕ ᐊᔅᒋᒡ ᐊᑯᑕ ᒋ ᐱᒪᑎᓯᒐᓂ᙮ ᐊᑯᑕ ᒪᒃ ᐊᓐᑕ ᑲ ᐅᑐᑕᔨᒂᓂ, ᐎᐛ ᐳᕆᓯᓚ ᐊᒋ ᐎᒐᐛᑦ, ᐛᔅ ᐊᓐ ᒋᓴᐅᒋᒪᐤ ᑲᓗᑎᔭᔅ ᒋ ᐃᑎᓱᐛᒐ ᒥᓯᐛ ᒍᐤ ᐃᔪᐛ ᒐ ᓂᑭᑎᒥᔨᒋ ᕈᒻ ᐅᑕᓇᔪᐤ ᐊᓐᑕ ᐃᑕᓕ ᐊᔅᒋᒡ ᑲ ᑎᑯᓂᔨᒡ᙮ ᒋ ᓂᑐᐛᐱᒪᐤ ᒪᒃ ᑈᓪ ᐅᔭ ᐊᑯᐎᓚᐃᒋ ᑭᔭ ᐎᐎᔪᐛ᙮ 3 ᒂ ᐎᒋᒪᑦ ᑭᔭ ᒂ ᐎᒋ ᐊᐱᑎᓯᒪᑦ ᐊ ᐅᓯᑕᔨᒋ ᒥᒋᐛᐸ ᐛᔅ ᐊᐅᑯᓐ ᑲ ᐃᑕᐱᑎᓯᔨᒋ ᒧᔭᒻ ᐎᔾ ᑲ ᐃᑕᐱᑎᓯᑦ ᐊᓐᑕ ᒐᒋ ᐅᒋ ᐎᒋᐃᓱᑦ᙮ 4 ᒧᔅ ᒪᒃ ᑕᑥᐤ ᐊ ᒍᐤ ᐊᔭᒥᐊᐅᒋᓯᑲᔨᒡ ᒋ ᓇᒋ ᐊᔭᒥᐊᐤ ᑈᓪ ᐊᑯ ᑲᒋ ᐃᔨᒥᐃᑐᒡ ᐊᓂᔭ ᒍᐤ ᑭᔭ ᑯᕆᒃ ᐃᔪᐛ ᐊ ᓯᒋᒪᑦ ᒐᒋ ᑕᑈᑕᑯᑦ᙮ 5 ᐃᔅᐱ ᒪᒃ ᑕᑯᓯᓂᔨᒋ ᓴᓂᓴ ᑭᔭ ᑎᒧᑎᔨᒋ ᐊᓐᑕ ᒪᓯᑐᓂᔭ ᐊ ᐅᑐᑕᔨᒋ, ᐊᑯ ᒂ ᐳᓂᑦ ᐊᓂᔭ ᐊ ᒪᓂᒐᑦ᙮ ᐊᑯ ᑈᓪ ᐱᓯᒄ ᑲ ᐛᐎᑎᒧᐛᑦ ᐊᓂᔭᔪᐛ ᒍᐤ ᐃᔪᐛ ᒥᔽᒋᒧᐅᓂᔪᐤ ᐊ ᐃᑕᑦ, “ᒋᓴᔅ ᐊᐅᒄ ᙭ ᐊᓂᔭ ᒋᓴᒪᓂᑐᐤ ᑲ ᐸᒋ ᐃᑎᓴᐛᑦ᙮” 6 ᒋ ᐊᓏᑕᑯᐤ ᒪᒃ ᑭᔭ ᒋ ᒪᔭᔨᒥᑯᐤ ᐊᑯ ᑈᓪ ᒂ ᐸᐳᐛᒄ ᐅᑦ ᐊᐱᒋᑕᐅᓇ ᐊ ᓄᑯᑕᑦ ᐊᑲ ᓂᐃᔅᑲᑯᑦ ᐊᓂᔭ ᐊ ᐃᑎᔨᒋ᙮ ᐊᑯ ᒂ ᐃᑕᑦ, “ᒋᔨᐛᐤ ᒋᑭ ᐃᑐᑕᓱᓇᐛᐤ ᓂᓱᐅᓇᑎᓯᔭᒂ, ᓇᒪᔭᐤ ᓂᔾ ᒐ ᑐᑕᑎᑯᒡ᙮ ᐛᔅ ᐊᐅᑯᐤ ᒐ ᒋᒋᐱᔭᓐ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᐊ ᐛᐎᑎᒧᐅᒂᐤ ᒥᔽᒋᒧᐅᓂᔪᐤ᙮” 7 ᐊᑯ ᒂ ᓂᑭᑕᑦ, ᒂ ᐎᒋᒪᑦ ᓇᐸᐤ ᑎᑎᔭᔅ ᒐᔅᑕᔅ ᐊ ᐃᓯᓂᐧᑲᓱᔨᒋ, ᐊᑲ ᒍᐤ ᐃᑎᔅᑲᓇᓯᔨᒋ ᐃᔭᐱᒡ ᒪᒃ ᐊ ᑕᑈᔭᔨᒪᔨᒋ ᒋᓴᒪᓂᑐᐛ᙮ ᒥᒋᒪ ᒍᐤ ᐊᔭᒥᐊᐅᒋᐛᐱᒡ ᒋ ᒋᒥᑕᔪᐤ ᐎᒡ ᐅ ᓇᐸᐤ᙮ 8 ᑯᕆᔅᐳᔅ ᒪᒃ, ᐊᓐ ᑲᓂᑲᓂᔅᑲᐧᒃ ᐊᓂᔭ ᐊᔭᒥᐊᐅᒋᐛᐱᔪᐤ ᒋ ᑕᑈᔭᔨᒪᐤ ᐅᑎᐸᔨᒋᒐᐛ, ᑭᔭ ᒥᓯᐛ ᐊᓂᔭᔪᐛ ᐊᓐᑕ ᐊ ᐸᐃᑯᔅᑲᓇᓯᑦ᙮ ᑭᔭ ᒥᒐᑦ ᐊᓐᑕ ᑯᕆᓐᑦ ᑲ ᑕᒡ ᐃᔪᒡ ᒋ ᐸᑎᒧᒡ ᐊᓂᔭ ᒥᔽᒋᒧᐅᓂᔪᐤ᙮ ᒋ ᑕᑈᑎᒧᒡ ᑭᔭ ᒋ ᓯᑲᐃᑐᐛᑭᓄᐎᒡ᙮ 9 ᐸᐃᒂᐤ ᐊ ᑎᐱᔅᑲᔨᒡ ᑈᓪ ᒋ ᐛᐸᑎᔭᑭᓄᐤ ᒐᒂᔪᐤ, ᐅᑎᐸᔨᒋᒐᐛ ᐊ ᐃᔨᒥᐃᑯᑦ ᐊ ᐃᑎᑯᑦ, “ᐊᑲᐎᔾ ᑯᔅᑕᒋ, ᐃᔭᐱᒡ ᑭᒐᔅᒋᒧᐤ, ᐊᑲᐎᔾ ᓄᑎᐳᓂ᙮ 10 ᐛᔅ ᒋ ᐎᒐᐅᑎᓐ᙮ ᓇᒪ ᐊᐛᓐ ᒋᑭ ᒋ ᐎᔭᔅᑐᑕᒄ ᐛᔅ ᒥᒐᑦ ᐃᔪᒡ ᐅᑕ ᐅᑕᓇᒡ ᓂᔾ ᐊᓐᒡ ᓂᑦ ᐃᔨᒥᒡ᙮” 11 ᐊᑯ ᑈᓪ ᒂ ᑕᑦ ᐊᓐᑕ ᐅᑕᓇᒡ ᐸᐃᒄ ᐱᐳᓇ ᒪᒃ ᐳᔅᒄ, ᐊ ᒋᔅᒋᓄᐊᒧᐛᑦ ᐃᔪᐛ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ 12 ᐃᔅᐱ ᒪᒃ ᑲᓕᐅ ᕈᒻ ᑲ ᐅᒋᒪᐧᑲᓄᑦ ᐊᓐᑕ ᐊᑲᔭ ᑲ ᐃᓯᓂᐧᑲᑕᔨᒡ ᐊᔅᒋᔪᐤ ᐊᓐᒡ ᒍᐤ ᐃᔪᒡ ᒪᒧᐤ ᒋ ᒪᒧᐎᐅᒡ ᐊᑯ ᒂ ᒪᑯᓇᒡ ᑈᓚ ᒂ ᐃᑐᑕᐊᒡ ᐊᓐᑕ ᑎᐸᔅᑯᓂᒐᐅᒋᐛᐱᒡ᙮ 13 ᐊᑯ ᒂ ᐃᔅᒋᔄᒡ, “ᐅ ᓇᐸᐤ ᓯᒋᒪᐤ ᐃᔪᐛ ᐃᔭᒡ ᒐᒋ ᐃᓯ ᑕᑈᑎᒥᔨᒋ, ᐊᓂᔭ ᒪᒃ ᐊ ᐃᓯ ᒋᔅᑯᑎᒪᒐᑦ ᒐᒋ ᐃᓯ ᐊᔭᒥᐊᔅᑐᐛᑭᓄᔨᒋ ᒋᓴᒪᓂᑐᐛ ᓇᒪ ᐃᑎᔅᑕᐤ ᐊᓐᑕ ᐎᓱᐛᐅᓂᒡ ᐅ ᒐᒋ ᐃᑎᓇᓄᐅᒡ᙮” 14 ᒧᔭᒻ ᒪᒃ ᑈᓪ ᒋ ᐎ ᐃᔨᒧᐤ, ᑲᓕᐅ ᒂ ᐃᑕᑦ ᐊᓂᔭᔪᐛ ᒍᐤ ᐃᔪᐛ, “ᑕᑈ ᑲ ᐅᓂᑐᑎᒧᒂ ᐅ ᓇᐸᐤ ᑈᓪ, ᒋᐸ ᓂᑐᑕᑎᓇᐛᐤ᙮ 15 ᒥᒄ ᒪᒃ ᒋᔨᐛᐤ ᐊᓐᑕ ᒋᒥᒋᐱᔨᐃᑐᐅᓇᐛᐤ ᐃᔅᒋᔄᐅᓇ ᐅᒋ ᑭᔭ ᐃᓯᓂᐧᑲᓱᐅᓇ ᐅᒋ ᑭᔭ ᒋᑦ ᐊᔭᒥᐊᐅ ᐎᓱᐛᐅᓄᐛᐛ ᐅᒡ᙮ ᒋᔨᐛᐤ ᒥᔪᐱᔨᑕᒄ ᑕᓐ ᐊ ᐃᓯ ᒥᒋᐱᔭᒄ, ᓇᒪ ᐎ ᓂᔾ ᒋᑭ ᐅᒋ ᐎᒋᐃᑎᓇᐛᐤ᙮” 16 ᐊᑯ ᑲᓕᐅ ᒂ ᐎᐎᑎᓴᐛᑦ ᐊᓂᔭᔪᐛ ᐃᔪᐛ ᑲ ᐸᓱᐛᔨᒋ ᑈᓚ ᐊᓐᑕ ᑎᐸᔅᑯᓂᒐᐅᒋᐛᐱᒡ᙮ 17 ᐊᑯ ᐊᓐᒡ ᐃᔪᒡ ᒥᔅᑯᒡ ᐊᓂᔭ ᓱᔅᑎᓂᓴ ᒂ ᒪᑯᓇᒡ, ᐊᓂᔭ ᑲ ᓂᑲᓂᔅᑭᒥᔨᒋ ᒍᐤ ᐊᔭᒥᐊᐅᒋᐛᐱᔪᐤ, ᐊᑯ ᒂ ᒪᓯᐧᑯᐛᒡ ᐊᓐᑕ ᐎᐎᑎᒥᒡ ᑎᐸᔅᑯᓂᒐᐅᒋᐛᐱᒡ᙮ ᓇᒪ ᒥᒄ ᐅᒋ ᐊᐱᑕᔨᒪᐤ ᐊᓐ ᐅᒋᒪᐤ ᑲᓕᐅ ᐊᓂᔭ ᑲ ᐃᑎᔨᒋ᙮ ᑈᓪ ᑲᐤ ᑲ ᐃᑐᑕᑦ ᐊᓐᑎᔭᑭᒡ 18 ᒥᒐᑐᐤ ᒋᓯᑲᐛ ᒋ ᑕᐤ ᑈᓪ ᐊᓐᑕ ᑯᕆᓐᑦ ᐊᓐᑕ ᐊᔭᒥᐊᐤ ᐎᐧᑲᓂᓯᒪᐛ ᐊ ᑕᔨᒋ᙮ ᐊᑯ ᒐᒃ ᒂ ᒋᑕᓯᒡ, ᐊᓐᑕ ᓯᕆᔭ ᒋ ᐃᔅᒋᒪᐅᒡ, ᐳᕆᓯᓚ ᑭᔭ ᐊᑯᐎᓚ ᒋ ᐎᒐᐅᑯᐤ᙮ ᐊᔅᒄ ᒪᒃ ᐊᑲ ᐅᒋ ᐃᔅᒋᒪᒡ ᐊᓐᑕ ᓴᓂᑯᕆᔭᒡ, ᑈᓪ ᒋ ᑲᔅᒋᐸᑎᒻ ᐅᔅᑎᒂᓐ ᒧᔭᒻ ᒍᐤ ᐃᔪᐛ ᑲᒋ ᐃᑎᔨᒋ ᒐᒂᔪᐤ ᐊᒋ ᑕᔨᒋ ᒋᓴᒪᓂᑐᐤ ᒐᔅᑎᓇᔅ ᒐ ᐃᑐᑕᐧᒃ᙮ 19 ᐊᑯ ᑲ ᒥᓯᑲᒡ ᐊᓐᑕ ᐃᐱᓴᔅ ᑲ ᐃᓯᓂᐧᑲᑕᔨᒡ ᐅᑕᓇᔪᐤ, ᐊᑯᑕ ᐊᓐᑕ ᑈᓪ ᑲ ᓂᑭᑕᑦ ᐊᓂᔭ ᐳᕆᓯᓚᐃᒋ ᑭᔭ ᐊᑯᐎᓚᐃᒋ, ᐃᔭᒡ ᒋ ᐃᑐᑕᐅᒡ ᐎᔨᐛᐤ ᐊᓐᒡ᙮ ᐊᑯ ᑈᓪ ᒂ ᐱᒐᑦ ᐊᓐᑕ ᒍᐤ ᐊᔭᒥᐊᐅᒋᐛᐱᒡ ᐊᑯ ᒂ ᐃᔨᒥᐃᑐᒡ ᐊᓂᔭ ᒍᐤ ᐊ ᓯᒋᒪᑦ ᒐᒋ ᑕᑈᑕᑯᑦ ᑕᓐ ᐊ ᐃᔅᒋᔄᑦ᙮ 20 ᒋ ᑯᒂᒋᒥᑯᐤ ᒪᒃ ᐊᓂᔭ ᐱᔅᒐ ᒍᐤ ᐃᔪᐛ ᓇᐅᔅ ᒐᒋ ᑕᑦ ᐊᓐᑕ ᐊ ᑕᔨᒋ, ᓇᒪ ᒥᒄ ᐅᒋ ᓂᔅᑯᒪᐤ᙮ 21 ᒥᒄ ᒋ ᐃᑕᐤ ᑈᓪ, ᐃᔅᐱ ᒐ ᔅᑐᑕᑦ, “ᓂᑭ ᑎᑯᓯᓐ ᒥᓐ, ᒋᓴᒪᓂᑐᐤ ᐃᑕᔨᑕᒐ ᒥᓐ ᒐᒋ ᑎᑯᓯᓂᔭᓐ᙮” ᐊᑯ ᒂ ᐳᓯᑦ ᐅᐤᑎᔪᐤ ᐊᓐᑕ ᐅᒋ ᐃᐱᓴᔅ᙮ 22 ᐃᔅᐱ ᒪᒃ ᒪᓯᑲᑦ ᐊᓐᑕ ᓯᓴᕆᔭ, ᐊᑯᑕ ᐊᓐᑕ ᑲ ᐅᒋ ᔅᑐᑕᑦ ᒋᕈᓯᓕᒥᒡ ᐊ ᐃᑐᑕᑦ, ᒂ ᓂᑐᐛᐱᒪᑦ ᐊᓂᔭ ᐅᒪᒧᐊᔭᒥᐊᐛ ᐊᑯ ᒥᓐ ᐊᓐᑕ ᐊᓐᑎᔭᑭᒡ ᒂ ᐃᑐᑕᑦ᙮ 23 ᐊᑯᑕ ᑲ ᑕᑦ ᐛᐃᐱᔅᒋᔅ ᐊᑯ ᒥᓐ ᒂ ᔅᑐᑕᑦ᙮ ᐊᑯ ᐊᓐᑕ ᐊᔅᒋᒡ ᑲᓚᓯᔭ ᑭᔭ ᐳᕆᒋᔭ ᑲ ᐃᓯᓂᐧᑲᑕᔨᒋ ᐊᑯᑕ ᑲ ᐃᑐᑕᑦ, ᐊ ᐃᔨᒪᐊᑦ ᐊᓂᔭ ᒋᓴᓴ ᑲ ᑕᑈᔭᔨᒪᔨᒋ ᒐᒋ ᐊᔨᒋᑲᐳᔨᒋ᙮ ᐊᐳᓚᔅ ᐊᓐᑕ ᐃᐱᓴᔅ ᑲ ᑕᑦ 24 ᒍᐤ ᐃᔪᐤ ᐊᐳᓚᔅ ᐊ ᐃᓯᓂᐧᑲᓱᑦ ᐊᓐᑕ ᐊᓕᒃᓴᓐᑕᕆᔭ ᐊ ᐅᒋᑦ ᒋ ᑎᑯᓯᓄᐤ ᐊᓐᑕ ᐃᐱᓴᔅ᙮ ᓇᔅᒡ ᒋ ᑭᔅᒋᐅᐤ ᐅ ᓇᐸᐤ ᐊ ᐃᔨᒥᑦ, ᑭᔭ ᒋ ᒥᔪ ᒋᔅᒐᔨᑎᒻ ᑕᓐ ᐊ ᐃᑎᔅᑕᔨᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ 25 ᓇᔅᒡ ᒪᒃ ᑯᐃᔅᒄ ᒋ ᐃᓯ ᒋᔅᑯᑎᒧᐛᑭᓄᑯᐱᓇ ᐊᓂᔭ ᒪᔅᑭᓇᔪᐤ ᐅᑎᐸᔨᒋᒐᐛ ᑲ ᐃᔅᒋᔄᔨᒋ ᒐᒋ ᐃᓯ ᐱᒧᑕᓄᐎᒡ ᐊᓐᑕ ᒐᒋ ᐅᒋ ᐱᒪᒋᐅᓇᓄᐎᒡ᙮ ᑭᔭ ᓇᔅᒡ ᒋ ᓯᒋᔭᓱᐤ ᐊ ᐊᔨᒧᒪᑦ ᒋᓴᓴ ᑕᓐ ᐊᓐ ᑲ ᐃᓯ ᐸᑐᐛᑦ ᒠᓐ ᐅᓯᑲᐃᑕᒐᐛ ᐊ ᐃᓯ ᐊᔨᒧᒪᔨᒋ ᑭᔭ ᒋ ᑕᑈᐤ ᐊᓂᔭ ᑲ ᐃᓯ ᒋᔅᑯᑎᒪᒐᑦ᙮ ᒥᒄ ᒪᒃ ᓇᒪ ᐅᒋ ᒋᔅᒐᔨᒪᐤ ᑕᓐ ᑲ ᐸᒋ ᐃᔅᐱᔨᒋ ᒋᓴᓴ᙮ 26 ᒋ ᐃᔨᒪᐊᐤ ᒪᒃ ᐃᔪᐛ ᐊᓐᑕ ᒍᐤ ᐊᔭᒥᐊᐅᒋᐛᐱᒡ ᐊᑲ ᓇᔅᒡ ᑯᔅᑕᒋᑦ᙮ ᐃᔅᐱ ᒪᒃ ᑲ ᐸᑕᑯᑦ ᐳᕆᓯᓚᔨᒋ ᑭᔭ ᐊᑯᐎᓚᔨᒋ, ᒋ ᒋᐛᑕᐃᑯᐤ᙮ ᐊᑐᐎᔅ ᒂ ᐃᓯ ᐛᐎᑎᒪᑯᑦ ᒋᓴᒪᓂᑐᐛ ᐅᒪᔅᑭᓇᒥᔪᐤ᙮ 27 ᐊᐳᓚᔅ ᒐᒃ ᑲ ᐃᑕᔨᑕᐧᒃ ᒐᒋ ᐃᑐᑕᑦ ᐊᓐᑕ ᐊᑲᔭ, ᐊᑯ ᐊᓂᔭᔪᐛ ᐎᐧᑲᓂᓯᒪᐛ ᐊᓐᑕ ᐃᐱᓴᔅ ᑲ ᑕᔨᒋ ᒋ ᓇᐊᔨᑎᒥᔪᐛ ᐊᓐᑕ ᒐᒋ ᐃᑐᑕᑦ ᐊᑯ ᒂ ᒥᓯᓇᐊᒧᐛᒡ ᐊᓂᔭ ᑲ ᑕᑈᔭᔨᒪᔨᒋ ᒋᓴᓴ, ᐊᑲᔭ ᑲ ᑕᔨᒋ ᐊ ᑕᒡ ᒐ ᒥᔪᐧᑯᐛᒡ ᐊᓂᔭ ᐊᑈᓚᓴ ᑎᑯᓯᓂᔨᒐᓂ ᐊᓐᑕ᙮ ᐃᔅᐱ ᒪᒃ ᐊᐳᓚᔅ ᑕᑯᓯᐧᒃ ᐊᓐᑕ ᐊᑲᔭ, ᓇᔅᒡ ᑕᑈ ᒥᔅᑎ ᒋ ᐎᒋᐊᐤ ᐊᓂᔭ ᐊᐛᔪᐛ ᑲ ᑕᑈᔭᔨᒪᔨᒋ ᒋᓴᓴ, ᐊᓂᔭᔪᐛ ᑲ ᓱᐛᔨᒥᑯᔨᒋ ᒋᓴᒪᓂᑐᐛ ᒐᒋ ᑕᑈᑎᒥᔨᒋ᙮ 28 ᓇᔅᒡ ᒪᒃ ᒋ ᓴᐧᑯᒋᒪᐤ ᐊᓂᔭᔪᐛ ᒍᐤ ᐃᔪᐛ ᐊᓐᑕ ᐊ ᒥᒐᑎᓇᓄᐎᒡ, ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ ᐊ ᐅᒋ ᐎᑎᒧᐛᑦ ᒋᓴᓴ ᐊ ᐊᐎᔨᒋ ᙭ᑕ, ᒋᓴᒪᓂᑐᐛ ᐊᒋ ᐸᒋ ᐃᑎᓴᐅᑯᔨᒋ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.