ᐊᑈᔅᑕᓇᒡ 16 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑎᒧᑎ ᑲ ᐎᒐᐛᑦ ᑈᓚ 1 ᐊᑯ ᑈᓪ ᐊᓐᑕ ᑎᕐᐱᒡ ᑭᔭ ᓕᔅᑐᕋᒡ ᒂ ᐃᑐᑕᑦ᙮ ᒋ ᑕᐤ ᐊᓐᑕ ᓇᐸᐤ ᐊ ᑕᑈᔭᔨᒪᑦ ᒋᓴᓴ, ᑎᒧᑎ ᐊ ᐃᓯᓂᐧᑲᓱᑦ, ᐅᑲᐎᔭ ᑭᔭ ᒋ ᑕᑈᔭᔨᒪᔪᐛ ᒋᓴᓴ᙮ ᒍᐤ ᒋ ᐃᑎᔅᑲᓇᓯᔪᐛ ᐅᔭ ᐅᑲᐎᔭ ᐊᑯ ᐅᑕᐎᔭ ᑯᕆᒃ ᒋ ᐃᑎᔅᑲᓇᓯᔪᐛ᙮ 2 ᑎᒧᑎ ᒪᒃ ᒥᓯᐛ ᒋ ᒥᔽᒋᒥᑯᐤ ᐊᓂᔭ ᐎᐧᑲᓂᓯᒪᐛ ᐊᓐᑕ ᓕᔅᑐᕋᒡ ᑭᔭ ᐊᓐᑕ ᐊᐃᑯᓂᔭᒥᒡ ᑲ ᑕᔨᒋ᙮ 3 ᑈᓪ ᒋ ᓂᑐᐛᔨᒪᐤ ᐊᓂᔭᔪᐛ ᑎᒧᑎᔨᒋ ᒐᒋ ᐎᒐᐅᑯᑦ, ᓂᔅᑎᒻ ᒪᒃ ᒋ ᒋᔅᒋᓄᐛᒋᔄᐤ᙮ ᐊᐅᒄ ᐅᔭ ᑲ ᐃᑐᑐᐛᑦ ᐊᑲ ᐅᒋ ᐎ ᒪᔭᔨᒪᑦ ᐊᓂᔭᔪᐛ ᒍᐤ ᐃᔪᐛ ᐊᓐᑕ ᑲ ᐎᒋᔨᒋ ᐛᔅ ᒋ ᒋᔅᒐᔨᒪᐅᒡ ᐊᓐᒡ ᐃᔪᒡ ᐊᓂᔭ ᑎᒧᑎᔨᒋ ᐅᑕᐎᔪᐛ ᑯᕆᒃ ᐊ ᐃᑎᔅᑲᓇᓯᔨᒋ᙮ 4 ᐊᓂᔭ ᒪᒃ ᐊ ᐊᑎ ᔭᓂᔅᒐᔅᑲᒡ ᐅᑕᓇᐛ ᒋ ᐛᐎᑎᒧᐛᐅᒡ ᐅᒪᒧᐊᔭᒥᐊᐤ ᑕᓐ ᑲ ᐃᓯ ᐎᔭᔨᑎᒥᔨᒋ ᐊᑈᔅᑕᓇ ᑭᔭ ᐊᓂᔭᔪᐛ ᑲ ᓂᑲᓂᔅᑭᒥᔨᒋ ᐊᔭᒥᐊᐅᒋᐛᐱᔪᐤ ᐊᓐᑕ ᒋᕈᓯᓕᒥᒡ ᑕᓐ ᒋᐸ ᐃᓯ ᓂᓇᑭᑐᐛᔨᑎᒧᒡ᙮ 5 ᐊᑯ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᔭᔅᒃ ᒋ ᐊᑎ ᐊᔨᒋᑲᐳᐅᒡ ᑕᑈᑎᒧᐅᓂᒡ ᐃᔅ ᑭᔭ ᐊᓯᑯᒻ ᒋᓯᑲᐛ ᒋ ᐊᑎ ᒥᒐᑐᐅᒡ ᐊᐛᓐᒋ ᐊ ᑕᑈᑕᒡ᙮ ᑕᓐ ᑲ ᐃᓯ ᐛᐸᑎᔭᑭᓄᐅᑦ ᑈᓪ 6 ᐊᑯ ᐊᓐᑕ ᐳᕆᒋᔭ ᑭᔭ ᑲᓚᓯᔭ ᐊᔅᒋᒡ ᒂ ᐃᑐᑕᒡ, ᑲ ᐸᔭᒋᓯᔨᒋ ᐊᒐᒂ ᐊᒋ ᓇᑲᓂᑯᒡ ᒐᒋ ᐛᐎᑕᒡ ᒥᔽᒋᒧᐅᓂᔪᐤ ᐊᓐᑕ ᐊᐃᓴ ᐊᔅᒋᒡ᙮ 7 ᐃᔅᐱ ᐛᑎᑕᒡ ᒪᐃᓯᔭ ᐊᔅᒋᔪᐤ, ᒋ ᐎ ᐱᒐᐅᒡ ᐱᑎᓂᔭ ᐊᔅᒋᒡ ᒥᒄ ᒪᒃ ᒋᓴᓴ ᐅᑦ ᐊᒐᐧᑯᔪᐛ ᒋ ᓇᑲᓂᑯᐅᒡ ᒐᒋ ᐃᑐᑕᒡ ᐊᓐᑕ᙮ 8 ᐊᑯ ᑲ ᓴᐳᑐᐛᑕᒡ ᐊᓂᔭ ᒪᐃᓯᔭ ᐊᔅᒋᔪᐤ ᐊᑯ ᐊᓐᑕ ᑐᕈᐊᔅ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᒂ ᐊᑎ ᐃᑐᑕᒡ᙮ Acts 16.9-15 (Easter-6 Year C) 9 ᐊᓂᔭ ᒪᒃ ᑕᐱᔅᑲᔨᒡ ᑈᓪ ᒋ ᐛᐸᑎᔭᑭᓄᐤ ᐛᐸᑎᔨᐛᐅᓂᔪᐤ᙮ ᒧᔭᒻ ᐊ ᐛᐱᒪᑦ ᓇᐸᐛ ᒋ ᐃᓯᓂᒻ ᐊᓐᑕ ᒪᓯᑐᓂᔭ ᐊᔅᒋᒡ ᐅᒡ ᐊ ᓂᐳᔨᒋ ᐊ ᐃᑎᑯᑦ, “ᐸᒋ ᐃᑐᑕᒄ ᐅᑕ ᒪᓯᑐᓂᔭᒡ, ᒐ ᐸᒋ ᐎᒋᐃᔭᒡ᙮” 10 ᐃᔅᐱ ᒪᒃ ᑲ ᐎᑎᒧᔨᒥᑦ ᑈᓪ ᐅᔭ ᑲ ᐃᓯᓇᐧᒃ, ᓂᒋ ᒐᔅᑎᓇᐅᓇᓐ ᒋᓴᒪᓂᑐᐤ ᐊ ᓂᑐᐛᔨᒥᔨᒥᑦ ᒐᒋ ᐎᑎᒧᐅᒋᒡ ᐊᓐᒡ ᐃᔪᒡ ᒥᔽᒋᒧᐅᓂᔪᐤ᙮ ᐊᑯ ᑎᐛᒡ ᑲ ᐊᔭᔅᑯᐎᔭᒡ ᒐ ᐃᑐᑕᔭᒡ ᐊᓐᑕ᙮ ᑲ ᒂᔅᑲᑎᓯᑦ ᐃᔎᐤ ᓕᑎᔭ ᑲ ᐃᓯᓂᐧᑲᓱᑦ ᐊᓐᑕ ᐱᓕᐸᐃᒡ ᑲ ᐅᒋᑦ 11 ᐊᓐᑕ ᑐᕈᐊᓯᒡ ᓂᒋ ᐅᒋᒋᒪᓇᓐ ᐊᑯ ᐊᓐᑕ ᑯᐃᔅᒄ ᓴᒧᑐᕋᓯᒡ ᑲ ᐃᔅᒋᒪᔭᒡ᙮ ᐊᑯ ᒥᓐ ᐎᔭᐸᒡ ᐊᓐᑕ ᓂᔭᐳᓕᔅ ᓂᒋ ᐃᔅᒋᒪᓇᓐ᙮ 12 ᐊᑯᑕ ᐊᓐᑕ ᑲ ᐅᒋ ᐱᒧᑕᔭᒡ ᐊᓐᑕ ᐊ ᐃᑐᑕᔭᒡ ᐱᓕᐸᐃᒡ ᐊᓐ ᑲ ᒥᓴᒡ ᐅᑕᓇᐤ ᐊᓐᑕ ᒪᓯᑐᓂᔭ ᐊᔅᒋᒡ ᑲ ᑎᒂᒡ, ᕈᒻ ᐃᔪᒡ ᒋ ᑎᐸᔨᑎᒧᒡ ᐊᓂᔭ ᐅᑕᓇᔪᐤ᙮ ᐛᐃᐱᔅᒋᔅ ᐊᓐᑕ ᓂᒋ ᑕᓇᓐ᙮ 13 ᐊᓐ ᒪᒃ ᐊ ᐊᔭᒥᐊᐅᒋᓯᑲᒡ, ᓂᒋ ᓇᓯᐸᓇᓐ ᐊᓐᑕ ᓯᓱᒡ ᓯᐱᒡ ᐎᐎᑎᒥᒡ ᐊᓐᑕ ᐊᓐ ᐅᑕᓇᐤ ᐊ ᐃᑕᔨᑎᒪᒡ ᒐ ᒥᔅᑭᒧᐎᒋᑦ ᐊᓐᑕ ᒍᐤ ᐃᔪᒡ ᐊ ᐊᔭᒥᐊᒡ᙮ ᓂᒋ ᐊᐱᓇᓐ ᐊᑯ ᑲ ᐃᔨᒥᐃᒋᒡ ᐊᓐᒡ ᐃᔎᐅᒡ ᐊᓐᑕ ᑲ ᒪᒧᐎᒡ᙮ 14 ᐊᑯ ᐸᐃᒄ ᐃᔎᐤ ᐊᓐᑕ ᑲ ᑕᑦ ᐊ ᓂᑐᑕᑯᔭᒡ ᓕᑎᔭ ᒋ ᐃᓯᓂᐧᑲᓱᐤ, ᑕᔭᑕᐃᕋ ᐊ ᐃᓯᓂᐧᑲᑕᔨᒡ ᐅᑕᓇᔪᐤ ᒋ ᐅᒋᔪᐤ᙮ ᐊᐅᑯᓐ ᑲ ᐃᑕᐱᑎᓯᑦ ᐊᒋ ᐊᑕᐛᑦ ᒪᓐ ᐊ ᓱᓇᔭᐎᔨᒋ ᐊᐱᒋᑕᐅᓇ᙮ ᐊᑎ ᒪᒃ ᐊᑲ ᒍᐤ ᐅᒋ ᐃᑎᔅᑲᓇᓯᑦ ᐃᔭᐱᒡ ᒋ ᑕᑈᔭᔨᒪᐤ ᒋᓴᒪᓂᑐᐛ ᒧᔭᒻ ᒍᐤ ᐃᔪᒡ ᑲ ᐃᑎᒡ᙮ ᓇᔅᒡ ᒋ ᓂᑐᑎᒻ ᑕᓐ ᑲ ᐃᔅᒋᔄᔨᒋ ᑈᓚ, ᐊᑯ ᒂ ᒥᔨᑯᑦ ᐅᑎᐸᔨᒋᒐᐛ ᒐᒋ ᓂᔅᑐᑕᐧᒃ ᑭᔭ ᒐᒋ ᑕᑈᑕᐧᒃ᙮ 15 ᒋ ᓯᑲᐃᑐᐛᑭᓄᐤ ᒪᒃ ᓕᑎᔭ ᑭᔭ ᒥᓯᐛ ᐊᓐᑕ ᐎᒋᒡ ᑲ ᐎᒋᒥᑯᑦ᙮ ᐊᑯ ᒂ ᐎᓴᒥᔨᒥᒡ ᐊᓐᑕ ᐎᒋᒡ ᒐᒋ ᐎᒋᒥᒋᑦ ᐊ ᐃᑎᑯᔭᒡ, “ᒋᔭᔅᑎᓇᐅᐛᒂ ᐊ ᑕᑈᔭᔨᒥᒃ ᐅᑎᐸᔨᒋᒐᐤ, ᐸᒋ ᐱᒐᒄ ᓂᒋᒡ ᐊᓐᑕ ᒐ ᑕᔭᒄ᙮” ᓂᒋ ᓴᐧᑯᒋᒥᑯᓇᓐ ᒪᒃ᙮ ᑈᓪ ᑭᔭ ᓴᓂᔅ ᑲ ᒋᐸᐛᑭᓄᐎᒡ ᐊᓐᑕ ᐱᓕᐸᐃᒡ Acts 16.16-34 (Easter-7 Year C) 16 ᐸᐃᒂᐤ ᐊ ᐃᑐᑕᔭᒡ ᐊᓐᑕ ᐊᒪᒧᐎᓇᓄᐅᒡ ᐊ ᐊᔭᒥᐊᓄᒡ, ᓂᒋ ᓂᒋᔅᑯᐛᓇᓐ ᑯᐸᓇᔎᔅ ᐊ ᐱᒋᔅᑲᑯᑦ ᒥᒋ ᐊᒐᒂ, ᐊ ᐃᑐᑕᑯᑦ ᒐᒋ ᓂᑲᓐ ᐎᑕᐧᒃ ᑕᓐ ᒐ ᐃᔅᐱᔨᒡ᙮ ᓇᔅᒡ ᒪᒃ ᒋ ᐅᓱᓇᔭᓂᒥᐧᑯᐛᐤ ᐊᓂᔭᔪᐛ ᓇᐸᐛ ᑲ ᑎᐸᔨᒥᑯᑦ ᐊᓂᔭ ᐊ ᐃᑎᑦ᙮ 17 ᓂᒋ ᐱᐸᒥᓇᓴᐅᑯᓇᓐ ᐊᓐ ᐃᔎᔅ ᐊ ᑕᑈᑦ ᐊ ᐃᔅᒋᔄᑦ, “ᒋᓴᒪᓂᑐᐤ ᒪᐅᒡ ᑲ ᒋᔅᑕᔨᑕᑯᓯᔨᒋ ᐊᑐᔅᑯᐛᐅᒡ ᐅᒡ ᓇᐸᐅᒡ᙮ ᒋᑭ ᐎᑎᒪᑯᐛᐅᒡ ᑕᓐᑕ ᒐᒋ ᐅᒋ ᐱᒪᒋᐅᔭᒄ᙮” 18 ᐊᐅᑯᓐ ᑲ ᐃᑎᑦ ᐊᓯᑯᒻ ᒋᓯᑲᐛ, ᑈᓪ ᒐᒃ ᑲ ᐱᒋᔅᑲᒋᒥᑯᑦ, ᐊᑯ ᒂ ᒂᔅᒋᑲᐳᔅᑐᐛᑦ, ᒂ ᐃᑕᑦ ᐊᓂᔭ ᒥᒋ ᐊᒐᒂ, “ᒋᓴᔅ ᙭ ᐅᑦ ᐃᓯᓂᐧᑲᓱᐅᓂᒡ ᐅᒋ ᒪᒋ ᐎᐎᔾ ᐊᓐᑕ ᐊ ᑕᑦ !” ᐊᑯ ᐊᓐ ᐊᒐᐧᒄ ᑎᐛᒡ ᒂ ᐎᐎᑦ ᐊᓐᑕ ᐊᓂᔭ ᐃᔎᓴ ᐊ ᑕᔨᒋ ᐅᒡ᙮ 19 ᐃᔅᐱ ᒪᒃ ᐊᓐ ᐃᔎᔅ ᐊᓂᔭᔪᐛ ᐅᒋᒪᒪ ᑲ ᐛᐸᑎᒥᔨᒋ ᒐ ᐊᑲ ᒋ ᐅᓱᓇᔭᓂᒥᐧᑲᑯᒡ, ᒋ ᒪᑯᓇᐅᒡ ᐊᓂᔭ ᑈᓚ ᑭᔭ ᓴᓂᓴ, ᐊᑯ ᑲ ᐃᑐᑕᐊᒡ ᐊᓐᑕ ᑲᒋ ᒪᒧᐎᔨᒋ ᐊᐛᔪᐛ ᐊᓐᑕ ᑲ ᑕᔨᒋ ᐊᓂᔭ ᑲ ᓂᑲᓂᔅᑭᒥᔨᒋ ᐊᓂᔭ ᐅᑕᓇᔪᐤ᙮ 20 ᐃᔅᐱ ᒪᒃ ᑲ ᐸᓱᐛᒡ ᐊᓐᑕ ᕈᒻ ᐎᓱᐛᐅᒋᒪᐛ ᐊ ᑕᔨᒋ ᒐᒋ ᑎᐸᔅᑯᓇᔨᒋ, ᒋ ᐃᑕᐅᒡ, “ᒍᐤ ᐃᔪᒡ ᐅᒡ ᓇᐸᐅᒡ, ᒥᒋᐱᔨᑕᐅᒡ ᐅᑕ ᒋ ᐅᑕᓇᒥᓇᒡ ! 21 ᒋᔅᑯᑎᒧᐛᐅᒡ ᐊᐛᔪᐛ ᒐᒂᔪᐤ ᐊ ᐃᑎᔅᑕᔨᒡ ᐊᓐᑕ ᕈᒻ ᐎᓱᐛᐅᓂᒡ ᐊᑲ ᒋᐸ ᐃᑐᑕᑭᓄᐅᔪᐤ᙮ ᕈᒻ ᐃᔪᒡ ᒋᔭᓄᐤ, ᓇᒪ ᒋᐸ ᐅᒋ ᐅᑎᓇᓇᓄᐤ ᑭᔭ ᓇᒪ ᒋᐸ ᐅᒋ ᐃᑐᑕᓇᓄᐤ ᐊᓂᔭ ᑕᓐ ᐊ ᐃᔅᒋᔄᒡ᙮” 22 ᐊᑯ ᐊᓐᒡ ᑯᑎᑭᒡ ᐃᔪᒡ ᒋ ᐎᒋᐃᐛᐅᒡ ᐊ ᐛᐛᓯᐊᑭᓄᔨᒋ ᑈᓚ ᑭᔭ ᓴᓂᓴ, ᐊᑯ ᐊᓐᒡ ᕈᒻ ᐃᔪᐛ ᑲ ᓂᑲᓂᔅᑯᐛᒡ ᒋ ᒥᓂᐱᑎᒺᐅᒡ ᐅᑦ ᐊᐱᒋᑕᐅᓂᔪᐛ, ᐊᑯ ᑲ ᐃᑎᓱᐛᒡ ᒐᒋ ᐸᐱᓯᔅᑕᐛᑭᓄᔨᒋ᙮ 23 ᐃᔅᐱ ᒪᒃ ᑲᒋ ᐃᓯ ᒥᔅᑎ ᐸᐱᓯᔅᑕᐛᑭᓄᐎᒡ ᐊᑯ ᑲ ᐱᑎᑲᐊᑭᓄᐎᒡ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᐊᑯ ᑲ ᐃᑎᓱᒪᑭᓄᐅᑦ ᐊᓐ ᑲ ᓂᓇᑭᑐᐛᔨᑕᐧᒃ ᑲᒪᑯᓄᐛᓯᐅᒋᐛᐱᔪᐤ ᐃᔭᒂ ᐅᔭ ᒐᒋ ᓂᓇᑭᑐᐛᔨᒪᑦ᙮ 24 ᐅᔭ ᒪᒃ ᐊᒋ ᐃᑎᓱᒪᑭᓄᐅᑦ ᐊᓐᑕ ᒋᐱᔎᒡ ᐊᓐᑕ ᒪᐅᒡ ᐊ ᐃᔨᒪᒡ ᐊ ᐎᐧᑯᒋᐅᓇᓄᐅᒡ ᐊᓂᔭ ᑲᒪᑯᓄᐛᓯᐅᒋᐛᐱᔪᐤ ᐊᑯᑕ ᑲ ᒪᒪᒋᑯᓯᑕᔭᐱᔅᑲᐛᒡ ᐊ ᐱᑯᓇᑎᒋᓯᔨᒋ ᐱᐱᒋᑎᒂ᙮ 25 ᒐᑲᑦ ᒋ ᐊᐱᑕᑎᐱᔅᑲᔨᒐ ᐊᑯ ᑲ ᐊᔭᒥᐊᒡ ᑈᓪ ᑭᔭ ᓴᓂᔅ ᑭᔭ ᐊ ᓂᑭᒧᔅᑐᐛᒡ ᒋᓴᒪᓂᑐᐛ, ᐊᓐᒡ ᒪᒃ ᑯᑎᑭᒡ ᑲ ᒪᑯᓇᑭᓄᐅᒡ ᒥᒄ ᒋ ᓂᑐᑐᐛᐅᒡ᙮ 26 ᒐᒃ ᓯᔅᒋᑯᒡ ᓇᔅᒡ ᒋ ᓱᒐᔨᑕᑯᓐ ᐊ ᓂᓇᒥᔅᑲᒡ, ᐊᑯ ᐊᓐ ᑲᒪᑯᓄᐛᓯᐅᒋᐛᑉ ᓇᔅᒡ ᒋ ᐊᔭᒋᐱᔪᐤ᙮ ᒥᓯᐛ ᔅᑐᐧᑭᓂᒡ ᒋ ᔪᑕᐱᔪᐅᒡ, ᐊᑯ ᐊᓐᒡ ᑲ ᒪᒪᒋᒂᐱᔅᑲᐛᑭᓄᐅᒡ ᒋ ᒥᓂᐱᔪᐛ ᐊᓂᔭᔪᐛ ᐃᓴᒂᔭᐱᔭ ᑲ ᒋᔅᑲᒡ᙮ 27 ᒋ ᐸᑯᐱᔪᐤ ᐊᓐ ᑲ ᓂᓇᑭᑐᐛᔨᑕᐧᒃ ᑲᒪᑯᓄᐛᓯᐅᒋᐛᐱᔪᐤ᙮ ᐃᔅᐱ ᐎᔭᐱᒪᑦ ᐊᓂᔭ ᔅᑐᐧᑭᓇ ᐊ ᔪᑕᑯᒋᓂᔨᒋ, ᒋ ᐃᑕᔨᑎᒻ ᒥᓯᐛ ᐊᓂᔭ ᑲ ᒋᐸᐛᑭᓄᔨᒋ ᐊᒋ ᒋᑎᓯᒧᔨᒋ᙮ ᐊᑯ ᑲ ᐎ ᓂᐸᐃᓱᑦ, ᒋ ᒥᓂᐱᑎᒻ ᐊᓂᔭ ᐅᓂᑐᐱᔪᐅ-ᒧᐧᑯᒪᓐ ᐊ ᐎ ᐊᐱᒋᑕᑦ ᐊ ᐃᔅᐱᔅ ᒥᔅᑎ ᓴᒋᓯᑦ᙮ 28 ᑈᓪ ᒪᒃ ᒋ ᑕᑈᑕᐤ ᐊ ᐃᑕᑦ, “ᐊᑲᐎᔾ ᐎ ᐎᔭᔅᑐᑕᓱᐤ, ᒥᓯᐛ ᐛᔅ ᐊᓐ ᐊᔅᒄ ᐊᑯᑕ ᐅᑕ ᐊ ᑕᔭᒡ᙮” 29 ᐊᑯ ᐊᓐ ᑲ ᓂᓇᑭᑐᐛᔨᑕᐧᒃ ᐊᓂᔭ ᑲᒪᑯᓄᐛᓯᐅᒋᐛᐱᔪᐤ ᒋ ᓂᑐᐛᔨᑎᒻ ᐛᔅᑕᓂᐱᒪᑭᓂᔪᐤ, ᐊᑯ ᒂ ᐱᑕᐸᑕᑦ ᐊᓐᑕ ᐊᓂᔭ ᑈᓚ ᑭᔭ ᓴᓂᓴ ᑲ ᑕᔨᒋ, ᑲ ᐅᒋᒋᐧᑯᓂᐱᔪᐅᑦ ᐊᓐᑕ ᐅᑎᔅᑯᐤ ᐊ ᑕᔨᒋ ᐊ ᓂᓇᒥᐱᔨᑦ ᐊ ᐃᔅᐱᔅ ᓴᒋᓯᑦ᙮ 30 ᐊᑯ ᒂ ᐎᐎᑕᐊᑦ ᐊᓐᑕ ᑲᒪᑯᓄᐛᓯᐅᒋᐛᐱᒡ ᐅᒋ, ᒂ ᐃᑕᑦ, “ᒋᔨᐛᐤ ᓇᐸᑐᒄ, ᐸᒋ ᐎᑎᒧᐅᒄ ᑕᓐ ᒐ ᐃᑎᔭᓐ ᐊ ᐎ ᐱᒪᒋᐅᔭᓐ ?” 31 ᐊᑯ ᑈᓪ ᒂ ᐃᑕᑦ ᐅᔭ ᓇᐸᐛ, “ᑕᑈᔭᔨᒻ ᐅᑎᐸᔨᒋᒐᐤ ᒋᓴᔅ, ᑭᔭ ᒐ ᐱᒪᒋᐅᔨᓐ ᑭᔭ ᒥᓯᐛ ᐊᓐᒡ ᐊᓐᑕ ᐊ ᐸᐃᑯᑕᐅᓯᔨᓐ ᐊ ᑕᒡ᙮” 32 ᒋ ᐊᔨᒧᑎᒧᐛᐤ ᒪᒃ ᐊᓂᔭ ᓇᐸᐛ ᐅᑎᐸᔨᒋᒐᐛ ᐅᑦ ᐃᔨᒧᐅᓂᔪᐤ ᑭᔭ ᒥᓯᐛ ᐊ ᐃᑎᓯᔨᒋ ᐊᐛᔪᐛ ᐊᓐᑕ ᐎᒋᔨᒡ ᑲ ᑕᔨᒋ᙮ 33 ᑎᐛᒡ ᒪᒃ, ᐊᑎ ᐊ ᒪᒂᑎᐱᔅᑲᔨᒡ, ᐊᓐ ᑲ ᓂᓇᑭᑐᐛᔨᑕᐧᒃ ᐊᓂᔭ ᑲᒪᑯᓄᐛᓯᐅᒋᐛᐱᔪᐤ ᒋ ᐎᐎᑕᐊᐤ ᑈᓚ ᑭᔭ ᓴᓂᓴ ᐊᑯ ᑲ ᒋᔅᑕᐸᐅᑕᐛᑦ ᐊᓐᑕ ᑲ ᐸᐱᓯᔅᑕᐛᑭᓄᔨᒋ᙮ ᐊᑯ ᑎᐛᒡ ᐎᔾ ᑭᔭ ᒥᓯᐛ ᐊᓐᑕ ᐊ ᐸᐃᑯᔅᑲᓇᓯᑦ ᑲ ᓯᑲᐃᑐᐛᑭᓄᐅᒡ᙮ 34 ᐊᑯ ᐊᓐᑕ ᐎᒋᒡ ᒂ ᐃᑐᑕᐊᑦ ᐊᓂᔭ ᑈᓚ ᑭᔭ ᓴᓂᓴ, ᒂ ᒥᔭᑦ ᒥᒋᒥᔪᐤ ᒐᒋ ᒥᒋᓱᔨᒋ᙮ ᓇᔅᒡ ᒪᒃ ᒋ ᒥᔽᔨᑎᒻ ᑭᔭ ᐊᓂᔭ ᐊᓐᑕ ᐊ ᐸᐃᑯᔅᑲᓇᓯᑦ ᒋ ᒧᒋᒐᔨᑎᒥᔪᐛ ᐊ ᑕᑈᐅᒐᔨᒪᒡ ᒋᓴᒪᓂᑐᐛ᙮ 35 ᐎᔭᐱᓂᔨᒡ ᒪᒃ, ᐊᓐᒡ ᕈᒻ ᐅᒋᒪᐅᒡ ᒋ ᐃᑎᓴᐛᐅᒡ ᐊᓂᔭ ᑲᒪᑯᓄᐛᓯᔨᒋ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᒐᒋ ᐃᑕᔨᒋ ᐊᓂᔭ ᑲ ᓇᑭᑐᐛᐸᑎᒥᔨᒋ ᑲᒪᑯᓄᐛᓯᐅᒋᐛᐱᔪᐤ, ᒐᒋ ᐱᔅᑎᓇᔨᒋ ᐊᓂᔭᔪᐛ ᓇᐸᐛ᙮ 36 ᐊᑯ ᐊᓐ ᑲ ᓂᓇᑭᑐᐛᔨᑕᐧᒃ ᑲᒪᑯᓄᐛᓯᐅᒋᐛᐱᔪᐤ ᒋ ᐃᑕᐤ ᐊᓂᔭ ᑈᓚ, “ᐊᓐᒡ ᐅᒋᒪᐅᒡ ᐃᔅᒋᔄᐅᒡ ᒐᒋ ᐱᔅᑎᓂᑕᒡ, ᒪᒋᒄ ᒪᒃ ᒋᔭᒻ ᔅᑐᑕᒄ, ᓇᒪ ᐊᐛᓐ ᒋᑭ ᐅᒋ ᐎᔭᔅᑐᑕᑯᐛᐤ᙮” 37 ᒥᒄ ᒪᒃ ᑈᓪ ᐎᔾ ᒋ ᐃᔨᒪᐊᐤ ᐊᓂᔭ ᑲ ᒪᑯᓄᐛᓯᔨᒋ ᒂ ᐃᑕᑦ, “ᐃᑎᔅᑕᐤ ᕈᒻ ᐎᓱᐛᐅᓐ, ᕈᒻ ᐊ ᐃᓯ ᒥᓯᓇᓱᑦ ᐊᐛᓐ ᓂᔅᑎᒻ ᒋᐸ ᑎᐸᔅᑯᓇᑭᓄᐤ ᐊᑯ ᐃᔭᒄ ᒋᐸ ᐛᐛᓯᐊᑭᓄᐤ᙮ ᕈᒻ ᓂᑦ ᐃᑎᓯᓇᓱᓇᓐ ᐃᔭᐱᒡ ᒪᒃ ᐊᒋ ᐱᐱᓯᔅᑕᐅᑯᐅᔭᒡ ᑭᔭ ᐱᑕᐛᐱᓂᑯᐅᔭᒡ ᑲᒪᑯᓄᐛᓯᐅᒋᐛᐱᒡ, ᐊᑲ ᐛᐛᒡ ᐅᒋ ᑎᐸᔅᑯᓂᑯᐅᔭᒡ᙮ ᐊᑯ ᒪᒃ ᒋᒧᑦ ᐛ ᐱᔅᑎᓂᑯᐅᔭᒡ᙮ ᓇᒪ ᒪᒃ ᓂᑭ ᐅᒋ ᐃᒐᑕᓇᓐ ᐅᑕ᙮ ᓂᑐᐛᔨᒪᓇᓐᒡ ᐊᓐᒡ ᕈᒻ ᐅᒋᒪᐅᒡ ᐎᔨᐛᐤ ᒐᒋ ᐸᒋ ᑎᑯᓯᓂᒡ ᒐᒋ ᐱᔅᑎᓂᔨᒥᒡ᙮” 38 ᐊᑯ ᐊᓐᒡ ᑲᒪᑯᓄᐛᓯᒡ ᒂ ᒋᐛᒡ ᓇᑕ ᒂ ᐎᑎᒧᐛᒡ ᐊᓂᔭᔪᐛ ᐅᒋᒪᐛ ᑕᓐ ᑲ ᐃᔅᒋᔄᔨᒋ ᑈᓚ᙮ ᐃᔅᐱ ᒪᒃ ᐱᔭᑕᒡ ᐊᓐᒡ ᐅᒋᒪᐅᒡ ᕈᒥᒡ ᐊ ᐃᓯ ᒥᓯᓇᓱᔨᒋ ᑈᓚ ᑭᔭ ᓴᓂᓴ, ᒋ ᓴᒋᓱᐅᒡ, ᐛᔅ ᒋ ᒋᔅᒐᔨᑎᒧᒡ ᐊᒋ ᐎ ᒥᒋᑐᑐᐛᒡ᙮ 39 ᐊᑯ ᒂ ᓂᑐᐛᐱᒪᒡ, ᑲ ᐃᑕᒡ, ᓂ ᒥᑕᒋᔨᐛᓯᓇᓐ ᐊᓐ ᑲ ᑎᔭᒡ᙮ ᐊᑯ ᑲ ᐎᐎᑕᐊᒡ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᒂ ᐃᑕᒡ ᒐ ᓂᑭᑎᒥᔨᒋ ᐊᓂᔭ ᐅᑕᓇᔪᐤ᙮ 40 ᐊᑯ ᒪᒃ ᑈᓪ ᑭᔭ ᓴᓂᔅ ᐊᓐᑕ ᐊᓂᔭ ᐃᔎᐛ ᓕᑎᔭᔨᒋ ᐊ ᑕᔨᒋ ᐊᑯᑕ ᒂ ᐃᑐᑕᒡ᙮ ᐊᑯᑕ ᐅᑕ ᐱᔅᒐ ᑲ ᑕᔨᒋ ᒋᐧᑲᓂᓯᓄᐛ ᑲ ᑕᑈᑎᒥᔨᒋ, ᐊᑯ ᒂ ᐃᔨᒪᐊᒡ ᒐᒋ ᐊᔨᒋᑲᐳᔨᒋ ᐊ ᑕᑈᑎᒥᔨᒋ᙮ ᐊᑯ ᒂ ᔅᑐᑕᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.