3 ᒠᓐ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᔾ ᒠᓐ ᐸᐃᒄ ᑲ ᓂᑲᓂᔅᑯᐛᑦ ᐅᒪᒧᐊᔭᒥᐊᐛ ᒋ ᒥᓯᓇᐊᒪᑎᓐ ᒋᔾ ᓂᐎᒐᐛᑭᓐ ᑲᐃᔭᔅ, ᓇᔅᒡ ᑲ ᓴᒋᐃᑕᓐ᙮ 2 ᒋᔾ ᓂᐎᒐᐛᑭᓐ ᑲ ᓴᒋᐃᑕᓐ, ᒋᑦ ᐊᔭᒥᐊᔅᑎᒪᑎᓐ ᒥᓯᐛ ᒐᒋ ᐃᓯ ᒥᔪᐱᔨᓐ ᑭᔭ ᒐᒋ ᒥᔪ ᐱᒪᑎᓯᔨᓐ᙮ ᒋ ᒋᔅᒐᔨᒥᑎᓐ ᐊ ᒥᔪᐱᔨᓐ ᒋᑦ ᐊᒐᐧᑯᒡ᙮ 3 ᓇᔅᒡ ᑕᑈ ᓂᒋ ᒥᔽᔨᑕᓐ ᑕᑥᐤ ᑲ ᑎᑯᓯᒡ ᐱᔅᒐ ᒋᐧᑲᓂᓯᓄᐅᒡ ᐊ ᐸᒋ ᑎᐸᒋᒥᔅᒡ ᑕᑈ ᐊ ᐃᓯ ᐱᒪᑎᓯᔪᐅᑦ ᐊ ᐃᓯ ᓂᑐᐛᔨᒥᔅᒃ ᒋᓴᒪᓂᑐᐤ ᒐᒋ ᐃᓯ ᐱᒪᑎᓯᔪᐅᑦ᙮ ᒋ ᒋᔅᒐᔨᒥᑎᓐ ᑕᑈ ᐊᓐ ᐊ ᐃᓯ ᐱᒪᑎᓯᔨᓐ᙮ 4 ᓇᒪ ᑎᑯᓐ ᒐᒂᓐ ᐃᐛᒃ ᒐᒋ ᒥᔽᔨᑎᒥᐃᑯᔭᓐ ᐊ ᐃᑐᑕᑯᔭᓐ ᐊ ᐸᑎᒪᓐ ᓂᑦ ᐊᐛᓯᒥᒡ ᑕᑈ ᐊ ᐱᒪᑎᓯᒡ ᑕᓐ ᐊ ᐃᓯ ᓂᑐᐛᔨᒥᑯᒡ ᒋᓴᒪᓂᑐᐛ ᒐᒋ ᐃᓯ ᐱᒪᑎᓯᒡ᙮ ᑲᐃᔭᔅ ᑲ ᒥᔽᒋᒪᑭᓄᐅᑦ 5 ᒋᔾ ᓇᔅᒡ ᑲ ᓴᒋᐃᑕᓐ, ᓄᑯᓐ ᑕᓐ ᐊ ᐃᓯ ᑕᑈᑎᒥᓐ ᓂᓇᐧᑯᐤ ᒪᓐ ᐊ ᐃᓯ ᐛᐎᒋᐃᑥᐤ ᒋᐧᑲᓂᓯᓄᐅᒡ ᐊ ᑎᑯᓯᒡ, ᐊᑐᐎᔅ ᒪᒃ ᐊᓐᒡ ᐊᐛᓐᒋ ᐃᔭᒄ ᐊ ᐛᐱᒥᒡ᙮ 6 ᒋ ᐊᔨᒧᑎᒧᒡ ᐅᒡ ᐊᓐᑕ ᐅᒪᒧᐊᔭᒥᐊᐛ ᐊ ᑕᔨᒋ ᑕᓐ ᑲ ᐃᔅᐱᔅ ᒥᔪᑐᑐᐅᑥᐤ᙮ ᒋᑭ ᒥᔪᑐᑕᓐ ᒪᒃ ᒐᒋ ᒥᔨᑥᐤ ᒐᒂᔪᐤ ᑕᓐ ᒐ ᐃᓯ ᓂᑐᐛᔨᑕᒡ ᐊ ᐱᐸᒧᑕᒡ ᒥᔽᒋᒧᐅᓂᔪᐤ᙮ ᐛᔅ ᐊᐅᑯᓐ ᐊ ᐃᓯ ᒥᔽᒡ ᒐᒋ ᐃᑐᑐᐛᑯᒡ ᐊᓐᒡ ᒋᓴᒪᓂᑐᐛ ᑲ ᐊᑐᔅᑯᐛᒡ᙮ 7 ᐛᔅ ᔅᑐᑕᐅᒡ ᙭ᑕ ᒐᒋ ᐊᑐᔅᑯᐛᒡ᙮ ᓇᒪ ᐅᒋ ᓂᑐᐛᔨᑎᒧᐛᐅᒡ ᐊᓂᔭᔪᐛ ᐊᑲ ᑕᑈᑎᒥᔨᒋ ᒐᒂᔪᐤ ᒐᒋ ᐃᓯ ᐎᒋᐃᑯᒡ᙮ 8 ᒋᔭᓄᐤ ᑲ ᑕᑈᔭᔨᒪᐧᒄ ᙭ ᒋᐸ ᐎᒋᐊᓄᒡ ᐅᒡ ᓇᐸᐅᒡ ᑕᓐ ᐊ ᐃᓯ ᓂᑐᐛᔨᑕᒡ ᒐᒂᔪᐤ ᒐᒋ ᐅᒋ ᐎᒋᐊᐧᑯᒡ ᐊ ᐛᐎᑎᒧᐛᒡ ᐊᐛᔪᐛ ᑕᑈᐅᓂᔪᐤ᙮ ᑎᐅᑦᕆᐸᔅ ᑭᔭ ᑎᒥᑦᕆᔭᔅ ᑲ ᐊᔨᒧᒪᑭᓄᐎᒡ 9 ᓴᔅ ᓂᒋ ᒥᓯᓇᐊᒧᐛᐅᒡ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ, ᒥᒄ ᒪᒃ ᐊᓐ ᓇᐸᐤ ᑎᐅᑦᕆᐸᔅ ᑲ ᐃᓯᓂᐧᑲᓱᑦ ᐊᐅᒄ ᐊᓐ ᓇᔅᒡ ᐛ ᐅᒋᒪᐅᑦ, ᓇᒪ ᐊᐱᓯᑎᒻ ᑕᓐ ᐊ ᐃᔅᒋᔄᐅᒡ᙮ 10 ᑎᑯᓯᓄᐅᒐ ᐊᓐᑕ ᐊ ᑕᐛᒄ, ᓇᔅᒡ ᓂᑭ ᐛᐎᑎᒺᓐ ᑕᓐ ᐊᓐ ᐊ ᐃᑎᑦ, ᓂᑎᒥᒄ ᐊ ᐃᑕᒋᒥᔨᒥᑦ᙮ ᓇᒪ ᒪᒃ ᒥᒄ ᐊᓂᔭ ᐃᑐᐤ᙮ ᓇᒪ ᒥᔽᔨᑎᒻ ᒐᒋ ᐱᑎᑲᐊᑭᓄᔨᒋ ᐊᓂᔭᔪᐛ ᒋᐧᑲᓂᓯᓄᐛ ᑲ ᐱᐸᒧᑕᔨᒋ ᒥᔽᒋᒧᐅᓂᔪᐤ᙮ ᒋᑕᐊᒧᐛᐤ ᐊᓂᔭᔪᐛ ᐊᐛᔪᐛ ᑲ ᐱᑎᑲᐊᔨᒋ ᐅᔭ ᑭᔭ ᐃᒐᑎᓴᐛᐤ ᐊᓐᑕ ᐅᒪᒧᐊᔭᒥᐊᐛ ᐊ ᑕᔨᒋ ᐅᒡ᙮ 11 ᓂᐎᒐᐛᑭᓐ ᑲ ᓴᒋᐃᑕᓐ, ᐊᑲᐎᔾ ᒋᔅᒋᓄᐛᐸᑕ ᒥᒐᑎᓯᐅᓐ, ᑯᐃᔅᑯᑕᑎᓯᐅᓐ ᐊᐅᒄ ᒋᔅᒋᓄᐛᐸᑕ᙮ ᐊᓐ ᐊᐛᓐ ᑲ ᑯᐃᔅᑯᑕᑎᓯᑦ ᒋᓴᒪᓂᑐᐛ ᑎᐱᔨᐛᐅᓯᑐᑕᑯᐤ, ᐊᑯ ᐊᓐ ᐊᐛᓐ ᑲ ᒥᒐᑎᓯᑦ ᓇᒪ ᐅᒋ ᐛᐱᒪᐤ ᒋᓴᒪᓂᑐᐛ᙮ 12 ᐊᓐ ᓇᐸᐤ ᑎᒥᑦᕆᔭᔅ ᑲ ᐃᓯᓂᐧᑲᓱᑦ ᒥᓯᐛ ᐊᐛᔪᐛ ᒥᔽᒋᒥᑯᐤ᙮ ᓄᑯᓂᔪᐤ ᑕᑈ ᑕᑈᐅᓂᒡ ᐊ ᐃᓯ ᐱᒪᑎᓯᑦ᙮ ᑭᔭ ᓂᔾ ᓂ ᒥᔽᒋᒪᐤ᙮ ᒋ ᒋᔅᒐᔨᑕᓇᐛᐤ ᒪᒃ ᐊ ᑕᑈᒥᑲᒡ ᑕᓐ ᐊ ᐃᔅᒋᔄᔭᓐ᙮ ᒪᔅᑕᔾ ᐛᒋᔭᒧᐛᐅᓐ 13 ᓇᔅᒡ ᑕᑈ ᒥᔅᑎ ᑎᑯᓐ ᒐᒋ ᐎᑎᒪᑎᑯᒡ, ᒥᒄ ᒪᒃ ᓇᒪ ᓂ ᐎ ᒥᓯᓇᐊᓐ ᑕᓐ ᐛ ᐃᓯ ᐊᔨᒧᑎᒪᑎᑯᒡ᙮ 14 ᓂ ᐱᑯᓴᔨᑕᓐ ᐎᐱᒡ ᒐᒋ ᐛᐱᒥᑎᑯᒡ ᑭᔭ ᐅᑎᔅᑯᐤ ᒐᒋ ᐃᔨᒥᐃᑐᔭᐧᒄ᙮ 15 ᓂᑦ ᐊᔭᒥᐊᓐ ᒋᔭᒪᔨᑎᒧᐅᓐ ᒐᒋ ᐊᔭᔭᒄ᙮ ᒥᓯᐛ ᒋᐎᒐᐛᑭᓄᐛᐅᒡ ᒋ ᐛᒋᔭᒥᑯᐛᐅᒡ᙮ ᐎᑎᒧᐛᐧᑯᒡ ᒥᓯᐛ ᐸᐸᐃᒄ ᓂᐎᒐᐛᑭᓇᓐᒡ ᐊᓐᑕ ᐊ ᑕᔭᒄ ᐊ ᑕᒡ ᐊ ᐛᒋᔭᒥᒋᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.