2 ᑕᓴᓗᓂᔭᓇ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᔭᒥᐊᔅᑎᒧᐅᓇᓐ

¹ ᐊᐅᒄ ᐅ ᒪᔅᑕᔾ ᐛ ᐃᑎᑎᑯᒡ, ᓂᐧᑲᓂᓯᑐᒄ, ᐸᒋ ᐊᔭᒥᐊᔅᑎᒧᐅᓇᓐ ᒐ ᐊᑲ ᒋ ᒋᐱᒋᑕᑭᓄᐎᒡ ᐅᑎᐸᔨᒋᒐᐤ ᐅᒥᔽᒋᒧᐅᓐ᙮ ᐊᔭᒥᐊᒄ ᒐᒋ ᒥᓯᑕᐱᔨᒡ ᒧᔭᒻ ᒋᔨᐛᐤ ᐊᓐᑕ ᐊ ᑕᔭᒄ ᑲ ᐃᓯ ᒥᓯᑕᐱᔨᒡ᙮

² ᐸᒋ ᐊᔭᒥᐊᔅᑎᒧᐅᓇᓐ ᑭᔭ ᒐᒋ ᑭᓄᐛᔨᒥᔨᒥᑦ ᒋᓴᒪᓂᑐᐤ ᒐ ᐊᑲ ᒋ ᓂᓱᐅᓇᒋᐃᔨᒥᒡ ᐊᓐᒡ ᑲ ᒥᒐᑎᓯᒡ᙮ ᐛᔅ ᓇᒪ ᒥᓯᐛ ᐊᐛᓐ ᑕᑈᑎᒻ ᒥᔽᒋᒧᐅᓂᔪᐤ᙮

³ ᐃᑕᔨᑕᑯᓱᐤ ᒪᒃ ᐅᑎᐸᔨᒋᒐᐤ ᒐᒋ ᑕᑈᐅᒐᔨᒪᑭᓄᐅᑦ᙮ ᒋᑭ ᐃᑐᑕᑯᐛᐤ ᒐᒋ ᓱᒋᑲᐳᐅᐛᒄ ᑭᔭ ᒋᑭ ᒥᔪ ᑭᓄᐛᔨᒥᑯᐛᐤ ᒐ ᐊᑲ ᒋ ᓂᓱᐅᓇᒋᐃᑕᒄ ᒥᒋᒥᓂᑐᐤ᙮

⁴ ᐅᑎᐸᔨᒋᒐᐤ ᒪᒃ ᓂ ᐃᑐᑕᑯᓇᓐ ᒐᒋ ᑕᑈᐅᒐᔨᒥᑕᒡ᙮ ᓂ ᒐᔅᑎᓇᐅᓇᓐ ᐊ ᐃᑐᑎᒪᒄ ᐊᓐ ᑲ ᐃᓯ ᐎᑎᒪᑕᒡ ᑭᔭ ᒧᔅ ᒐ ᐃᑐᑎᒪᒄ᙮

⁵ ᓂ ᓂᑐᑎᒧᐛᓇᓐ ᐅᑎᐸᔨᒋᒐᐤ ᒐᒋ ᐎᒋᐃᑕᒄ ᐊᑐᐎᔅ ᒐᒋ ᒋᔅᒐᔨᑎᒺᒄ ᒋᓴᒪᓂᑐᐤ ᐅᓴᒋᐃᐛᐅᓐ᙮ ᑭᔭ ᒐᒋ ᓯᐱᔨᐛᓱᐛᒄ ᐊ ᓂᒋᔅᑭᒪᒄ ᐊ ᐊᔨᒪᒡ ᒧᔭᒻ ᙭ ᑲ ᐃᓯ ᓯᐱᔨᐛᓯᑦ᙮

ᐊᑐᔅᒐᒄ, ᐊᑲᐎᔾ ᒋᑎᒥᒄ 2 Thessalonians 3.6-13 (Proper-28 Year C)

⁶ ᓂᐧᑲᓂᓯᑐᒄ, ᒋᑦ ᐃᑎᓱᒥᑎᓇᓐ ᐅᑎᐸᔨᒋᒐᐤ ᒋᓴᔅ ᙭ ᐅᑦ ᐃᓯᓂᐧᑲᓱᐅᓐ ᐅᒋ, ᐊᑲᐎᔾ ᐊᐱᑕᔨᒪᐧᑯᒡ ᐊᓐᒡ ᐊᐛᓐᒋ ᐊᑲ ᓇᔅᒡ ᒐᒂᓂᒡ ᐃᑕᐱᑎᓯᒡ ᑭᔭ ᐊᑲ ᐊᐱᑕᔨᑕᒡ ᑕᓐ ᑲ ᐃᓯ ᒋᔅᑯᑎᒪᑕᒡ᙮

⁷ ᒋ ᒥᔪ ᒋᔅᒐᔨᑕᓇᐛᐤ ᑭᔭ ᒋᔨᐛᐤ ᒐᒋ ᐃᑎᔭᒄ ᑕᓐ ᑲ ᑎᔭᒡ ᐊᓐᑕ ᐊ ᑕᔭᒄ ᑲᒋ ᑕᔭᒡ᙮ ᓇᒪ ᓂ ᐅᒋ ᒋᑎᒥᓇᓐ᙮

⁸ ᓇᒪ ᓂ ᐅᒋ ᐱᔅᑎᓇᓇᓐᒡ ᐊᐛᓐᒋ ᒐᒋ ᐊᓯᒥᔨᒥᒡ ᐊᑲ ᐛᐛᒡ ᒋᓯᐧᑯᐅᒋᒡ᙮ ᐃᔭᐱᒡ ᓂᒋ ᒥᔅᑎ ᐊᑐᔅᒐᓇᓐ ᐊ ᒋᓯᑲᒡ ᑭᔭ ᐊ ᑎᐱᔅᑲᒡ ᒐ ᐊᑲ ᒋ ᐊᔨᒥᐃᑕᒡ᙮

⁹ ᐊᐅᒄ ᑲ ᑎᔭᒡ᙮ ᐊᑎ ᐃᓯᓇᒂᒡ ᒐᒋ ᓂᑐᑎᒪᑕᒡ ᒐᒋ ᐱᒥᐱᔨᐃᔨᐊᒡ ᓇᒪ ᒋ ᐅᒋ ᓂᑐᐛᔨᑎᒪᑎᓇᓐ ᒐᒂᓐ᙮ ᐛᔅ ᔅᒋ ᐎ ᐛᐸᑎᔨᑎᓇᓐ ᑕᓐ ᒋᐸ ᐃᑕᑎᓯᓇᐛᐤ ᑭᔭ ᒋᔨᐛᐤ᙮

¹⁰ ᐊᓐᑕ ᐊ ᑕᔭᒄ ᑲᒋ ᑕᔭᒡ ᐊᐅᑯᓐ ᑲᒋ ᐃᑎᑕᒡ ᒪᓐ, “ᐊᐛᓐ ᐊᑲ ᐎ ᐊᑐᔅᒐᑦ ᓇᒪ ᒋᐸ ᐅᒋ ᒥᔭᑭᓄᐤ ᒐᒋ ᒥᒋᓱᐅᑦ᙮”

¹¹ ᐊᐅᒄ ᐅ ᐛᒋ ᐃᑎᑕᒡ ᐛᔅ ᓂᒋ ᐸᑕᓇᓐ ᐊ ᑕᒡ ᐊᓐᑕ ᐊ ᑕᔭᒄ ᐱᔅᒐ ᐊᑲ ᓇᔅᒡ ᐎᔭᔅ ᐃᑕᐱᑎᓯᒡ ᒥᒄ ᐊ ᐃᔨᒥᑐᑐᐛᒡ ᐊᐛᔪᐛ᙮

¹² ᓂᓯᒋᒪᓇᓂᒡ ᐅᒡ ᐊᐛᓐᒋ ᑭᔭ ᓂᑦ ᐃᔭᒂᒥᒪᓇᓂᒡ ᐅᑎᐸᔨᒋᒐᐛ ᒋᓴᓴ ᐊ ᑕᔨᒋ ᐃᓯ ᐊ ᐃᑎᒋᒡ, ᒋᔭᒻ ᐃᓯ ᐱᒪᑎᓯᒄ ᑭᔭ ᐊᑐᔅᒐᒄ ᐊᓐᑕ ᒐᒋ ᐅᒋ ᐱᒥᓂᑎᓱᔭᒄ᙮

¹³ ᒥᓯᐛ ᓂᐧᑲᓂᓯᑐᒄ ᒋᑦ ᐃᑎᓇᐛᐤ, ᐊᑲᐎᔾ ᐱᒋᔅᑲᒋᒄ ᐊ ᒥᔪᑐᑎᒪᒄ᙮

¹⁴ ᐊᐛᓐ ᐊᑕᒂ ᐊᓐᑕ ᐊ ᑕᔭᒄ ᐊᑲ ᐎ ᓂᓇᐃᑕᐧᒃ ᑕᓐ ᑲ ᐃᓯ ᒥᓯᓇᐊᒪᑕᒡ ᒋᔅᒋᓯᑐᑐᐛᐧᒄ᙮ ᐊᑲᐎᔾ ᐊᐱᑕᔨᒪᐧᒄ ᑭᔭ ᒐ ᓯᓴᒂᔨᒧᑦ᙮

¹⁵ ᒥᒄ ᐊᑲᐎᔾ ᐃᑐᑐᐛᐧᒄ ᒧᔭᒻ ᐊ ᐛᐧᑲᑕᒄ, ᐃᔭᐱᒡ ᒋᐸ ᐃᔭᒂᒪᐛᐤ ᐊ ᐎᐧᑲᓂᓯᑐᐛᒄ᙮

ᑈᓪ ᒪᔅᑕᔾ ᑲ ᐃᓯ ᐎᑎᒧᐛᑦ

¹⁶ ᓂᑦ ᐊᔭᒥᐊᓇᓐ ᐅᑎᐸᔨᒋᒐᐤ ᐎᔾ ᐊ ᑕᑦ ᐛᒋᐱᔨᒡ ᒋᔭᒪᔨᑎᒧᐅᓂᔪᐤ, ᒧᔅ ᒋᔭᒪᔨᑎᒧᐅᓂᔪᐤ ᒐᒋ ᒥᔨᑕᒄ ᒥᒄ ᑕᓐ ᐊ ᐃᔅᐱᔨᐛᒄ᙮ ᐅᑎᐸᔨᒋᒐᐤ ᒧᔅ ᒋᑭ ᐎᒐᐅᑯᐛᐤ᙮

¹⁷ ᓂᔾ ᑈᓪ ᒋ ᒥᓯᓇᐊᒪᑎᓇᐛᐤ᙮ ᐊᐅᒄ ᐊ ᐃᓯᓇᒂᒡ ᓂᔾ ᐊ ᒥᓯᓇᐅᓱᔭᓐ᙮

¹⁸ ᒋᑦ ᐊᔭᒥᐊᔅᑎᒪᑎᓇᐛᐤ ᒥᓯᐛ ᒐᒋ ᒥᔪᑐᑕᑕᒄ ᒋᑎᐸᔨᒋᒐᓯᒥᓄᐤ ᒋᓴᔅ ᙭᙮