2 ᑕᓴᓗᓂᔭᓇ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑲ ᒪᔭᑎᓯᑦ ᒐ ᓄᑯᐊᑭᓄᐅᑦ 2 Thessalonians 2.1-5,13-17 (Proper-27 Year C) 1 ᓂᐧᑲᓂᓯᑐᒄ, ᒋᑭ ᐊᔨᒧᑎᒪᑎᓇᐛᐤ ᑕᓐ ᒐ ᐃᔅᐱᔨᒡ ᐅᑎᐸᔨᒋᒐᐤ ᒋᓴᔅ ᙭ ᑎᑯᓯᒐ ᒪᒧᐅᔭᒂ ᐊᓐᑕ ᐎᔾ ᐊ ᑕᑦ᙮ ᒋ ᓂᑐᐛᔨᒥᑎᓇᐛᐤ ᓂᐧᑲᓂᓯᑐᒄ, 2 ᒐ ᐊᑲ ᒋ ᐎᔭᓯᐃᑕᑯᒡ ᐊᐛᓐᒋ ᐊ ᐃᔅᒋᔄᒡ ᓴᔅ ᐊ ᐅᑎᒋᐱᔨᒡ ᐅᑎᐸᔨᒋᒐᐛ ᒐ ᑎᑯᓯᓂᔨᒋ᙮ ᐊᑲᐎᔾ ᑕᑈᑎᒧᒄ ᐊᑎ ᐃᔅᒋᔄᒐ ᐊᐛᓐ ᒋᓴᒪᓂᑐᐛ ᐊᒋ ᒋᔅᒐᔨᑎᒥᐃᑯᑦ ᐅᔭ, ᒪᒃ ᐃᔅᒋᔄᒐ ᐊᐛᓐ ᓂᔭᓐ ᐊᒋ ᐎᑎᒧᐅᒋᒡ ᐅᔭ ᒪᒃ ᐃᔅᒋᔄᒐ ᐊᒋ ᐃᔨᒥᑕᒡ ᒥᓯᓇᐃᑭᓂᔪᐤ ᓂᔭᓐ ᐊᒋ ᒥᓯᓇᐃᒐᐅᒋᒡ ᐅᔭ ᐊ ᐊᔨᒧᑎᒧᒋᒡ᙮ 3 ᐃᔭᒂᒥᒄ ᐊᑲ ᓇᔅᒡ ᒐᒋ ᐎᔭᓯᐃᑕᑯᒡ ᐊᐛᓐᒋ᙮ ᐊᔅᒄ ᐊᑲ ᐅᑎᒋᐱᔨᒐ ᐊᓐ ᐊ ᒋᓯᑲᒡ ᒥᒐᑦ ᐊᐛᓐᒋ ᒪᔅᑕᔾ ᒋᑭ ᓱᒐᔨᒧᑐᐛᐅᒡ ᒋᓴᒪᓂᑐᐛ᙮ ᑭᔭ ᒋᑭ ᓄᑯᐊᑭᓄᐤ ᐊᓐ ᐊᐛᓐ ᑲ ᒪᔭᑎᓯᑦ ᐊᑲ ᓇᔅᒡ ᑲ ᐊᐱᑕᔨᑎᒺᑦ ᒋᓴᒪᓂᑐᐛ ᐅᐎᓱᐛᐅᓂᔪᐤ, ᐊᔪᐅᒄ ᐅᔭ ᒋᓴᒪᓂᑐᐤ ᐊᓐᑕ ᒥᒋ ᐃᔅᑯᑕᒡ ᒐ ᐃᑎᓴᐛᑦ ᒐᒋ ᓂᓱᐅᓇᑎᓯᔨᒋ᙮ 4 ᒥᓯᐛ ᒐᒂᔪᐤ ᑲ ᐃᑐᑕᑯᔨᒋ ᐊᐛᔪᐛ ᒐᒋ ᐊᔭᒥᐊᔅᑐᐛᔨᒋ ᒋᓴᒪᓂᑐᐛ ᒪᒃ ᒋᓴᒪᓂᑐᐛ ᐊ ᑕᔨᒋ ᐊ ᐅᒋᐱᔨᒡ ᐊ ᐃᑕᔨᑕᑯᓂᔨᒡ ᒋᑭ ᒪᓯᑕᐤ᙮ ᐊᔪᐅᒄ ᐅᔭ ᒐ ᐃᑎᑦ ᐊ ᓂᑐᐛᔨᑕᐧᒃ ᐎᔾ ᓇᔅᒡ ᒐᒋ ᒋᔅᑕᔨᑕᑯᐊᑭᓄᐅᑦ᙮ ᐛᐛᒡ ᒋᑭ ᐱᒐᐤ ᐊᓐᑕ ᒋᓴᒪᓂᑐᐛ ᐅᒋᓴᐊᔭᒥᐊᐅᒋᐛᐱᒡ ᐊᑯ ᒐ ᐃᔅᒋᔄᑦ ᐎᔾ ᐊ ᒋᓴᒪᓂᑐᐅᑦ᙮ 5 ᓇᒪᐎᔾ ᐊ ᒋ ᒋᔅᒋᓯᓇᐛᐤ ᓴᔅ ᒥᓯᐛ ᐊᒋ ᐎᑎᒪᑎᑯᒡ ᐅ ᒪᒂᒡ ᐊᓐᑕ ᐊ ᑕᔭᒄ ᑲ ᑕᔭᓐ᙮ 6 ᐊᓐ ᐊᐛᓐ ᑲ ᐊᔨᒧᒥᒃ ᐊᑲ ᓇᔅᒡ ᑲ ᐊᐱᑕᔨᑎᒺᑦ ᒋᓴᒪᓂᑐᐛ ᐅᐎᓱᐛᐅᓂᔪᐤ, ᒋ ᒋᔅᒐᔨᑎᒺᓇᐛᐤ ᒐᒂᔪᐤ ᒥᔭᒪᒋᑯᓂᑯᑦ ᐛᒋ ᐊᑲ ᐊᔅᒄ ᐱᔅᑎᓇᑭᓄᐅᑦ ᒐᒋ ᓄᑯᓯᑦ᙮ 7 ᐛᔅ ᐊᓐ ᒥᒐᑎᓯᐅᓐ ᑲ ᒪᒥᔅᑲᑕᔨᑕᒂᒡ ᓴᔅ ᐊᑐᔅᒐᒥᑭᓐ ᒥᒄ ᒪᒃ ᐊᓐ ᑕᓐ ᐊᔅᒄ ᒐ ᐃᔅᐱᔨᒡ ᓇᒪ ᐸᑎᒪ ᒋᑭ ᐅᒋ ᐃᔅᐱᔪᐤ ᐸᑐᔅ ᒋ ᐃᒐᓇᑭᓄᒐ ᐊᓐ ᑲ ᐅᑎᒥᐃᐛᑦ᙮ 8 ᐊᑯ ᒪᒃ ᒐ ᓄᑯᐊᑭᓄᐅᑦ ᐊᐛᓐ ᒋᒋᐛ ᐊ ᐊᐎᔨᑦ ᐊᓐ ᐊᑲ ᓇᔅᒡ ᑲ ᐊᐱᑕᔨᑎᒺᑦ ᒋᓴᒪᓂᑐᐛ ᐅᐎᓱᐛᐅᓂᔪᐤ᙮ ᒥᒄ ᒪᒃ ᐃᔅᐱ ᑎᑯᓯᒐ ᐅᑎᐸᔨᒋᒐᐤ ᒋᓴᔅ ᐎᔾ ᒋᑭ ᓂᐸᐊᐤ ᐅᔭᔭᐅᓐ ᐊ ᐊᐱᒋᑕᑦ᙮ ᓇᔅᒡ ᒋᑭ ᓂᓱᐅᓇᒋᐊᐤ ᐃᔅᐱ ᑎᑯᓯᒐ ᐅᒋᔅᑕᔨᑕᑯᓱᐅᓂᒡ᙮ 9 ᐊᔅᒄ ᒪᒃ ᐊᑲ ᐃᔅᐱᔨᒡ ᐅ ᐊᓐ ᐊᑲ ᓇᔅᒡ ᑲ ᐊᐱᑕᔨᑎᒺᑦ ᒋᓴᒪᓂᑐᐛ ᐅᐎᓱᐛᐅᓂᔪᐤ ᒥᒋᒥᓂᑐᐛ ᒋᑭ ᒥᔨᑯᐤ ᓱᐧᑲᑎᓯᐅᓂᔪᐤ᙮ ᒪᒥᔅᑲᒡ ᐛᐸᑎᔨᐛᐅᓇ ᒋᑭ ᐛᐸᑎᔨᐛᐤ ᑭᔭ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ ᒋᑭ ᐃᑐᑎᒻ᙮ ᐊᔪᐅᒄ ᐅᔭ ᒐ ᐃᑎᑦ ᒐᒋ ᐅᒋ ᐎᔭᓯᐊᑦ ᐊᐛᔪᐛ᙮ 10 ᒥᓯᐛ ᓂᓇᐧᑯᐤ ᒋᑭ ᐃᓯ ᒥᒋ ᐎᔭᓯᐊᐤ ᐊᓂᔭᔪᐛ ᒐ ᓂᓱᐅᓇᑎᓯᔨᒋ᙮ ᒋᑭ ᓂᓱᐅᓇᑎᓯᔪᐛ ᐊᑲ ᐅᒋ ᐎ ᓴᒋᑕᔨᒋ ᑕᑈᐅᓂᔪᐤ ᐊᓐᑕ ᒐᒋ ᐅᒋ ᐱᒪᒋᐅᔨᒋ᙮ 11 ᐊᐅᒄ ᒪᒃ ᐅᔭ ᐛᒋ ᐱᔅᑎᓇᐧᒃ ᒋᓴᒪᓂᑐᐤ ᒐᒋ ᓱᒐᔨᑕᑯᓂᔨᒡ ᐊ ᐃᓯ ᐎᔭᓯᐊᑭᓄᐎᒡ ᐊᓐᑕ ᒐᒋ ᐅᒋ ᑕᑈᑕᒡ ᑭᑭᒋᔭᐅᓂᔪᐤ᙮ 12 ᐊᑯ ᒪᒃ ᒥᓯᐛ ᐊᐛᓐᒋ ᐊᑲ ᐅᒋ ᑕᑈᑕᒡ ᑕᑈᐅᓂᔪᐤ, ᐅᔅᑕ ᑲ ᒥᔽᔨᑕᒡ ᐊ ᒥᒐᑎᓯᒡ ᐊᐅᑯᓐᒡ ᐅᒡ ᒐ ᓂᓱᐅᓇᒋᒪᑭᓄᐎᒡ᙮ ᒋᓴᒪᓂᑐᐤ ᔅᒋ ᐅᑎᓂᑯᐛᐤ ᒐᒋ ᐱᒪᒋᐃᑯᐅᔭᒄ 2 Thessalonians 2.1-5,13-17 (Proper-27 Year C) 13 ᐃᑕᔨᑕᑯᓐ ᒧᔅ ᒐᒋ ᓂᓇᔅᑯᒥᒋᒡ ᒋᓴᒪᓂᑐᐤ ᒋᔨᐛᐤ ᐅᒋ, ᒋᔨᐛᐤ ᑲ ᓴᒋᐃᑕᒄ ᐅᑎᐸᔨᒋᒐᐤ᙮ ᐛᔅ ᓴᔅ ᔅᒋ ᐅᑎᓂᑯᐛᐤ ᒋᓴᒪᓂᑐᐤ ᒐᒋ ᐱᒪᒋᐅᐛᒄ ᐊᔅᒄ ᐊᑲ ᐛᐛᒡ ᐅᒋ ᐅᓯᑕᑦ ᐅᔭ ᐊᔅᒋᔪᐤ᙮ ᒋᑭ ᐱᒪᒋᐅᓇᐛᐤ ᒪᒃ ᐛᔅ ᒋᓴᒪᓂᑐᐤ ᑲ ᓱᒐᔨᑕᑯᓯᔨᒋ ᐅᑦ ᐊᒐᒂ ᒋᑭ ᑐᑕᑯᐛᐤ ᒋᓴᒪᓂᑐᐤ ᒐᒋ ᐅᑦ ᐃᔨᒥᑐᑕᑕᒄ ᐛᔅ ᒋ ᑕᑈᑕᓇᐛᐤ ᑕᑈᐅᓐ᙮ 14 ᒋᓴᒪᓂᑐᐤ ᔅᒋ ᐅᑎᓂᑯᐛᐤ ᒐᒋ ᑕᑈᑎᒪᒄ ᑕᑈᐅᓐ ᐃᔅᐱ ᑲ ᐎᑎᒪᑕᒡ ᒥᔽᒋᒧᐅᓐ᙮ ᔅᒋ ᐅᑎᓂᑯᐛᐤ ᒐᒋ ᐊᔭᐛᒄ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᒋᔅᑕᔨᑕᑯᓱᐅᓐ᙮ 15 ᐊᑯ ᒪᒃ ᓂᐧᑲᓂᓯᑐᒄ, ᓱᒃ ᓱᒋᑲᐳᐅᒄ ᒋᑕᑈᑎᒧᐅᓄᐛᒡ ᑭᔭ ᒥᒪᒋᒥᓂᒧᒄ ᑕᓐ ᑲ ᐃᓯ ᒋᔅᑯᑎᒪᑕᒡ ᑲ ᑭᒐᔅᒋᒥᑕᒡ ᑭᔭ ᑕᓐ ᑲ ᐃᓯ ᒥᓯᓇᐊᒪᑕᒡ᙮ 16 ᒋᓴᒪᓂᑐᐤ ᒍᑕᐎᓄᐤ ᑭᔭ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᒋᓴᒋᐃᑯᓄᐅᒡ ᑭᔭ ᔅᒋ ᒥᔨᑯᓄᐅᒡ ᑲᒋᒡ ᒥᔽᔨᒧᐅᓂᔪᐤ ᑭᔭ ᐊᔅᐸᔨᒧᐅᓂᔪᐤ ᓱᐛᔨᒋᒐᐅᓂᒡ ᐅᒡ᙮ 17 ᓂᑐᑎᒧᐛᓇᓂᒡ ᒐᒋ ᒥᔽᔨᒧᐃᑯᐅᔭᒄ ᑭᔭ ᒐᒋ ᓱᒋᑲᐳᐅᔭᒄ ᒥᓯᐛ ᑕᓐ ᐊ ᐃᓯ ᒥᔪᑐᑎᒪᒄ ᑭᔭ ᑕᓐ ᐊ ᐃᓯ ᐃᔨᒥᔭᒄ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.