2 ᑯᕆᓐᑎᔭᓇ 9 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᐊ ᑎᒂᒡ ᓱᐛᔨᒋᒐᐅᓐ ᐊ ᒥᔨᐛᓄᐅᒡ 1 ᓇᒪ ᐊᑎᓇᔅᒡ ᓂᑐᐛᔨᑕᑯᓐ ᒐᒋ ᐊᔨᒧᑎᒪᑎᑯᒡ ᐊ ᐱᔅᑎᓂᒐᓄᒡ ᐊᓐᑕ ᐊ ᐅᒋ ᐎᒋᐊᑭᓄᐎᒡ ᐊᓐᒡ ᑲ ᑕᑈᑕᒡ ᒍᑎᔭᒡ ᑲ ᑕᒡ᙮ 2 ᒋ ᒋᔅᒐᔨᒥᑎᓇᐛᐤ ᑭᑈ ᓇᔅᒡ ᐊ ᐊᓯᒐᔨᑎᒪᒄ ᒐᒋ ᐎᒋᐊᑯᒡ᙮ ᔅᒋ ᐊᔨᒧᒥᑎᓇᐛᐤ ᒪᒃ ᐊᓐᑕ ᒪᓯᑐᓂᔭᒡ ᑲ ᐃᑎᒂᐤ ᐊᓐᒡ ᐃᔪᒡ, “ᒋᐧᑲᓂᓯᓄᐅᒡ ᐊᑲᔭ ᐊ ᐃᓯᓂᐧᑲᑕᔨᒡ ᐊᔅᒋᔪᐤ ᐊ ᑕᒡ, ᓴᔅ ᐸᐳᓂᔨᒡ ᒋ ᐊᔭᔅᑯᐎᔪᐅᒡ ᒐᒋ ᐱᔅᑎᓂᒐᒡ ᓱᓇᔭᔪᐤ᙮” ᑲ ᐸᑕᒡ ᐅᔭ ᓇᔅᒡ ᒋ ᐃᑕᔨᑎᒧᒡ ᑭᔭ ᐎᔨᐛᐤ ᒐᒋ ᐱᔅᑎᓂᒐᒡ᙮ 3 ᑕᐅᒡ ᐅᒡ ᒋᐧᑲᓂᓯᓄᐅᒡ ᐊ ᐃᑎᓴᐊᒪᑎᑯᒡ ᒐᒋ ᐅᑎᓇᒡ ᐊᓂᔭ ᓱᓇᔭᔪᐤ ᑲ ᐱᔅᑎᓂᒺᒄ ᐊ ᐎᒋᐊᑭᓄᔨᒋ ᐊᓂᔭ ᑲ ᑕᑈᑎᒥᔨᒋ ᐊᓐᑕ ᒋᕈᓯᓕᒥᒡ ᑲ ᑕᔨᒋ᙮ ᐛᐸᑎᔨᐛᒄ ᑕᑈ ᐊ ᐃᓯᓇᒂᒡ ᑕᓐ ᑲ ᐃᑕᒋᒥᑕᒡ ᓇᔅᒡ ᐊ ᐊᓯᒐᔨᑎᒪᒄ ᒐᒋ ᐎᒋᐃᐛᔭᒄ ᑭᔭ ᒋᔨᐛᐤ᙮ 4 ᐊᔅᒄ ᒪᒃ ᒐ ᐊᑲ ᐊᔭᔅᑯᐎᐛᒂ ᒐᒋ ᐱᔅᑎᓂᒪᒄ ᓱᓇᔭᐤ ᐅᑎᑎᑕᒐ, ᑭᑈ ᐃᐛᒃ ᒐ ᓴᒂᔨᒧᐃᔭᒡ ᑭᔭ ᒋᔨᐛᐤ ᒪᒃ ᐃᐛᒃ ᒋᑭ ᓴᒂᔨᒧᓇᐛᐤ᙮ ᐛᔅ ᓇᔅᒡ ᑕᑈ ᓂᒋ ᒐᔅᑎᓇᐅᓐ ᒥᒄ ᒐ ᐃᓯ ᐱᔅᑎᓂᒐᔭᒄ᙮ 5 ᐊᐅᒄ ᐅ ᐛᒋ ᓂᑲᓐ ᐃᑎᓴᐊᒪᑎᑯᒡ ᐅᒡ ᓂᐧᑲᓂᓯᒡ, ᒋᑭ ᒋ ᐎᒋᐃᑯᐛᐅᒡ ᒐᒋ ᐊᔭᔅᑯᐅᓂᒺᒄ ᐊᓂᔭ ᓱᓇᔭᔪᐤ ᑲ ᐃᔅᒋᔄᐛᒄ ᒐ ᐱᔅᑎᓂᒺᒄ᙮ ᐛᐸᑎᒪᓇ ᒪᒃ ᓴᔅ ᐊᒋ ᐊᔭᔅᑯᓂᒪᒄ ᐊᓐ ᒋᐱᔅᑎᓂᒐᐅᓄᐛᐤ ᑎᑯᓯᓂᔭᓇ ᐊᑯᑕ ᒐ ᓂᔅᑐᓇᒂᒡ ᐊᑲ ᐊᔨᐧᑭᒻ ᐅᒋ ᐱᔅᑎᓂᒐᔭᒄ ᒪᒃ ᐊᒋ ᓯᒋᔭᓯᔭᒄ ᒐᒋ ᒥᔨᐛᔭᒄ᙮ 6 ᒪᐅ ᒐ ᐎ ᒋᔅᒋᓯᔭᒄ, ᐊᓐ ᒥᒄ ᐊᐱᓯᔅ ᑲ ᓂᑕᐅᒋᑕᒐᑦ ᒥᒄ ᐊᐱᓯᔅ ᒐᒂᔪᐤ ᒋᑭ ᓂᑕᐅᒋᓂᔪᐤ ᐊᑯ ᐊᓐ ᒥᔅᑎ ᑲ ᓂᑕᐅᒋᑕᑦ ᒥᔅᑎ ᒐᒂᔪᐤ ᒋᑭ ᓂᑕᐅᒋᓂᔪᐤ᙮ 7 ᒥᓯᐛ ᐸᐸᐃᒄ ᐊᐛᓐ ᒥᒄ ᑕᓐ ᑲ ᐃᑕᔨᑕᐧᒃ ᐅᑕᐃᒡ ᒐ ᐃᔅᐱᔅ ᐱᔅᑎᓂᒐᑦ ᐊᐅᑯᓐ ᒋᐸ ᐃᔅᐱᔅ ᐱᔅᑎᓂᒐᐤ᙮ ᓇᒪ ᒋᐸ ᐅᒋ ᒪᒪᓯᐤ ᑭᔭ ᓇᒪ ᐊᐃᓴᒡ ᒋᐸ ᐅᒋ ᐱᔅᑎᓂᒐᐤ᙮ ᒋᓴᒪᓂᑐᐤ ᓇᔅᒡ ᓴᒋᐊᐤ ᐊᓂᔭ ᐊᐛᔪᐛ ᑲ ᒥᔽᔨᑎᒥᔨᒋ ᐊ ᐱᔅᑎᓂᒐᔨᒋ᙮ 8 ᒋᑭ ᒋ ᐃᑐᑎᒻ ᒋᓴᒪᓂᑐᐤ ᐊᑐᐎᔅ ᒐᒋ ᐃᔅᐱᔅ ᒥᔨᑕᒄ ᑕᑥᐤ ᐊ ᓱᐛᔨᒥᑕᒄ, ᑭᔭ ᒧᔅ ᒐ ᐊᔭᔭᒄ ᑕᓐ ᒐ ᐃᓯ ᓂᑐᐛᔨᑎᒧᐛᐛᒂ᙮ ᐊᑐᐎᔅ ᒋᑭ ᐃᔅᐱᔅ ᒥᔨᑯᐛᐤ ᑯᑎᑭᒡ ᐊᐛᓐᒋ ᒐᒋ ᐎᒋᐊᑯᒡ᙮ 9 ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᐊᓐ ᐊᐛᓐ ᑲ ᐛᔪᐅᒡ ᐎᒋᐊᑦ ᐊᓂᔭ ᑲ ᒋᔅᑎᒪᑎᓯᔨᒋ ᑲᒋᒡ ᒋᑭ ᒋᔅᒋᓯᓇᓄᔪᐤ ᐅᒥᔪᑐᑎᒪᒐᐅᓐ᙮ 10 ᒋᓴᒪᓂᑐᐤ ᐊᐅᒄ ᒪᔭᑦ ᓂᑕᐅᒋᒐᓱᐛ ᒐᒂᔪᐤ ᒐ ᓂᑕᐅᒋᑕᔨᒋ᙮ ᐎᔾ ᑭᔭ ᐊᓯᒪᐤ ᒥᓯᐛ ᐊᐛᔪᐛ᙮ ᑭᔭ ᒋᔨᐛᐤ ᒪᒃ ᒋᑭ ᐛᔪᐅᒡ ᒥᔨᑯᐛᐤ ᒥᒐᑦ ᐊᐛᓐᒋ ᒐᒋ ᐎᒋᐊᑯᒡ᙮ ᐊᑯ ᒪᒃ ᐅ ᐊ ᐃᓯ ᒥᔪᑐᑎᒪᒐᔭᒄ ᒥᒐᑦ ᐊᐛᓐᒋ ᒥᔅᑎ ᒋᑭ ᒥᔪᑐᑎᒪᑯᐅᒡ ᒋᓴᒪᓂᑐᐛ᙮ 11 ᑭᔭ ᒋᔨᐛᐤ ᒪᒃ ᓇᔅᒡ ᑕᑈ ᓂᓇᐧᑯᐤ ᒋᑭ ᐃᓯ ᐛᔪᐅᒡ ᒥᔨᑯᐛᐤ ᒋᓴᒪᓂᑐᐤ ᑭᔭ ᓂᓇᐧᑯᐤ ᒐᒋ ᐃᓯ ᒥᔭᑯᒡ ᑯᑎᑭᒡ᙮ ᐊᑯ ᒪᒃ ᒐ ᒥᒐᑎᒡ ᐊᓐᒡ ᒐ ᓂᓇᔅᑯᒪᒡ ᒋᓴᒪᓂᑐᐛ ᐃᔅᐱ ᒥᔅᑲᒂᐛ ᐊᓂᔭ ᒋᐱᔅᑎᓂᒐᐅᓄᐛᐅᔪᐤ᙮ 12 ᐅᔭ ᒪᒃ ᐊ ᐃᓯ ᒥᔪᑐᑎᒧᐛᑯᒡ ᑲ ᑕᑈᑕᒡ ᐊ ᒥᔭᑯᒡ ᑕᓐ ᐊ ᐃᓯ ᓄᑕᐱᔨᒡ ᐊᑯᑕ ᐛᒋᐱᔨᒡ ᒥᔅᑎ ᒐᒋ ᓂᓇᔅᑯᒪᒡ ᒋᓴᒪᓂᑐᐛ᙮ 13 ᑭᔭ ᒋᑭ ᒋᔅᑕᒋᒪᐅᒡ ᒋᓴᒪᓂᑐᐛ ᐛᐸᑕᒂᐛ ᐊ ᓄᑯᓂᔨᒡ ᑕᑈ ᐊ ᑕᑈᑎᒪᒄ ᑭᔭ ᐊ ᓂᓇᐃᑎᒺᒄ ᒋᓴᔅ ᙭ ᐅᒥᔽᒋᒧᐅᓐ᙮ ᑭᔭ ᒋᑭ ᒋᔅᑕᒋᒪᐅᒡ ᒋᓴᒪᓂᑐᐛ ᐊᓂᔭ ᑕᓐ ᑲ ᐃᔅᐱᔅ ᐎᒋᐊᑯᒡ ᑭᔭ ᑕᓐ ᑲ ᐃᔅᐱᔅ ᐎᒋᐃᒪᑯ ᑯᑎᑲ ᐊᐛᔪᐛ᙮ 14 ᑲ ᐃᔅᐱᔅ ᒋ ᐛᔪᐅᒡ ᓱᐛᔨᒥᑕᒄ ᒋᓴᒪᓂᑐᐤ ᒋᑭ ᓴᒋᐃᑯᐛᐅᒡ ᑭᔭ ᒋᑭ ᐊᔭᒥᐊᔅᑎᒪᑯᐛᐅᒡ᙮ 15 ᓂᓇᔅᑯᒪᑕᐤ ᒋᓴᒪᓂᑐᐤ ᐊᓂᔭ ᐅᒥᔨᐛᐅᓐ᙮ ᓇᒪ ᐊᓐ ᒋ ᐎᑕᑭᓄᐅᔪᐤ ᐊ ᐃᔅᐱᔅ ᒥᔽᔨᑕᑯᓂᔨᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.