2 ᑯᕆᓐᑎᔭᓇ 6 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊ ᐃᓯ ᐊᔨᒥᐅᑦ ᐊᐛᓐ ᙭ᑕ ᐊ ᐊᑐᔅᑯᐛᑦ 2 Corinthians 6.1-13 (Proper-7 Year B)

¹ ᐊᓐ ᒪᒃ ᐊ ᒪᒧᐤ ᐊᑐᔅᑯᐅᒋᒡ ᒋᓴᒪᓂᑐᐤ ᒋ ᓂᑐᑎᒪᑎᓇᓐ ᒐ ᐊᑲ ᒋ ᐃᓯᓇᑯᓯᔭᒄ ᐊᑲ ᐊ ᐊᐱᑕᔨᑎᒪᒄ ᑕᓐ ᐊ ᐃᓯ ᒋᓴᐛᑐᑕᑕᒄ ᒋᓴᒪᓂᑐᐤ᙮

² ᐛᔅ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐃᑎᔅᑕᐤ ᐊᒋ ᐃᔅᒋᔄᑦ, ᐊᓐᑕ ᑲ ᐃᑕᔨᑎᒥᐃᑯᔭᓐ ᒐᒋ ᓂᑐᑕᑕᓐ ᔅᒋ ᓂᑐᑕᑎᓐ ᐊ ᐊᔭᒥᐊᔨᓐ᙮ ᐊᓐᑕ ᑲ ᓂᑐᐛᔨᑎᒥᓐ ᐎᒋᐃᑯᓯᐅᓐ ᐊᑯᑕ ᑲ ᐱᒪᒋᐃᑕᓐ᙮ ᐊᐅᒄ ᐅᔭ ᑲ ᐃᔅᒋᔄᑦ ᒋᓴᒪᓂᑐᐤ ᑭᔭ ᓂᔾ ᐛᑎᒪᑕᓐ, ᐊᓄᒡ ᓇᐃᐱᔪᐤ ᒐᒋ ᐱᒪᒋᐅᔨᓐ᙮ ᐊᓄᒡ ᐱᒪᒋᐃᐛᐤ ᒋᓴᒪᓂᑐᐤ᙮

³ ᓇᒪ ᓂᑐᐛᔨᑕᓇᓐ ᓂᑎᒥᒄ ᒐᒋ ᐃᓯ ᐱᔅᑎᓇᑭᓄᐅᒡ ᑕᓐ ᐊ ᐃᓯ ᐊᑐᔅᑯᐅᒋᒡ ᒋᓴᒪᓂᑐᐤ ᑭᔭ ᓱᒃ ᒂᒋᑕᔭᒡ ᒐ ᐊᑲ ᒋ ᐃᓯ ᐱᒪᑎᓯᔭᒡ ᒐᒋ ᒋᐱᔅᑲᑯᑦ ᐊᐛᓐ ᒐᒋ ᐱᒪᒋᐅᑦ᙮

⁴ ᒥᒄ ᑕᓐ ᐊ ᐃᑐᐛᒐ ᓱᒃ ᓂ ᐎ ᓂᔅᑐᓇᑯᐃᓱᓇᓐ ᑕᑈ ᐊ ᐊᑐᔅᑯᐅᒋᒡ ᒋᓴᒪᓂᑐᐤ᙮ ᓱᒃ ᓂᓯᐱᔪᐛᓯᔅᑕᓇᓐ ᑕᓐ ᐊ ᐃᓯ ᐊᔨᒥᐅᔭᒡ᙮ ᓂ ᓂᓇᐧᑲᑕᔨᒧᐃᑯᐅᓇᓐ᙮ ᓂ ᓂᓇᐧᑲᒋᐃᑯᐅᓇᓐ᙮

⁵ ᓂᒋ ᐱᓯᔅᑕᐅᑯᓇᓐ᙮ ᓂᒋ ᒋᐸᐅᑯᓇᓐ ᑲᒪᑯᓄᐛᓯᐅᒋᐛᐱᒡ᙮ ᓂᒋ ᒪᓯᐧᑲᑯᓇᓐᒡ ᐊᐛᓐᒋ ᐊ ᒥᒐᑎᒡ᙮ ᓂᒋ ᐊᔭᔅᑯᓯᓇᓐ ᐊᔅᐱᔅ ᒥᔅᑎ ᐊᑐᔅᒐᔭᒡ᙮ ᓇᓂᑯᑎᓂᔾ ᓇᒪ ᓂ ᐅᒋ ᓂᐸᓇᓐ᙮ ᑭᔭ ᓂᒋ ᓯᐛᔨᓇᓐ ᒪᓐ᙮

⁶ ᓂᒋ ᓄᑯᑕᓇᓐ ᑕᑈ ᐊ ᐊᑐᔅᑯᐅᒋᒡ ᒋᓴᒪᓂᑐᐤ ᐊ ᒥᔽᑎᓯᔭᒡ, ᑕᓐ ᐊ ᐃᓯ ᒥᔪ ᓂᔅᑐᑎᒪᒡ ᑕᑈᐅᓐ, ᐊ ᓯᐱᔪᐛᓯᔭᒡ ᑕᓐ ᐊ ᐃᓯ ᓂᒋᔅᑲᒪᒡ, ᐊ ᒥᔪᑐᑐᐎᒋᒡ ᐊᐛᓐᒋ᙮ ᑲ ᐸᔭᒋᓯᑦ ᐊᒐᐧᒄ ᑭᔭ ᓂ ᐎᒋᐃᑯᐅᓇᓐ ᑭᔭ ᓂ ᓄᑯᑕᓇᓐ ᑕᑈ ᐊ ᓴᒋᐃᒋᒡ ᒥᓯᐛ ᐊᐛᓐ᙮

⁷ ᑕᓐ ᐊ ᐃᓯ ᑯᐃᔅᒄ ᐎᑎᒪᒡ ᑕᑈᐅᓐ ᑭᔭ ᑕᓐ ᑲ ᐃᓯ ᒥᔨᒥᑦ ᒋᓴᒪᓂᑐᐤ ᓱᒐᔨᑕᑯᓱᐅᓂᔪᐤ ᐊᑯᑕ ᒥᓐ ᐛᒋ ᒋᔅᒐᔨᑕᑯᓯᔭᒡ ᑕᑈ ᐊ ᐊᑐᔅᑯᐅᒋᒡ᙮ ᐊ ᐃᓯ ᑯᐃᔅᒄ ᐱᒪᑎᓯᔭᒡ ᐊᑯᑕ ᒥᒄ ᐛᒋ ᓇᑲᐊᒪᓱᔭᒡ ᑕᓐ ᐛ ᐃᓯ ᒥᒋ ᐊᔨᒧᒥᑯᐅᔭᒡ ᑭᔭ ᑕᓐ ᐛ ᐃᓯ ᒪᔭᔨᒥᑯᐅᔭᒡ ᐊᐛᓐ ᒪᒃ ᓂᑐᐎᔾ ᐊ ᐎ ᐃᑐᑐᐎᔨᒥᑦ᙮

⁸ ᑎᑯᓐ ᐊ ᐃᓯ ᒥᔪ ᐊᔨᒧᒥᑯᐅᔭᒡ᙮ ᑎᑯᓐ ᐊ ᐃᓯ ᐊᑐᐛᔨᒥᑯᐅᔭᒡ᙮ ᑯᑎᑭᒡ ᓂ ᒥᔽᒋᒥᑯᓇᓂᒡ᙮ ᑯᑎᑭᒡ ᓂ ᒪᔭᔨᒥᑯᓇᓂᒡ᙮ ᑯᑎᑭᒡ ᑲ ᑭᑭᒋᔭᒡ ᓂᑦ ᐃᑕᔨᒥᑯᓇᓂᒡ ᒥᒄ ᒪᒃ ᒧᔅ ᑕᑈᐅᓐ ᓂ ᐎᑕᓇᓐ᙮

⁹ ᐊᑎ ᒪᒃ ᐊ ᒥᔪ ᒋᔅᒐᔨᑕᑯᓯᔭᒡ ᐃᔭᐱᒡ ᒧᔭᒻ ᐊᑲ ᐊᓐ ᒋᔅᒐᔨᑕᑯᓯᒡ ᐊᐛᓐᒋ ᓂᑦ ᐃᑕᔨᒧᑯᐅᓇᓐ᙮ ᒧᔅ ᓂ ᐸᓱᐛᐸᑕᓇᓐ ᓂᐳᐅᓐ᙮ ᓂ ᐱᒪᑎᓯᓇᓐ ᒪᒃ᙮ ᐊᑎ ᐊ ᑎᒂᒡ ᒪᓐ ᐊ ᐃᓯ ᐛᐛᓯᐃᑯᐅᔭᒡ ᓇᒪ ᓂ ᐅᒋ ᓂᐸᐃᑯᐅᓇᓐ᙮

¹⁰ ᑎᑯᓐ ᐊ ᐃᓯ ᒥᓯᒪᔨᑎᒪᒡ᙮ ᐃᔭᐱᒡ ᒪᒃ ᓂ ᒥᔽᔨᑕᓇᓐ᙮ ᓇᒪ ᓂ ᐛᔪᑎᓯᓇᓐ᙮ ᐃᔭᐱᒡ ᒪᒃ ᓂ ᐃᑐᑐᐛᓇᓂᒡ ᐊᐛᓐᒋ ᒐᒋ ᐊᔭᒡ ᒋᒋᐛ ᐛᔪᑎᓯᐅᓂᔪᐤ᙮ ᐊᑎ ᐊᑲ ᒐᒂᓐ ᑎᐱᔨᐛᐅᓯᔭᒡ, ᐃᔭᐱᒡ ᒥᓯᐛ ᒐᒂᓐ ᐊ ᑎᐱᔨᐛᐅᓯᔭᒡ ᓂᑦ ᐃᓯᓇᑯᓯᓇᓐ᙮

¹¹ ᒋᔨᐛᐤ ᓂᐎᒐᐛᑭᓇᓂᒡ ᐊᓐᑕ ᑯᕆᓐᑦ ᐊ ᑕᔭᒄ ᓇᔅᒡ ᓂᑕᐃᓇᒡ ᒋ ᐅᒋ ᐃᔨᒥᐃᑎᓇᓐ᙮ ᓇᔅᒡ ᒋ ᐎᑎᒪᑎᓇᓐ ᒪᓐ ᑕᓐ ᐛ ᐃᑎᑕᒡ᙮

¹² ᓇᒪ ᓇᔅᒡ ᑎᑯᓐ ᐊ ᐃᓯ ᓇᑲᐎᔭᒡ ᒐᒋ ᐛᐸᑎᔨᑕᒡ ᑭᔭ ᒐᒋ ᐎᑎᒪᑕᒡ ᑕᓐ ᐊᔅᐱᔅ ᓴᒋᐃᑕᒡ᙮ ᒋᔨᐛᐤ ᒪᒃ ᐎ, ᒧᔭᒻ ᐊ ᑎᒂᒡ ᑕᓐ ᐊ ᐃᓯ ᓂᑲᐎᔭᒄ ᒋᑦ ᐃᑕᔨᑕᑯᓯᓇᐛᐤ᙮

¹³ ᒧᔭᒻ ᓂᑦ ᐊᐛᓯᒥᒡ ᐊᐅᑯᓐ ᐊᑕᔨᒥᑎᑯᒡ᙮ ᐊᐅᑯᓐ ᒪᒃ ᒧᔭᒻ ᐃᓯ ᒋᓴᐛᑐᑐᐅᓇᓐ ᑭᔭ ᒋᔨᐛᐤ᙮

ᐃᔭᒂᒥᔅᑐᐛᐧᑯᒡ ᐊᓐᒡ ᐊᑲ ᑕᑈᑕᒡ ᒥᔽᒋᒧᐅᓂᔪᐤ

¹⁴ ᐊᑲᐎᔾ ᒋᑭ ᐅᒋ ᐊᓯᑎᐱᓱᓇᐛᐤ ᐊᓐᒡ ᐊᑲ ᑕᑈᑕᒡ ᐊ ᑕᒡ᙮ ᒋᑭ ᒋ ᐊ ᒥᔪ ᐎᒐᐛᐤ ᐊᐛᓐ ᐊ ᑯᐃᔅᑯᑕᑎᓯᑦ ᓇᔅᒡ ᐊ ᒪᔭᒋ ᐱᒪᑎᓯᔨᒋ ᐊᐛᔪᐛ ? ᒋᑭ ᒋ ᐊ ᒥᔪ ᐎᒐᐅᑐᐅᒡ ᐊᐛᓐᒋ ᓂᓱᐎᒡ ᐊ ᐃᓯ ᐱᒧᑕᒡ, ᐸᐃᒄ ᐛᔅᑕᐅᓂᒡ ᐊ ᐃᓯ ᐱᒧᑕᑦ ᐊᑯ ᐊᓐ ᑯᑎᒃ ᐊᓐᑕ ᐊ ᐅᑲᔅᑕᔭᔨᒡ ᐊ ᐃᓯ ᐱᒧᑕᑦ ?

¹⁵ ᑎᑯᓂᔪᐤ ᐊ ᒐᒂᔪᐤ ᐸᐃᑯᓄᒡ ᐊ ᐃᓯ ᑭᓄᐛᐸᑕᒡ ᙭ ᑭᔭ ᒥᒋᒥᓂᑐᐤ ? ᓇᒪ ᑭᑈ᙮ ᑕᓐᑕ ᐸᐃᑯᓄᒡ ᐊ ᐃᑕᔨᑕᑯᓯᒡ ᑲ ᑕᑈᑕᐧᒃ ᑭᔭ ᐊᓐ ᐊᑲ ᑕᑈᑕᐧᒃ ?

¹⁶ ᓇᒪ ᒋᑭ ᒋ ᑎᔭᑭᓄᐎᒡ ᒥᓂᑐᐧᑲᓐᒡ ᐊᓐᑕ ᒋᓴᒪᓂᑐᐤ ᐅᑦ ᐊᔭᒥᐊᐅᒋᐛᐱᒡ᙮ ᒋᔭᓄᐤ ᐛᔅ ᒋᓴᒪᓂᑐᐤ ᑲ ᐱᒪᑎᓯᑦ ᐅᑦ ᐊᔭᒥᐊᐅᒋᐛᑉ᙮ ᒧᔭᒻ ᒋᓴᒪᓂᑐᐤ ᑲ ᐃᔅᒋᔄᑦ, “ᓂᑭ ᐱᒋᔅᑯᐛᐅᒡ ᑭᔭ ᒧᔅ ᓂᑭ ᐎᒐᐛᐅᒡ᙮ ᓂᔾ ᓂᑭ ᐅᒋᓴᒪᓂᑐᒥᑐᑕᑯᒡ᙮ ᐎᔨᐛᐤ ᓂᑭ ᐅᑦ ᐃᔨᒥᑐᑐᐛᐅᒡ᙮”

¹⁷ “ᐊᑯ ᒪᒃ, ᓂᑭᑕᐧᑯᒡ ᐊᓐᒡ ᐊᑲ ᑕᑈᑕᒡ, ᑭᔭ ᑎᐸᓂᐃᓱᒄ,” ᐃᔅᒋᔄᐤ ᐅᑎᐸᔨᒋᒐᐤ᙮ “ᐊᓐ ᒐᒂᓐ ᐊ ᐃᑕᔨᑕᒂᒡ ᐊ ᒪᔭᑎᒡ ᐊ ᐅᓇᔨᑎᒥᐃᑯᑦ ᐊᐛᓐ ᐊ ᐊᔭᒥᐊᑦ ᑭᔭ ᐊ ᐊᔭᒥᐊᔅᑐᐛᑦ ᒋᓴᒪᓂᑐᐛ ᐊᑲᐎᔾ ᐊᐱᑕᔨᑎᒧᒄ᙮ ᓂᑭ ᒥᔽᔨᑕᓐ ᒪᒃ ᐸᒋ ᓇᓯᔭᒂ᙮

¹⁸ ᒋᑭ ᐅᑕᐎᒪᐅᑐᑐᓇᐛᐤ᙮ ᓂᑯᓯᒡ ᑭᔭ ᓂᑕᓂᓯᒡ ᒋᑭ ᐃᓯ ᑭᓄᐛᐱᒥᑎᓇᐛᐤ,” ᐃᔅᒋᔄᐤ ᐅᑎᐸᔨᒋᒐᐤ ᐊᓐ ᒪᐅᒡ ᓯᔪᐧᑲᑎᓯᑦ᙮