2 ᑯᕆᓐᑎᔭᓇ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓴᔅ ᓂᒋ ᐃᑕᔨᑕᓐ ᒐ ᐊᑲ ᐅᒋ ᐎ ᒥᓯᒪᔨᑎᒥᐃᑎᑯᒡ ᒥᓐ ᓂᑐᐛᐱᒥᑎᑯᒐ, 2 ᐛᔅ ᒋ ᒥᔽᔨᑎᒥᐃᓇᐛᐤ᙮ ᒥᓯᒪᔨᑎᒥᐃᑎᑯᒐ ᒪᒃ, ᐊᐛᓐ ᒥᓐ ᐊ ᑕᑦ ᒐ ᒥᔽᔨᑎᒥᐃᑦ ? ᓇᒪ ᐊᐛᓐ᙮ 3 ᐊᐅᑯᓐ ᐛᒋ ᒥᓯᓇᐊᒪᑎᑯᒡ ᐊᓐ ᑲ ᒥᓯᓇᐊᒪᑎᑯᒡ᙮ ᓇᒪ ᓂ ᐅᒋ ᓂᑐᐛᔨᑕᓐ ᒐᒋ ᒥᓯᒪᔨᑎᒥᐃᔭᒄ ᓂᑐᐛᐱᒥᑎᑯᒐ, ᐛᔅ ᒋᔨᐛᐤ ᒋᐸ ᒥᔽᔨᑎᒥᐃᓇᐛᐤ᙮ ᓇᔅᒡ ᓂᒋ ᒋᔅᒐᔨᑕᓐ ᒥᔽᔨᑎᒪᓇ ᑭᔭ ᒋᔨᐛᐤ ᒐ ᒥᔽᔨᑎᒪᒄ᙮ 4 ᐅᑕ ᑲ ᒥᓯᓇᐊᒪᑎᑯᒡ ᒪᒂᒡ ᓇᔅᒡ ᑕᑈ ᓂᒋ ᒥᑯᔅᑲᑕᔨᑕᓐ᙮ ᓂᒋ ᒥᓯᒥᑕᐊᓐ᙮ ᒥᔅᑎ ᑭᔭ ᓂᒋ ᐅᒋᐧᑯᐛᐱᓐ᙮ ᑕᐸ ᒋ ᐅᒋ ᐎ ᒥᓯᒪᔨᑎᒥᐃᑎᓇᐛᐤ ᐊᓐ ᑲ ᒥᓯᓇᐊᒪᑎᑯᒡ ᒥᒄ ᔅᒋ ᐎ ᒋᔅᒐᔨᑎᒥᐃᑎᓇᐛᐤ ᑕᓐ ᐊᔅᐱᔅ ᒥᔅᑎ ᓴᒋᐃᑎᑯᒡ᙮ ᒐᒋ ᐛᐸᔨᑎᒧᐛᑭᓄᐅᑦ ᐊᐛᓐ ᑲ ᐅᓂᑐᑎᐧᒃ 5 ᐊ ᐃᑕᒂ ᐊᐛᓐ ᐊᒋ ᒥᓯᒪᔨᑎᒥᐊᑦ ᐊᐛᔪᐛ, ᓇᒪ ᓂᔾ ᓂ ᐅᒋ ᒥᓯᒪᔨᑎᒥᐃᒄ᙮ ᒋᔨᐛᐤ ᒪᒃ ᒥᓯᐛ ᐊ ᑎᓯᔭᒄ ᒋ ᑎᑯᓂᔪᐤ ᑕᓐ ᑲ ᐃᓯ ᒥᓯᒪᔨᑎᒥᐃᑕᒄ᙮ ᓇᒪ ᐊᑐᐎᔅ ᓂ ᐎ ᐊᔨᒧᑕᓐ ᐅ᙮ 6 ᓴᔅ ᔅᒋ ᐎᔭᔨᑕᓇᐛᐤ ᑕᓐ ᒐ ᐃᓯ ᐛᐛᓯᐊᑭᓄᐅᑦ᙮ ᐃᔅᐱᔪᐤ ᒪᒃ ᐊᓂᔭ ᑕᓐ ᑲ ᐃᓯ ᐛᐛᓯᐊᑭᓄᐅᑦ᙮ 7 ᐅᑎᒋᐱᔪᐤ ᒪᒃ ᒐᒋ ᐛᐸᔨᑎᒧᐛᒄ ᐊᑯ᙮ ᑭᔭ ᒋᐸ ᒥᔽᔨᒺᐛᐤ ᒐ ᐊᑲ ᒋ ᐃᑕᔨᑕᐧᒃ ᒋᒋᐛ ᒐᒋ ᐱᒋᑕᔨᒧᑦ ᐛᓴ ᐊ ᒥᔅᑎ ᒥᒐᔨᑕᐧᒃ᙮ 8 ᐊᐅᑯᓐ ᐛᒋ ᓯᒋᒥᑎᑯᒡ ᒐᒋ ᒋᔅᒐᔨᑎᒥᐊᒄ ᑕᑈ ᐊᔅᒄ ᐊ ᓴᒋᐊᒄ᙮ 9 ᔅᒋ ᐎ ᓂᑐ ᒋᔅᒐᔨᒥᑎᓇᐛᐤ ᐊᓐ ᑲ ᒥᓯᓇᐊᒪᑎᑯᒡ᙮ ᒐ ᓂᓇᐃᑎᒧᐛᒂ ᐊᓐ ᒥᓯᐛ ᑕᓐ ᐊ ᐃᑎᓱᒥᒂᐤ ᓂᒋ ᐃᑕᔨᑕᓐ᙮ 10 ᐛᔅ ᑕᑥᐤ ᐊ ᐛᐸᔨᑎᒧᐛᒄ ᐊᐛᓐ ᑕᓐ ᑲ ᐃᑎᑦ ᑭᔭ ᓂᔾ ᓂ ᐛᐸᔨᑎᒧᐛᐤ᙮ ᓇᑐᐛᔨᑕᑯᓂᒂ ᒐᒋ ᐛᐸᔨᑎᒧᐅᒃ ᐊᐛᓐ ᓂ ᐛᐸᔨᑎᒧᐛᐤ ᒋᔨᐛᐤ ᒐᒋ ᐎᒋᐃᑯᔭᒄ ᐊ ᒋᔅᒐᔨᑎᒪᓐ ᙭ ᐊ ᑕᑦ ᐅᑕ ᐊ ᑕᔭᓐ᙮ 11 ᐅ ᒪᒃ ᒋᑦ ᐃᑎᓇᓄᐤ ᒐ ᐊᑲ ᒋ ᐎᔭᓯᐃᑕᐧᒄ ᒥᒋᒥᓂᑐᐤ᙮ ᐛᔅ ᒋ ᒋᔅᒐᔨᒪᓄᐤ ᑕᓐ ᐛ ᐃᑎᑦ᙮ ᑐᕈᐊᓯᒡ ᑭᔭ ᒪᓯᑐᓂᔭᒡ ᑲ ᐃᑐᑕᑦ ᑈᓪ 12 ᑐᕈᐊᔅ ᐊ ᐃᓯᓂᐧᑲᑕᒡ ᐅᑕᓇᐤ ᐊᑯᑕ ᑲ ᐛᐎᑎᒧᒡ ᙭ ᐅᒥᔽᒋᒧᐅᓐ᙮ ᑲ ᐸᐱᔭᓐ ᒪᒃ ᐊᓐᑕ ᓇᔅᒡ ᒋ ᓂᔅᑐᓇᑯᓐ ᐅᑎᐸᔨᒋᒐᐤ ᓴᔅ ᐊᒋ ᐊᔭᔅᑯᔅᑕᑯᐱᓇ ᐊᓐᑕ ᒐᒋ ᑭᒐᔅᒋᒧᐅᒡ᙮ 13 ᒥᒄ ᒪᒃ ᐃᔭᐱᒡ ᒋ ᑎᑯᓐ ᑕᓐ ᑲ ᐃᓯ ᒥᑯᔅᑲᑕᔨᑎᒪᓐ ᐛᔅ ᑕᐸ ᓂ ᐅᒋ ᐛᐱᒪᐤ ᓂᐧᑲᓂᔅ ᑕᐃᑕᔅ ᐊᓐᑕ ᒐᒋ ᑕᑦ᙮ ᐊᑯ ᒪᒃ ᑲ ᓂᑭᑎᒂᐤ ᐊᓐᒡ ᐃᔪᒡ ᐊᓐᑕ ᐊ ᑕᒡ᙮ ᒪᓯᑐᓂᔭ ᐊ ᐃᓯᓂᐧᑲᑕᒡ ᐊᔅᒋᔾ ᐊᑯᑕ ᒥᓐ ᑲ ᐃᑐᑕᔭᓐ᙮ ᙭ ᒋ ᐃᑐᑕᑭᓄᐤ ᒐᒋ ᑲᓂᔪᐅᔭᐧᒄ 14 ᒥᒄ ᒪᒃ ᑕᑈ ᓂᓇᔅᑯᒪᐤ ᒋᓴᒪᓂᑐᐤ ᐛᔅ ᒧᔅ ᐎᔾ ᓂ ᒋᔅᒋᓄᑕᐃᒄ ᑕᓐᑕ ᐊ ᐃᑐᑕᐅᒡ ᐊ ᐎᒋᐃᑦ ᐊ ᐊᔨᒧᒥᒋ ᙭ᑕ ᒐᒋ ᐅᒋ ᒋᔅᒐᔨᒪᑭᓄᔨᒋ, ᐛᔅ ᙭ ᒧᔅ ᐱᔅᒋᔭᒐᐅᓂᒡ ᒋ ᐊᑎ ᐃᓯ ᐱᒧᑕᔨᑯᓄᐤ᙮ ᒋᓴᒪᓂᑐᐤ ᒋ ᐎᒋᐃᑯᓄᐤ ᒐᒋ ᑎᐸᒋᒪᐧᒄ ᙭ ᒥᓯᐛ ᐊᐛᓐ ᒐᒋ ᒋᔅᒐᔨᒪᑦ᙮ ᐊ ᒋᔅᒐᔨᒪᑭᓄᐅᑦ ᙭ ᒧᔭᒻ ᑲ ᐎᒋᒪᑯᓯᒡ ᒐᒂᓐ ᐃᑕᔨᑕᑯᓐ᙮ 15 ᐅ ᐊ ᐃᑎᔭᐧᒄ ᒧᔭᒻ ᙭ ᐊ ᐱᔅᑎᓂᒧᐛᑦ ᒋᓴᒪᓂᑐᐛ ᑲᐎᒋᒪᑯᓯᔨᒡ ᒐᒂᔪᐤ ᐊᐅᑯᓐ ᐊ ᐃᓯᓇᒂᒡ᙮ ᐊᓐ ᒪᒃ ᐊ ᐎᒋᒪᔅᑕᒡ ᐊᓐᑕ ᐊᓐᒡ ᒐ ᐱᒪᒋᐅᒡ ᐊᐛᓐᒋ ᑭᔭ ᐊᓐᒡ ᐊᐛᓐᒋ ᒐ ᐅᓂᓯᓂᒡ ᐊᑯᑕ ᐊ ᐃᑕᐸᑕᒡ᙮ 16 ᐊᓐᒡ ᒪᒃ ᒐ ᐅᓂᓯᓂᒡ ᐊᐛᓐᒋ ᒧᔭᒻ ᒐᒂᓐ ᑲ ᓂᐸᐃᐛᒡ ᐊᐅᑯᓐ ᐊ ᐃᓯᒪᑕᒡ ᐅᔭ ᑲᐎᒋᒪᑯᓯᔨᒡ, ᐊᑯ ᐊᓐᒡ ᒐ ᐱᒪᒋᐅᒡ ᐊᐛᓐᒋ ᒧᔭᒻ ᐊᓐ ᒐᒂᓐ ᒐ ᐱᒪᒋᐃᐛᒡ ᐊᐅᑯᓐ ᐊ ᐃᓯᒪᑕᒡ ᐅᔭ᙮ ᐊᐛᓐ ᒪᒃ ᑎᔭᐱᒐᔨᑕᑯᓯᑦ ᐅᔭ ᒐᒋ ᐃᑕᐱᑎᓯᑦ ᒥᔽᒋᒧᐅᓂᔪᐤ ᐊ ᐛᐎᑕᐧᒃ᙮ 17 ᐱᔅᒐ ᐊᐛᓐᒋ ᑲ ᐱᐸ ᑭᒐᔅᒋᒧᒡ ᒧᔭᒻ ᐊ ᐱᐸ ᐊᑕᐛᐛᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᐅᑯᓐ ᐊ ᐃᓯᓇᑯᓯᒡ, ᐊ ᐎ ᐅᓯᑎᒪᓱᒡ ᓱᓇᔭᔪᐤ ᐊ ᐃᑎᒡ᙮ ᓇᒪ ᐎ ᓂᔭᓐ ᐅ ᓂᑦ ᐃᓯᓇᑯᓯᓇᓐ᙮ ᓂ ᑯᐃᔅᑯᑕᐊᓇᓐ ᑭᔭ ᒋᒋᐛ ᓂᑦ ᐃᑕᔨᑕᓇᓐ ᑕᓐ ᐊ ᐃᑎᓱᒥᔨᒥᑦ ᙭ ᒐᒋ ᐃᓯ ᐊᑐᔅᑯᐅᒋᑦ ᐛᔅ ᓂ ᒋᔅᒐᔨᒥᑯᓇᓐ ᑕᓐ ᐊ ᐃᑐᐅᒋᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.