2 ᑯᕆᓐᑎᔭᓇ 11 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑕᓐ ᑲ ᐃᓯ ᐊᔨᒧᒪᑦ ᑈᓪ ᐊᓂᔭᔪᐛ ᐊᑲ ᒋᒋᐛ ᐊᑈᔅᑕᓄᐎᔨᒋ 1 ᒋ ᐱᑯᓴᔨᒥᑎᓇᐛᐤ ᒐᒋ ᓯᐱᔪᐛᓯᔅᑐᔭᒄ ᐊᐱᓯᔅ ᐊ ᒋᔎ ᐃᔨᒥᔭᓐ᙮ ᓇᔅᒡ ᒋ ᐱᑯᓴᔨᒥᑎᓇᐛᐤ ᒐᒋ ᓯᐱᔪᐛᓯᔅᑐᔭᒄ᙮ 2 ᑎᑯᓐ ᐊ ᐃᓯ ᐅᑕᔨᑎᒪᓐ ᒋᔨᐛᐤ ᐅᒋ ᒧᔭᒻ ᒋᓴᒪᓂᑐᐤ ᐊ ᐃᓯ ᐅᑕᔨᑕᐧᒃ ᐅᑦ ᐃᔨᒪ ᐅᒡ᙮ ᐛᔅ ᐅᔅᒋᓂᒋᔎᐤ ᐊᑲ ᐊᔅᒄ ᐅᒋ ᒋᔅᒐᔨᒪᑦ ᓇᐸᐛ ᒋᑦ ᐃᓯᓇᑯᓯᓇᐛᐤ, ᔅᒋ ᐃᑕᔨᒥᑎᓇᐛᐤ ᒪᒃ ᒥᒄ ᐸᐃᒄ ᓇᐸᐤ ᒐᒋ ᑭᓄᐛᔨᒥᑕᒄ ᐊᐅᒄ ᙭᙮ 3 ᓂ ᑯᔅᐱᓇᑕᔨᑕᓐ ᒐᒋ ᐎᔭᓯᐃᑯᐅᔭᒄ, ᒧᔭᒻ ᑕᓐ ᑲ ᐃᓯ ᐎᔭᓯᐃᑯᑦ ᐃᑉ ᒋᓇᐱᒂ ᐊᒋ ᑭᑭᒋᔭᒥᑯᑦ, ᓂ ᑯᔅᐱᓇᑕᔨᑕᓐ ᒐᒃ ᒐ ᐊᑲ ᒋ ᐃᑕᔨᒪᒄ ᙭ ᑕᓐ ᐊ ᐃᑕᔨᒪᒄ ᐊᓄᒡ, ᓇᔅᒡ ᒋ ᐊᑎ ᐃᓯ ᓇᓴᐛᐛᐤ ᑭᔭ ᒥᒄ ᐎᔾ ᒋ ᓂᓇᑭᑐᐛᔨᒪᐛᐤ᙮ 4 ᒥᔅᑯᒡ ᐛᒋᐱᔪᐛ ᒥᒄ ᒐᒋ ᐃᓯ ᑕᑈᑎᒪᒄ ᑕᓐ ᐊ ᐃᓯ ᐛᐎᑎᒪᑕᑯᒡ ᐅᒡ ᓂᑎᒥᒄ ᑲ ᐃᓯ ᒋᔅᑯᑎᒪᒐᒡ ᒋᔅᑯᑎᒪᒐᓱᒡ, ᐊ ᐃᑕᔨᒪᑯᒡ᙮ ᓇᔅᒡ ᒋᓂᑐᑐᐛᐛᐤ ᐊᐛᓐ ᐃᔭᒡ ᐊ ᐃᓯ ᐊᔨᒧᒪᑦ ᒋᓴᓴ ᑕᓐ ᑲ ᐃᓯ ᐊᔨᒧᑎᒪᑕᒡ ᓂᔭᓐ᙮ ᐊᓄᒡ, ᒥᒄ ᒋ ᐊᑎ ᐃᓯ ᑕᑈᐅᒐᔨᒪᐛᐤ ᐃᔭᒡ ᐊ ᐃᑕᔨᑕᑯᓯᑦ ᐊᒐᐧᒄ ᑕᓐ ᑲ ᐃᑕᔨᑕᑯᓯᑦ ᐊᓐ ᑲ ᐸᔭᒋᓯᑦ ᐊᒐᐧᒄ ᓂᔅᑎᒻ ᑲ ᐊᔭᐛᒄ᙮ ᑭᔭ ᐃᔭᒡ ᐊ ᐃᑎᑕᑯᒡ ᒥᔽᒋᒧᐅᓐ ᐊᓐ ᑲ ᐃᓯ ᐎᑎᒪᑕᒡ ᒥᒄ ᒋ ᐊᑎ ᐃᓯ ᑕᑈᑕᓇᐛᐤ᙮ 5 ᓇᒪ ᓇᔅᒡ ᓄᑕᔭᔅ ᓂᑦ ᐃᑕᔨᑕᑯᓯᓐ ᓂᑦ ᐃᑕᔨᑕᓐ ᑕᓐ ᐊ ᐃᑕᔨᑕᑯᓯᒡ ᐊᓐᒡ ᑲ ᒋᔅᑕᔨᒪᑯᒡ ᐊᑈᔅᑕᓇᒡ ᑲ ᐃᓯᓂᐧᑲᑕᑯᒡ᙮ 6 ᒂᔄᓐ ᓇᒪᐎᔾ ᓂᔾ ᐊᓐ ᐊᐛᓐ ᓇᔅᒡ ᑲ ᑭᔅᒋᐅᑕᑯᓯᑦ ᐊ ᐃᔨᒥᑦ, ᒥᒄ ᒪᒃ ᓂ ᑭᓄᐛᔨᑕᓐ ᒋᔅᒐᔨᑎᒧᐅᓐ᙮ ᑕᑥᐤ ᒪᒃ ᑲ ᐃᔨᒥᐃᑕᒡ ᓂᓇᐧᑯᐤ ᒐᒂᓐ ᐊ ᐎᑎᒪᑕᒡ ᔅᒋ ᐃᓯ ᐃᔨᒥᐃᑎᓇᓐ ᒐᒋ ᐱᔭᑭᔅᒡ ᓂᔅᑐᑎᒪᒄ᙮ 7 ᐃᔅᐱ ᑲ ᐛᐎᑎᒪᑎᑯᒡ ᒋᓴᒪᓂᑐᐤ ᐅᒥᔽᒋᒧᐅᓐ ᓇᒪ ᒋᒋᐛ ᓂ ᐅᒋ ᐃᑕᔨᒥᓱᓐ᙮ ᔅᒋ ᐎ ᒋᔅᒐᔨᑎᒥᐃᑎᓇᐛᐤ ᐊ ᒪᒥᑐᓇᔨᒥᑕᒄ ᒋᓴᒪᓂᑐᐤ ᑭᔭ ᓇᒪ ᒋ ᐅᒋ ᓂᑐᐛᔨᒥᑎᓇᐛᐤ ᒐᒋ ᒋᓯᐧᑯᔭᒄ᙮ ᓂᒋ ᐅᓂᐱᔨᓐ ᑲᑭᔭ ᐅ ᑲ ᐃᑎᔭᓐ᙮ 8 ᒋ ᐊᐃᑎᓱᐅᒡ ᑭᔭ ᐊᓐᒡ ᒋᐧᑲᓂᓯᓄᐅᒡ ᑲ ᐎᒋᐃᒡ ᓱᓇᔭᔪᐤ ᐃᔅᐱ ᑲ ᐛᐎᑎᒪᑎᑯᒡ ᒥᔽᒋᒧᐅᓐ᙮ ᒧᔭᒻ ᐊ ᑭᒐᒧᑎᒧᐅᒂᐤ ᐅᒡ ᒋᐧᑲᓂᓯᓄᐅᒡ ᓂᒋ ᐃᓯᓇᑯᓯᓐ ᐊᒋ ᐅᑎᓂᒧᒡ ᑕᓐ ᑲ ᐎ ᐃᓯ ᐸᒋ ᐎᒋᐃᒡ ᒋᔨᐛᐤ ᒐᒋ ᐎᒋᐃᑎᑯᒡ᙮ 9 ᐊᑎ ᒪᒃ ᓇᓂᑯᑎᓂᔾ ᐊᒋ ᓄᑕᐱᔭᓐ ᒐᒂᓐ ᒪᒂᒡ ᐊᓐᑕ ᐊ ᑕᔭᒄ ᑲ ᑕᔭᓐ, ᓇᒪ ᐃᔭᐱᒡ ᒋ ᐅᒋ ᓂᑐᐛᔨᑎᒪᑎᓇᐛᐤ ᒐᒂᓐ᙮ ᒋᐧᑲᓂᓯᓄᐅᒡ ᒪᓯᑐᓂᔭ ᑲ ᐃᓯᓂᐧᑲᑕᔨᒡ ᐊᔅᒋᔪᐤ ᑲ ᑕᒡ ᓂᒋ ᐎᒋᐃᑯᓇᓂᒡ ᐊᒋ ᒥᔨᒥᒡ ᑕᓐ ᑲ ᐃᓯ ᓄᑕᐱᔪᒋᑦ᙮ ᓇᒪ ᒋ ᐅᒋ ᐎ ᐊᔨᒪᔨᑎᒥᐃᑎᓇᓐ ᒐᒋ ᓂᑐᐛᔨᑎᒪᑕᒡ ᒐᒂᓐ᙮ ᐊᔅᒄ ᒪᒃ ᐊᓄᒡ ᓇᒪ ᐃᔭᐱᒡ ᒋ ᓂᑐᐛᔨᑎᒪᑎᓇᓐ ᒐᒂᓐ᙮ 10 ᐊ ᒋᔅᒐᔨᒥᑦ ᙭ ᐊ ᑕᑈᐅᒡ ᑕᓐ ᐊ ᐃᔅᒋᔄᐅᒡ, ᓇᒪ ᓂᑭ ᐅᒋ ᐱᔅᑎᓇᐅᒡ ᑯᑎᑭᒡ ᒐᒋ ᒋ ᐸᒋ ᐎᒋᐃᒡ ᐊ ᐊᔨᒧᑎᒧᒡ ᐅᔭ ᒥᓯᐛ ᐊᓐᑕ ᐊᓂᔭ ᐊᔅᒋᔪᐤ ᐊᑲᔭ ᑲ ᐃᓯᓂᐧᑲᑕᒡ᙮ 11 ᒋᑦ ᐃᑕᔨᑕᓇᐛᐤ ᐊ ᐊᑲ ᓴᒋᐃᑎᑯᒡ ᐛᒋ ᐃᔅᒋᔄᔭᓐ ᐅ ? ᒋᓴᒪᓂᑐᐤ ᒋᔅᒐᔨᑎᒻ ᑕᑈ ᐊ ᓴᒋᐃᑎᑯᒡ᙮ 12 ᐃᔭᐱᒡ ᒧᔅ ᓂᑭ ᑐᑕᓐ ᑕᓐ ᐊ ᐃᑎᔭᓐ ᐊᓄᒡ ᒐ ᐊᑲ ᒋ ᑎᑯᓂᔨᒡ ᑕᓐ ᒐ ᐃᓯ ᓂᓇᐸᐅᒧᒡ ᐊᓐᒡ ᓂᑎᒥᒄ ᑲ ᐃᓯ ᒋᔅᑯᑎᒪᒐᒡ ᑭᔭ ᒐ ᐊᑲ ᒋ ᐃᔅᒋᔄᒡ ᒧᔭᒻ ᓂᔭᓐ ᐊ ᐃᑕᐱᑎᓱᒋᑦ ᐊ ᐃᑕᐱᑎᓯᒡ᙮ 13 ᓇᒪᔭᐅᒡ ᐅᒡ ᒋᒋᐛ ᐊᑈᔅᑕᓇᒡ᙮ ᒧᔭᒻ ᑕᑈ ᐊᑈᔅᑕᓇᒡ ᐊ ᐊᑐᔅᑯᐛᒡ ᒋᓴᔅ ᙭ᑕ ᐎ ᐃᑕᔨᑕᑯᐃᓱᒡ ᐅᒡ ᒥᒄ ᒪᒃ ᑭᑭᒋᔭᐅᒡ ᑭᔭ ᐎᔭᓯᐃᐛᐅᒡ᙮ 14 ᓇᒪ ᒪᒃ ᒋᐸ ᐅᒋ ᒥᔅᑲᑕᔨᑎᒥᐃᑯᓇᓄᐤ ᐅ ᐛᔅ ᐛᐛᒡ ᒥᒋᒥᓂᑐᐤ ᒧᔭᒻ ᐊ ᐛᔅᑐᐛᑦ ᐊᓐᒋᓐ ᒋᑭ ᒋ ᐃᓯᓇᑯᐃᓱᐤ᙮ 15 ᓇᒪ ᒪᒃ ᒥᔅᑲᑕᔨᑕᑯᓂᔪᐤ ᐅᑦ ᐊᐱᒋᐊᑭᓇ ᒧᔭᒻ ᑕᑈ ᑯᐃᔅᒄ ᑲ ᐃᑎᔨᒋ ᐊᐱᒋᐊᑭᓇ ᒐᒋ ᐃᓯᓇᑯᐃᓱᔨᒋ᙮ ᒥᒄ ᒪᒃ ᐃᔅᐱ ᑎᐸᔅᑯᓇᑭᓄᑥᐛ ᐊᓐ ᐊ ᐃᑕᔨᑕᑯᓂᔨᒡ ᒐᒋ ᐃᓯ ᒥᔅᑲᒡ ᐊᑯᓐ ᒐ ᐃᓯ ᒥᔭᑭᓄᐎᒡ᙮ ᑲ ᐊᔨᒧᑕᐧᒃ ᑈᓪ ᑕᓐ ᑲ ᐃᓯ ᐊᔨᒥᐅᑦ ᐊᑈᔅᑕᓐ ᐊ ᐃᑕᐱᒋᐃᑯᑦ ᙭ᑕ 16 ᒥᓐ ᓂᑭ ᐃᔅᒋᔄᓐ, ᐊᑲᐎᔾ ᐃᑕᔨᒥᒄ ᐊ ᒋᔎ ᐃᔨᒥᔭᓐ᙮ ᒧᔭᒻ ᒪᒃ ᒋᔎ ᐃᔨᒧᐤ ᐊ ᐃᑕᔨᒧᐛᒂ ᐱᔅᑎᓂᒄ ᐊᐱᓯᔅ ᒐᒋ ᐊᔨᒧᒥᓱᔭᓐ᙮ 17 ᐅ ᒪᒃ ᒐ ᐃᓯ ᐃᔨᒥᔭᓐ ᓂᔾ ᐅ ᐊ ᐃᑕᔨᑎᒪᓐ, ᓇᒪ ᐅᑎᐸᔨᒋᒐᐤ ᓂ ᐅᒋ ᐃᑎᓱᒥᒄ ᒐᒋ ᐃᔅᒋᔄᔭᓐ᙮ ᒧᔭᒻ ᐊ ᒋᔎ ᐃᔨᒥᔭᓐ ᐃᑎᑕᑯᓐ᙮ 18 ᒧᔭᒻ ᐊ ᓂᔅᐱᑕᐅᒂᐤ ᐊᐛᓐᒋ ᐅᑕ ᐊᔅᒋᒡ ᑲ ᓂᓇᐸᐅᒧᒡ ᓂᑭ ᐃᑎᓐ, ᓇᔅᒡ ᑲ ᓂᓇᐸᐅᒧᒡ ᑕᓐ ᐊ ᐃᑎᒡ᙮ 19 ᓇᒪ ᒪᒃ ᒋᐸ ᐅᒋ ᑯᔅᑯᓯᑯᓇᐛᐤ ᐅ᙮ ᓇᔅᒡ ᑕᑈ ᒋ ᑭᒐᑕᐛᔨᒥᓱᓇᐛᐤ᙮ ᒪᓐ ᒥᒄ ᑲ ᐃᓯ ᐱᑎᑲᐊᑯᒡ ᐊᓐᒡ ᑲ ᒋᔎ ᐃᔨᒥᒡ᙮ 20 ᒋ ᐱᔅᑎᓇᐛᐅᒡ ᐅᒡ ᓂᑎᒥᒄ ᑲ ᐃᓯ ᒋᔅᑯᑎᒪᒐᒡ ᒐᒋ ᐅᒋᒪᐧᑲᑕᑕᑯᒡ ᑭᔭ ᒐᒋ ᒥᓂᓱᓇᔭᐛᑐᑕᑕᑯᒡ᙮ ᒋ ᐱᔅᑎᓇᐛᐅᒡ ᒐᒋ ᑭᒐᒧᑎᒪᑕᑯᒡ ᑭᔭ ᒐᒋ ᒪᔭᔨᒥᑕᑯᒡ ᑭᔭ ᒐᒋ ᐅᑕᒥᒂᐅᑕᑯᒡ᙮ 21 ᑕᑈ ᑭᑈ ᓂᒋ ᐅᓂᐱᔨᓇᓐ ! ᓂ ᓴᒂᔨᒧᓐ ᒐᒋ ᐃᔅᒋᔄᔭᓐ ᐊᑲ ᐅᒋ ᐃᑎᔭᒡ ᐅ ᓂᔭᓐ᙮ ᐊᑲ ᓂᑲᐎᒂ ᐊᐛᓐ ᒐᒋ ᓂᓇᐸᐅᒧᑦ ᑕᓐ ᐊ ᐃᑎᑦ ᓂᐸ ᒋ ᓂᓇᐸᐅᒧᓐ ᑭᔭ ᓂᔾ᙮ ᒥᓐ ᒪᒃ ᓂ ᒋᔎ ᐃᔨᒥᓐ ᐅ ᑲ ᐃᔅᒋᔄᔭᓐ᙮ 22 ᒋᒋᐛ ᐊ ᐃᑕᔨᒥᓱᒡ ᒍᐤ ᑲ ᐃᑎᔅᑲᓇᓯᒡ ? ᑭᔭ ᓂᔾ ᒍᐤ ᓂᑦ ᐃᑎᔅᑲᓇᓯᓐ᙮ ᒋᒋᐛ ᐊ ᐃᑕᔨᒥᓱᒡ ᐊᓂᔭ ᐃᔅᕋᐃᓪ ᐊ ᐅᒋᒡ ? ᑭᔭ ᓂᔾ ᐊᑯᑕ ᐛᒋᔭᓐ᙮ ᒋᒋᐛ ᐊ ᐃᑕᔨᒥᓱᒡ ᒥᒄ ᐊᑉᕋᐊᒪ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᒡ ? ᓂᔾ ᑭᔭ ᐊᑯᑕ ᑲ ᐅᒋ ᐊᓂᔅᒐ ᐱᒪᑎᓯᔭᓐ᙮ 23 ᐃᑕᔨᑎᒧᒡ ᐊ ᐊ ᐊᑐᔅᑯᐛᒡ ᙭ᑕ ? ᐊᑐᐎᔅ ᓂᔾ ᓂᑦ ᐊᑐᔅᑯᒪᔪᐛ᙮ ᓴᔅ ᐊᑐᐎᔅ ᓂ ᒋᔎ ᐃᔨᒥᓐ᙮ ᓇᒪ ᓂ ᒥᔽᔨᑕᓐ ᒧᔭᒻ ᐎᔨᐛᐤ ᐊ ᐃᓯ ᐊᔨᒧᒥᓱᒡ ᐊ ᐃᓯ ᐊᔨᒧᒥᓱᔭᓐ᙮ ᐊᑐᐎᔅ ᓂᔾ ᓂᒋ ᒥᔅᑎ ᐊᐱᑎᓯᓐ ᐃᔅᐱᔅ ᐎᔨᐛᐤ᙮ ᐊᑐᐎᔅ ᓂᔾ ᒥᒐᑥᐤ ᓂᒋ ᒋᐸᐅᑯᓐ᙮ ᐊᑐᐎᔅ ᓂᔾ ᒥᒐᑥᐤ ᓂᒋ ᐱᓯᔅᑕᐅᑯᓐ ᐃᔅᐱᔅ ᐎᔨᐛᐤ᙮ ᐊᑐᐎᔅ ᓂᔾ ᒥᒐᑥᐤ ᓂᒋ ᐸᓱᐛᐸᑕᓐ ᓂᐳᐅᓐ ᐃᔅᐱᔅ ᐎᔨᐛᐤ᙮ 24 ᐱᑕᑕᒡ ᑕᑐᔪᐤ ᓂᒋ ᐎᓯᒐᔨᑎᒥᐃᑯᐅᒡ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᓂᔅᑐᔪᐤ ᐊᓱ ᐸᐃᑯᔅᑕᐤ ᑕᑥᐤ ᐊᒋ ᐱᓯᔅᑕᐅᒡ᙮ 25 ᓂᔍᐤ ᓂᒋ ᐛᐛᓯᐃᑯᐅᓐ ᐃᓴᒂ ᐊ ᐅᑎᑕᒧᐅᑯᔭᓐ᙮ ᐸᐃᒂᐤ ᓂᒋ ᐸᐱᒧᓯᓇᑕᐅᑯᐅᓐ ᐊ ᐎ ᓂᐸᐃᑯᐅᔭᓐ᙮ ᓂᔍᐤ ᓂᒋ ᑕᓐ ᐊ ᑯᓴᐸᒡ ᐊ ᒥᓴᒡ ᐅᐤᑦ᙮ ᐸᐃᒂᐤ, ᐸᐃᒄ ᒋᓯᑲᐛ ᒪᒃ ᐸᐃᒄ ᑎᐱᔅᑲᐛ ᒧᓴ ᓂᒋ ᐱᐸᒪᐅᑯᐅᓐ ᐎᓂᐸᑯᒡ᙮ 26 ᒥᒐᑥᐤ ᓂᒋ ᐱᐸᒥᐱᔨᓐ ᐊ ᐛᐎᑎᒪᓐ ᒥᔽᒋᒧᐅᓐ᙮ ᐅ ᒪᒃ ᑲ ᐃᓯ ᐱᐸᒥᐱᔭᓐ ᒥᒐᑥᐤ ᒋ ᑯᔅᑕᑎᑯᓐ ᓯᐱᒡ ᐊ ᑕᔭᓐ᙮ ᒥᒐᑥᐤ ᒋ ᑯᔅᐱᓇᑕᔨᑕᑯᓐ ᑲᒋᒧᑎᒡ ᒐᒋ ᒪᓯᐧᑯᒡ᙮ ᒥᒐᑥᐤ ᓂᒋ ᐊᔨᒥᐃᑯᒡ ᒍᐤ ᑲ ᐃᑎᔅᑲᓇᓯᒡ ᓂᑦ ᐃᔨᒥᒡ ᑭᔭ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ᙮ ᐅᑕᓇᒡ ᓂᒋ ᐎᓯᒐᔨᑎᒥᐃᑯᓐ ᑭᔭ ᐊᓐᑕ ᐸᐧᑯᑎᔅᑭᒥᑲᒡ ᓂᒋ ᐊᔨᒥᐅᓐ᙮ ᐎᓂᐸᑯᒡ ᑭᔭ ᓂᒋ ᐊᔨᒥᐅᓐ᙮ ᑭᔭ ᐊᓐᒡ ᓂᐧᑲᓂᓯᒡ ᑲ ᐃᑕᔨᒥᒂᐤ ᐊᑲ ᒪᒃ ᑕᑈ ᑲ ᐎᐧᑲᓂᓱᐛᐸᓇ ᓂᒋ ᐊᔨᒥᐃᑯᒡ᙮ 27 ᓇᔅᒡ ᑕᑈ ᓂᒋ ᒥᔅᑎ ᐊᑐᔅᒐᓐ᙮ ᒥᒐᑥᐤ ᓂᒋ ᒥᔅᑎ ᐊᔭᔅᑯᓯᓐ, ᒥᒐᑥᐤ ᑭᔭ ᓇᒪ ᐛᐛᒡ ᓂ ᐅᒋ ᓂᐸᓐ᙮ ᒥᒐᑥᐤ ᓂᒋ ᓄᑕᐱᔨᓐ ᒥᒋᒻ ᑭᔭ ᑲ ᐊᑎ ᓯᐛᔨᔭᓐ, ᑭᔭ ᓂᒋ ᓄᑕᔭᐸᒂᓐ᙮ ᓇᓂᑯᑎᓂᔾ ᓇᒪ ᐛᐛᒡ ᐅᒋ ᑎᑯᓐ ᑕᓐᑕ ᒐ ᑕᔭᓐ ᑭᔭ ᓇᓂᑯᑎᓂᔾ ᓂᒋ ᓯᐧᑭᒋᓐ᙮ 28 ᐊᓯᑯᒻ ᒋᓯᑲᐛ ᑭᔭ ᓂ ᑯᓯᑯᔅᑲᑯᓐ ᐊ ᒪᒥᑐᓇᔨᒥᒂᐤ ᒥᓯᐛ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᓂᓇᐧᑯᐤ ᐅᑕᓇᒡ ᑲ ᑕᒡ᙮ 29 ᐊᐛᓐ ᐊᑲ ᓴᐸᔨᒥᓱᑦ ᓂ ᒋᔅᒐᔨᑕᓐ ᑕᓐ ᐊ ᐃᑕᔨᑕᒂᒡ ᐊᓂᔭ ᐊ ᐃᑎᑦ ᐊᐛᓐ᙮ ᐛᔅ ᒧᔭᒻ ᐊᐛᓐ ᐊ ᒥᒋᑐᑕᐧᒃ ᑎᑯᓐ ᐊ ᐃᓯ ᒥᓯᒪᔨᑎᒥᐃᑯᔭᓐ ᐅ᙮ 30 ᓇᑐᐛᔨᑕᑯᓂᒂ ᐅ ᒐᒋ ᐃᓯ ᐃᔨᒥᔭᓐ ᐊᑯᓐ ᑭᑈ ᒐ ᐃᓯ ᐊᔨᒧᒥᓱᔭᓐ᙮ ᓇᒪ ᒪᒃ ᓂ ᐎ ᒋᔅᑕᔨᑕᑯᐃᓱᓐ᙮ ᐃᔭᐱᒡ ᓂᑭ ᐊᔨᒧᑕᓐ ᑕᓐ ᐊᔅᐱᔅ ᐊᑲ ᓴᐱᓯᔭᓐ᙮ 31 ᒋᓴᒪᓂᑐᐤ ᒋᑎᐸᔨᒋᒐᓯᒥᓄᐤ ᒋᓴᔅ ᐅᑕᐎᔭ ᒋᔅᒐᔨᑎᒻ ᐊᑲ ᑭᑭᒋᔭᐅᒡ᙮ ᐎᔾ ᑲᒋᒡ ᒋᑭ ᒪᒥᒋᒪᑭᓄᐤ᙮ 32 ᑕᒪᔅᑲᔅ ᑲ ᐃᓯᓂᐧᑲᑕᒡ ᐅᑕᓇᐤ ᑲ ᑕᔭᓐ ᐊᓐ ᐱᑐᐅᒋᒪᐤ ᐊᓐ ᐛᒋ ᑕᒋᔅᑯᐛᑦ ᐊᓂᔭ ᒋᓴᐅᒋᒪᐛ ᐊᕆᑕᔅ ᑲ ᐃᓯᓂᐧᑲᓱᔨᒋ ᒋ ᐃᑎᓱᐛᔪᐛ ᒐᒋ ᐅᑎᓂᑯᐅᒡ ᐊᓐᑕ ᐅᑕᓇᒡ᙮ ᒋ ᐎ ᐎᐎᔭᓐ ᐊᓐ ᐅᑕᓇᐤ ᓂᐸ ᒪᑯᓂᑯᓐ᙮ 33 ᓂᐎᒐᐛᑭᓂᒡ ᒪᒃ ᓂᒋ ᐎᒋᐃᑯᐅᒡ ᒐᒋ ᒋᑎᓯᒧᒡ᙮ ᐅᑎᐱᐅᑎᒡ ᓂᒋ ᐱᑕᐅᑯᒡ ᐊᑯ ᐊᓐᑕ ᓯᐳᐛᔅᑕᔨᑕᑭᓂᒡ ᑲ ᐅᒋ ᐱᔅᑕᐱᒐᓂᒡ ᐎᐎᑎᒥᒡ ᐊᓂᔭ ᐅᑕᓇᔪᐤ, ᑭᔭ ᒂ ᒋᑎᓯᒧᔭᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.