1 ᑕᓴᓗᓂᔭᓇ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑕᓐ ᑲ ᐃᓯ ᒥᔪ ᐊᐱᑎᓯᑦ ᑎᒧᑎ ᑕᓴᓗᓇᐃᑲᒡ

¹ ᐊᑯ ᒪᒃ ᐃᔅᐱ ᐊᑲ ᐅᒋ ᐃᑎᔭᒡ ᒐ ᐊᑲ ᒋ ᐛᐱᒥᑕᒡ ᐊᑯ ᑲ ᐎᔭᔨᑎᒪᒡ ᐅᑕ ᐊᑕᓐᔅ ᒐᒋ ᑕᔭᒡ,

² ᐊᑯ ᑎᒧᑎ ᑲ ᐃᑎᓴᐅᒋᒡ ᐊᓐᑕ ᐊ ᑕᐛᒄ᙮ ᐅ ᒋᐧᑲᓂᓯᓄᐤ ᓂ ᐎᒋ ᐊᑐᔅᒐᒥᑯᓇᓐ ᒋᓴᒪᓂᑐᐛ ᐊ ᐊᑐᔅᑯᐅᒥᒋᒋ ᑭᔭ ᐎᔾ ᐊ ᐛᐎᑕᐧᒃ ᒥᔽᒋᒧᐅᓂᔪᐤ ᐊ ᑎᐸᒋᒪᑭᓄᔨᒋ ᙭ᑕ᙮ ᓂᒋ ᐃᑎᓴᐛᓇᓐ ᒐᒋ ᐎᒋᐃᑕᒄ ᐊᑐᐎᔅ ᒐᒋ ᓱᒋᑲᐳᐛᒄ ᑕᓐ ᐊ ᐃᓯ ᑕᑈᔭᔨᒪᒄ ᙭,

³ ᐊᑲ ᐛᒋ ᐸᐃᒄ ᐊ ᑎᓯᔭᒄ ᒐᒋ ᒋᐛᑲᐳᔭᒄ ᐊᓐ ᐊ ᓂᓇᐧᑲᒋᐃᑯᔭᒄ ᙭ ᐅᒡ᙮ ᒋᔨᐛᐤ ᓇᓂᑎᒻ ᒋ ᒋᔅᒐᔨᑕᓇᐛᐤ ᐊᐅᑯᓐ ᑭᔭ ᑲ ᐃᓯ ᐎᔭᔨᑕᐧᒃ ᒋᓴᒪᓂᑐᐤ, ᒐᒋ ᓂᓇᐧᑲᒋᐃᑯᐛᐧᒄ ᐊ ᓇᓴᐅᒪᐧᑯ ᒋᓴᓴ᙮

⁴ ᐛᔅ ᐊᔅᒄ ᐊᓐᑕ ᐊ ᑕᔭᒄ ᐊᒋ ᑕᔭᒡ ᓴᔅ ᓂᑲᓐ ᔅᒋ ᐎᑎᒪᑎᓇᓐ ᒐ ᐅᑎᒋᐱᔨᒡ ᒐ ᓂᓇᐧᑲᒋᐃᑯᔭᐧᒄ᙮ ᐊᐅᑯᓐ ᒪᒃ ᒧᔭᒻ ᑕᑈ ᑲ ᐃᔅᐱᔨᒡ ᒧᔭᒻ ᐊ ᐃᓯ ᒋᔅᒐᔨᑎᒪᒄ ᐊᑯ᙮

⁵ ᐊᐅᒄ ᒪᒃ ᐊᓂᔭ ᐛᒋ ᔭᐃᑕᔾ ᒋ ᐃᑎᓴᐅᒄ ᑎᒧᑎ ᐊᓐᑕ ᐊ ᑕᐛᒄ᙮ ᐃᔅᐱ ᐊᑲ ᑲᒋ ᐃᑎᔭᓐ ᐊᑲ ᒋᔅᒐᔨᒥᑎᑯᒡ ᑕᓐ ᐊ ᐃᔅᐱᔨᔭᒄ ᐊᑯ ᒂ ᐃᑎᓴᐅᒃ ᑎᒧᑎ ᐊᓐᑕ ᐊ ᑕᐛᒄ ᒐᒋ ᓂᑐ ᒋᔅᒐᔨᒥᑕᒡ ᑕᓐ ᐊ ᐃᔅᐱᔪᐛᒂ ᐊ ᑕᑈᔭᔨᒪᒄ ᙭᙮ ᓂᒋ ᓴᒋᓯᓐ ᒐᒋ ᐃᑐᑕᑕᒄ ᒥᒋᒥᓂᑐᐤ ᒐᒋ ᐳᓂᐛᒄ ᐊ ᑕᑈᑎᒪᒄ ᒐᔅᑲ ᒐᒋ ᐃᓯᓇᒂᒡ ᑕᓐ ᑲ ᐃᓯ ᐊᑐᔅᑯᐅᒋᒡ ᐅᑎᐸᔨᒋᒐᐤ ᐊᓐᑕ ᐊ ᑕᔭᒄ᙮

⁶ ᐊᑯ ᒪᒃ ᐊᒋ ᐸᒋ ᑎᑯᓯᐧᒃ ᑎᒧᑎ ᐊᓐᑕ ᐊ ᑕᐛᒄ ᐊ ᐅᑐᑕᑦ ᑭᔭ ᐊᒋ ᒥᔪ ᐊᔨᒧᑎᒧᔨᒥᑦ ᒋᑕᑈᑎᒧᐅᓄᐛᔪᐤ ᑭᔭ ᒋᓴᒋᐃᐛᐅᓄᐛᔪᐤ, ᐊᔪᐤ ᓂᒋ ᐎᑎᒪᑯᓇᓐ ᒧᔅ ᐊ ᒥᔪ ᒋᔅᒋᑐᐎᔭᒡ ᑭᔭ ᓇᔅᒡ ᐊ ᐎ ᐛᐱᒥᔭᒡ ᒧᔭᒻ ᓂᔭᓐ ᐛ ᐃᔅᐱᔅ ᐎ ᐛᐱᒥᑕᒡ᙮

⁷ ᐊᑯ ᒪᒃ ᐊᓐ ᒪᒂᒡ ᐊ ᒥᑯᔅᑲᑕᔨᑎᒪᒡ ᑭᔭ ᐊ ᓂᓇᐧᑲᑕᔨᒧᔭᒡ ᓂᒋ ᐅᐱᓂᑯᐛᓇᓐ ᓂᐱᒪᑎᓯᐅᓇᒡ ᐅᔭ ᑲ ᐃᑕᒋᒥᑕᒄ᙮ ᓇᔅᒡ ᓂ ᒥᔽᔨᒧᐃᑯᐅᓇᓐ ᐊ ᐸᑎᒪᒡ ᑕᓐ ᐊ ᐃᓯ ᑕᑈᔭᔨᒪᒄ ᙭᙮

⁸ ᐊᑯ ᒪᒃ ᒧᔭᒻ ᐊ ᐅᔅᒋᐃᑯᐅᔭᒡ ᓂᐱᒪᑎᓯᐅᓇᒡ ᓂᑦ ᐃᑕᔨᑕᓇᓐ ᐊ ᒋᔅᒐᔨᒥᑕᒡ ᐊᔅᒄ ᐃᔭᐱᒡ ᐊ ᓱᒋᑲᐳᐅᔭᒄ ᐊ ᐎᒐᐛᒄ ᐅᑎᐸᔨᒋᒐᐤ᙮

1 Thessalonians 3.9-13 (Advent-1 Year C)

⁹ ᑕᓐᑕ ᒪᒃ ᒐᒋ ᐅᒋ ᑕᑈ ᓂᓇᔅᑯᒥᒋᒡ ᒋᓴᒪᓂᑐᐤ ᒋᔨᐛᐤ ᐅᒋ ᐊᓐ ᐊ ᐃᔅᐱᔅ ᓇᔅᒡ ᒥᔽᔨᑎᒥᐃᔭᒡ ᐃᔅᐱ ᐊ ᐃᔨᒥᐃᒋᒡ ᒋᓴᒪᓂᑐᐤ᙮

¹⁰ ᒧᓯᓇᐤ ᓂ ᓂᑐᑎᒧᐛᓇᓐ ᒋᓴᒪᓂᑐᐤ ᒐᒋ ᐛᐱᒥᑕᒡ ᒥᓐ ᒐᒋ ᑕᔭᒡ ᐊᓐᑕ ᐊ ᑕᔭᒄ ᑭᔭ ᒐᒋ ᐎᒋᐃᑕᒡ ᑕᓐ ᐊᔅᒄ ᐊ ᐃᓯ ᓄᑕᐱᔨᔭᒄ ᑕᑈ ᒐᒋ ᑕᑈᔭᔨᒪᒄ ᙭ ᑕᓐ ᒋᐸ ᐃᓯ ᑕᑈᔭᔨᒪᐛᐤ᙮

¹¹ ᐊᐅᒄ ᒪᒃ ᐅ ᐊ ᐃᓯ ᐊᔭᒥᐊᔅᑎᒪᑕᒡ, ᓂ ᓂᑐᑎᒧᐛᓇᓐ ᒋᓴᒪᓂᑐᐤ ᒍᑕᐎᓄᐤ ᑭᔭ ᐅᑎᐸᔨᒋᒐᐤ ᒋᓴᔅ ᒐᒋ ᓇᐃᐱᔨᑕᒡ ᒥᓐ ᒐᒋ ᓂᑐᐛᐱᒥᑕᒡ᙮

¹² ᓂ ᓂᑐᑎᒧᐛᓇᓐ ᐅᑎᐸᔨᒋᒐᐤ ᒐᒋ ᐃᑐᑕᑕᒄ ᐊᔭᔅᒃ ᒐᒋ ᓴᒋᐃᑐᐛᒄ ᑭᔭ ᑯᑎᑲ ᐊᐛᔪᐛ ᐊᔭᔅᒃ ᒐᒋ ᓴᒋᐃᒪᑯ, ᒐᒋ ᐊᑎ ᐃᔅᐱᔅ ᓴᒋᐃᑐᔭᒄ ᑭᔭ ᒐᒋ ᐊᑎ ᐃᔅᐱᔅ ᓴᒋᐊᑯᒡ ᑯᑎᑭᒡ ᐊᐛᓐᒋ ᒧᔭᒻ ᓂᔭᓐ ᐊ ᐃᔅᐱᔅ ᓴᒋᐃᑕᒡ᙮

¹³ ᐊᑯᑕ ᒐ ᐅᒋ ᒥᔅᑯᓯᔨᑕᒄ ᑭᔭ ᑯᐃᔅᒄ ᒐ ᐃᓯ ᐱᒪᑎᓯᔭᒄ ᑭᔭ ᒐ ᐸᔭᒋ ᐱᒪᑎᓯᔭᒄ ᐃᔅᐱ ᐅᑎᔅᑯᑲᐳᔅᑎᐛᒂ ᒋᓴᒪᓂᑐᐤ ᒍᑕᐎᓄᐤ ᑎᑯᓯᒐ ᐅᑎᐸᔨᒋᒐᐤ ᒋᓴᔅ ᙭ ᐊ ᐸᒋ ᐎᒐᐛᑦ ᒥᓯᐛ ᐊᓂᔭᔪᐛ ᑲ ᑕᑈᑎᒥᔨᒋ᙮