1 ᐱᑕᕐ 4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒋᐱᒪᑎᓯᐅᓄᐛᐤ ᒋᑭ ᒂᔅᒋᓇᑯᓐ 1 ᙭ ᒪᒃ ᐊᒋ ᐛᐎᓯᒐᔨᑕᐧᒃ ᐎᔭᓱᐅᓂᒡ ᒪᒂᒡ ᐅᑕ ᐊᔅᒋᒡ ᑲ ᐱᒪᑎᓯᑦ ᑭᔭ ᒋᔨᐛᐤ ᐊᑯᓐ ᒋᐸ ᐃᓯ ᒪᒥᑐᓇᔨᑎᒥᐃᑯᓇᐛᐤ ᒐᒋ ᐃᓯ ᐊᔭᔅᑯᐎᔅᑎᒪᒄ, ᐛᔅ ᐊᓐ ᐊᐛᓐ ᑲ ᐛᐎᓯᒐᔨᑎᒥᐊᑭᓄᐅᑦ ᐎᔭᓱᐅᓂᒡ ᐳᓂᑕᐤ ᒥᒐᑎᓯᐅᓂᔪᐤ᙮ 2 ᐊᑯ ᒪᒃ ᑕᓐ ᐊᔅᒄ ᒐ ᐃᔅᐱᔅ ᐱᒪᑎᓯᒂ ᐅᑕ ᐊᔅᒋᒡ ᓇᒪ ᐊᑯ ᒋᐸ ᐅᒋ ᑎᐸᔨᒥᑯᐤ ᐎᔾ ᑕᓐ ᐊ ᐃᓯ ᒧᔅᑕᓇᔨᑕᐧᒃ ᑎᐱᔨᐛ ᒐᒋ ᐃᑕᑎᓯᑦ ᒪᒃ ᐃᐛᒃ ᒋᓴᒪᓂᑐᐛ ᑕᓐ ᐊ ᐃᓯ ᓂᑐᐛᔨᒥᑯᑦ ᐊᔪᐅᒄ ᐊᓂᔭ ᒋᐸ ᐎ ᓂᓇᑭᑐᐛᔨᑎᒥᐃᑯᐤ ᒐᒋ ᐃᑐᑕᐧᒃ᙮ 3 ᐛᔅ ᐃᔅᐱᔪᐤ ᐊᑯ ᑕᓐ ᑲ ᐃᔅᐱᔅ ᒋ ᐸᒋ ᒥᒐᑎᓯᔭᒄ ᐊᓐᑕ ᐅᑕᒡ ᒧᔭᒻ ᐊᓄᒡ ᑕᓐ ᐊ ᐃᓯ ᒥᒐᑎᓯᒡ ᐊᓐᒡ ᐊᑲ ᑕᑈᑕᒡ᙮ ᐎᓂᓱᐅᓂᒡ ᒋ ᐊᑎ ᐃᓯ ᐱᒪᑎᓯᓇᐛᐤ, ᓇᔅᒡ ᒋ ᑎᐸᔨᒥᑯᓇᐛᐤ ᓂᓇᐧᑯᐤ ᒥᒋ ᓂᑐᐛᔨᑎᒧᐅᓇ᙮ ᑭᔭ ᓇᔅᒡ ᒋ ᒥᔽᔨᑕᓇᐛᐤ ᐊ ᒥᓂᔭᒄ, ᒋ ᒥᔽᔨᑕᓇᐛᐤ ᐊ ᐎᒋᐃᐛᔭᒄ ᐊᓐᑕ ᐊ ᒥᓇᓄᐅᒡ ᑭᔭ ᐊᓐᑕ ᐊ ᐎᓂᓯᓇᓄᐅᒡ, ᔅᒋ ᐊᔭᒥᐊᔅᑐᐛᐛᐅᒡ ᑭᔭ ᓇᔅᒡ ᐊ ᒥᒋᓇᑯᓯᒡ ᒥᓂᑐᐧᑲᓐᒡ᙮ 4 ᓇᔅᒡ ᒪᒃ ᒋᒥᔅᑲᑕᔨᒥᑯᐛᐅᒡ ᐊᓐᒡ ᐊᑲ ᑕᑈᑕᒡ ᐊᑲ ᐎᒐᐛᑯᒡ ᐊᓂᔭ ᐊ ᐊᒂᑕᔨᑕᑯᓯᒡ ᐊ ᐃᓯ ᐱᒪᑎᓯᒡ ᑭᔭ ᓇᔅᒡ ᐛ ᒪᒪᔭᔨᒥᑕᑯᒡ᙮ 5 ᐸᐃᒂᐤ ᒪᒃ ᐊ ᒋᓯᑲᔨᒡ ᒋᑭ ᐅᑎᔅᑯᑲᐳᔅᑐᐛᐅᒡ ᒋᓴᒪᓂᑐᐛ ᐊ ᐎᑕᒡ ᑕᓐ ᑲ ᐃᓯ ᐸᒋ ᐱᒪᑎᓯᒡ᙮ ᐊᐅᒄ ᐛᔅ ᐅ ᒋᓴᒪᓂᑐᐤ ᒐ ᑎᐸᔅᑯᓇᑦ ᒥᓯᐛ ᐊᓂᔭ ᑲ ᓂᐱᔨᒋ ᑭᔭ ᐊᓂᔭ ᐸᒪᑎᓯᔨᒋ᙮ 6 ᐊᐅᒄ ᒪᒃ ᐅ ᐊᔪᐤ ᐊᓐᒡ ᑲ ᓂᐱᒡ ᐛᒋ ᐛᐎᑎᒧᐛᑭᓄᐅᒡ ᐅᔭ ᒥᔽᒋᒧᐅᓂᔪᐤ ᒐᒋ ᑎᐸᔅᑯᓇᑭᓄᐎᒡ ᐊᓂᔭ ᑕᓐ ᑲ ᐃᓯ ᐱᒪᑎᓯᒡ ᒥᓯᐛ ᐊᐛᔪᐛ ᑕᓐ ᐊ ᐃᓯ ᑎᐸᔅᑯᓇᑭᓄᔨᒋ, ᒋ ᐛᐎᑎᒥᒧᐛᑭᓄᐎᒡ ᐅᔭ ᒥᔽᒋᒧᐅᓂᔪᐤ ᒐᒋ ᐊᔭᒡ ᐊᒐᐧᒄ ᐱᒪᑎᓯᐅᓂᔪᐤ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᑯᐃᔅᒄ ᐃᓯ ᐊᐱᒋᑕᐛᒄ ᒋᓴᒪᓂᑐᐤ ᐅᒥᔨᐛᐅᓇ 7 ᓴᔅ ᐸᓱᓇᑯᓐ ᒥᓯᐛ ᒐᒂᓐ ᒐ ᐃᔎᐱᔨᒡ᙮ ᒋ ᓂᑐᐛᔨᑕᑯᓯᓇᐛᐤ ᒐᒋ ᐃᓯ ᓂᓇᑭᑐᐛᔨᑎᒪᒄ ᑕᓐ ᐊ ᐃᑎᔭᒄ ᑭᔭ ᐊᓱᐛᐱᒄ ᐊ ᐊᔭᒥᐊᔭᒄ᙮ 8 ᒪᐅᒡ ᒪᒃ ᐊ ᐃᑕᔨᑕᒂᒡ ᐊᐅᒄ ᐅ ᒋᒋᐛ ᒐᒋ ᓴᒋᐃᑐᔭᒄ ᒥᓯᐛ ᐊ ᑎᓯᔭᒄ, ᐛᔅ ᓴᒋᐃᐛᐅᓐ ᐛᐸᔨᑎᒧᒥᑭᓐ ᒥᒐᑦ ᒥᒋᑥᐅᓇ᙮ 9 ᒪᒥᔅᑯᒡ ᒪᒥᔪᑐᑕᑐᒄ, ᒥᔽᔨᑎᒧᒄ ᐅ ᐊ ᐃᓯ ᐎᒋᐃᑐᔭᒄ᙮ 10 ᒥᓯᐛ ᐸᐸᐃᒄ ᐊᐛᓐ ᑎᑯᓂᔪᐤ ᑕᓐ ᐊ ᐃᓯ ᒥᔨᑯᑦ ᒋᓴᒪᓂᑐᐛ ᑭᔅᒋᐅᓂᔪᐤ᙮ ᐊᐅᒄ ᒪᒃ ᐅᔭ ᑭᔅᒋᐅᓂᔪᐤ ᒋᐸ ᐊᐱᒋᑕᐤ ᐊ ᐛᐎᒋᐊᑦ ᑯᑎᑲ ᐊᐛᔪᐛ, ᐊ ᐊᓱᐤ ᒥᔭᑦ ᐊᐛᔪᐛ ᒋᓴᒪᓂᑐᐛ ᐅᓱᐛᔨᒋᒐᐅᓂᔪᐤ᙮ 11 ᐊᐛᓐ ᐊᒋ ᒥᔨᑯᑦ ᒋᓴᒪᓂᑐᐛ ᒐᒋ ᐃᔨᒪᐊᑦ, ᒋᐸ ᐃᔨᒧᐤ ᑕᓐ ᐊᓂᔭᔪᐛ ᐊ ᐃᓯ ᒥᔨᑯᑦ ᒋᓴᒪᓂᑐᐛ ᒐᒋ ᐃᓯ ᐃᔨᒥᑦ᙮ ᐊᓐ ᐊᐛᓐ ᑲ ᒥᔭᑭᓄᐅᑦ ᑭᔅᒋᐅᓂᔪᐤ ᒐᒋ ᐎᒋᐊᑦ ᑯᑎᑲ ᐊᐛᔪᐛ, ᑭᑈ ᒋᐸ ᐎᒋᐊᐤ ᑕᓐ ᐊ ᐃᓯ ᒥᔨᑯᑦ ᒋᓴᒪᓂᑐᐛ ᑭᔅᒋᐅᓂᔪᐤ᙮ ᐊᑯ ᒪᒃ ᐎᔾ ᒋᓴᒪᓂᑐᐤ ᒐ ᒋᔅᑕᔨᑕᑯᐊᑭᓄᐅᑦ ᒥᓯᐛ ᒐᒂᔪᐤ ᑕᓐ ᐊ ᐃᓯ ᐃᑐᑕᐧᒃ ᐊᓐᑕ ᒋᓴᔅ ᙭ᑕ ᐊ ᑕᔨᒋ ᐃᔅ, ᐎᔾ ᒋᓴᒪᓂᑐᐤ ᒐ ᐊᑲ ᓂᑕ ᐃᔎᐱᔨᒡ ᐅᒋᔅᑕᔨᑕᑯᓱᐅᓐ ᑭᔭ ᐅᒥᔅᑯᓯᐅᓐ᙮ ᐊᒥᓐ᙮ ᑲ ᑕᑈᑕᒡ ᐊᐛᓐᒋ ᐊ ᓂᓇᐧᑲᑕᔨᒧᐊᑭᓄᐎᒡ 1 Peter 4.12-14; 5.6-11 (Easter-7 Year A) 12 ᓂᐧᑲᓂᓯᑐᒄ ᑲ ᓴᒋᐃᑎᑯᒡ, ᐊᑲᐎᔾ ᒪᒥᑯᔅᑲᑕᔨᑎᒥᐃᑯᒄ ᑕᓐ ᐊ ᐃᓯ ᒥᔅᑎ ᐊᔨᒪᒡ ᐊ ᐃᓯ ᑯᒂᒋᐃᑯᐅᔭᒄ ᒧᔭᒻ ᒐᒂᓐ ᐊ ᐅᑎᑕᐅᑯᔭᒄ ᐊ ᒪᓐᑕᐛᔨᑕᒂᒡ ᒐᒋ ᐃᑕᔨᑎᒪᒄ᙮ 13 ᐃᔭᐱᒡ ᒋᐸ ᒥᔽᔨᑕᓇᐛᐤ ᐊ ᐎᒋᐃᐛᔭᒄ ᑕᓐ ᑲ ᐃᓯ ᐛᐎᓯᒐᔨᑎᒥᐊᑭᓄᐅᑦ ᙭, ᐊᑯ ᒪᒃ ᒐ ᓴᑭᔅᒋᓇᔅᑲᑯᔭᒄ ᒥᔽᔨᑎᒧᐅᓐ ᐃᔅᐱ ᐸᒋ ᓄᑯᑕᑭᓄᔨᒐ ᐅᒋᔅᑕᔨᑕᑯᓱᐅᓐ᙮ 14 ᐛᔅ ᒧᔭᒻ ᒪᔭᔨᒥᑯᐅᔭᒂ ᙭ ᐊ ᓇᓴᐛᒄ, ᒋ ᓱᐛᔨᑕᑯᓯᓇᐛᐤ ᐛᔅ ᐊᑯᑕ ᐛᒋ ᒋᔅᒐᔨᑕᒂᒡ ᑕᑈ ᐊ ᐎᒐᐅᑕᒄ ᑲ ᒋᔅᑕᔨᑕᑯᓯᑦ ᐊᒐᐧᒄ, ᒋᓴᒪᓂᑐᐤ ᐅᑦ ᐊᒐᒂ᙮ 15 ᐊᑲᐎᔾ ᒪᒃ ᐊᐛᓐ ᐊᓐᑕ ᐊ ᑎᓯᔭᒄ ᒋᑭ ᐅᒋ ᓂᓇᐧᑲᑕᔨᒧᐤ ᐊᓂᔭ ᐅᒋ ᐊ ᐎ ᓂᐸᐃᐛᑦ, ᑭᔭ ᒪᒃ ᐊ ᒋᒧᑎᒂ, ᑭᔭ ᒪᒃ ᐊ ᒥᒋᐃᔪᑦ, ᑭᔭ ᒪᒃ ᐊᓂᔭ ᐅᒋ ᐊ ᐅᑕᔨᒪᑦ ᑯᑎᑲ ᐊᐛᔪᐛ ᐊ ᐃᑎᔨᒋ᙮ 16 ᒪᒃ ᒧᔭᒻ ᐊ ᓇᐧᑲᒋᐅᐛᒂ ᐊ ᓇᓴᐛᒄ ᙭, ᐊᑲᐎᔾ ᒋᑭ ᐅᒋ ᓴᒂᔨᒧᓇᐛᐤ᙮ ᒋᐸ ᓂᓇᔅᑯᒪᐛᐤ ᒋᓴᒪᓂᑐᐤ ᙭ ᐊ ᐊᔭᐅᑕᒄ᙮ 17 ᐛᔅ ᓴᔅ ᐅᑎᒋᐱᔪᐤ ᒐ ᑎᐸᔅᑯᓇᑦ ᒋᓴᒪᓂᑐᐤ ᐅᑦ ᐃᔨᒪ᙮ ᒧᔭᒻ ᒪᒃ ᒋᔭᓄᐤ ᑲ ᑕᑈᑎᒪᐧᒄ ᓂᔅᑎᒻ ᒐ ᑎᐸᔅᑯᓂᑯᐛᐅᒂ, ᐃᓯᒪ ᒋᑭ ᐃᔅᐱᔪᒡ ᐊᓐᒡ ᐊᑲ ᐎ ᓂᓇᐃᑎᒺᒡ ᒋᓴᒪᓂᑐᐛ ᐅᒥᔽᒋᒧᐅᓂᔪᐤ᙮ 18 ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒧᔭᒻ ᒥᓇᐅᔅ ᒐ ᐱᒪᒋᐊᑭᓄᐛᒂ ᐊᓐᒡ ᑲ ᑯᐃᔅᑯᑕᑎᓯᒡ, ᑕᓐ ᒐ ᐃᔅᐱᔨᒡ ᐎ ᐊᓐᒡ ᐅᒥᒋᑥᐅᒡ ᑭᔭ ᐊᓐᒡ ᑲ ᒪᓂᑐᐛᑎᓯᒡ ᐊᑲ ᐎ ᓂᓇᐃᑐᐛᒡ ᒋᓴᒪᓂᑐᐛ ? 19 ᐊᑯ ᒪᒃ ᐊᓐᒡ ᐊᐛᓐᒋ ᑲ ᓂᓇᐧᑲᑕᔨᒧᒡ ᒋᓴᒪᓂᑐᐛ ᐊᒋ ᐱᔅᑎᓂᒥᔨᒋ ᐅᔭ ᒐᒋ ᐃᔅᐱᔨᒡ, ᐃᔭᐱᒡ ᒋᐸ ᐃᑐᑎᒧᒡ ᐊᓂᔭ ᑕᓐ ᐊ ᐃᓯ ᑯᐃᔅᑯᓇᑯᓂᔨᒡ ᑭᔭ ᓇᔅᒡ ᒋᐸ ᑕᑈᐅᒐᔨᒪᐅᒡ ᒋᓴᒪᓂᑐᐛ ᐊᓂᔭ ᑲ ᐅᓯᐃᑯᒡ, ᐊᓂᔭ ᒐ ᐊᑲ ᓂᑕ ᐅᒋ ᐳᓂᔨᒋ ᐊ ᐎᒋᐃᑯᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.