1 ᐱᑕᕐ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᓇᐸᐅᒡ ᑭᔭ ᐃᔎᐅᒡ ᑲ ᓂᐳᐅᒡ ᒐ ᐃᓯ ᒋᔅᑕᔨᒥᑐᒡ 1 ᒧᔭᒻ ᒪᒃ ᑭᔭ ᒋᔨᐛᐤ ᐃᔎᑐᒄ ᑲ ᓂᐳᔭᒄ ᒋᐸ ᓂᓇᐃᑐᐛᐛᐅᒡ ᒋᓇᐸᒧᐛᐅᒡ᙮ ᐛᔅ ᐅ ᑎᔭᒂ ᒋᑭ ᒋ ᐃᓯᓇᑯᓂᔪᐤ ᐱᔅᒐ ᒐᒋ ᐊᑎ ᑕᑈᑕᒡ ᐛᐱᒥᑕᒂᐛ ᑕᓐ ᐊ ᐃᓯ ᑯᐃᔅᑯᐱᒪᑎᓯᐛᒄ, ᐊᑎ ᐊᑲ ᒋᔅᑐᑕᒂᐛ ᒐᒋ ᑕᑈᑕᒡ᙮ 2 ᐛᔅ ᐛᐱᒥᑕᒂᐛ ᐊ ᐸᔭᒋ ᐱᒪᑎᓯᐛᒄ ᑭᔭ ᐊ ᒋᔅᑕᔨᒪᒄ ᒋᓴᒪᓂᑐᐤ ᐊᔪᐅᒄ ᐅᔭᔪᐤ ᒐ ᐎᒋᐃᑯᒡ ᒐᒋ ᑕᑈᑕᒡ᙮ 3 ᓇᒪ ᓇᔅᒡ ᒋᐸ ᐅᒋ ᐊᐱᑕᔨᑎᒥᐃᑯᓇᐛᐤ ᑕᓐ ᒐ ᐃᓯᓇᑯᐃᓱᔭᒄ ᐅᑕ ᐅᔅᒡ, ᒧᔭᒻ ᑕᓐ ᒐ ᐃᑎᐛᐊᒪᔭᒄ ᒪᒃ ᒐᒂᓐ ᒐ ᐛᐛᓯᐅᐛᒐᔭᒄ, ᒪᒃ ᑭᔭ ᑕᓐ ᒐ ᐃᑕᔅᐱᓱᔭᒄ᙮ 4 ᐃᐛᒃ ᐃᑕᔨᑕᑯᓐ ᑯᐃᔅᒄ ᒐᒋ ᐃᓯ ᐱᒪᑎᓯᔭᒄ ᑭᔭ ᒐᒋ ᒋᔭᒪᑎᓯᔭᒄ ᒐᒋ ᐅᒋ ᒥᔪᓇᑯᓯᔭᒄ᙮ ᐊᔪᐅᒄ ᐅᔭ ᓇᔅᒡ ᒪᔪᓇᑯᓯᑦ ᐃᔎᐤ ᐊ ᐃᓯ ᐱᒪᑎᓯᑦ ᑭᔭ ᐊᔪᐅᒄ ᐅᔭ ᐊ ᐃᑐᑕᑯᑦ ᒧᔅ ᒐᒋ ᒥᔪᓇᑯᓯᑦ᙮ ᐊᔪᐅᒄ ᐅᔭ ᒪᐅᒡ ᒪᔪᓇᐧᒃ ᒋᓴᒪᓂᑐᐤ ᐃᔎᐛ ᒐᒋ ᐃᓯ ᐱᒪᑎᓯᔨᒋ᙮ 5 ᐛᔅ ᐊᑯᓐ ᑲ ᐃᓯᓇᑯᓯᒡ ᐊᓐᒡ ᑲ ᐸᔭᒋ ᐱᒪᑎᓯᒡ ᐃᔎᐅᒡ ᐊᓐᑕ ᐛᔅᑭᒡ, ᐊᓐᒡ ᑲ ᐊᔅᐸᔨᒧᑐᑐᐛᒡ ᒋᓴᒪᓂᑐᐛ᙮ ᒋ ᓂᓇᐃᑐᐛᐅᒡ ᐅᓇᐸᒧᐛᐛ᙮ 6 ᒧᔭᒻ ᐊᓂᔭ ᓴᕋ ᑲ ᐃᓯᓇᑯᓯᑦ, ᐊᐅᒄ ᐊᓐ ᐸᐃᒄ ᑲ ᐊᔨᒧᒪᑭᓄᐅᑦ ᐊᒋ ᓂᓇᐃᑐᐛᑦ ᐅᐎᒋᒪᑭᓇ ᐊᑉᕋᐊᒪ, ᓄᒋᒪᒻ ᐊᒋ ᐃᓯᓂᐧᑲᑕᑦ᙮ ᐊᐅᒄ ᒪᒃ ᐅ ᓴᕋ ᐛᐅᑕᓂᓯᑐᑕᑕᒄ ᒧᔭᒻ ᑯᐃᔅᒄ ᐊ ᐃᑎᔭᒄ ᑭᔭ ᐊᑲ ᑯᔅᑎᒪᒄ ᒐᒂᓐ᙮ 7 ᐊᐅᑯᓐ ᒪᒃ ᑭᔭ ᒋᔨᐛᐤ ᑲ ᓂᐳᐅᔭᒄ ᓇᐸᑐᒄ ᒐ ᐃᑎᔭᒄ᙮ ᓱᒃ ᐎ ᓂᓇᑭᑐᐛᔨᒪᐧᑯᒡ ᒋᐅᐛᐅᒡ ᐊ ᐎᒋᒪᑯᒡ ᐊ ᒋᔅᒐᔨᒪᑯᒡ ᐊᑲ ᐃᔅᐱᔅ ᓱᒋᓯᒡ ᒋᔨᐛᐤ ᐊ ᐃᔅᐱᔅ ᓱᒋᓯᐛᒄ᙮ ᒋᔅᑕᔨᒪᐧᑯᒡ ᐛᔅ ᑭᔭ ᐎᔨᐛᐤ ᒋᑭ ᐊᓂᔅᒐ ᒥᔭᑭᓄᐎᒡ ᑲᒋᒡ ᐱᒪᑎᓯᐅᓂᔪᐤ ᒧᔭᒻ ᒋᔨᐛᐤ ᒐ ᐃᓯ ᒥᔨᑯᐅᔭᒄ᙮ ᐃᑐᑎᒧᒄ ᐅ ᐊ ᐃᑎᓱᒥᑎᑯᒡ ᐊᑲ ᒐᒂᓐ ᒐᒋ ᒋᐱᔅᑲᑯᔭᒄ ᐊ ᐊᔭᒥᐊᒄ ᒋᓴᒪᓂᑐᐤ᙮ ᐊ ᓂᓇᐧᑲᑕᔨᒧᑦ ᐊᐛᓐ ᐊ ᒥᔪᑐᑕᐧᒃ 8 ᐅ ᒪᒃ ᒥᓯᐛ ᑲ ᐃᓯ ᐊᔨᒧᑎᒪᑎᑯᒡ ᒥᓯᐛ ᐊ ᑎᓯᔭᒄ ᓱᒃ ᐸᐃᑯᓄᒡ ᐃᓯ ᒪᒥᑐᓇᔨᑎᒧᒄ ᐊ ᒋᔅᑎᒪᒐᔨᒥᑐᔭᒄ ᑭᔭ ᓴᒋᐃᑐᒄ ᑕᐱᔅᑯᓐ ᐊ ᐎᐧᑲᓂᓯᑕᑐᔭᒄ ᑭᔭ ᒋᓴᐛᑐᑕᑐᒄ᙮ ᓱᒃ ᒧᔅ ᑎᐱᑕᔨᒧᒄ᙮ 9 ᐊᑲᐎᔾ ᔭᐃᑕᔾ ᐎ ᑎᐸᐊᒪᓱ ᐊᐛᓐ ᐊ ᐅᓂᑐᑕᔅᒃ ᒪᒃ ᐊ ᒪᒥᐊᔭᔨᒥᔅᒃ᙮ ᐃᔭᐱᒡ ᐅᔅᑕ ᒥᔪᑐᑎᒧᐤ ᑭᔭ ᐊᔭᒥᑐᐤ ᒐᒋ ᓱᐛᔨᒥᑯᑦ ᒋᓴᒪᓂᑐᐛ, ᐛᔅ ᐊᐅᒄ ᐅ ᑲ ᐃᓯ ᐃᑕᔨᑕᑭᓄᐅᒡ ᒋᐱᒪᑎᓯᐅᓐ ᒐᒋ ᐃᓯᓇᒂᒡ᙮ ᐊᑯᑕ ᒐᒋ ᐅᒋ ᐊᓂᔅᒐ ᒥᑭᐎᔨᓐ ᓱᐛᔨᒋᒐᐅᓐ᙮ 10 ᐛᔅ ᐃᑎᔅᑕᐤ ᒥᓯᓇᐃᑭᓂᒡ, ᐊᐛᓐ ᑕᑈ ᐛ ᒥᔽᔨᑎᒧᒂ ᐊ ᐱᒪᑎᓯᑦ ᑭᔭ ᐸᑯᓴᔨᒧᒂ ᒐᒋ ᒪᒥᔪᐱᔨᑦ, ᐊᑲᐎᔾ ᒋᑭ ᐅᒋ ᒥᒋ ᐃᔨᒧᐤ ᑭᔭ ᐊᑲᐎᔾ ᒋᑭ ᐅᒋ ᐎᒋ ᑭᑭᒋᔭᐤ᙮ 11 ᐊᑯᔅ ᒋᑭ ᐳᓂᐤ ᐊ ᒥᒋᑐᑕᐧᒃ᙮ ᐅᔅᑕ ᒧᔅ ᒋᑭ ᐎ ᒥᔪᑐᑎᒪᒐᐤ᙮ ᓱᒃ ᒋᑭ ᐎ ᐊᒋᔅᑎᒻ ᒐᒋ ᐎᒋᐊᑦ ᒥᓯᐛ ᐎᐧᑲᓂᓯᒪᐛ ᒧᔅ ᒐᒋ ᒥᔪ ᐎᒐᐅᑐᔨᒋ᙮ 12 ᐛᔅ ᐅᑎᐸᔨᒋᒐᐤ ᒥᔪ ᑭᓄᐛᔨᒪᐤ ᐊᓂᔭ ᑲ ᑯᐃᔅᑯᐱᒪᑎᓯᔨᒋ ᑭᔭ ᓂᑐᑐᐛᐤ ᐃᔅᐱᔅ ᐊ ᐊᔭᒥᐊᔨᒋ, ᐊᑯ ᐊᓂᔭ ᑲ ᒥᒐᑎᓯᔨᒋ ᓇᒪ ᓇᐃᐱᒪᐤ᙮ ᐊᐅᒄ ᐊᑎᔅᑕᒡ ᒥᓯᓇᐃᑭᓂᒡ᙮ 1 Peter 3.13-22 (Easter-6 Year A) 13 ᐊᐛᓐ ᒪᒃ ᒐᒂᔪᐤ ᒐᒋ ᐃᑐᑕᑕᒄ ᐊᓐ ᐅᒋ ᓱᒃ ᐊ ᐃᑕᔨᑎᒥᐃᑯᔭᒄ ᒐᒋ ᒥᔪᑐᑎᒪᒄ᙮ 14 ᐊᑎ ᐃᓯᓇᒂᒡ ᒐᒋ ᓂᓇᐧᑲᒋᐃᑯᐅᔭᒄ ᐊ ᑯᐃᔅᑯᑕᑎᓯᔭᒄ ᐅᒋ, ᒋᑭ ᓱᐛᔨᒥᑯᐛᐤ ᒋᓴᒪᓂᑐᐤ᙮ ᐊᑲᐎᔾ ᑯᑯᔅᑕᐧᑯᒡ ᑲ ᐎᐎᔭᔅ ᐃᑐᑕᑕᑯᒡ ᐊᐛᓐᒋ, ᐊᑲᐎᔾ ᒋᑭ ᐅᒋ ᒥᑯᔅᑲᑕᔨᑕᓇᐛᐤ, 15 ᒋᔅᑕᔨᒪᐧᒄ ᐅᑎᐸᔨᒋᒐᐤ ᙭ ᒋᑕᐃᐛᒡ᙮ ᒧᔅ ᒋᐸ ᐊᔭᔅᑯᐎᓇᐛᐤ ᑕᓐ ᒐᒋ ᐃᓯ ᐎᑎᒧᐊᑯᒡ ᐊᓐᒡ ᑲ ᐎ ᓇᓂᑐ ᒋᔅᒐᔨᑕᒡ ᐊᓂᔭ ᐊᔅᐸᔨᒧᐅᓂᔪᐤ ᑲ ᐱᒋᔅᑲᑯᐛᒄ᙮ ᒋᔭᒻ ᒥᒄ ᐎᑎᒧᐛᐧᑯᒡ ᐊᐛᓐᒋ ᐅᔭᔪᐤ ᑭᔭ ᐃᔭᐱᒡ ᒋᔅᑕᔨᒪᐧᑯᒡ᙮ 16 ᓱᒃ ᒧᔅ ᑯᐃᔅᒄ ᐎ ᐃᓯ ᐱᒪᑎᓯᒄ ᓇᔅᒡ ᒐᒋ ᒐᔅᑎᓇᐅᔭᒄ ᐊᑲ ᒥᒋᑐᑎᒪᒄ᙮ ᐅ ᐃᓯᓇᑯᓯᔭᒂ, ᐊᑯᑕ ᒐ ᐅᒋ ᓯᓴᒂᔨᒧᒡ ᐊᓐᒡ ᑲ ᒪᔭᔨᒥᑕᑯᒡ, ᐊᓐᒡ ᑲ ᒥᒋ ᐊᔨᒧᒥᑕᑯᒡ ᐊ ᑯᐃᔅᑯᐱᒪᑎᓯᐛᒄ ᙭ᑕ ᐊ ᓇᓴᐅᒪᑯ᙮ 17 ᓂᓇᐧᑲᑕᔨᒧᔨᓇ ᐊᓐ ᐅᒋ ᐊ ᒥᔪᑐᑎᒥᓐ, ᒋᓴᒪᓂᑐᐤ ᒪᒃ ᐊ ᐱᔅᑎᓇᐧᒃ ᐅᔭ ᒐᒋ ᐃᔅᐱᔪᑦ, ᐅᔅᑕ ᒥᔽᐤ ᐊ ᓂᓇᐧᑲᑕᔨᒧᔨᓐ ᐊ ᒥᔪᑐᑎᒥᓐ ᐃᔅᐱᔅ ᐎ ᒐᒋ ᓂᓇᐧᑲᑕᔨᒧᔨᓐ ᐊ ᒥᒋᑐᑎᒥᓐ᙮ 1 Peter 3.18-22 (Lent-1 Year B) 18 ᐛᔅ ᙭ ᐸᐃᒂᐤ ᔅᒋ ᓂᐱᔅᑎᒪᑭᓄᐤ ᒥᒋᑥᐅᓂᒡ ᐅᒡ ᒐᒋ ᐅᒋ ᐸᓱᐅᑕᐧᒄ ᒋᓴᒪᓂᑐᐛ ᐊ ᑕᔨᒋ᙮ ᐊᓐ ᑲ ᑯᐃᔅᑯᑕᑎᓯᑦ ᒋ ᓂᐱᔅᑎᒧᐛᐤ ᐊᓂᔭ ᐊᑲ ᑯᐃᔅᑯᑕᑎᓯᔨᒋ᙮ ᑕᑈ ᑭᑈ ᒋ ᓂᐸᑕᑭᓄᐅᔪᐤ ᐎᔪᐤ ᒥᒄ ᒪᒃ ᒋ ᐃᑐᑐᐛᑭᓄᐅᔪᐛ ᐅᑦ ᐊᒐᒂ ᐃᔭᐱᒡ ᒐᒋ ᐱᒪᑎᓯᔨᒋ᙮ 19 ᐊᒐᐧᑯᒡ ᒪᒃ ᒋ ᐃᓯ ᑭᒐᔅᒋᒪᐤ ᐊᓂᔭᔪᐛ ᐊᒐᒂ ᑲ ᒋᐸᐛᑭᓄᔨᒋ᙮ 20 ᐊᐅᑯᓐᒡ ᐅᒡ ᐊᓂᔭᐧᑲ ᑲ ᐱᒪᑎᓯᒡ ᒪᒂᒡ ᐊᓂᔭ ᓄᐛ ᑲ ᐅᓯᑕᑦ ᐊ ᒥᓴᔨᒡ ᐅᐤᑎᔪᐤ᙮ ᓇᒪ ᐅᒋ ᓂᓇᐃᑐᐛᓯᐱᓐᒡ ᒋᓴᒪᓂᑐᐛ, ᒥᒄ ᒪᒃ ᒋ ᓯᐱᔪᐛᓯᔅᑕᑯᐅᒡ ᒋᓴᒪᓂᑐᐛ᙮ ᒥᒄ ᔭᓇᐤ ᐊᐛᓐᒋ ᒋ ᐳᓱᐅᒡ ᐊᓂᔭ ᐅᐤᑎᔪᐤ, ᒋ ᐱᒪᒋᐃᑯᐅᒡ ᒪᒃ ᒋᓴᒪᓂᑐᐛ ᐊᓐᑕ ᐊᓂᔭ ᑲ ᐃᔅᒋᐳᑕᔨᒡ᙮ 21 ᐊᓐ ᒪᒃ ᓂᐱᔾ, ᒧᔭᒻ ᓯᑲᐃᑕᒐᐅᓐ ᒋ ᐃᓯᓇᑯᓐ, ᓯᑲᐃᑕᒐᐅᓂᔪᐤ ᒪᒃ ᐊᔪᐅᒄ ᐸᒪᒋᐃᑯᑦ ᐊᐛᓐ ᑲ ᑕᑈᑕᐧᒃ᙮ ᒥᒄ ᒪᒃ ᐊ ᓯᑲᐃᑐᐛᑭᓄᐅᑦ ᐊᐛᓐ ᓇᒪ ᐎᔪᐤ ᒋᔅᑕᐸᐅᑕᑭᓄᐅᔪᐤ᙮ ᓄᑯᑕᐤ ᒋᓴᒪᓂᑐᐛ ᐊ ᐃᑕᑦ ᑕᑈ ᙭ᑕ ᒐ ᓇᓴᐛᑦ᙮ ᐱᒪᒋᐃᑯᐤ ᐊ ᓯᑲᐃᑐᐛᑭᓄᐅᑦ ᐊᓂᔭ ᐅᒋ ᒋᓴᔅ ᙭ᑕ ᐊᒋ ᐅᓂᔅᑲᓇᑭᓄᔨᒋ ᓂᐳᐅᓂᒡ ᐅᒡ᙮ 22 ᐊᐅᒄ ᐅ ᙭ ᒋᒋᒋᓯᑯᒡ ᑲ ᐃᓯ ᐅᐱᔨᑦ ᑭᔭ ᑲ ᐊᔨᑯᑦ ᒋᓴᒪᓂᑐᐛ ᐅᒥᔪᓂᔨᒡ ᐃᑕᒐ ᐊᓐᑕ ᒪᐅᒡ ᐊ ᒋᔅᑕᔨᑕᑯᓂᔨᒡ ᒐᒋ ᐊᐱᑦ ᐊᐛᓐ᙮ ᐊᑯᑕ ᒪᒃ ᑲ ᒥᔭᑭᓄᐅᑦ ᒐᒋ ᐅᒋᒪᒥᑕᑯᑦ ᒥᓯᐛ ᐊᓐᒋᓇ ᑭᔭ ᒐᒋ ᑎᐸᔨᑕᐧᒃ ᒥᓯᐛ ᒋᒋᒋᓯᒄ ᑎᐸᔨᒐᐅᓂᔪᐤ ᑭᔭ ᒥᓯᐛ ᓱᐧᑲᑎᓯᐅᓂᔪᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.