1 ᒠᓐ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒋᓴᒪᓂᑐᐤ ᐅᑦ ᐊᐛᓯᒪ 1 John 3.1-7 (Easter-3 Year B) 1 ᑭᓄᐛᐸᑎᒧᒄ ᒪ ᐊᔅᐱᔅ ᓴᒋᐃᑕᐧᒄ ᒋᓴᒪᓂᑐᐤ, ᐊ ᒥᔨᑕᐧᒄ ᒋᓴᒪᓂᑐᐤ ᐅᑦ ᐊᐛᓯᒪ ᒐᒋ ᐃᓯᓂᐧᑲᑎᑯᐅᐛᐧᒄ ! ᑕᑈ ᒪᒃ ᒋ ᐅᑦ ᐊᐛᓯᒥᑕᑯᓄᐤ ! ᐊᓐᒡ ᐊᑲ ᑕᑈᔭᔨᒪᒡ ᒋᓴᒪᓂᑐᐛ, ᓇᒪ ᒋ ᒋᔅᒐᔨᒥᑯᓄᐅᒡ ᐊᐛᓐᒋ ᒋᔭᓄᐤ ᐛᔅ ᑕᐸ ᒋᔅᒐᔨᒪᐅᒡ ᒋᓴᒪᓂᑐᐛ᙮ 2 ᓂᐧᑲᓂᓯᑐᒄ ᑲ ᓴᒋᐃᑎᑯᒡ, ᒋ ᐅᑦ ᐊᐛᓯᒥᑕᑯᓄᐤ ᒋᓴᒪᓂᑐᐤ ᐊᓄᒡ, ᒥᒄ ᒪᒃ ᐊᔅᒄ ᓇᒪ ᓄᑯᓐ ᑕᓐ ᒐ ᐃᑕᔨᑕᑯᓯᔭᐧᒄ, ᒥᒄ ᒋ ᒋᔅᒐᔨᑕᓇᓄᐤ ᐃᔅᐱ ᑎᑯᓯᒐ ᒧᔭᒻ ᐎᔾ ᐊ ᐃᑕᔨᑕᑯᓯᑦ ᐊᐅᑯᓐ ᒐ ᐃᑕᔨᑕᑯᓯᔭᐧᒄ᙮ ᐛᔅ ᒋᑭ ᐛᐱᒪᓄᐤ ᑕᓐ ᐊᓐ ᐊ ᐃᑕᔨᑕᑯᓯᑦ᙮ 3 ᒥᓯᐛ ᒪᒃ ᐊᐛᓐ ᐅᔭᔪᐤ ᑲ ᐃᓯ ᐊᔅᐸᔨᒧᑦ, ᓂᓇᑭᑐᐛᔨᒥᓱᐤ ᒐᒋ ᐸᔭᒋᓯᑦ ᒧᔭᒻ ᙭ᑕ ᐊ ᐃᓯ ᐸᔭᒋᓯᔨᒋ᙮ 4 ᒥᓯᐛ ᐊᐛᓐ ᑲ ᒥᒋᑐᑕᐧᒃ, ᐱᑯᓂᒺᐤ ᒋᓴᒪᓂᑐᐛ ᐅᐎᓱᐛᐅᓂᔪᐤ᙮ ᐛᔅ ᐊ ᒥᒋᑐᑕᑭᓄᐅᒡ ᐱᑯᓂᑭᓄᐤ ᐎᓱᐛᐅᓐ᙮ 5 ᒋ ᒋᔅᒐᔨᑕᓇᐛᐤ ᙭ ᐊᒋ ᐸᒋ ᑎᑯᓯᐧᒃ ᒐᒋ ᐃᒐᓂᒧᐛᑦ ᐊᐛᔪᐛ ᐅᒥᒋᑥᐅᓂᔪᐛ ᑭᔭ ᐊᑲ ᓂᑕ ᐎᔾ ᐅᒋ ᒥᒋᑐᑕᐧᒃ᙮ 6 ᐊᓐ ᐊᐛᓐ ᒧᔅ ᑲ ᐎᒐᐛᑦ ᙭ᑕ, ᓇᒪ ᒥᒋᑐᑎᒻ᙮ ᐊᓐ ᐊᐛᓐ ᑲ ᒥᒋᑐᑕᐧᒃ, ᓇᒪ ᐅᒋ ᐛᐱᒪᐤ ᒋᓴᓴ ᑭᔭ ᓇᒪ ᐅᒋ ᒋᔅᒐᔨᒪᐤ᙮ 7 ᓂᑦ ᐊᐛᓯᒥᑎᒄ, ᐊᑲᐎᔾ ᒥᔭᐧᒄ ᐊᐛᓐ ᒐᒋ ᐎᔭᓯᒥᑕᒄ᙮ ᐊᓐ ᐊᐛᓐ ᑯᐃᔅᒄ ᑲ ᐃᑎᑦ, ᑯᐃᔅᑯᑕᑎᓯᐤ ᒧᔭᒻ ᙭ᑕ ᐊ ᐃᓯ ᑯᐃᔅᑯᑕᑎᓯᔨᒋ᙮ 8 ᐊᓐ ᐊᐛᓐ ᑲ ᒥᒋᐱᒪᑎᓯᑦ ᒥᒋᒥᓂᑐᐛ ᐊᑕᔨᑕᑯᓯᔨᒋ ᐃᑕᔨᑕᑯᓱᐤ᙮ ᐛᔅ ᒥᒋᒥᓂᑐᐤ ᒧᔅ ᒋ ᐸᒋ ᒥᒋᑐᑎᒻ᙮ ᒋᓴᒪᓂᑐᐤ ᒪᒃ ᐅᑯᓴ ᒋ ᐸᒋ ᑎᑯᓯᓂᔪᐛ ᐅᑕ ᐊᔅᒋᒡ ᒐᒋ ᓂᓱᐅᓇᒋᑕᐛᔨᒋ ᒥᓯᐛ ᐅᑦ ᐊᑐᔅᒐᐅᓂᔪᐤ ᒥᒋᒥᓂᑐᐛ᙮ 9 ᐊᓐ ᐊᐛᓐ ᒋᓴᒪᓂᑐᐛ ᑲ ᐱᒪᒋᐃᑯᑦ, ᐳᓂᐤ ᐊ ᒥᒋᑐᑕᐧᒃ᙮ ᐛᔅ ᒋᓴᒪᓂᑐᐛ ᐃᑐᑕᑯᐤ ᒐᒋ ᐃᑕᔨᑕᑯᓯᑦ ᒋᓴᒪᓂᑐᐛ ᐊ ᐃᑕᔨᑕᑯᓯᔨᒋ᙮ ᓇᒪ ᒪᒃ ᒋ ᒥᒋᑐᑎᒻ ᒋᓴᒪᓂᑐᐛ ᐊᒋ ᐱᒪᒋᐃᑯᑦ᙮ 10 ᐊᐛᓐ ᐊᑲ ᑯᐃᔅᑯᑕᑎᓯᑦ ᒪᒃ ᐊᑲ ᓴᒋᐊᑦ ᐎᐧᑲᓂᓴ, ᓇᒪ ᐅᑦ ᐊᐛᓯᒥᑐᑕᑯᐤ ᒋᓴᒪᓂᑐᐛ᙮ ᐊᑯᑕ ᐛᒋ ᒋᔅᒐᔨᒪᑭᓄᐅᑦ ᐊᐛᓐ ᐊᐛᔪᐛ ᐊ ᐅᑦ ᐊᐛᓯᒥᑐᑕᑯᑦ, ᒋᓴᒪᓂᑐᐛ ᑭᔭ ᒪᒃ ᒥᒋᒥᓂᑐᐛ᙮ ᒋᐸ ᓴᒋᐃᑐᓇᓄᐤ 11 ᐅᔅᑭᒡ ᑲ ᐛᐎᑎᒪᑯᔭᒄ ᒥᔽᒋᒧᐅᓐ ᐊᐅᒄ ᐅ ᑲ ᐃᓯ ᐎᑎᒪᑯᔭᒄ, ᒐᒋ ᓴᒋᐃᑐᔭᐧᒄ᙮ 12 ᓇᒪ ᒋᐸ ᐅᒋ ᓂᔅᐱᑐᐛᓄᐤ ᑲᐃᓐ᙮ ᒥᒋᒥᓂᑐᐛ ᒋ ᑎᐸᔨᒥᑯᐤ ᐊᓂᔭ ᑲ ᓂᐸᐊᑦ ᐎᐧᑲᓂᓴ᙮ ᒐᒂᔪᐤ ᒪᒃ ᐛᒋ ᓂᐸᐊᑦ ? ᒋ ᒪᔭᑎᓂᔪᐤ ᐊᓂᔭ ᑕᓐ ᐎᔾ ᑲ ᐃᑎᑦ, ᒋ ᑯᐃᔅᑯᓇᑯᓂᔪᐤ ᒪᒃ ᐎ ᐊᓂᔭ ᑕᓐ ᑲ ᐃᑎᔨᒋ ᐎᐧᑲᓂᓴ᙮ 13 ᐊᐅᒄ ᒪᒃ ᐅ ᐅᒋ, ᓂᐧᑲᓂᓯᑐᒄ, ᐊᑲᐎᔾ ᒋᑭ ᐅᒋ ᒥᔅᑲᑕᔨᑕᓇᐛᐤ ᐊ ᐛᐧᑲᑎᑕᑯᒡ ᐊᓐᒡ ᐊᐛᓐᒋ ᐊᑲ ᑕᑈᔭᔨᒪᒡ ᒋᓴᓴ᙮ 14 ᐊ ᓴᒋᐊᐧᑯᒡ ᒋᐧᑲᓂᓯᓄᐅᒡ, ᐊᑯᑕ ᐛᒋ ᒋᔅᒐᔨᑎᒪᐧᒄ ᓂᐳᐅᓂᒡ ᐊᒋ ᐅᒋ ᐊᓱᑕᐃᑯᐅᔭᐧᒄ ᐱᒪᑎᓯᐅᓂᒡ ᒐᒋ ᐃᓯ ᑕᔭᐧᒄ᙮ ᐊᐛᓐ ᐊᑲ ᓴᒋᐊᑦ ᐎᐧᑲᓂᓴ ᐊᔅᒄ ᑎᐸᔨᒥᑯᐤ ᓂᐳᐅᓂᔪᐤ᙮ 15 ᐊᐛᓐ ᑲ ᐛᐧᑲᑕᑦ ᐎᐧᑲᓂᓴ ᑲ ᓂᐸᐃᐛᑦ ᐃᓯᓇᑯᓱᐤ᙮ ᒋ ᒋᔅᒐᔨᑕᓇᓄᐤ ᒪᒃ ᐅᓂᐸᐃᐛᐤ ᐊᑲ ᐊ ᐊᔭᑦ ᑲᒋᒡ ᐱᒪᑎᓯᐅᓂᔪᐤ᙮ 1 John 3.16-24 (Easter-4 Year B) 16 ᙭ ᓇᔅᒡ ᑲ ᐱᔅᑕᔨᒧᑦ ᒐᒋ ᓂᐱᔅᑎᒪᑕᐧᒄ, ᐊᑯᑕ ᑲ ᐅᒋ ᒋᔅᒐᔨᑎᒥᐃᑕᐧᒄ ᓴᒋᐃᐛᐅᓂᔪᐤ᙮ ᐊᑯ ᒪᒃ ᑭᔭ ᒋᔭᓄᐤ ᓇᑐᐛᔨᑕᑯᓯᔭᐧᒄ ᒐᒋ ᐱᔅᑕᔨᒥᑎᓱᔭᐧᒄ ᒋᐧᑲᓂᓯᓄᐅᒡ ᒐᒋ ᐎᒋᐃᐧᑯᒡ᙮ 17 ᐛᐱᒪᒐ ᐊᐛᓐ ᐊ ᓄᑕᐱᔨᒋ ᐊᐛᔪᐛ ᒐᒂᔪᐤ, ᐊᑲ ᒪᒃ ᐎᔾ ᓄᑕᐱᔨᑦ ᒐᒂᔪᐤ, ᐊᑲ ᒪᒃ ᒋᔅᑎᒪᒐᔨᒪᒐ, ᑕᓐᑕ ᒐᒋ ᐅᒋ ᐃᔅᒋᔄᑦ ᐊ ᐱᒋᔅᑲᑯᑦ ᒋᓴᒪᓂᑐᐛ ᐅᓴᒋᐃᐛᐅᓂᔪᐤ᙮ 18 ᓂᑦ ᐊᐛᓯᒥᑎᒄ, ᓇᒪ ᒥᒄ ᒋᐸ ᐅᒋ ᐃᔅᒋᔄᓇᓄᐤ ᐊ ᓴᒋᐃᐛᔭᐧᒄ᙮ ᒥᒄ ᑕᓐ ᐊ ᐃᑎᔭᐧᒄ ᐊᑯᑕ ᒋᐸ ᓄᑯᓐ ᑕᑈ ᐊ ᓴᒋᐃᐛᔭᐧᒄ᙮ ᒐᔅᑎᓇᑕᔨᒧᐅᓐ ᒋᓴᒪᓂᑐᐤ ᐃᔅ ᐊ ᑕᑦ 19 ᐛᔅ ᑕᑈ ᓴᒋᐃᐛᔭᒂ, ᐊᑯᑕ ᒐ ᐅᒋ ᒋᔅᒐᔨᑎᒪᐧᒄ ᒋᓴᒪᓂᑐᐤ ᐊ ᑎᐸᔨᒥᑕᐧᒄ ᐎᔾ ᐊ ᑕᑦ ᐛᒋᐱᔨᒡ ᑕᑈᐅᓂᔪᐤ᙮ ᐊᑯᑕ ᑭᔭ ᐛᒋ ᒋᔭᒪᔨᑎᒪᐧᒄ ᒋᑕᐃᓇᒡ ᐊ ᐃᔨᒥᔭᐧᒄ ᒋᓴᒪᓂᑐᐤ ᐊᑎ ᐊ ᒋᔅᒐᔨᑎᒪᐧᒄ ᐊ ᐅᓂᑐᑎᒪᐧᒄ ᒪᓐ᙮ 20 ᐛᔅ ᒋᑕᐃᓄᐛ ᐎᑎᒪᑯᔭᒂ ᐊ ᒥᒋᑐᑎᒪᐧᒄ, ᒋᑭ ᒋᔭᒪᔨᑕᓇᓄᐤ ᐛᔅ ᒋ ᒋᔅᒐᔨᒪᓄᐤ ᒋᓴᒪᓂᑐᐤ ᐎᔾ ᐅᔅᑕ ᐊ ᒋᔅᒐᔨᒥᑕᐧᒄ ᑭᔭ ᒥᓯᐛ ᒐᒂᔪᐤ ᐊ ᒋᔅᒐᔨᑕᐧᒃ᙮ 21 ᓂᐧᑲᓂᓯᑐᒄ ᑲ ᓴᒋᐃᑎᑯᒡ, ᒋᔭᒪᔨᑎᒪᐧᑯ ᒋᑕᐃᓇᒡ, ᓇᒪ ᒋᑭ ᐅᒋ ᓴᒋᓯᓇᓄᐤ ᒐᒋ ᓇᑕᐧᒄ ᒋᓴᒪᓂᑐᐤ᙮ 22 ᒋᑭ ᒥᔨᑯᓄᐤ ᒐᒂᔪᐤ ᐊ ᐃᓯ ᓂᑐᐛᔨᑎᒧᐛᐧᒄ, ᐊ ᐃᑐᑎᒪᐧᒄ ᑕᓐ ᐊ ᐃᑎᓱᒥᑕᐧᒄ ᑭᔭ ᐊ ᐃᑐᑎᒪᐧᒄ ᐊᓂᔭ ᒐᒂᔪᐛ ᓂᐊᔨᑎᒥᐃᑯᑦ᙮ 23 ᒪᐅᔭᔪᐤ ᒪᒃ ᐊ ᐃᑎᓱᒥᑕᐧᒄ ᒐᒋ ᐃᑐᐛᐧᒄ, ᒐᒋ ᑕᑈᔭᔨᒪᐧᑯ ᐅᑯᓴ ᒋᓴᔅ ᙭ᑕ ᑭᔭ ᒐᒋ ᓴᒋᐃᑐᐛᐧᒄ ᒧᔭᒻ ᙭ ᑲ ᐃᑎᓱᒥᑕᐧᒄ ᒐᒋ ᐃᓯ ᓴᒋᐃᐛᐛᐧᒄ᙮ 24 ᒥᓯᐛ ᐊᓐᒡ ᑲ ᐃᑐᑎᒺᒡ ᑕᓐ ᐊ ᐃᑎᓱᒥᑯᒡ ᒋᓴᒪᓂᑐᐛ ᒧᔅ ᐎᒐᐛᐅᒡ ᒋᓴᒪᓂᑐᐛ ᑭᔭ ᐎᔨᐛᐤ ᒪᒃ ᒧᔅ ᐎᒐᐅᑯᐅᒡ᙮ ᐊᓂᔭᔪᐛ ᒪᒃ ᐅᑦ ᐊᒐᒂ ᑲ ᒥᔨᑕᐧᒄ, ᐊᑯᑕ ᐛᒋ ᒋᔅᒐᔨᑎᒪᐧᒄ ᐊ ᐎᒐᐅᑕᐧᒄ ᒋᓴᒪᓂᑐᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.