1 ᒠᓐ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐱᒪᑎᓯᐅ-ᐃᔨᒧᐅᓐ 1 John 1.1-2.2 (Easter-2 Year B)

¹ ᒋ ᒥᓯᓇᐊᒪᑎᓇᓐ ᐊ ᐊᔨᒧᒥᒋᒡ ᐊᓐ ᓴᔅ ᑲ ᑕᑦ ᐊᔅᒄ ᐊᑲ ᓇᔅᒡ ᐅᒋ ᑎᑯᓂᔨᒡ ᒐᒂᔪᐤ᙮ ᑲᒋ ᐸᑐᐅᒋᒡ, ᑲᒋ ᐛᐱᒥᒋᒡ, ᑭᔭ ᑲᒋ ᑕᒋᓂᒋᒡ᙮ ᒋᑦ ᐊᔨᒧᑎᒪᑎᓇᓐ ᐊᓐ ᑲ ᒥᔨᐛᑦ ᐱᒪᑎᓯᐅᓂᔪᐤ ᐊᓂᔭ ᐅᒋ ᑕᓐ ᑲ ᐃᓯ ᐛᐎᑕᐧᒃ᙮

² ᐛᔅ ᐊᓂᒪ ᐱᒪᑎᓯᐅᓐ ᒋ ᓄᑯᑕᑭᓄᐤ᙮ ᓂᒋ ᐛᐸᑕᓇᓐ ᒪᒃ, ᑭᔭ ᓂ ᑎᐸᑕᓇᓐ ᒪᒃ ᐊᓂᒪ ᑲᒋᒡ ᐱᒪᑎᓯᐅᓐ, ᑲᒋ ᐎᒋᒥᑯᑦ ᐅᑕᐎᒪᐤ ᑭᔭ ᑲᒋ ᐛᐸᑎᔨᑯᐅᔭᒡ᙮

³ ᐊᓂᒪ ᑲᒋ ᐛᐸᑎᒪᒡ ᑭᔭ ᑲᒋ ᐸᑎᒪᒡ ᒋ ᐎ ᐊᔨᒧᑎᒪᑎᓇᓐ ᑭᔭ ᒋᔨᐛᐤ ᒐᒋ ᒋᔅᒐᔨᒪᒄ ᒧᔭᒻ ᓂᔭᓐ ᐊ ᐃᓯ ᒋᔅᒐᔨᒥᒋᒡ᙮ ᐊᑯ ᒪᒃ ᒐᒋ ᐃᓯ ᐎᒐᐎᔭᒡ ᐊ ᐃᓯ ᐎᒐᐅᒋᒡ ᐅᑕᐎᒪᐤ ᑭᔭ ᐅᑯᓴ ᒋᓴᔅ ᙭ᑕ᙮

⁴ ᐊᐅᒄ ᐅ ᐛᒋ ᒥᓯᓇᐊᒪᑕᒡ ᒐᒋ ᓴᑭᔅᒋᓇᔅᑲᑯᔭᐧᒄ ᒧᒋᒐᔨᑎᒧᐅᓐ᙮

ᐛᔅᑕᐅᓂᒡ ᒋᐸ ᐃᓯ ᐱᒪᑎᓯᓇᓄᐤ

⁵ ᒋ ᐎ ᐎᑎᒪᑎᓇᓐ ᑕᓐ ᑲ ᐃᓯ ᐎᑎᒧᔨᒥᑦ ᒋᓴᔅ᙮ ᒋᓴᒪᓂᑐᐤ ᐊᐅᒄ ᐛᔅᑕᐅᓐ, ᓇᔅᑎᔅ ᓇᒪ ᐱᒋᔅᑲᑯᐤ ᐅᓂᑎᐱᔅᒋᓯᐅᓂᔪᐤ᙮

⁶ ᒧᔭᒻ ᐃᔅᒋᔄᔭᒂ ᒋᓴᒪᓂᑐᐤ ᐊ ᐎᒐᐛᐧᒄ, ᐅᓂᑎᐱᔅᒋᓯᐅᓂᒡ ᒪᒃ ᐊ ᐃᓯ ᐱᒪᑎᓯᔭᐧᒄ, ᒋ ᑭᑭᒋᔭᓇᓄᐤ ᑭᔭ ᓇᒪ ᑕᑈᐅᓂᒡ ᒋ ᐊᑎ ᐃᓯ ᐱᒪᑎᓯᓇᓄᐤ᙮

⁷ ᒧᔭᒻ ᐛᔅᑕᐅᓂᒡ ᐃᓯ ᐱᒪᑎᓯᔭᒂ ᒧᔭᒻ ᐎᔾ ᐛᔅᑕᐅᓂᒡ ᐊ ᐃᓯ ᑕᑦ, ᑕᑈ ᒋᑭ ᒥᔪ ᐎᒐᐅᑐᓇᓄᐤ, ᑭᔭ ᒋᓴᔅ, ᒋᓴᒪᓂᑐᐤ ᐅᑯᓴ, ᐅᒥᐧᒄ ᒋ ᐸᔭᒋᐃᑯᐛᓇᓄᐤ ᒥᓯᐛ ᒥᒋᑥᐅᓂᒡ ᐅᒡ᙮

⁸ ᒧᔭᒻ ᐃᔅᒋᔄᔭᒂ ᐊᑲ ᓂᑕ ᒥᒋᑐᑎᒪᐧᒄ, ᒋ ᐎᔭᓯᒥᑎᓱᓇᓄᐤ, ᑭᔭ ᓇᒪ ᒋ ᐱᒋᔅᑲᑯᓇᓄᐤ ᑕᑈᐅᓐ᙮

⁹ ᒧᔭᒻ ᐎᑎᒧᐛᒂ ᒋᓴᒪᓂᑐᐤ ᒋᒥᒋᑐᑎᒧᐅᓄᐛ, ᐎᔾ ᑕᑈᐅᒐᔨᑕᑯᓱᐤ ᑭᔭ ᑯᐃᔅᑯᑐ, ᒋᑭ ᐛᐸᔨᑎᒪᑭᓄᐤ ᒋᒥᒋᑥᐅᓄᐛ ᑭᔭ ᒋᑭ ᐸᔭᒋᐃᑯᓄᐤ ᑕᓐ ᐊ ᐃᓯ ᐊᑲ ᑯᐃᔅᑯᑕᑎᓯᐛᐧᒄ᙮

¹⁰ ᒧᔭᒻ ᐃᔅᒋᔄᔭᒂ ᐊᑲ ᒥᒋᑐᑎᒪᐧᒄ ᒧᔭᒻ ᐊ ᑭᑭᒋᔭᑦ ᒋᑦ ᐃᓯᓇᑯᐊᓄᐤ ᒋᓴᒪᓂᑐᐤ ᑭᔭ ᓇᒪ ᒋ ᐱᒋᔅᑲᑯᐛᓇᓄᐤ ᐅᑦ ᐃᔨᒧᐅᓐ᙮