1 ᑯᕆᓐᑎᔭᓇ 9 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑕᓐ ᐊ ᐃᓯ ᐊᔭᑦ ᐊᑈᔅᑕᓐ ᑭᔭ ᑕᓐ ᒋᐸ ᐃᑕᐱᑎᓯᐤ 1 ᓇᒪ ᒐᒂᓐ ᓂ ᑎᐸᔨᒥᑯᓐ᙮ ᐊᑈᔅᑕᓐ ᑕᑈ ᓂᔾ᙮ ᒋᓴᔅ ᒋᑎᐸᔨᒋᒐᓯᒥᓄᐤ ᓂᒋ ᐸᒋ ᓄᑯᓯᔅᑕᒄ᙮ ᑭᔭ ᓂᔾ ᔅᒋ ᐎᑎᒪᑎᓇᐛᐤ ᒥᔽᒋᒧᐅᓐ ᐊᑎ ᑲ ᐅᒋ ᑕᑈᔭᔨᒪᒄ ᙭᙮ ᒋᔨᐛᐤ ᐊ ᑕᔭᒄ ᐊᑯᑕ ᐛᒋ ᓄᒂᒡ ᑕᑈ ᐊ ᐊᑐᔅᑯᐅᒃ ᐅᑎᐸᔨᒋᒐᐤ᙮ 2 ᐊᑎ ᑯᑎᑭᒡ ᐊᑲ ᐊᑈᔅᑕᓐ ᐃᑕᔨᒥᑥᐛ, ᐊᑈᔅᑕᓐ ᒋᐸ ᐃᑕᔨᒥᓇᐛᐤ ᒋᔨᐛᐤ᙮ ᐊᓐ ᒪᒃ ᐊ ᐃᓯ ᐱᒪᑎᓯᔅᑐᐛᒄ ᐅᑎᐸᔨᒋᒐᐤ ᐊᑯᑕ ᐛᒋ ᓄᒂᒡ ᑕᑈ ᐊᑈᔅᑕᓐ ᐊ ᑕᔭᓐ᙮ 3 ᐊ ᐸᒋ ᑯᒂᒋᒥᒡ ᐊᐛᓐᒋ ᒐᒋ ᓄᑯᑕᐅᒡ ᑕᑈ ᐊᑈᔅᑕᓐ ᐊ ᐃᑕᐱᑎᓱᐛᐅᒐ, ᒪᐅᔭᔪᐤ ᐊ ᐃᓯ ᐛᐎᑎᒧᐅᒂᐤ᙮ 4 ᓇᒪᐎᔾ ᐊ ᒪᒃ ᐃᓯᓇᑯᓐ ᑭᔭ ᓂᔭᓐ ᒐᒋ ᐊᓯᒥᑯᐅᔭᒡ ᑭᔭ ᒐᒋ ᒥᓂᐃᑯᐅᔭᒡ ᐊᓐ ᐊ ᐃᑕᐱᑎᓯᔭᒡ᙮ 5 ᓇᒪᐎᔾ ᐊ ᒪᒃ ᓂᐸ ᒋ ᓂᐳᐅᓐ ᑭᔭ ᓂᔾ ᑭᔭ ᓂᐸ ᒋ ᐱᐸᐎᒐᐛᐤ ᓂᐅ ᐊ ᐛᐎᑎᒪᓐ ᒥᔽᒋᒧᐅᓐ᙮ ᐊᐅᑯᓐ ᐊ ᐃᑎᒡ ᐊᓐᒡ ᑯᑎᑭᒡ ᐊᑈᔅᑕᓇᒡ ᑭᔭ ᐅᑎᐸᔨᒋᒐᐤ ᐎᐧᑲᓂᓴ ᑭᔭ ᐱᑕᕐ ᐊᐅᑯᓐ ᐊ ᐃᑎᑦ᙮ 6 ᒥᒄ ᐊ ᓂᔭᓐ ᐸᕐᓇᐸᔅ ᐊ ᓂᓯᔭᒡ ᐃᑕᔨᑕᑯᓐ ᒐᒋ ᐊᑐᔅᒐᔭᒡ ᒐᒋ ᐅᒋ ᐱᒪᒋᐃᓱᔭᒡ᙮ 7 ᓇᒪ ᐊᐛᓐ ᓴᒐᔾ ᐊᓯᒪᑭᓂᓯᐤ ᐊᑐᔅᒐᐤ᙮ ᔭᐃᑕᔾ ᑎᐸᐊᒧᐛᑭᓄᐤ ᐊᓂᔭ ᐊ ᐃᑕᐱᑎᓯᑦ᙮ ᑭᔭ ᐊᐛᓐ ᑲ ᓂᑕᐅᒋᑕᑦ ᓇᒪᐎᔾ ᐊ ᒥᒍᐤ ᐊᓂᔭᔪᐛ ᑲ ᓂᑕᐅᒋᑕᑦ᙮ ᓇᒪ ᑭᔭ ᐊᐛᓐ ᓂᓇᑭᑐᐛᔨᒪᐤ ᒪᔭᑕᓂᓴ, ᒐ ᐊᑲ ᒋ ᐅᒋ ᒥᓄᐛᑦ ᐅᒋᒋᓇᐳᐃᒥᔪᐛ᙮ 8 ᓇᒪ ᓂᑦ ᐃᔅᒋᔄᓐ ᐅ ᒥᒄ ᐊᓐ ᐊ ᐛᐸᑎᒪᓐ ᐊ ᐃᑎᓇᓄᐅᒡ᙮ ᐛᔅ ᐊᐅᑯᓐ ᐊ ᐃᓯ ᐊᔨᒧᑕᒡ ᑭᔭ ᐊᓐᑕ ᐎᓱᐛᐅᓂᒡ᙮ 9 ᒪᐅ ᐊ ᐃᑎᔅᑕᔨᒡ ᒧᓱᔅ ᐅᐎᓱᐛᐅᓐ, “ᓇᒪ ᒋᐸ ᐅᒋ ᒋᑭᒧᑕᐛᓐ ᒋᐳᑐᓇᐱᓱᐅᓂᔪᐤ ᓇᐸ ᒥᔅᑐᔅ ᐅᑐᓂᒡ ᒐ ᐊᑲ ᒋ ᒥᒋᓱᑦ ᒪᒂᒡ ᐊ ᐊᐱᒋᐃᑦ᙮” ᓇᒪ ᒥᒄ ᒥᔅᑐᓴ ᒪᒥᑐᓇᔨᒪᐤ ᒋᓴᒪᓂᑐᐤ ᐛᒋ ᐃᔅᒋᔄᑦ ᐅᔭ᙮ 10 ᒥᓯᐛ ᐊᐛᔪᐛ ᑲ ᐊᑐᔅᒐᔨᒋ ᐊᔨᒧᒪᐤ ᒧᔭᒻ ᐊᓂᔭᔪᐛ ᐊᐛᔪᐛ ᑲ ᐱᑯᔅᑭᒥᑲᒐᔨᒋ ᒐᒋ ᐊᑎ ᓂᑕᐅᒋᑕᔨᒋ ᑭᔭ ᐊᓂᔭ ᑲ ᒪᒧᓴᒋᓂᒥᔨᒋ ᓂᑕᐅᒋᑕᑭᓇ ᐃᔅᐱ ᑲᒋ ᐃᓯ ᓂᑕᐅᒋᓂᔨᒋ᙮ ᐃᓯᓇᑯᓂᔪᐤ ᒪᒃ ᑕᐱᔅᑯᓐ ᐊᓐᒡ ᒐᒋ ᐅᒋ ᒥᒋᓱᒡ ᐊᓂᔭ ᑲ ᐃᓯ ᓂᑕᐅᒋᑕᒡ᙮ 11 ᐊᑯ ᒪᒃ ᐊᓐᑕ ᑲ ᐎᑎᒪᑕᒡ ᒥᔽᒋᒧᐅᓐ ᒧᔭᒻ ᐊ ᓂᑕᐅᒋᑕᔭᒡ ᒋ ᐃᓯᓇᑯᓐ, ᒋ ᒥᔪ ᓂᑕᐅᒋᓇᐛᐤ ᒪᒃ ᑕᑈᑎᒧᐅᓂᒡ ᐃᔅ᙮ ᒥᔅᑎ ᐊ ᒪᒃ ᐃᓯᓇᑯᓐ ᐊ ᑯᒂᒋᒥᑕᒡ ᒐᒋ ᒥᔨᔭᒡ ᑕᓐ ᐊ ᐃᓯ ᓂᑐᐛᔨᑎᒪᑕᒡ᙮ 12 ᓇᒪᐎᔾ ᒐᒂᓐ ᒋᑦ ᐃᑕᔨᑕᓇᓄᐤ ᑯᑎᑭᒡ ᐊᐛᓐᒋ ᐊ ᐱᒪᒋᐊᑯᒡ᙮ ᐊᑐᐎᔅ ᒪᒃ ᐃᑕᔨᑕᑯᓐ ᓂᔭᓐ ᒐᒋ ᐱᒪᒋᐃᔭᒡ᙮ ᐊᑎ ᐊ ᐃᑕᔨᑕᒂᒡ ᒐᒋ ᓂᑐᑎᒪᑕᒡ ᒐᒋ ᐎᒋᐃᔨᐊᒡ ᓇᒪ ᐃᔭᐱᒡ ᒋ ᐅᒋ ᑯᒂᒋᒥᑎᓇᓐ᙮ ᐊᑯ ᒪᒃ ᓂᔭᓐ ᐸᒥᐱᔨᐃᓱᔭᒡ ᐛᔅ ᑕᐸ ᓇᓂᑐᐛᔨᑕᓇᓐ ᒐᒂᓐ ᒐᒋ ᒋᐱᔅᑲᑯᔭᒡ ᐊ ᐎ ᐛᐎᑎᒪᒡ ᒥᔽᒋᒧᐅᓐ᙮ 13 ᒋ ᒋᔅᒐᔨᑕᓇᐛᐤ ᐊᓐᒡ ᑲ ᐊᑐᔅᒐᒡ ᐊᓐᑕ ᐊᔭᒥᐊᐅᒋᐛᐱᒡ ᐊ ᐊᓯᒪᑭᓄᐎᒡ ᐊᓂᔭ ᒥᒋᒥᔪᐤ ᑲ ᐸᑕᑭᓄᔨᒋ ᐊᓐᑕ ᐊᔭᒥᐊᐅᒋᐛᐱᒡ ᐊᓂᔭ ᑲ ᐸᒂᓂᒧᐛᑭᓄᐎᒋ ᒋᓴᒪᓂᑐᐛ᙮ ᑭᔭ ᐊᓐᒡ ᑲ ᐊᑐᔅᒐᒡ ᐊᓐᑕ ᐊ ᑎᑯᓂᔨᒡ ᐊᓂᔭ ᐱᔅᑎᓂᒐᐅᓇᐱᔅᑯᔪᐤ ᐊᐛᓯᓴ ᑲᒋ ᒥᑐᔅᑕᐊᒪᓄᐎᒋ, ᐊᑯᑕ ᑭᔭ ᐎᔨᐛᐤ ᐛᒋ ᐊᓯᒪᑭᓄᐎᒡ ᐊᓂᔭ ᐎᔭᓯᔪᐤ ᑲ ᒥᑐᔅᑕᐊᒪᓄᔨᒋ᙮ 14 ᐊᐅᑯᓐ ᒪᒃ ᒧᔭᒻ ᑲ ᐃᔅᒋᔄᑦ ᐅᑎᐸᔨᒋᒐᐤ ᒐ ᐃᑐᑐᐛᑭᓄᔨᒋ ᐊᓂᔭᔪᐛ ᑲ ᐛᐎᑎᒥᔨᒋ ᒥᔽᒋᒧᐅᓂᔪᐤ᙮ ᒋ ᐃᑎᓱᐛᐤ ᒐᒋ ᒥᔭᑭᓄᔨᒋ ᒐᒂᔪᐤ ᒐᒋ ᐅᒋ ᐱᒪᒋᐃᓱᔨᒋ᙮ 15 ᐊᑎ ᒪᒃ ᐊ ᐃᓯᓇᒂᒡ ᒐᒋ ᑎᐸᐊᒪᑯᐅᔭᓐ ᓇᒪ ᒋ ᐅᒋ ᐃᑎᑎᓇᐛᐤ ᒐᒋ ᑎᐸᐊᒧᐅᔭᒄ᙮ ᑭᔭ ᒪᒃ ᓇᒪ ᒋ ᒥᓯᓇᐊᒪᑎᓇᐛᐤ ᒐᒋ ᐃᑎᑎᑯᒡ ᒐᒋ ᑎᐸᐊᒧᐅᔭᒄ᙮ ᓂᑦ ᐃᑕᔨᑕᓐ ᐃᐛᒃ ᒋᐸ ᒥᔽᐤ ᒐᒋ ᓂᐱᔭᓐ ᐃᔅᐱᔅ ᐎ ᒐᒋ ᐃᑎᑎᑯᒡ ᒐᒋ ᑎᐸᐊᒧᐅᔭᒄ᙮ ᐛᔅ ᓂ ᒥᔽᔨᑕᓐ ᐊ ᐛᐎᑎᒪᑎᑯᒡ ᒥᔽᒋᒧᐅᓐ ᐊᑲ ᑎᐸᐊᒧᐅᔭᒄ᙮ 1 Corinthians 9.16-23 (Epiphany-5 Year B) 16 ᓇᒪ ᒪᒃ ᐃᓯᓇᑯᓐ ᒐᒋ ᓴᒂᔨᒧᔭᓐ ᐊ ᑭᒐᔅᒋᒧᔭᓐ ᐊ ᐛᐎᑎᒪᓐ ᒥᔽᒋᒧᐅᓐ᙮ ᐛᔅ ᐊᐅᑯᓐ ᑲ ᐃᑎᓱᒥᑯᐅᔭᓐ ᒐᒋ ᐃᑎᔭᓐ᙮ ᒋᑭ ᑎᑯᓐ ᐛᔅ ᐊᓐ ᒐ ᐃᓯ ᐊᒂᒡ ᒥᒋᐱᔨᔭᓐ ᐊᑲ ᐛᐎᑎᒪᓇ ᒥᔽᒋᒧᐅᓐ᙮ 17 ᓂᔾ ᒋ ᐃᑕᔨᑎᒪᓇᒂ ᒐᒋ ᐛᐎᑎᒪᓐ ᒥᔽᒋᒧᐅᓐ, ᑭᑈ ᓂᐸ ᐱᑯᓴᔨᑕᓐ ᒐᒋ ᑎᐸᐊᒪᑯᐅᔭᓐ᙮ ᒥᒄ ᒪᒃ ᒋᓴᒪᓂᑐᐤ ᐎᔾ ᓂᒋ ᒥᔨᒄ ᐅᔭ ᒐᒋ ᐃᓯ ᐊᑐᔅᒐᔅᑎᒧᒡ ᒥᔽᒋᒧᐅᓂᔪᐤ ᐊᐅᒄ ᒪᒃ ᐅ ᐛᒋ ᐛᐎᑎᒪᓐ᙮ 18 ᒐᒄ ᑎᐸᐊᒪᑯᓯᐅᓐ ᒪᒃ ᒪᔨᑯᐅᔭᓐ᙮ ᐊᓐ ᓴᒐᔾ ᐊ ᑭᒐᔅᒋᒧᔭᓐ ᐊ ᐛᐎᑎᒪᓐ ᒥᔽᒋᒧᐅᓐ ᐊᐅᑯᓐ ᐊᓐ ᓂᑎᐸᐊᒪᑯᓯᐅᓐ᙮ ᐊᑎ ᐊ ᐃᑕᔨᑕᒂᒡ ᒐᒋ ᓂᑐᑎᒪᑎᑯᒡ ᒐᒋ ᐱᒪᒋᐃᔭᒄ ᐊ ᐛᐎᑎᒪᓐ ᒥᔽᒋᒧᐅᓐ ᓇᒪ ᒋ ᑯᒂᒋᒥᑎᓇᐛᐤ ᒐᒋ ᐛᐎᒋᐃᔭᒄ᙮ 19 ᓇᒪ ᒐᒂᓐ ᓂᒥᒪᒋᑭᓂᑯᓐ ᐛᔅ ᓇᒪ ᐊᐛᓐ ᓂ ᐅᑦ ᐊᐱᒋᐊᑭᓂᑐᑕᒄ᙮ ᒥᒄ ᒪᒃ ᐃᔭᐱᒡ ᓂᔾ ᑎᐱᔨᐛ ᓂᒋ ᐎᔭᔨᑕᓐ ᒥᓯᐛ ᐊᐛᓐ ᒐ ᐎ ᐊᑐᔅᑯᐅᒃ᙮ ᐊᑯ ᒪᒃ ᒥᒐᑦ ᐊᐛᓐ ᒐ ᐃᑐᑐᐅᒃ ᒐᒋ ᑕᑈᑕᐧᒃ ᒥᔽᒋᒧᐅᓂᔪᐤ᙮ 20 ᐊᓐᑕ ᒍᐤ ᑲ ᐃᑎᔅᑲᓇᓯᒡ ᐃᔪᒡ ᐊ ᑕᒡ ᐊ ᑕᔭᓐ, ᒧᔭᒻ ᒍᐤ ᐃᔪᐤ ᓂᑦ ᐃᑕᔨᑕᑯᐃᓱᓐ᙮ ᓇᔅᒡ ᐃᔭᒂ ᓂᓇᑭᑐᐛᔨᑎᒧᒡ ᐎᓱᐛᐅᓂᔪᐤ ᑭᔭ ᓂᔾ ᒪᒃ ᐊᐅᑯᓐ ᐊ ᐃᑎᔭᓐ ᐊᑎ ᐊᑲ ᒪᒋᒂᐱᐧᑲᑎᑯᔭᓐ ᐊᓐ ᐎᓱᐛᐅᓐ᙮ ᐅ ᒪᒃ ᓂᑦ ᐃᑎᓐ ᒐᒋ ᐎᒋᐃᒂᐤ ᐊᓐᒡ ᑲ ᐃᑕᔨᑕᒡ ᒐᒋ ᐱᒪᒋᐅᒡ ᐊ ᓂᓇᐃᑕᒡ ᐎᓱᐛᐅᓂᔪᐤ᙮ ᓂ ᐎ ᐎᒋᐊᐅᒡ ᒐᒋ ᑕᑈᔭᔨᒪᒡ ᒋᓴᓴ᙮ 21 ᐊᑯ ᒪᒃ ᐃᔅᐱ ᐊ ᑕᔭᓂ ᐊᓐᑕ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᐊ ᑕᒡ, ᒧᔭᒻ ᐊᑲ ᒍᐤ ᐃᑎᔅᑲᓇᓯᔭᓐ ᓂᑦ ᐃᑕᐃᓱᓐ ᐊ ᐎ ᐃᑐᑐᐅᒂᐤ ᑭᔭ ᐎᔨᐛᐤ ᒐᒋ ᑕᑈᔭᔨᒪᒡ ᙭ᑕ᙮ ᒋᔅᒐᔨᑎᒻ ᒋᓴᒪᓂᑐᐤ ᐊ ᓂᓇᐃᑎᒪᓐ ᐎᓱᐛᐅᓐ, ᐊᓂᔭ ᐎᓱᐛᐅᓂᔪᐤ ᙭ ᑲ ᐸᒋ ᒥᔨᑦ ᐊᐅᑯᓐ ᐊᓐ ᓂᓇᐃᑎᒪᓐ᙮ 22 ᑭᔭ ᐊ ᐃᑕᔭᓂ ᐊᓐᑕ ᐊ ᑕᒡ ᐊᓐᒡ ᐊᑲ ᓇᔅᒡ ᑲ ᓱᒋᑲᐳᐅᒡ ᐅᑕᑈᑎᒧᐅᓄᐛᒡ ᐊᐅᑯᓐ ᑭᔭ ᓂᔾ ᐊ ᐃᑕᔨᑕᑯᐃᓱᔭᓐ᙮ ᐅᔭ ᓂᑦ ᐃᑐᐛᓐ ᒐᒋ ᐎᒋᐃᒂᐤ ᐊᑐᐎᔅ ᒐᒋ ᓱᒋᑲᐳᐅᒡ ᐊ ᑕᑈᑕᒡ᙮ ᒥᒄ ᑕᓐ ᐊ ᐃᑕᔨᑕᑯᓯᒡ ᐊᐛᓐᒋ ᐊ ᑭᒐᔅᒋᒥᒂᐤ ᐊᐅᑯᓐ ᐊ ᐃᑕᔨᑕᑯᐃᓱᔭᓐ᙮ ᒥᒄ ᑕᓐ ᒐ ᐃᓯ ᓇᐃᐱᔨᒂ ᒐᒋ ᐃᓯ ᐎᒋᐃᒂᐤ ᐊᐅᑯᓐ ᒐ ᐃᓯ ᐎᒋᐃᒂᐤ ᐱᔅᒐ ᒐᒋ ᐱᒪᒋᐅᒡ᙮ 23 ᐊᐅᒄ ᐛᒋ ᐃᑎᔭᓐ ᐅ ᒐᒋ ᑕᑈᑕᑭᓄᐅᒡ ᒥᔽᒋᒧᐅᓐ ᑕᓐᑕ ᒥᒄ ᐊ ᐊᑎ ᐛᐎᑎᒪᓐ᙮ ᐊᑯ ᒪᒃ ᒐ ᒥᔅᑭᒪᓐ ᑕᓐ ᐊ ᐃᓯ ᐊᔨᒧᑕᒡ ᓱᐛᔨᒋᒐᐅᓐ ᐊᓐᑕ ᒥᔽᒋᒧᐅᓂᒡ᙮ 1 Corinthians 9.24-27 (Epiphany-6 Year B) 24 ᒋ ᒋᔅᒐᔨᑕᓇᐛᐤ ᑕᓐᑕ ᐊ ᑎᒂᒡ ᐊ ᒋᒋᐸᔨᑐᓇᓄᐅᒡ ᐊ ᐎ ᑯᒂᒋᔅᑭᑕᐅᑐᓇᓄᐅᒡ, ᒥᒐᑦ ᐊᐛᓐᒋ ᒋᒋᐸᑕᐅᒡ᙮ ᒥᒄ ᒪᒃ ᐸᐃᒄ ᐊᐛᓐ ᑲᓂᔪᐤ ᒐᒂᔪᐤ᙮ ᒧᔭᒻ ᒪᒃ ᐊᓐ ᑲ ᒋᒋᐸᑕᑦ ᐊᔅᐱᔅ ᓱᒃ ᒋᒋᐸᑕᑦ, ᐊᐅᑯᓐ ᑭᔭ ᒋᔾ ᒥᒄ ᒋᐸ ᐃᑎᓐ ᑕᓐ ᐊ ᐃᓯ ᐱᒪᑎᓯᔨᓐ ᐊ ᑕᑈᔭᔨᒥᑦ ᙭᙮ ᐊᑯ ᒪᒃ ᑭᔭ ᒋᔾ ᒐ ᒥᔨᑯᔨᓐ ᒋᑲᓂᔪᐎᓐ᙮ 25 ᒥᓯᐛ ᐊᐛᓐ ᑲ ᑯᒂᒋᔅᑭᑕᐃᒐᑦ ᐱᓯᒄ ᑯᒂᒋᐱᔨᑎᓱᐤ ᐊᑐᐎᔅ ᒐᒋ ᑭᔅᒋᐅᑦ᙮ ᐊᑯᑕ ᓇᔅᒡ ᐊ ᐃᓯ ᐱᔅᑎᓇᐧᒃ ᐅᐱᒪᑎᓯᐅᓐ᙮ ᐅᒡ ᒪᒃ ᑲ ᑯᒂᒋᔅᑭᑕᐃᒐᒡ ᐊᐅᒄ ᐅᔭ ᐊ ᐃᑎᒡ ᐊ ᐎ ᐊᔭᒡ ᑲᓂᔪᐅᓂᔪᐤ ᐛᐃᐱᔅᒋᔅ ᒥᒄ ᒐ ᑎᑯᓂᔨᒡ᙮ ᐊᐅᑯᓐ ᒪᒃ ᐊ ᐃᑎᔭᐧᒄ ᑭᔭ ᒋᔭᓄᐤ ᒐᒋ ᐊᔭᔭᐧᒄ ᐊᓐ ᑲᓂᔪᐅᓐ ᑲᒋᒡ ᒐ ᐊᔭᔭᐧᒄ᙮ 26 ᐊᐅᒄ ᒪᒃ ᐊᓐ ᐛᒋ ᓱᒃ ᐎ ᒋᔅᑕᔭᓐ ᓂᔾ ᐊᓐ ᐊ ᐃᓯ ᐱᒥᐸᑕᔭᓐ᙮ ᐊᐅᑯᓐ ᑭᔭ ᐛᒋ ᐃᓯᓇᑯᓯᔭᓐ ᒧᔭᒻ ᐊᐛᓐ ᑲ ᐅᑕᒪᐃᒐᑦ ᒧᔅ ᑲ ᑲᒋᔅᑕᐛᑦ ᐊᐛᔪᐛ᙮ ᓇᒪ ᓂᑦ ᐃᓯᓇᑯᓯᓐ ᒧᔭᒻ ᐊᐛᓐ ᑲ ᐅᑎᑕᒪᐃᒐᑦ ᐊᑲ ᒪᒃ ᒐᒂᔪᐤ ᑲ ᒋᔅᑕᐊᐧᒃ᙮ 27 ᒥᓯᐛ ᐊ ᐃᓯ ᓂᑐᐛᔨᑕᒂᒡ ᒐᒋ ᐃᑎᔭᓐ ᐊ ᑯᒂᒋᔅᑭᑕᐃᒐᔭᓐ ᓇᔅᒡ ᓂ ᐱᔅᑎᓂᓱᓐ ᒐᒋ ᐃᑐᑎᒪᓐ᙮ ᐛᔅ ᓇᒪ ᓇᓂᑐᐛᔨᑕᓐ ᒐᒋ ᐅᓂᑕᔭᓐ ᑕᓐ ᓂᐸ ᐃᓯ ᑲᓂᔪᐃᑯᐅᓐ ᓴᔅ ᐎ ᐊᒋ ᑭᒐᔅᒋᒥᒂᐤ ᑲ ᑕᑈᑕᒡ ᒐ ᐃᓯ ᐱᒪᑎᓯᒡ ᑕᓐ ᐊᓂᔭᔪᐛ ᒋᐸ ᐃᓯ ᐱᒪᑎᓯᔪᐛ ᐊᐛᔪᐛ ᐊ ᑕᑈᔭᔨᒪᔨᒋ ᙭ᑕ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.