1 ᑯᕆᓐᑎᔭᓇ 8 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒥᒋᒥᔪᐤ ᐊᒋ ᒥᑐᔅᑕᐊᒧᐛᑭᓄᐎᒡ ᒥᓂᑐᐧᑲᓐᒡ 1 Corinthians 8.1-13 (Epiphany-4 Year B)

¹ ᐊᑯ ᒪᒃ ᒐ ᐊᔨᒧᑎᒪᑎᑯᒡ ᑕᓐ ᒋᐸ ᐃᓯ ᑭᓄᐛᐸᑕᑭᓄᐤ ᒥᒋᒻ ᒥᓂᑐᐧᑲᓐᒡ ᐊᒋ ᐱᔅᑎᓂᒧᐛᑭᓄᐎᒡ᙮ ᐃᓇᓄᐤ ᒥᓯᐛ ᐊᐛᓐ ᐊ ᐊᔭᑦ ᒋᔅᒐᔨᑎᒧᐅᓂᔪᐤ᙮ ᐃᑐᑕᑯᐤ ᒪᒃ ᐊᐛᓐ ᒋᔅᒐᔨᑎᒧᐅᓂᔪᐤ ᒋᒋᐛ ᒐᒋ ᐃᑕᔨᒥᓱᑦ᙮ ᒥᒄ ᒪᒃ ᐊᐛᓐ ᑲ ᐊᔭᑦ ᓴᒋᐃᐛᐅᓂᔪᐤ ᐃᑐᑐᐛᐤ ᑯᑎᑲ ᐊᐛᔪᐛ ᒐᒋ ᓱᒋᑲᐳᔨᒋ᙮

² ᐊᑯ ᒪᒃ ᐊ ᐃᑕᔨᑎᒧᒂ ᐊᐛᓐ ᓇᔅᒡ ᒥᔅᑎ ᐊ ᒋᔅᒐᔨᑕᐧᒃ ᒐᒂᔪᐤ, ᓄᑯᑕᐤ ᐊᔅᒄ ᐊᑲ ᒋᔅᒐᔨᑕᐧᒃ ᑕᓐ ᒋᐸ ᐃᓯ ᒋᔅᒐᔨᑎᒻ᙮

³ ᐊᓐ ᐊᐛᓐ ᑲ ᓴᒋᐊᑦ ᒋᓴᒪᓂᑐᐛ ᐊᐅᒄ ᐅ ᒐᔅᒐᔨᒥᑯᑦ ᒋᓴᒪᓂᑐᐛ᙮

⁴ ᐊᑯ ᒪᒃ ᐛ ᐊᔨᒧᑎᒪᓐ ᐊ ᒥᒋᓇᓄᐅᒡ ᒥᒋᒻ ᒥᓂᑐᐧᑲᓐᒡ ᐊᒋ ᐱᔅᑎᓂᒧᐛᑭᓄᐎᒡ᙮ ᒋᐛᐱᒪᓄᐅᒡ ᒥᓂᑐᐧᑲᓐᒡ ᒥᒄ ᒪᒃ ᒋ ᒋᔅᒐᔨᑕᓇᓄᐤ ᐊᑲ ᓇᔅᒡ ᒐᒂᓂᒡ ᐃᑕᔨᑕᑯᓯᒡ᙮ ᑭᔭ ᒋ ᒋᔅᒐᔨᑕᓇᓄᐤ ᐊᑲ ᑕᑦ ᑯᑎᒃ ᐊᐛᓐ ᐊ ᒋᓴᒪᓂᑐᐅᑦ, ᒥᒄ ᒋᓴᒪᓂᑐᐤ᙮

⁵ ᐊᑎ ᐊ ᐃᑕᔨᑕᒡ ᐊᐛᓐᒋ ᐊ ᒥᒐᑎᔨᒋ ᒋᓴᒪᓂᑐᐛ ᐅᑕ ᐊᔅᒋᒡ ᑭᔭ ᒪᒃ ᒋᒋᒋᓯᑯᒡ ᑭᔭ ᒥᓯᐛ ᐊ ᐱᒪᑎᓯᔨᒋ,

⁶ ᒋ ᒋᔅᒐᔨᑕᓇᓄᐤ ᐎ ᒋᔭᓄᐤ ᒥᒄ ᐊ ᐸᐃᑯᓯᑦ ᒋᓴᒪᓂᑐᐤ ᐊᓐ ᐛᑕᐎᒪᐅᑦ, ᐊᓐ ᒥᓯᐛ ᒐᒂᔪᐤ ᑲ ᐅᓯᑕᑦ᙮ ᒥᓯᐛ ᒐᒂᓐ ᒋᓴᒪᓂᑐᐤ ᐊ ᑕᑦ ᐅᒋᐱᔪᐤ, ᑭᔭ ᐊᐅᒄ ᐸᒪᑎᓯᔅᑐᐛᐧᒄ᙮ ᑭᔭ ᒥᒄ ᐸᐃᑯᓱᐤ ᐅᑎᐸᔨᒋᒐᐤ, ᐊᐅᒄ ᒋᓴᔅ ᙭᙮ ᐎᔾ ᐅᒋ ᐛᒋ ᑎᒂᒡ ᒥᓯᐛ ᒐᒂᓐ ᑲ ᐅᓯᑕᑭᓄᐅᒡ, ᑭᔭ ᐎᔾ ᐅᒋ ᐛᒋ ᐊᔭᔭᐧᒄ ᐱᒪᑎᓯᐅᓐ᙮

⁷ ᒥᒄ ᒪᒃ ᓇᒪ ᒥᓯᐛ ᐊᐛᓐ ᒋᔅᒐᔨᑎᒻ ᐊ ᑕᑈᒥᑭᓂᔨᒡ ᐅᔭ᙮ ᐱᔅᒐ ᐊᐛᓐᒋ ᐃᑕᔨᑎᒧᒡ ᒧᔭᒻ ᒥᓂᑐᐧᑲᓇ ᐊ ᐊᔭᒥᐊᔅᑐᐛᒡ ᐊ ᐃᓯᓇᑯᓯᒡ ᐊ ᒥᒋᒡ ᒥᑐᔅᑕᐊᒪᒐᐅᓂᔪᐤ ᒥᓂᑐᐧᑲᓇ ᐊᒋ ᐱᔅᑎᓂᒧᐛᑭᓄᔨᒋ᙮ ᐛᒋᐱᔪᐤ ᒐᒋ ᐃᑕᔨᑕᒡ ᐅᔭ ᐛᔅ ᓇᒪ ᐊᔨᒋᑲᐳᐅᒡ ᑕᑈᑎᒧᐅᓂᒡ᙮

⁸ ᓇᒪ ᒥᒋᒻ ᒋᑭ ᐅᒋ ᐃᑐᑕᑯᓇᓄᐤ ᐃᐛᒃ ᒐᒋ ᐃᑕᔨᑕᑯᓯᔭᐧᒄ ᒋᓴᒪᓂᑐᐤ ᐃᔅ ᐊ ᑕᑦ᙮ ᓇᒪ ᐃᐛᒃ ᒋᑭ ᐅᒋ ᐃᑕᔨᑕᑯᓯᓇᓄᐤ ᐊᑎ ᒥᒋᔭᒂ ᑭᔭ ᓇᒪ ᐃᐛᒃ ᒋᑭ ᐅᒋ ᐃᑕᔨᑕᑯᓯᓇᓄᐤ ᐊᑎ ᐊᑲ ᒥᒋᔭᒂ᙮

⁹ ᐃᔭᒂᒥ ᒪᒃ᙮ ᐊᓐ ᐊ ᐃᓯᓇᒂᒡ ᒐᒋ ᐎᔭᔨᑎᒪᓱᔨᓐ ᒋᔾ ᑕᓐ ᒐ ᐃᑎᔨᓐ ᐊᑲᐎᔾ ᒋᑭ ᐅᒋ ᐃᑐᑕᑯᐤ ᑯᑎᒃ ᐊᐛᓐ ᐊᔅᒄ ᐊᑲ ᐊᔨᒋᑲᐳᐅᑦ ᑕᑈᑎᒧᐅᓂᒡ ᒐᒋ ᒥᒋᑐᑕᐧᒃ᙮

¹⁰ ᑕᓐ ᒪᒃ ᒐ ᐃᑎᑦ ᐊᐛᓐ ᐊᑲ ᐊᔨᒋᑲᐳᐅᑦ ᑕᑈᑎᒧᐅᓂᒡ ᐛᐱᒥᔅᒐ ᐊ ᒥᒋᓱᐅᑦ ᐊᓐᑕ ᒥᓂᑐᐧᑲᓐ ᐊᔭᒥᐊᐅᒋᐛᐱᒡ, ᐊ ᐃᑕᔨᒥᔅᒃ ᒪᒃ ᐊ ᐊᔭᐅᑦ ᒋᔅᒐᔨᑎᒧᐅᓂᔪᐤ᙮ ᓇᒪᐎᔾ ᐊ ᒋᔾ ᒋᑭ ᐅᒋ ᐃᑐᑐᐛᐤ ᒥᒋᒐ ᐊᓂᔭ ᒥᒋᒥᔪᐤ ᒥᓂᑐᐧᑲᓇ ᑲ ᐱᔅᑎᓂᒧᐛᑭᓄᔨᒋ᙮

¹¹ ᐛᔅ ᒥᒄ ᐃᓯ ᐃᑐᑎᒥᓇ ᒋᔾ ᑕᓐ ᐊ ᐃᓯ ᒋᔅᒐᔨᑎᒥᓐ ᒐᒂᓐ ᐊᑲ ᒪᒃ ᒪᒥᑐᓇᔨᒥᑕ ᐊᓐ ᒋᐧᑲᓂᔅ ᐊᑲ ᐊᔨᒋᑲᐳᐅᑦ, ᒋᑭ ᒋ ᐃᓯᓇᑯᓐ ᒐᒋ ᓂᓱᐅᓇᒋᑕᐅᑦ ᐅᑕᑈᑎᒧᐅᓐ᙮ ᒋᔅᒋᓯ ᒪ ᑭᔭ ᐎᔾ ᐊᒋ ᓂᐱᔅᑎᒪᑯᑦ ᙭ᑕ᙮

¹² ᐅᓂᑐᑐᐅᑕ ᒪᒃ ᒋᐧᑲᓂᔅ ᑭᔭ ᓂᓱᐅᓇᒋᑕᐅᑕ ᐅᑕᑈᑎᒧᐅᓐ ᙭ ᒋᐎᓂᑐᑐᐛᐤ᙮

¹³ ᐊᑯ ᒪᒃ, ᒥᒋᔭᓇ ᒥᒋᒻ ᒥᓂᑐᐧᑲᓐ ᐊᒋ ᐱᔅᑎᓂᒧᐛᑭᓄᐅᑦ ᐃᑐᑕᑯᒐ ᒪᒃ ᓂᐧᑲᓂᔅ ᒐᒋ ᐅᓂᑐᑕᐧᒃ ᐊᓂᔭ ᐊ ᐃᑐᐅᒡ, ᓇᒪ ᒥᓐ ᓂᑕ ᓂᑭ ᐅᒋ ᒥᒋᓐ ᐊᓐ ᒥᒋᒻ ᒐ ᐃᑐᑕᑯᒂ ᓂᐧᑲᓂᔅ ᒐᒋ ᐸᒋᓯᐧᒃ᙮