1 ᑯᕆᓐᑎᔭᓇ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒋᓴᒪᓂᑐᐤ ᐅᑦ ᐊᐱᒋᐊᑭᓇ 1 ᓂᐧᑲᓂᓯᑐᒄ, ᐊᓐᑕ ᐊ ᑕᔭᒄ ᑲ ᑕᔭᓐ ᓇᒪ ᒋ ᐅᒋ ᐃᓯ ᐃᔨᒥᐃᑎᓇᐛᐤ ᑕᓐ ᐊ ᐃᓯ ᓂᑐᐛᔨᑕᒂᒡ ᒐᒋ ᐃᓯ ᐃᔨᒪᐊᑭᓄᐎᒡ ᐊᐛᓐᒋ ᑲ ᐸᔭᒋᓯᔨᒋ ᐊᒐᒂ ᑲ ᐊᔭᐛᒡ᙮ ᒧᔭᒻ ᐊᐛᓐᒋ ᐊᑲ ᐊᔭᐛᒡ ᑲ ᐸᔭᒋ ᐊᒐᒂ ᔅᒋ ᐃᓯ ᐃᔨᒥᐃᑎᓇᐛᐤ᙮ ᒧᔭᒻ ᑲ ᐅᔅᒋ ᑕᑈᔭᔨᒪᒡ ᙭ᑕ ᐊ ᐃᓯ ᐃᔨᒪᐊᑭᓄᐎᒡ ᐊᐅᑯᓐ ᑲ ᐃᓯ ᐃᔨᒥᐃᑎᑯᒡ᙮ 2 ᐊᐛᔅ ᓂᔅᑎᒻ ᒋᒋᓇᐳᔭ ᒥᔭᑭᓄᐤ ᐊᔅᒄ ᐊᑲ ᐃᔅᐱᑎᓯᑦ ᒋᒋᐛ ᒐᒋ ᒥᒋᓱᐅᑦ᙮ ᒋ ᐛᒋᑕᑯᓐ ᑕᓐ ᑲ ᐃᓯ ᐎᑎᒪᑎᑯᒡ ᒥᔽᒋᒧᐅᓐ ᒐᒋ ᓂᔅᑐᑕᒡ ᐊᒋ ᐃᑕᔨᒥᑎᑯᒡ᙮ ᐊᓄᒡ ᒪᒃ ᐃᔭᐱᒡ ᐊᔅᒄ ᓇᒪ ᔅᒋ ᓂᔅᑐᑕᓇᐛᐤ ᐊᓂᔭ ᐊᒐᐧᑯ ᑕᑈᐅᓇ ᐊ ᐊᔨᒥᓂᔨᒋ ᒐᒋ ᓂᔅᑐᑕᑭᓄᐅᒋ᙮ 3 ᐊᔅᒄ ᐊᐅᑯᓐ ᐊ ᐃᓯ ᐱᒪᑎᓯᔭᒄ ᐊ ᐃᓯ ᐱᒪᑎᓯᒡ ᐊᓐᒡ ᐊᔅᒄ ᐊᑲ ᐱᔅᑎᓇᒡ ᑲ ᐸᔭᒋ ᐊᒐᒂ ᒐᒋ ᐱᒥᐱᔨᑕᔨᒋ ᐅᐱᒪᑎᓯᐅᓄᐛᐛ᙮ ᐛᔅ ᒋ ᒪᒥᒐᔨᒥᑐᓇᐛᐤ ᑭᔭ ᒋ ᒪᒥᒋᐱᔨᐃᑐᓇᐛᐤ᙮ ᐊᑯᑕ ᒪᒃ ᐊ ᓄᒂᒡ ᐊᔅᒄ ᐊ ᐃᓯ ᐱᒪᑎᓯᔭᒄ ᐊᓂᔭ ᑕᓐ ᐊ ᐃᓯ ᐱᒪᑎᓯᒡ ᐊᓐᒡ ᐊᑲ ᑕᑈᑕᒡ᙮ 4 ᐸᐃᒄ ᐊᓐᑕ ᐊ ᑎᓯᔭᒄ ᐊ ᐃᔅᒋᔄᑦ, “ᑈᓪ ᓂᔾ ᓂ ᓇᓴᐛᐤ,” ᐊᑯ ᒥᓐ ᑯᑎᒃ ᐊ ᐃᔅᒋᔄᑦ, “ᐊᐳᓚᔅ ᓂᔾ ᓇᓴᐛᐤ᙮” ᐊᑯᑕ ᒪᒃ ᐊ ᓄᒂᒡ ᐊ ᐱᒪᑎᓯᔭᒄ ᐊᓂᔭ ᑕᓐ ᐊ ᐃᓯ ᐱᒪᑎᓯᒡ ᐊᓐᒡ ᐊᔅᒄ ᐊᑲ ᑕᑈᔭᔨᒪᒡ ᒋᓴᓴ᙮ 5 ᐊᐛᓐ ᒪᒃ ᐅ ᐊᐳᓚᔅ ᑭᔭ ᐊᐛᓐ ᓂᔾ ᑈᓪ ? ᐊᐱᒋᐊᑭᓐᒡ ᓂᔭᓐ᙮ ᐊᐅᑯᓐᒡ ᐅᒡ ᐊᐱᒋᐊᑭᓐᒡ ᑲ ᐎᑎᒪᑕᑯᒡ ᒥᔽᒋᒧᐅᓂᔪᐤ ᑭᔭ ᑎᔭᑈᑎᒪᒄ᙮ ᑕᐱᔅᑯᓐ ᓂᒋ ᓂᓇᐃᑕᓇᓐ ᑕᓐ ᑲ ᐃᑎᓱᒥᔨᒥᑦ ᐅᑎᐸᔨᒋᒐᐤ᙮ 6 ᒧᔭᒻ ᑲᓂᑕᐅᒋᒋᑭᓂᒐᑦ ᐊ ᒋᒋᐱᔨᑕᑦ ᐊ ᓂᑕᐅᒋᑕᑦ, ᐊᐅᑯᓐ ᐊ ᐃᓯᓇᑯᓯᔭᓐ ᓂᔾ, ᐛᔅ ᓂᔾ ᓂᔅᑎᒻ ᔅᒋ ᐎᑎᒪᑎᓇᐛᐤ ᒥᔽᒋᒧᐅᓐ᙮ ᐊᑯ ᒪᒃ ᐊᐳᓚᔅ ᒧᔭᒻ ᐊᓐ ᑲ ᓂᑕᐅᒋᑕᑦ ᒧᔅ ᑲ ᓱᒋᔅᑕᑦ ᐊᓂᔭᔪᐛ ᑲ ᓂᑕᐅᒋᑕᐅᒡ ᐃᓯᓇᑯᓱᐤ᙮ ᐊᑐᐎᔅ ᔅᒋ ᐎᑎᒪᑯᐛᐤ ᑕᓐ ᒋᐸ ᐃᓯ ᐱᒪᑎᓯᐛᓇᐛᐤ ᐊᓐᑕ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᒥᒄ ᒪᒃ ᒋᓴᒪᓂᑐᐤ ᐊᐅᒄ ᒋᒋᐛ ᐊ ᐃᑐᑕᑕᒄ ᒐᒋ ᒥᔪ ᓂᑕᐅᒍᐛᒄ ᒋᑕᑈᑎᒧᐅᓄᐛᒡ᙮ 7 ᓇᒪ ᒪᒃ ᒐᒂᓐ ᐃᑕᔨᑕᑯᓱᐤ ᐊᓐ ᐊᐛᓐ ᑲ ᓂᑕᐅᒋᑕᑦ ᑭᔭ ᐊᓐ ᐊᐛᓐ ᑲ ᓱᒋᔅᑕᑦ ᐊᓂᔭ ᓂᑕᐅᒋᑕᑭᓂᔪᐤ᙮ ᒋᓴᒪᓂᑐᐤ ᐊᐅᒄ ᒋᒋᐛ ᐊ ᐃᑕᔨᑕᑯᓯᑦ ᐊᓐ ᑲ ᐃᑐᑕᐧᒃ ᒐᒋ ᓂᑕᐅᒋᓂᔨᒡ ᐊᓂᔭ ᓂᑕᐅᒋᑕᑭᓂᔪᐤ᙮ 8 ᐊᓐ ᐊᐛᓐ ᑲ ᓂᑕᐅᒋᑕᑦ ᑭᔭ ᐊᓐ ᑲ ᓱᒋᔅᑕᑦ ᐊᓂᔭ ᓂᑕᐅᒋᑕᑭᓂᔪᐤ, ᓂᓱ ᐊᑐᔅᒐᐅᒡ᙮ ᑕᐱᔅᑯᓐ ᐊᑐᔅᒐᔅᑎᒧᒡ ᐊᓂᔭ ᓂᑕᐅᒋᑕᑭᓂᔪᐤ᙮ ᒋᓴᒪᓂᑐᐛ ᒪᒃ ᒋᑭ ᑎᐸᐊᒪᑯᐅᒡ ᑕᓐ ᒐ ᐃᓯ ᐊᑐᔅᒐᔅᑎᒺᒂ᙮ ᑕᓐ ᒐ ᐃᓯ ᐎᔨᑲᐳᐅᑕᔭᒄ 9 ᑕᐱᔅᑯᓐ ᓂ ᐎᒋ ᐊᑐᔅᒐᒪᓇᓐ ᒋᓴᒪᓂᑐᐤ᙮ ᒋᔨᐛᐤ ᒪᒃ ᒧᔭᒻ ᓂᑕᐅᒋᑕᑭᓐ ᐊᔅᒋᔾ ᒋᑦ ᐃᓯᓇᑯᓯᓇᐛᐤ᙮ ᒪᒃ ᐅᑕ ᒋᐸ ᒋ ᐃᓯ ᑭᓄᐛᐸᑕᓇᐛᐤ᙮ ᒧᔭᒻ ᒋᓴᒪᓂᑐᐤ ᐅᐛᔅᑲᐃᑭᓂᒻ ᒋᑦ ᐃᓯᓇᑯᓯᓇᐛᐤ᙮ 10 ᒋᓴᒪᓂᑐᐤ ᑲ ᐃᓯ ᒐᓱᐛᑦ ᒥᔪᑐᑎᒧᐅᑦ ᓂᒋ ᐃᑎᒄ ᒐᒋ ᐊᑐᔅᑯᐅᒃ᙮ ᓂᒋ ᐃᓯ ᐊᑐᔅᒐᓐ ᒪᒃ ᒧᔭᒻ ᐊᓐ ᐊᐛᓐ ᓇᔅᒡ ᑲ ᑭᔅᒋᐅᑦ ᐊ ᐅᓯᑕᑦ ᑕᓐᑕ ᒐ ᑕᒋᑲᐳᐎᔨᒡ ᒥᒋᐛᐱᔪᐤ᙮ ᐊᑯ ᒪᒃ ᑯᑎᑭᒡ ᐊ ᐊᑎ ᒋᔅᑕᒡ ᐊᓂᔭ ᑲ ᐃᓯ ᒋᒋ ᐎᔨᑲᐳᐅᑕᐅᒡ᙮ ᒥᒄ ᒪᒃ ᒥᓯᐛ ᐊᓐᒡ ᑲ ᐊᑎ ᐊᑐᔅᒐᔅᑕᒡ ᐊᓂᔭ ᑲ ᐃᓯ ᒋᒋ ᐎᔨᑲᐳᐅᑕᐅᒡ ᔭᐃᑕᔾ ᑯᐃᔅᒄ ᒋᑭ ᐎ ᐃᓯ ᐎᔨᑲᐳᐅᑕᐅᒡ ᐊᓂᔭ ᒥᒋᐛᐱᔪᐤ᙮ 11 ᒋᓴᔅ ᙭ᑕ ᐊ ᑕᔨᒋ ᐊᑯᑕ ᑲ ᐅᒋ ᐎᔨᑲᐳᐅᑕᑦ ᒋᓴᒪᓂᑐᐤ ᐎᒡ᙮ ᓇᒪ ᑯᑎᑲ ᐊᐛᔪᐛ ᐊ ᑕᔨᒋ ᒋᑭ ᒋ ᐅᒋ ᐎᔨᑲᐳᐅᑕᑭᓄᐅᔪᐤ ᐎᒡ᙮ ᐛᔅ ᒋᓴᒪᓂᑐᐤ ᓴᔅ ᒋ ᐎᔭᔨᑎᒻ ᒋᓴᓴ ᒥᒄ ᐊ ᑕᔨᒋ ᒐᒋ ᐅᒋ ᐎᔨᑲᐳᐅᑕᑭᓄᐎᒡ ᐊᓂᔭ ᒥᒋᐛᐱᔪᐤ᙮ 12 ᑯᑎᑭᒡ ᐊᐛᓐᒋ ᐎᔄᐅᓱᓇᔭᐱᔎ ᒋᑭ ᐊᐱᒋᐊᐅᒡ ᑭᔭ ᒪᒃ ᐛᐱᓯᐅᓱᓇᔭᐱᔎ ᑭᔭ ᒪᒃ ᓂᓇᐧᑯᐤ ᐊ ᐃᓯᓇᑯᓯᔨᒋ ᐊᓯᓂᔭ ᐊ ᓱᓇᔭᐎᔨᒋ᙮ ᐊᑯ ᑯᑎᑭᒡ ᒥᔅᑎᒂ ᒋᑭ ᐊᐱᒋᐊᐅᒡ ᑭᔭ ᒪᒃ ᒥᔅᑯᓱᐛ ᒋᑭ ᐊᐱᒋᑕᐅᒡ᙮ 13 ᒥᓯᐛ ᒪᒃ ᐊᐛᓐ ᒋᑭ ᓄᑯᑕᑭᓄᐅᔪᐤ ᑕᓐ ᐊᓐ ᐊ ᐃᑕᔨᑕᑯᓂᔨᒡ ᐅᑦ ᐊᑐᔅᒐᐅᓐ ᑎᐸᔅᑯᓂᒐᐅ ᒋᓯᑲᔨᒐ᙮ ᐛᔅ ᐃᔅᑯᑕᔪᐤ ᒋᑭ ᐊᐱᑎᓂᔪᐤ ᐊ ᓂᑐ ᒋᔅᒐᔨᑕᑯᓂᔨᒡ ᑕᓐ ᐊᓐ ᐊ ᐃᑕᔨᑕᑯᓂᔨᒡ ᐊᐛᓐ ᐅᑦ ᐊᑐᔅᒐᐅᓐ᙮ ᐊᑯᑕ ᒐ ᐅᒋ ᒋᔅᒐᔨᑕᑯᓂᔨᒡ ᑕᑈ ᒪᔽᔨᒂ ᐅᑦ ᐊᑐᔅᒐᐅᓐ᙮ 14 ᐊᑯ ᒪᒃ ᐊᓂᔭ ᑕᓐ ᑲ ᐃᓯ ᐊᑐᔅᑯᐛᒂ ᐊᐛᓐ ᐅᑎᐸᔨᒋᒐᐛ ᐊᑲ ᓂᓱᐅᓇᑎᓂᔨᒐ, ᒋᑭ ᒥᔭᑭᓄᐤ ᐅᑎᐸᐊᒪᑯᓯᐅᓐ᙮ 15 ᐊᑯ ᒪᒃ ᐃᔎᑕᔨᒐ ᓇᒪ ᒐᒂᔪᐤ ᒋᑭ ᐅᒋ ᐊᔭᐤ, ᐊᑐᐎᔅ ᑭᑈ ᒋᑭ ᐱᒪᒋᐊᑭᓄᐤ ᐎᔾ ᒧᔭᒻ ᐊᐛᓐ ᐊᒋ ᓴᐳᔅᑲᐧᒃ ᐃᔅᑯᑕᔪᐤ ᐊᑲ ᐅᒋ ᑲᒋᔅᑎᑭᓱᑦ ᒋᑭ ᐃᓯᓇᑯᓱᐤ᙮ 16 ᓇᒪ ᓇ ᐊ ᒋ ᒋᔅᒐᔨᑕᓇᐛᐤ ᒧᔭᒻ ᒋᓴᒪᓂᑐᐤ ᐅᒋᓴᐊᔭᒥᐊᐅᒋᐛᑉ ᐊ ᐃᓯᓇᑯᓯᔭᒄ, ᑭᔭ ᒋᓴᒪᓂᑐᐤ ᐅᑦ ᐊᒐᒂ ᐊ ᐱᒋᔅᑲᑎᑕᑯ᙮ 17 ᐊᐛᓐ ᒪᒃ ᓂᓱᐅᓇᒋᑕᐛᒐ ᒋᓴᒪᓂᑐᐛ ᐅᒋᓴᐊᔭᒥᐊᐅᒋᐛᐱᔪᐤ, ᒋᓴᒪᓂᑐᐛ ᒋᑭ ᓂᓱᐅᓇᒋᐃᑯᐤ᙮ ᐛᔅ ᒋᓴᒪᓂᑐᐤ ᐅᒋᓴᐊᔭᒥᐊᐅᒋᐛᑉ ᐸᔭᐧᑭᓂᔪᐤ, ᒋᔨᐛᐤ ᒪᒃ ᐊᐅᒄ ᒋᓴᒪᓂᑐᐤ ᐅᒋᓴᐊᔭᒥᐊᐅᒋᐛᑉ᙮ ᓇᒪ ᐊᐛᓐ ᒋᒋᐛ ᒋᐸ ᐅᒋ ᐃᑕᔨᒥᓱᐤ 18 ᐊᑲᐎᔾ ᐊᐛᓐ ᒋᑭ ᐅᒋ ᐎ ᐎᔭᓯᐃᑎᓱᐤ᙮ ᐊ ᐃᑕᒂ ᐊᐛᓐ ᐊᓐᑕ ᐊ ᑎᓯᔭᒄ ᐊ ᐃᑕᔨᑎᒧᒂ ᓇᔅᒡ ᐊ ᒋᔅᒐᔨᑕᐧᒃ ᒐᒂᔪᐤ ᐅᑕ ᐊᔅᒋᒡ ᐊᑯᔅ ᒋᑭ ᐃᓯᓇᑯᓱᐤ ᐊᑲ ᐃᑈᐧᑲᑦ ᒐᒋ ᐅᒋ ᑭᒐᑕᐛᔨᑕᐧᒃ᙮ 19 ᐛᔅ ᐊᓂᔭ ᐊ ᐃᓯ ᑭᒐᑕᐛᔨᑕᒡ ᐊᐛᓐᒋ ᐅᑕ ᐊᔅᒋᒡ, ᒋᔎᓇᑯᓐ ᐃᑕᔨᑎᒻ ᐎᔾ ᒋᓴᒪᓂᑐᐤ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒋᓴᒪᓂᑐᐤ ᐊᐱᒋᑕᐛᐤ ᓇᐸᐛ ᐅᑭᒐᑕᐛᔨᑎᒧᐅᓂᔪᐤ ᒐᒋ ᐅᒋ ᒋᔅᒐᔨᑎᒥᐊᑦ ᑕᓐ ᐊ ᐃᓯ ᒋᔎᓇᑯᓂᔨᒡ ᐅᑭᒐᑕᐛᔨᑎᒧᐅᓂᔪᐤ᙮ 20 ᑭᔭ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᐅᑎᐸᔨᒋᒐᐤ ᒋᔅᒐᔨᑎᒻ ᐊᑲ ᒐᒂᔪᐤ ᐃᑕᔨᑕᑯᓂᔨᒡ ᐊᓂᔭ ᑕᓐ ᐊ ᐃᓯ ᒪᒥᑐᓇᔨᑎᒥᔨᒋ ᐊᓂᔭ ᑲ ᑭᒐᑕᐛᔨᑎᒥᔨᒋ ᐅᑕ ᐊᔅᒋᒡ ᐊ ᑕᔨᒋ᙮ 21 ᐊᑲᐎᔾ ᒪᒃ ᐊᐛᓐ ᒋᑭ ᐅᒋ ᒪᒥᒋᐃᑯᐤ ᓇᐸᐛ, ᐛᔅ ᒥᓯᐛ ᐊᐛᓐ ᒋᓴᒪᓂᑐᐛ ᐅᑦ ᐊᐱᒋᐊᑭᓂᑐᑕᑯᐤ᙮ ᒥᓯᐛ ᒐᒂᔪᐤ ᒋᓴᒪᓂᑐᐤ ᔅᒋ ᒥᔨᑯᐛᐤ ᒐᒋ ᑎᐱᔨᐛᐅᓯᐛᒄ᙮ 22 ᓂᔾ ᑈᓪ ᑭᔭ ᐊᐳᓚᔅ, ᑭᔭ ᐱᑕᕐ, ᒋᓴᒪᓂᑐᐤ ᓂᒋ ᐸᒋ ᐃᑎᓴᐅᑯᓇᓐ ᒐᒋ ᐎᒋᐃᑕᒡ᙮ ᒥᓯᐛ ᐅᔭ ᐊᔅᒋᔪᐤ ᔅᒋ ᐱᔅᑎᓂᒪᑯᐛᐤ, ᑭᔭ ᔅᒋ ᒥᔨᑯᐛᐤ ᐱᒪᑎᓯᐅᓂᔪᐤ ᑭᔭ ᓂᐳᐅᓂᔪᐤ᙮ ᐅᔭ ᐊᓄᒡ ᒪᒂᒡ ᑲ ᐃᔅᐱᔨᒡ ᑭᔭ ᒥᓯᐛ ᒐ ᐃᔅᐱᔨᒂ ᐊᓐᑕ ᓂᔅᑕᒥᒡ ᔅᒋ ᒥᔨᑯᐛᐤ ᒋᓴᒪᓂᑐᐤ ᒐᒋ ᐎᒋᐃᑯᐛᒄ᙮ 23 ᒋᔨᐛᐤ ᒪᒃ ᙭ ᐊ ᑕᑦ ᒋ ᐊᑎ ᐃᓯ ᑎᐸᔨᑕᑯᓯᓇᐛᐤ᙮ ᐎᔾ ᒪᒃ ᙭, ᒋᓴᒪᓂᑐᐛ ᐊ ᑕᔨᒋ ᐃᓯ ᑎᐸᔨᑕᑯᓱᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.