1 ᑯᕆᓐᑎᔭᓇ 12 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐸᔭᒋᓯᑦ ᐊᒐᐧᒄ ᐅᒥᔨᐛᐅᓇ 1 Corinthians 12.1-11 (Epiphany-2 Year C)

¹ ᓂᐧᑲᓂᓯᑐᒄ, ᐅ ᒐ ᐃᓯ ᐊᔨᒧᑎᒪᓐ, ᓇᔅᒡ ᑕᑈ ᒋ ᓂᑐᐛᔨᒥᑎᓇᐛᐤ ᒐᒋ ᓂᔅᑐᑎᒪᒄ᙮ ᐊᔪᑯᓂ ᐅᔭ ᒥᔨᐛᐅᓇ ᐸᔭᒋ ᐊᒐᐧᒄ ᑲ ᒥᔨᐛᑦ᙮

² ᒋ ᒋᔅᒐᔨᑕᓇᐛᐤ ᐊᔅᒄ ᐊᑲ ᐅᒋ ᑕᑈᔭᔨᒪᒄ ᒋᓴᒪᓂᑐᐤ, ᔅᒋ ᓇᓴᐛᐛᐅᒡ ᒥᓂᑐᐧᑲᓐᒡ ᐊᑲ ᒋ ᐃᔨᒥᒡ᙮ ᒧᔅ ᒪᒃ ᔅᒋ ᐱᔅᒐᑕᐃᑯᐛᐅᒡ ᐊᓐᒡ ᒥᓂᑐᐧᑲᓐᒡ᙮

³ ᒋ ᓂᑐᐛᔨᒥᑎᓇᐛᐤ ᒪᒃ ᒐᒋ ᓂᔅᑐᑎᒪᒄ ᐊᓐ ᐊᐛᓐ ᑲ ᐸᔭᒋᓯᔨᒋ ᐊᒐᒂ ᑲ ᐱᒥᐱᔨᐃᑯᑦ, ᓇᒪ ᓂᑕ ᒋᑭ ᐅᒋ ᒥᒋ ᐃᑕᐤ ᒋᓴᓴ᙮ ᐃᔅᒋᔄᒐ ᒪᒃ ᐊᐛᓐ, “ᒋᓴᔅ ᐊᐅᒄ ᐅᑎᐸᔨᒋᒐᐤ,” ᐸᔭᒋ ᐊᒐᒂ ᐃᑐᑕᑯᐤ ᐊᓂᔭ ᒐᒋ ᐃᔅᒋᔄᑦ᙮

⁴ ᓂᓇᐧᑯᐤ ᒥᔨᐛᐅᓇ ᔅᒋ ᒥᔨᑯᓇᓄᐤ, ᐸᐃᑯᓱᐤ ᒪᒃ ᐊᓐ ᑲ ᐸᔭᒋᓯᑦ ᐊᒐᐧᒄ ᑲ ᒥᔨᑕᐧᒄ ᐅᔭ ᒥᔨᐛᐅᓇ᙮

⁵ ᓂᓇᐧᑯᐤ ᑎᑯᓐ ᑕᓐ ᒐᒋ ᐃᓯ ᐛᐎᒋᐊᑭᓄᐅᒡ ᐊᐛᓐᒋ ᒥᒄ ᒪᒃ ᐸᐃᑯᓱᐤ ᐊᓐ ᐅᑎᐸᔨᒋᒐᐤ ᑲ ᐊᑐᔅᑯᐛᑭᓄᐅᑦ᙮

⁶ ᓂᓇᐧᑯᐤ ᑭᔅᒋᐅᓇ ᑎᑯᓇ ᒐᒋ ᐛᐎᒋᐊᑭᓄᐅᒡ ᐊᐛᓐᒋ ᒥᒄ ᒪᒃ ᐸᐃᑯᓱᐤ ᐊᓐ ᒋᓴᒪᓂᑐᐤ ᑲ ᒥᔨᐛᑦ ᒐᒋ ᐃᑐᑕᑭᓄᔨᒋ ᐅᔭ ᒐᒂᔪᐛ᙮

⁷ ᒥᓯᐛ ᐊᐛᓐ ᑲ ᑕᑈᑕᐧᒃ ᑎᑯᓂᔪᐤ ᐊ ᐃᓯ ᒋᔅᒐᔨᑕᑯᐃᓱᔨᒋ ᑲ ᐸᔭᒋᓯᔨᒋ ᐊᒐᒂ ᐊ ᑕᔨᒋ ᐊᓐᑕ ᐊ ᑕᑦ᙮ ᒋ ᐃᑐᑎᒪᑯᓇᓄᐤ ᐅᔭ ᒥᓯᐛ ᐸᐸᐃᒄ ᐊ ᑎᓯᔭᐧᒄ ᒐᒋ ᐛᐎᒋᐃᑐᔭᐧᒄ᙮

⁸ ᐊᐅᒄ ᒪᒃ ᐅ ᑲ ᐸᔭᒋᓯᑦ ᐊᒐᐧᒄ ᒪᔭᑦ ᐱᔅᒐ ᐊᐛᔪᐛ ᒐᒋ ᐛᐎᑎᒥᔨᒋ ᒋᓴᒪᓂᑐᐛ ᐅᑭᒐᑕᐛᔨᑎᒧᐅᓂᔪᐤ, ᐊᑯ ᑯᑎᑲ ᒪᔭᑦ ᒐᒋ ᐎᑎᒪᒐᔨᒋ ᑕᓐ ᐛ ᐃᓯ ᒋᔅᒐᔨᑎᒥᐊᔨᒋ ᒋᓴᒪᓂᑐᐛ ᐊᐛᔪᐛ᙮

⁹ ᐊᑯ ᑯᑎᑲ ᐊᐛᔪᐛ ᒪᔭᑦ ᓇᔅᒡ ᒐᒋ ᑕᑈᔭᔨᒪᔨᒋ ᒋᓴᒪᓂᑐᐛ᙮ ᒥᓐ ᑯᑎᑲ ᒥᔭᐤ ᓱᐧᑲᑎᓯᐅᓂᔪᐤ ᒐᒋ ᒥᓏᒋᐊᔨᒋ ᐊᐛᔪᐛ᙮

¹⁰ ᑯᑎᑲ ᐊᐛᔪᐛ ᓱᐧᑲᑎᓯᐅᓂᔪᐤ ᒥᔭᐤ ᒐᒋ ᒪᒥᔅᑲᒡ ᐃᑎᔨᒋ᙮ ᒥᓐ ᑯᑎᑲ ᐊᐛᔪᐛ ᒥᔭᐤ ᒐ ᒋᔅᒋᐛᐃᒐᔨᒋ᙮ ᐊᑯ ᒥᓐ ᑯᑎᑲ ᒪᔭᑦ ᓇᔅᒡ ᒐᒋ ᒐᔅᑎᓇᐅᔨᒋ ᒋᓴᒪᓂᑐᐛ ᐅᐸᔭᒋ ᐊᒐᐧᑯᔪᐛ ᐊ ᐊᑐᔅᒐᔨᒂᓂ ᒪᒃ ᒥᒋ ᐊᒐᒂ ᐊ ᐊᑐᔅᒐᔨᒂᓂ᙮ ᐊᑯ ᒥᓐ ᑯᑎᑲ ᒪᔭᑦ ᒐᒋ ᒂᔅᒋᐃᔨᒥᔨᒋ᙮ ᐊᑯ ᑯᑎᑲ ᐊᐛᔪᐛ ᒪᔭᑦ ᒐᒋ ᐱᔭᑭᔅᒋᑕᑯᑕᔨᒋ ᑕᓐ ᑲ ᐃᔅᒋᔄᔨᒋ ᐊᓂᔭᔪᐛ ᑲ ᒂᔅᒋᐃᔨᒥᔨᒋ᙮

¹¹ ᒥᒄ ᒪᒃ ᐸᐃᑯᓱᐤ ᑲ ᐸᔭᒋᓯᑦ ᐊᒐᐧᒄ, ᒥᓯᐛ ᒪᒃ ᐸᐸᐃᒄ ᐊᐛᔪᐛ ᒥᔭᐤ ᓂᓇᐧᑯᐤ ᐊᒐᐧᑯ ᒥᔨᐛᐅᓇ᙮ ᐎᔾ ᒪᒃ ᑲ ᐸᔭᒋᓯᑦ ᐊᒐᐧᒄ ᒋᔅᒐᔨᑎᒻ ᒐᒄ ᒥᔨᐛᐅᓂᔪᐤ ᒐ ᒥᔭᑦ ᐊᐛᔪᐛ᙮

ᐸᐃᒄ ᒥᔪᐤ ᓂᓇᐧᑯᐤ ᐊ ᐃᓯ ᐱᔅᒐᓯᒥᑲᒡ 1 Corinthians 12.12-31a (Epiphany-3 Year C)

¹² ᐊᓐᒡ ᑲ ᑕᑈᔭᔨᒪᒡ ᙭ᑕ ᒧᔭᒻ ᐸᐃᒄ ᒥᔪᐤ ᐃᓯᓇᑯᓱᐅᒡ᙮ ᐊᑎ ᓂᓇᐧᑯᐤ ᐊ ᐃᓯ ᐱᔅᒐᓯᒥᑲᒡ ᐃᔭᐱᒡ ᐸᐃᑯᓐ ᒥᔪᐤ᙮

¹³ ᐸᐃᑯᓱᐤ ᐊᓐ ᐊᒐᐧᒄ ᐊᑎ ᒥᓯᐛ ᐸᐃᒄ ᒥᔪᐤ ᑲ ᐅᒋ ᐃᓯᐃᑯᐅᔭᐧᒄ ᑲ ᓯᑲᐃᑕᑯᐅᔭᐧᒄ᙮ ᓇᒪ ᐎᔭᓯᓐ ᒍᐤ ᐊ ᐃᑎᔅᑲᓇᓯᒂ ᐊᐛᓐ ᒪᒃ ᐊᑲ ᒍᐤ ᐃᑎᔅᑲᓇᓯᒂ, ᑭᔭ ᒪᒃ ᐊᐱᒋᐊᑭᓐ ᐊ ᐃᑕᐱᒋᐊᑭᓄᒂ ᑭᔭ ᒪᒃ ᐊᑲ ᐊᐱᒋᐊᑭᓐ ᐃᑕᐱᒋᐊᑭᓄᒂ᙮ ᒥᓯᐛ ᐸᐸᐃᒄ ᐊ ᑎᓯᔭᐧᒄ ᐸᐃᒄ ᐊᒐᐧᒄ ᒋᐱᒋᔅᑲᑭᓄᐤ᙮

¹⁴ ᓇᒪ ᒥᒄ ᐸᐃᑯᓐ ᐊ ᐃᓯ ᐱᔅᒐᓯᒥᑲᒡ ᒥᔪᐤ᙮ ᓂᓇᐧᑯᐤ ᐃᓯ ᐱᔅᒐᓯᒥᑭᓐ᙮

¹⁵ ᐃᔅᒋᔄᒥᑲᒡ ᒪᒃ ᒥᓯᑦ, “ᓇᒪᔭᐤ ᓂᔾ ᒥᑎᒋᔾ, ᓇᒪ ᓂ ᐅᑎᒧᓐ ᐅᑕ ᒥᔭᒡ᙮” ᐊᓐ ᒪᒃ ᒥᓯᑦ ᓇᒪ ᒋᑭ ᐅᒋ ᐳᓂᒥᑭᓐ ᐊᓐᑕ ᒥᔭᒡ ᐊ ᐅᒋᒥᑲᒡ ᐊᑎ ᐊᓐ ᐃᔅᒋᔄᒥᑲᒐ᙮

¹⁶ ᒪᒃ ᒥᑐᑭᔾ ᐃᔅᒋᔄᒥᑲᒡ, “ᓇᒪᔭᐤ ᓂᔾ ᒥᔅᒋᓯᒄ, ᓇᒪ ᓂ ᐅᑎᒧᓐ ᐅᑕ ᒥᔭᒡ᙮” ᐊᓐ ᒥᑐᑭᔾ ᓇᒪ ᐃᔭᐱᒡ ᒋᑭ ᐅᒋ ᐳᓂᒥᑭᓐ ᐊᓐᑕ ᒥᔭᒡ ᐊ ᐅᒋᒥᑲᒡ ᒥᒄ ᐊᓐ ᐃᔅᒋᔄᒥᑲᒐ᙮

¹⁷ ᐛᔅ ᒥᔪᐤ ᒥᓯᐛ ᒥᒄ ᒥᔅᒋᓯᒄ ᒋ ᐃᓯᓇᑯᓂᒂ, ᓇᒪ ᒋᐸ ᐅᒋ ᐸᑎᒻ ᐊᐛᓐ᙮ ᒪᒃ ᒥᓯᐛ ᒥᒄ ᒥᑐᑲᒡ ᓇᒪ ᒋᐸ ᒋ ᒥᔭᒐᐤ ᐊᐛᓐ᙮

¹⁸ ᓇᒪ ᒪᒃ ᐊᓐᑕ ᐃᓯᓇᑯᓐ᙮ ᒋᓴᒪᓂᑐᐤ ᒥᓯᐛ ᒋ ᐅᓯᑕᐤ ᑕᓐ ᓂᓇᐧᑯᐤ ᐊ ᐃᓯ ᐱᔅᒐᓯᒥᑭᓂᔨᒡ ᒥᔭᔪᐤ᙮ ᑭᔭ ᐎᔾ ᒥᓯᐛ ᒋ ᐎᔭᔨᑎᒻ ᑕᓐ ᒐ ᐃᓯ ᐱᔅᒐᓯᒥᑭᓂᔨᒡ ᒥᔭᔪᐤ ᑭᔭ ᑕᓐᑕ ᒐ ᐊᑎ ᒋᑭᒧᔨᒋ ᐱᔅᒐᓯᐅᓇ᙮

¹⁹ ᓇᒪᐎᔾ ᒥᔪᐤ ᒋᐸ ᐅᒋ ᐃᓯᓇᑯᓐ ᒥᒄ ᐸᐃᒄ ᒐᒂᓐ ᑎᒂᒡ ᒥᔭᒡ᙮

²⁰ ᓂᓇᐧᑯᐤ ᒐᒂᓐ ᐃᓯ ᑎᑯᓐ ᒥᔭᒡ ᒥᔪᐤ ᒐᒋ ᐃᓯᓇᒂᒡ᙮

²¹ ᐊᑯ ᒪᒃ ᓇᒪ ᒋᑭ ᒋ ᐃᑕᐤ ᒥᔅᒋᓯᒄ ᐊᓂᔭ ᒥᑎᒋᔪᐤ, “ᓇᒪ ᒋ ᓂᑐᐛᔨᒥᑎᓐ᙮” ᑭᔭ ᒪᒃ ᒥᔅᑎᒂᓐ ᓇᒪ ᒋᑭ ᒋ ᐃᑕᐤ ᐊᓂᔭ ᒥᓯᑎᔪᐤ, “ᓇᒪ ᒋ ᓂᑐᐛᔨᒥᑎᓐ᙮”

²² ᑎᑯᓇ ᑭᑈ ᑕᑈ ᐱᔅᒐ ᒐᒂᔪᐛ ᐊᓐᑕ ᒥᔭᒡ ᐊᑲ ᓴᐱᓯᒥᑲᒋ ᐊ ᐃᓯᓇᒂᒋ᙮ ᒥᒄ ᒪᒃ ᐃᔭᐱᒡ ᓂᑐᐛᔨᑕᑯᓇ ᐅᔭ᙮

²³ ᑭᔭ ᑎᑯᓇ ᒋᔪᓇᒡ ᐊᓂᔭ ᒐᒂᔪᐛ ᐊᑲ ᓇᔅᒡ ᒋᔅᑕᔨᑕᒂᒋ ᐊ ᐃᑕᔨᑎᒪᐧᒄ᙮ ᐊᐅᑯᓂ ᒪᒃ ᐅᔭ ᓇᔅᒡ ᐃᔭᒂ ᐊ ᐃᑐᑎᒪᐧᒄ᙮ ᑭᔭ ᑎᑯᓇ ᐊᓂᔭ ᒐᒂᔪᐛ ᒋᔪᓇᒡ ᐊᑲ ᐎ ᓄᑯᑕᔭᐧᒄ, ᐃᔭᒂ ᒪᒃ ᒋ ᐃᑐᑕᓇᓄᐤ ᐅᔭ ᐊ ᐎ ᒥᔪ ᑭᓄᐛᔨᑎᒪᐧᒄ᙮

²⁴ ᑎᑯᓇ ᑯᑎᑲ ᒐᒂᔪᐛ ᒥᔭᒡ ᐊᑲ ᒐᒂᓐ ᐊ ᐃᑕᔨᑎᒪᐧᒄ ᐊ ᓄᒂᒋ᙮ ᐊᐅᑯᓂ ᒪᒃ ᐅᔭ ᓇᒪ ᓂᑐᐛᔨᑕᑯᓐ ᒐᒋ ᐊᑯᐊᒪᐧᒄ᙮ ᒋᓴᒪᓂᑐᐤ ᒋ ᐅᓯᑕᐤ ᒥᔭᔪᐤ ᐃᔭᒂ ᒐᒋ ᐃᑐᑕᑭᓄᔨᒋ ᒥᓯᐛ ᐊᓂᔭ ᐱᔅᒐᓯᐅᓇ ᐛᔅ ᒥᓯᐛ ᓂᑐᐛᔨᑕᑯᓐ ᒐᒋ ᒥᔪᐱᔨᒡ ᒥᔪᐤ᙮

²⁵ ᐊᐅᒄ ᐅᔭ ᑲ ᐃᓯᑕᑦ ᒐ ᐊᑲ ᒋ ᑎᒂᒡ ᑎᐸᓂᐃᓱᐅᓐ ᒥᔭᒡ, ᒋᓴᒪᓂᑐᐤ ᒋ ᓂᑐᐛᔨᑎᒻ ᐊᓂᔭᔪᐛ ᐱᔅᒐᓯᐅᓇ ᐊᓐᑕ ᒥᔭᒡ ᑲ ᑎᑯᓂᔨᒋ ᒥᓯᐛ ᐸᐃᑯᓄᒡ ᒐᒋ ᐛᐎᒋᐃᑐᒥᑭᓂᔨᒋ, ᓇᒪ ᐎ ᒐᒋ ᑕᑎᐸᓂᐱᔨᐃᓱᒥᑭᓂᔨᒋ᙮

²⁶ ᑎᒂᒐ ᐊ ᐃᓯ ᐊᐧᑯᓯᒥᑲᒡ ᐊᓐ ᒥᔪᐤ, ᒥᓯᐛ ᐊ ᐃᔅᐱᓴᒡ ᒥᔪᐤ ᒋᑭ ᒧᓯᑕᒐᒥᑭᓐ᙮ ᑭᔭ ᐸᐃᒄ ᐱᔅᒐᓯᐅᓐ ᐊᓐᑕ ᒥᔭᒡ ᒥᔪᐧᑲᑭᓄᐅᒐ, ᒥᓯᐛ ᐊ ᐃᔅᐱᓴᒡ ᐊᓐ ᒥᔪᐤ ᒋᑭ ᒥᔽᔨᒧᒥᑭᓐ᙮

²⁷ ᒋᔨᐛᐤ ᒪᒃ ᐊᐅᒄ ᙭ ᐎᔪᐤ᙮ ᒥᓯᐛ ᐸᐸᐃᒄ ᒋ ᐎᒋᐃᐛᓇᐛᐤ ᐊᓐᑕ ᐃᔅ᙮

²⁸ ᑕᔪᐛ ᒪᒃ ᐅᒪᒧᐊᔭᒥᐊᐛ ᒋᓴᒪᓂᑐᐤ ᐊᒋ ᐅᑎᓇᑦ ᑕᓐ ᒐ ᐃᑕᐱᑎᓯᔨᒋ᙮ ᐊᓂᔭᔪᐛ ᓂᔅᑎᒻ ᑲ ᐅᑎᓇᑦ ᐊᐅᒄ ᐅᔭ ᐊᑈᔅᑕᓇ ᐊᑯ ᒥᓐ ᐅᒋᔅᒋᐛᐃᒐᓱᐛ, ᐊᑯ ᒥᓐ ᒋᔅᑯᑎᒪᒐᓱᐛ, ᑭᔭ ᐊᐛᔪᐛ ᒪᒥᔅᑲᒡ ᒐᒂᔪᐤ ᒐ ᐃᑐᑎᒥᔨᒋ᙮ ᒋ ᐅᑎᓇᐤ ᑭᔭ ᐊᐛᔪᐛ ᒐ ᒥᓏᒋᐃᐛᔨᒋ, ᑭᔭ ᐊᓂᔭᔪᐛ ᓂᓇᐧᑯᐤ ᒐ ᐃᓯ ᐎᒋᐊᔨᒋ ᐊᐛᔪᐛ᙮ ᒋ ᐅᑎᓇᐤ ᑭᔭ ᐊᐛᔪᐛ ᐊ ᐛᐎᐱᔨᑕᔨᒋ ᒐᒂᔪᐤ ᒐ ᐃᑕᐱᑎᓯᔨᒋ, ᑭᔭ ᐊᐛᔪᐛ ᒐ ᒂᔅᒋᐃᔨᒥᔨᒋ᙮

²⁹ ᒥᓯᐛ ᐊ ᐊᐛᓐ ᐊᑈᔅᑕᓐ ᒋᑭ ᒋ ᐃᑕᐱᑎᓯᐤ ? ᒥᓯᐛ ᐊ ᐊᐛᓐ ᒋᑭ ᒋ ᒋᔅᒋᐛᐃᒐᐤ ? ᒥᓯᐛ ᐊ ᐊᐛᓐ ᒋᑭ ᒋ ᒋᔅᑯᑎᒪᒐᐤ ? ᒥᓯᐛ ᐊ ᐊᐛᓐ ᒪᒥᔅᑲᒡ ᐃᑐᐤ ?

³⁰ ᒥᓯᐛ ᐊ ᐊᐛᓐ ᒥᓏᒋᐊᐤ ᐊᐛᔪᐛ ? ᒥᓯᐛ ᐊ ᐊᐛᓐ ᒂᔅᒋᐃᔨᒧᐤ ? ᒥᓯᐛ ᐊ ᐊᐛᓐ ᐱᔭᑭᔅᒋᑕᑯᑕᒧᐛᐤ ᑕᓐ ᐊ ᐃᓯ ᒂᔅᒋᐃᔨᒥᔨᒋ ᐊᐛᔪᐛ ?

³¹ ᒋᐸ ᐱᑯᓴᔨᑕᓐ ᒐᒋ ᐊᔭᔨᓐ ᐊᓂᔭ ᒪᐅᒡ ᒪᔪᐊᐱᑎᓂᔨᒋ ᒋᓴᒪᓂᑐᐤ ᐅᒥᔨᐛᐅᓇ᙮ ᒥᒄ ᒪᒃ ᒋᑭ ᐛᐸᑎᔨᑎᓇᐛᐤ ᐊᓐ ᒐᒂᓐ ᒪᐅᒡ ᒐᔅᑕᔨᑕᒂᒡ ᐃᔅᐱᔅ ᐊᓂᔭᔪᐛ ᒐᒂᔪᐛ ᑲ ᐊᔨᒧᑎᒪᓐ᙮