1 ᑯᕆᓐᑎᔭᓇ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᓂᔾ ᑈᓪ, ᒋᓴᒪᓂᑐᐤ ᓂᒋ ᐅᑎᓂᒄ ᙭ ᒋᓴᔅ ᐅᑦ ᐊᑈᔅᑕᓂᒪ ᒐᒋ ᐃᑕᐱᒋᐃᑦ᙮ ᒋᐧᑲᓂᓯᓄᐤ ᓱᔅᑎᓂᔅ ᑭᔭ ᐎᔾ ᑕᐤ ᐅᑕ ᐊ ᑕᐅᒡ᙮

² ᒋᔨᐛᐤ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᑯᕆᓐᑦ ᑲ ᐃᓯᓂᐧᑲᑕᒡ ᐅᑕᓇᐤ ᐊ ᑕᔭᒄ ᒋ ᒥᓯᓇᐊᒪᑎᓇᐛᐤ᙮ ᐊᓂᔭ ᑕᓐ ᑲ ᐃᓯ ᐃᑐᑎᒪᑕᒄ ᒋᓴᔅ ᙭ ᐊᑯᑕ ᑲ ᐅᒋ ᐅᑎᓂᑕᒄ ᒋᓴᒪᓂᑐᐤ ᒐᒋ ᐅᑦ ᐃᔨᒥᑐᑕᑕᒄ᙮ ᔅᒋ ᐅᑎᓂᑯᐛᐤ ᒐᒋ ᐅᑦ ᐃᔨᒥᑐᑕᑕᒄ ᑭᔭ ᒥᓯᐛ ᐊᓂᔭᔪᐛ ᑯᑎᑲ ᐊᐛᔪᐛ ᑲ ᑕᑈᔭᔨᒥᑯᑦ ᒋ ᐅᑎᓇᐤ᙮ ᐎᔾ ᒪᒃ ᐊᐅᒄ ᐛᒋᒪᒥᔭᐧᒄ ᒥᓯᐛ ᐊ ᑎᓯᔭᐧᒄ᙮

1 Corinthians 1.3-9 (Advent-1 Year B)

³ ᓂᑦ ᐊᔭᒥᐊᐤ ᒋᓴᒪᓂᑐᐤ ᒍᑕᐎᓄᐤ ᑭᔭ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᒐᒋ ᒥᔨᑕᒄ ᓱᐛᔨᒋᒐᐅᓂᔪᐤ ᑭᔭ ᒋᔭᒪᔨᑎᒧᐅᓂᔪᐤ᙮

ᐊ ᐃᓯ ᓱᐛᔨᒥᑕᒄ ᒋᓴᒪᓂᑐᐤ ᙭ ᐅᒋ

⁴ ᒧᔅ ᓂᓇᔅᑯᒪᐤ ᒋᓴᒪᓂᑐᐤ ᑕᓐ ᑲ ᐃᓯ ᓱᐛᔨᒥᑕᒄ ᒋᓴᔅ ᙭ ᐅᒡ᙮

⁵ ᐛᔅ ᐊ ᐎᒐᐛᒄ ᙭ ᒥᓯᐛ ᒋ ᐊᑎ ᐃᓯ ᐛᔪᑎᓯᓇᐛᐤ ᒋᑦ ᐃᓯᓇᑯᓯᓇᐛᐤ, ᒋ ᐛᔪᑎᓯᐅᓇᐛᐤ ᑭᔭ ᑕᓐ ᐊ ᐃᓯ ᐃᔨᒥᔭᒄ ᑭᔭ ᐊ ᐃᓯ ᑭᒐᑕᐛᔨᑎᒪᒄ᙮

⁶ ᐛᔅ ᒋ ᒐᔅᑎᓇᑕᔨᑎᒥᐃᑯᓇᐛᐤ ᒥᓯᐛ ᑕᓐ ᑲ ᐃᓯ ᐊᔨᒧᑎᒪᑕᒡ ᙭᙮

⁷ ᐊᑯ ᒪᒃ ᓇᒪ ᓇᔅᒡ ᒋ ᓄᑕᐱᔨᓇᐛᐤ ᐊᒐᐧᒄ ᒥᔨᐛᐅᓇ ᒪᒂᒡ ᐊ ᐊᓱᐛᐱᒪᒄ ᒐ ᐃᔅᐱᔅ ᑎᑯᓯᐧᒃ ᒋᑎᐸᔨᒋᒐᓯᒥᓄᐤ ᒋᓴᔅ ᙭᙮

⁸ ᐎᔾ ᒋᑭ ᐎᒋᐃᑯᐛᐤ ᒧᔅ ᒐᒋ ᓱᒋᑲᐳᐅᐛᒄ ᑕᑈᑎᒧᐅᓂᒡ ᑭᔭ ᓇᒪ ᒋᑭ ᐅᒋ ᑎᑯᓐ ᑕᓐ ᒐ ᐃᓯ ᐊᑕᒪᔨᑕᑯᓯᔭᒄ ᐃᔅᐱ ᐅᑎᒋᐱᔨᒐ ᐊᓂᔭ ᐊ ᒋᓯᑲᔨᒡ ᒐ ᑎᑯᓯᐧᒃ ᐅᑎᐸᔨᒋᒐᐤ ᒋᓴᔅ ᙭᙮

⁹ ᑯᐃᔅᒄ ᐃᑐᐤ ᒋᓴᒪᓂᑐᐤ᙮ ᐊᐅᒄ ᒪᒃ ᐅ ᑲ ᑕᑈᑎᑕᒄ ᒐᒋ ᐎᒐᐅᒪᑯ ᐅᑯᓴ ᐊᐅᑯᔪᐛ ᐅᔭ ᒋᑎᐸᔨᒋᒐᓯᒥᓄᐛ ᒋᓴᔅ ᙭ᑕ᙮

ᐊ ᑕᑎᐸᓂᐱᔪᐅᒡ ᒪᒧᐤ ᑲ ᐊᔭᒥᐊᐛᑎᓯᒡ

¹⁰ ᓂᐧᑲᓂᓯᑐᒄ, ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᑦ ᐃᓯᓂᐧᑲᓱᐅᓂᒡ ᐅᒋ, ᒋ ᓯᒋᒥᑎᓇᐛᐤ ᒪᒧᐤ ᒐᒋ ᓂᔅᑯᒧᔭᒄ ᒐᒂᓐ ᐊ ᐃᔅᒋᔄᔭᒄ ᒐ ᐊᑲ ᒋ ᑕᑎᐸᓂᐱᔨᔭᒄ ᐊᓐᑕ ᒪᒂᒡ ᐊ ᑕᔭᒄ᙮ ᓱᒃ ᐎ ᒪᒧᐱᔪᐅᒄ ᐸᐃᑯᓄᒡ ᐊ ᐃᓯ ᒪᒥᑐᓇᔨᑎᒪᒄ ᑭᔭ ᐸᐃᑯᓄᒡ ᐊ ᐃᓯ ᓂᔅᑐᑎᒪᒄ᙮

¹¹ ᓂᐧᑲᓂᓯᑐᒄ, ᑲᓗᐃ ᑲ ᐃᓯᓂᐧᑲᓱᔨᒋ ᐃᔎᐛ ᐊ ᑕᔨᒋ ᐊ ᐅᑐᑕᒡ ᐊᐛᓐᒋ ᓂᒋ ᐃᑕᒋᒧᔅᑕᑯᒡ ᐊ ᒪᒥᒋᐱᔭᒄ ᐊᓐᑕ ᒪᒂᒡ ᐊ ᑕᔭᒄ᙮

¹² ᔅᒋ ᐃᑕᒋᒥᑯᐛᐅᒡ ᐱᔅᒐ ᐊᓐᑕ ᐊ ᑎᓯᔭᒄ ᐊ ᑕᒡ ᐊ ᐃᔅᒋᔄᔭᒄ, “ᓂᔾ ᑈᓪ ᐊ ᓇᓴᐎᔭᒄ,” ᐊᑯ ᑯᑎᑭᒡ ᐊᓐᑕ ᒪᒂᒡ ᐊ ᑕᐛᒄ ᐊ ᑕᒡ ᐊ ᐃᔅᒋᔄᒡ, ᐊᐳᓚᓴ ᐊ ᓇᓴᐛᒡ, ᐊᑯ ᑯᑎᑭᒡ ᐊ ᐃᔅᒋᔄᒡ, ᐱᑕᕋ ᐊ ᓇᓴᐛᒡ, ᐊᑯ ᒥᓐ ᑯᑎᑭᒡ ᐊ ᐃᔅᒋᔄᒡ, ᙭ᑕ ᐊ ᓇᓴᐛᒡ᙮

¹³ ᒧᔭᒻ ᐊᑲ ᐸᐃᑯᓯᑦ ᐊᓐ ᙭ ᒥᓯᐛ ᑲ ᓇᓴᐛᒄ ᐃᓯᓇᑯᓐ ᐅ ᐊ ᐃᑎᔭᒄ᙮ ᓂᔾ ᐊ ᓂᒋ ᒋᔅᑕᔎᑎᑯᐅᓐ ᒋᔨᐛᐤ ᐅᒡ ? ᐃᔅᐱ ᑲ ᓯᑲᐃᑕᑯᐅᔭᒄ ᓇᒪ ᐅᒋ ᐃᓇᓄᐤ, ᒋᑎ ᓯᑲᐃᑕᑎᓐ ᑈᓪ ᐅᑦ ᐃᓯᓂᐧᑲᓱᐅᓂᒡ ᐃᔅ᙮

¹⁴ ᐊᓐᑕ ᐊ ᑎᓯᔭᒄ ᓂ ᒥᔽᔨᑕᓐ ᒥᒄ ᑯᕆᔅᐳᔅ ᑭᔭ ᑲᐃᔭᔅ ᐊᒋ ᓯᑲᐃᑐᐅᒂᐤ᙮

¹⁵ ᓇᒪ ᒪᒃ ᐊᐛᓐ ᒋᑭ ᒋ ᐃᔅᒋᔄᐤ ᐊᒋ ᓯᑲᐃᑐᐛᑭᓄᐅᑦ ᓂᔾ ᒐᒋ ᐸᒋ ᓇᓴᐅᑦ᙮

¹⁶ ᓂ ᒋᔅᒋᓯᓐ ᑭᔭ ᔅᑎᐸᓇᔅ ᐊᒋ ᓯᑲᐃᑐᐅᒃ ᑭᔭ ᐊᓂᔭᔪᐛ ᐊᓐᑕ ᐊ ᑕᑦ ᑲ ᐎᒋᒥᑯᑦ ᓂᒋ ᓯᑲᐃᑐᐅᒪᐛ᙮ ᓇᒪ ᒪᒃ ᒥᓐ ᑯᑎᒃ ᐊᐛᓐ ᓂ ᒋᔅᒋᓯᓐ ᒐᒋ ᓯᑲᐃᑐᐅᒃ᙮

¹⁷ ᑕᐸ ᓂ ᐅᒋ ᐸᒋ ᐃᑎᓴᐅᒄ ᙭ ᒐᒋ ᓯᑲᐃᑕᒐᐅᒡ᙮ ᓂᒋ ᐸᒋ ᐃᑎᓴᐅᒄ ᒐᒋ ᑭᒐᔅᒋᒧᐅᒡ ᐊ ᐛᐎᑎᒧᒡ ᒥᔽᒋᒧᐅᓂᔪᐤ᙮ ᐅ ᒪᒃ ᐊ ᐃᑎᔭᓐ ᓇᒪ ᐊᔅᒋᔪᐤ ᑭᒐᑕᐛᔨᑎᒧᐅᓐ ᓂᑦ ᐊᐱᒋᑕᓐ᙮ ᐛᔅ ᐅ ᐊᐱᒋᑕᔭᓐ ᐊᑯ ᑭᑈ ᓇᒪ ᒋᐸ ᐅᒋ ᓱᒐᔨᑕᑯᓐ ᐊᓐ ᒥᔽᒋᒧᐅᓐ ᐊᓐᑕ ᐃᔭᔨᒧᒪᑭᓄᐅᑦ ᙭ ᒋᐱᔭᑎᑯᒡ ᐊᒋ ᓂᐱᑦ᙮

᙭ ᐊᐅᒄ ᒋᓴᒪᓂᑐᐤ ᐅᑭᒐᑕᐛᔨᑎᒧᐅᓐ ᑭᔭ ᐅᒥᔅᑯᓯᐅᓐ 1 Corinthians 1.18-25 (Lent-3 Year B)

¹⁸ ᐱᔅᒐ ᐊᐛᓐᒋ ᒋᔎ ᐃᔨᒧᐅᓐ ᐃᑕᔨᑎᒧᒡ ᐊ ᐊᔨᒧᑕᑭᓄᔨᒋ ᒋᓴᓴ ᑲ ᓂᐱᔨᒋ ᒋᐱᔭᑎᑯᒡ ᒐᒋ ᐅᒋ ᐱᒪᒋᐅᔨᒋ ᐅᒥᒐᑎᓯᐛ᙮ ᐊᐅᑯᓐᒡ ᒪᒃ ᐅᒡ ᐊᐛᓐᒋ ᐅᓂᓯᓄᐅᒡ ᐅᔭ ᑲ ᐃᑕᔨᑕᒡ᙮ ᒋᔭᓄᐤ ᒪᒃ ᐎ ᑲ ᐱᒪᒋᐅᔭᐧᒄ, ᒋ ᒋᔅᒐᔨᑕᓇᓄᐤ ᐊ ᐛᐎᑕᑭᓄᐎᔨᒡ ᙭ ᐊᒋ ᓂᐱᑦ ᒋᐱᔭᑎᑯᒡ ᐊᑯᑕ ᔭᐱᑎᓯᒥᑭᓂᔨᒡ ᒋᓴᒪᓂᑐᐤ ᐅᓱᐧᑲᑎᓯᐅᓐ᙮

¹⁹ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᓂᑭ ᐃᑐᑎᒺᓐ ᐊᑲ ᓇᔅᒡ ᓴᓯᑲᓐ ᒐᒋ ᐃᑕᐱᑎᓂᔨᒡ ᐅᑭᒐᑕᐛᔨᑎᒧᐅᓄᐛᐤ ᐊᓐᒡ ᑲ ᑭᒐᑕᐛᔨᑕᒡ, ᑭᔭ ᐊᓂᔭ ᐊ ᐃᓯ ᒪᒥᑐᓇᔨᑕᒡ ᐊᓐᒡ ᑲ ᐃᑈᐧᑲᒡ ᐊᑲ ᓇᔅᒡ ᒐᒂᓐ ᒐᒋ ᐃᑕᔨᑕᑯᓂᔨᒡ᙮

²⁰ ᑕᓐ ᒪᒃ ᐊᓐ ᐊᐛᓐ ᓇᔅᒡ ᑲ ᑭᒐᑕᐛᔨᑕᐧᒃ ? ᑕᓐ ᐊᓐ ᐊᐛᓐ ᓇᔅᒡ ᒥᔅᑎ ᑲ ᒋᔅᑯᑎᒧᐛᑭᓄᐅᑦ ? ᑭᔭ ᑕᓐ ᐊᓐ ᐊᐛᓐ ᓇᔅᒡ ᑲ ᑭᔅᒋᐅᑕᑯᓯᑦ ᐊ ᐃᔨᒥᑦ ? ᒋ ᓄᑯᑕᐤ ᐊ ᒋᓴᒪᓂᑐᐤ ᐊᑲ ᓇᔅᒡ ᒐᒋ ᐃᑈᐧᑲᑕᑯᓂᔨᒡ ᐊᓂᔭ ᐊᔅᒋᐤ ᑭᒐᑕᐛᔨᑎᒧᐅᓂᔪᐤ ?

²¹ ᐊᑯ ᒪᒃ ᐊ ᐃᔅᐱᔅ ᑭᒐᑕᐛᔨᑕᐧᒃ ᒋᓴᒪᓂᑐᐤ ᒋ ᐃᑐᑎᒻ ᐊᑲ ᑭᒐᑕᐛᔨᑎᒧᐅᓂᒡ ᒐᒋ ᐅᒋ ᒋᔅᒐᔨᒥᑯᑦ ᐊᐛᔪᐛ᙮ ᐃᔭᐱᒡ ᒋ ᓇᐊᔨᑎᒥᐃᑯᐤ ᒐᒋ ᐱᒪᒋᐊᑦ ᐊᓂᔭ ᐊᐛᔪᐛ ᑲ ᑕᑈᑎᒥᔨᒋ ᐊᓂᔭ ᒋᔎ ᐃᔨᒧᐅᓂᔪᐤ ᑲ ᐃᓯᓂᐧᑲᑕᑭᓄᐎᒡ ᐊᓂᔭ ᐎᔭᐎᑎᒺᐧᒄ᙮

²² ᐊᓐᒡ ᒍᐤ ᑲ ᐃᑎᔅᑲᓇᓯᒡ ᒪᒥᔅᑲᒡ ᐛᐸᑎᔨᐛᐅᓇ ᓂᑐᐛᔨᑎᒧᒡ ᒐᒋ ᐛᐸᑎᔭᑭᓄᐅᒡ ᐃᔭᒄ ᒐᒋ ᑕᑈᑕᒡ᙮ ᐊᑯ ᐊᓐᒡ ᑯᕆᒃ ᑲ ᐃᑎᔅᑲᓇᓯᒡ ᑭᒐᑕᐛᔨᑎᒧᐅᓂᔪᐤ ᓇᔅᒡ ᒋᒋᐛ ᐃᑕᔨᑎᒥᐃᑯᐅᒡ ᒐᒋ ᐅᒋ ᑕᑈᑕᒡ᙮

²³ ᒋᔭᓄᐤ ᒪᒃ ᐎ ᙭ ᐊᒋ ᒋᔅᑕᔎᑕᑭᓄᐅᑦ ᐊᐅᒄ ᐊ ᐃᓯ ᐛᐎᑎᒪᐧᒄ ᐊ ᑭᒐᔅᒋᒧᔭᐧᒄ᙮ ᒥᒄ ᒪᒃ ᐊᓐᒡ ᒍᐤ ᑲ ᐃᑎᔅᑲᓇᓯᒡ ᓂ ᒪᔭᔨᒥᑯᐅᓇᓐ ᐃᑕᔨᑎᒧᒡ ᐅᔭ ᐊ ᐃᓯ ᑭᒐᔅᒋᒧᓇᓄᐎᒡ᙮ ᐊᑯ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᒋᔎ ᐃᔨᒧᐅᓐ ᐅᔭ ᐃᑕᔨᑎᒧᒡ᙮

²⁴ ᒋᔭᓄᐤ ᒪᒃ ᐎ ᒋᓴᒪᓂᑐᐤ ᑲ ᐅᑎᓂᑕᐧᒄ, ᑕᐱᔅᑯᓐ ᒍᐤ ᐊ ᐃᑎᔅᑲᓇᓯᔭᐧᒄ ᑭᔭ ᑯᕆᒃ ᐊ ᐃᑎᔅᑲᓇᓯᔭᐧᒄ, ᒋ ᑕᑈᑕᓇᓄᐤ ᐅ ᙭ ᐊᐅᒄ ᒋᓴᒪᓂᑐᐤ ᐅᓱᐧᑲᑎᓯᐅᓐ ᑭᔭ ᐅᑭᒐᑕᐛᔨᑎᒧᐅᓐ᙮

²⁵ ᐅᔭ ᒪᒃ ᒋᓴᒪᓂᑐᐤ ᑲ ᐃᑐᑕᐧᒃ ᒋᐱᔭᑎᑯᒡ ᓇᔅᒡ ᐊᑲ ᐃᑈᐧᑲᐛᔨᑎᒥᔨᒋ ᐊᐛᔪᐛ ᐊᑐᐎᔅ ᑭᒐᑕᐛᔨᑕᑯᓂᔪᐤ ᐃᔅᐱᔅ ᐊᓂᔭ ᐊᑐᐎᔅ ᐊ ᑭᒐᑕᐛᔨᑕᑯᓂᔨᒡ ᓇᐸᐤ ᐅᑭᒐᑕᐛᔨᑎᒧᐅᓂᔪᐤ᙮ ᐊᑯ ᐊᓂᔭ ᑲ ᐃᑕᔨᑕᒡ ᐊᐛᓐᒋ ᓇᔅᒡ ᐊᑲ ᓱᒐᔨᑕᑯᓂᔨᒡ ᐊᑐᐎᔅ ᓱᒐᔨᑕᑯᓂᔪᐤ ᒋᓴᒪᓂᑐᐤ ᐅᓂᔨᒥᓯᐅᓐ᙮

²⁶ ᑭᓄᐛᐱᒥᓱᒄ ᒪ ᑕᓐ ᑲ ᐃᑕᔨᑕᑯᓯᔭᒄ ᒋᔨᐛᐤ ᓂᐧᑲᓂᓯᑐᒄ ᐃᔅᐱ ᒋᓴᒪᓂᑐᐤ ᑲ ᑕᑈᑎᑕᒄ᙮ ᓇᒪ ᒥᒐᑦ ᐊᓐᑕ ᐊ ᑎᓯᔭᒄ ᒋ ᐅᒋ ᐃᑕᔨᒥᑯᐛᐤ ᓇᐸᐤ ᐊ ᑭᓄᐛᐱᒥᑕᒄ ᓇᔅᒡ ᐊ ᐃᑈᐧᑲᐛᒄ᙮ ᓇᒪ ᒥᒐᑦ ᒋ ᐅᒋ ᐃᑕᔨᒥᑯᓇᐛᐤ ᓇᔅᒡ ᐊ ᐅᒋᒪᐛᔨᑕᑯᓯᔭᒄ ᑭᔭ ᓇᒪ ᒥᒐᑦ ᒋ ᐅᒋ ᓇᔅᒡ ᒋᒋᐛᔭᔨᒥᑯᓇᐛᐤ᙮

²⁷ ᒥᒄ ᒪᒃ ᒋᓴᒪᓂᑐᐤ ᒋ ᐅᑎᓇᐤ ᐊᓂᔭᔪᐛ ᐊᐛᔪᐛ ᐊᑲ ᓇᔅᒡ ᒐᒂᓐ ᑲ ᐃᑕᔨᒪᑭᓄᔨᒋ ᒋ ᐅᑎᓇᐤ ᒐᒋ ᐅᒋ ᐛᐸᑎᔭᑦ ᐊᓂᔭᔪᐛ ᒋᒋᐛ ᑲ ᐃᑕᔨᒪᑭᓄᔨᒋ ᐊᑲ ᓇᔅᒡ ᒐᒂᓐ ᐃᑕᔨᑕᑯᓯᔨᒋ ᐎᔾ ᐃᔅ ᐊ ᑕᑦ᙮ ᑭᔭ ᒋ ᐅᑎᓇᐤ ᐊᓂᔭᔪᐛ ᐊᑲ ᓱᒐᔨᑕᑯᓯᔨᒋ ᑲ ᐃᑕᔨᒪᑭᓄᔨᒋ ᐅᑕ ᐊᔅᒋᒡ ᒋ ᐅᑎᓇᐤ ᐊᓂᔭ ᒐᒋ ᐅᒋ ᐛᐸᑎᔭᑦ ᐊᓂᔭᔪᐛ ᑲ ᓱᒐᔨᑕᑯᓯᔨᒋ ᐊᑲ ᓇᔅᒡ ᓱᒐᔨᑕᑯᓯᔨᒋ ᐎᔾ ᐃᔅ ᐊ ᑕᑦ᙮

²⁸ ᐊᓂᔭᔪᐛ ᐊᑲ ᓇᔅᒡ ᑲ ᒋᐧᑲᔭᔨᑕᑯᓂᔨᒋ ᒐᒂᔪᐛ ᑭᔭ ᐊᑲ ᓇᔅᒡ ᑲ ᐊᐱᑕᔨᑕᑭᓄᔨᒋ ᐊᐅᑯᔪᐛ ᐅᔭ ᑲ ᐅᑎᓇᐧᒃ ᒋᓴᒪᓂᑐᐤ ᒐᒋ ᐅᒋ ᐊᑲ ᒐᒂᓐ ᐃᑕᔨᑕᑯᓂᔨᒋ ᐊᓂᔭᔪᐛ ᒐᒂᔪᐛ ᑲ ᒋᔅᑕᔨᑕᑯᓂᔨᒋ᙮

²⁹ ᐊᔪᐅᒄ ᐅᔭ ᑲ ᐃᑎᑦ ᒋᓴᒪᓂᑐᐤ ᐊᑲ ᐛᐛᒡ ᐸᐃᒄ ᐊᐛᔪᐛ ᒐᒋ ᒪᒥᒋᒧᔨᒋ ᐎᔾ ᐊᓐᑕ ᐃᔅ ᐊ ᑕᑦ᙮

³⁰ ᐎᔾ ᒋᓴᒪᓂᑐᐤ ᒋ ᓇᐃᐱᔨᑕᐤ ᒐᒋ ᐎᒐᐅᒪᑯ ᒋᓴᔅ ᙭ᑕ᙮ ᒋᓴᔅ ᒪᒃ ᐊ ᑕᑦ ᐅᒋ ᐊᑯᑕ ᐛᒋ ᐊᔭᔭᐧᒄ ᑭᒐᑕᐛᔨᑎᒧᐅᓐ, ᑭᔭ ᑯᐃᔅᑯᑕᑎᓯᐅᓐ, ᑭᔭ ᐸᔭᒋ ᐱᒪᑎᓯᐅᓐ, ᑭᔭ ᐱᒪᒋᐃᑯᓯᐅᓐ᙮

³¹ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᐊᐛᓐ ᐎ ᒪᒥᒋᒧᒐ ᒥᒄ ᐊᓂᔭ ᑕᓐ ᑲ ᐃᑐᑎᒥᔨᒋ ᐅᑎᐸᔨᒋᒐᐛ ᒋᐸ ᐊᔨᒧᑎᒻ᙮”