TITUS 3 - KETHOLESI KESAO N.T. (BSI)

¹ Süko khipü akelülü süyi thezho kekhiko mu kekuko khro, shecomiko jü kezü, mhatho keve kethilü keredepü keta.

² Mipürei sheli (kesu) pohite, kezhe bühi thihi te, vele tsü menu tate, renu metsati thipü thüma metü kate.

³ Kekrelamori uko thozori hucepü melo nyonyü tayo, mifüzümo, mikedo, umenyü kekrekre tiko nüthi, zü mezhokemo mu miresa meho, miphi metsü, hunehu ngounümo.

⁴ Vele süsalü ketsükeve mu kekhrü therüo celü uko kelakeyi thüma yo thi kesü ngoyi,

⁵ Uko mhatho kemezi kethi lazomo, vele pü uko kekhrü pü uko kelasü, uthi kesa salasü mu Kemesa Rüpü lü uthi kesa sü.

⁶ Pü ketsokele lapü uko yosü,

⁷ Jisu Khrista uko kelakeyiola.

⁸ Pü ngokemezhe uthi kemathoyi, de uthipü kechothe kalü kerhü kene kemeri khasü.

⁹ Mha hiohi kemelü kene jüpo, mu mhasüko neko thimu lüpü keta amedozo, uko therüo melü ketako menuyi mu mhakeve kethilü tayi, mha hiko vezo mu thümako la meve.

¹⁰ Vele kemelolü mhaketso tiko kekhayite, nuhü kephriko, ketükemeli ti, mu thezholü kemeli keti, mha süko mevemo mu kemechü zo tila.

¹¹ Thüma mipü va kerao mu va kenao pü tahi tarho süzo sheri pü ketho kemo laco (kehucephro) vato lize pü khava te. Thüma sübi ketako kethoo cu vote, kephomalü tate mu pü thopü mejo votato.

¹² I Artemas mori Tychicus ketsüpü nekoce kesüce neko mhalü menu de ta Nicopolis lü ace vorite, kekrelamori I tüsü tüce sülü bata keto lü bate.

¹³ Zenas thezho kekhio, mu Apollos ni neko revü cholüzüpü vori keto rekra menu süte, mu unipo mhapü sheri tsakhu ta kemo kesü süte.

¹⁴ Mu ha thümako pori mhakhimo kesuko khipü ukesüyi keto mhakeve kethilü ukopo usezhü kemopü thita mo ketola.

¹⁵ Azü kebako metü neko kelü süzüho; kemelülü keta hako kekhrü miko kelü süte, ngokemezhe kekhrüpo neko metü züba keyi thite, Amen.