TIMOTHY KÜRAO 6 - KETHOLESI KESAO N.T. (BSI)

¹ Mi pon u Kümünupüh za mu pu kümütha dzüko thaküta kümüprüla mice tathide mi voce püta kütako ponutho u nyepomi rho kütsükütsoyi küzü lüyite.

² Sülizo Khristami miceta thi kütami pori u nyepomi yi züde sazüdzüratazo, side uko rhomoküta thita hide uko yitho la küpra kümüve ngoküyilüde mu pu kümülümi kütala puno pu khriethomi tazo küti lüde punüde pü chovi thiyite.

Küthokümo kümütha mu kütho cene

³ Dzü hiko popüh müka mu mi tahitarho bazoyite. Thüma kühopüri kütho dzüpüh mi mütha kukri de Jisu Khrista dzüko yi mu kümülü dzürünyi mu talize puno küthüva mu mhapüri sebamote, süla puno mhapuriseyilho.

⁴ Thüma süko mhapüri semo zori ko müthu tayo side künyomi bide kütsozü kümoko ri kütso mu mizü kümülitayo. Mha süko lano mingo uroküti, panyoparo, küzhe kümüli, küthaküti, huhu lü müsu kütiko muküthoo thüratayo.

⁵ Sizomoli ukülü kükreta de huhu lü müsu küta, küthoo seyi mota de süceraka kümüho side mizü kümürhata tayo.

⁶ Siri thüma ulülü unüsayi de kütholüyo küzhomi u kümüve ba zo.

⁷ Kükrelamoli u mhapüri süde cejü lü vomo mu u mhapüri süde talayi lhozo kütila.

⁸ Siri u kütico mu u khwüne süküyi ba kütasa umhapüri künyo mori ve.

⁹ Siri mhaküne lüyo küzhomi tü dophi mu miratholü, kümüthu kümüri: uthi müsuyo kütilü lütayo: mha süko pon mizupüh de kükalü mu kümüsü lü tayo.

¹⁰ Sücerüka kümüho no mhaküsu mütü bodüo zo, humi süsü phu tade ukümülü vajopüh tate, mu ulü supüh mhapuh thide kümüzhe phitate.

Tarhoküsü

¹¹ Siri u Kümünupüh thümao non mha hiko thürayi de kümatho, küthokülü, kümülü, kükhrü ulü sügüsühie küti mu thülü kümünü phu yoyite.

¹² Thüma kümürhayo küzho bide kümülü dzü co n rhathi zoyite, side küchothe kürhü yisü nzüthi zoyite, thazüri süsü la n ciyi mu thümakükro mhuzülü dzü küve süsü po vota zo,

¹³ Mhamütüko mülhüküsü boo u Kümünupüh mu Pontius Pilate mhuzülüdzü küve popüh kütho zhopo thi küsüo Khrista Jisu mhungolüno;

¹⁴ In npo u Nyepo Jisu Khrista la prüta kümotha ncepo küsü dzüko thi muzü zode mipon dzü süko thata mode süko thiba zoyi no küti a dzü khasüho.

¹⁵ Pu küvo sü putho utütü ceno mipon ngoyito; püsü küdeko mhu Küdeozo, nyepoko mhu Nyepoo, küdeko mhu Küdeo sü pulibizo.

¹⁶ Satayi külhoo sü Pu lübi zo; Puno ungo votso külho küvelü bayo, thümapuri Pun gomo mu ngoriyi lhote, Pu pon thürho pükeyiyo mu küchothe kükuo thite.

¹⁷ Künemiko cedzü hihi posüte; uko pon ncene phude kümoko hi mori ukümüri mütüpüh u cenelü sü hite, kükrelamoh süsü küchothe ba küto cene moeli uko pon ukümüri püh Kümünupüh yolü süyite. Kükrelamoli putho cene sü molize kesu mütü püh u kütsüla.

¹⁸ Künemiko pon ucene süde mhaküve küthilü mhane sayi node posüte, side u ceneko süde miprümiza de thüma pon unüyite.

¹⁹ Uko mhatho hikohi thiyilize uko no küchothe cene künguküba zo side cene bo küveo swüdüyite.

²⁰ Timothy, non mha kam kha n mülü küvayo sü münude sü zoyite, side mithon dzüthuko, mori kücejü dzüko yisü mha küse dzü liyo küzhoko mu küngokümu, müsakümo dzüko thüra zoyite, thüma humi süko zü vo ukümülü khave.

²¹ Ngokümüzhe pon nzü ba küyiyo thiyite.