TIMOTHY KÜRAO 5 - KETHOLESI KESAO N.T. (BSI)

Kümülümi yolü thiyi molize küsuko

¹ Kütsami yolü dzü kürü pohite; sikutimoli süko yisü n pone bide uko hüzoyite, khresamiri yisü n sazümi bizoyite.

² Kütsapümi yisü nzune bizoyi, side ulü müsamüzi zode rülikori yisü nlipüne bizode süko ri lüzoyite.

³ Same hori same küthopühko khrüzoyite.

⁴ Thüno same horei unune mori u nune nuyie künemiko süko pon uthoucelümi cekro kütho tülü utho ukrüne vaphilaküyi do seyite,

⁵ siri thüno same pulubi zo küta küthomi u Kümünupüh kümülü lü mütütatayo. Süla puno thüva ri külheri cho mu u müzhiemülo tatayo.

⁶ Süri thüno same rügürüzü pünü pu müdo thi kütami kono rhükübalü satatazo.

⁷ Mipo süko thata mo kütola non kühuce dzü hiko posüte.

⁸ Thüma kühopuri putho pu cekro mühoyi külhomi bahori ukümünothoko puno pu kumülü thasü mote, süzi kütami mülükümokomi ceri sükuote.

⁹ Thüpu pü ce libi neta de same thi kütapüh külhüzho tütse hieswürü mhu tazo kümosa süko vaphi kütola uza thohite.

¹⁰ Puno mi mhuzülü ri mhatho küvela thütsüh küpümi molize su; puno natsimi thükü sü, rüso kümüso, kümüsami phe khrü, puno kümüzheküyimi vaphi side mhaküve küthoko sadzi thi küvomi molize su.

¹¹ Siri thünopü same tse hieswürü khroko vaphihite; süko Khrista müdozü mode kürüzülü lüta lizo uko no nyhitato,

¹² Side uko dzü kürao va küvala jo tato.

¹³ Side uko mhathi kümütsü dori sede celi kolü mürü tato, side uko mhathimütsüküta zo moli dzüh pozükümokori pode Salithi mu mitha mu pozükümoko pota tato.

¹⁴ Süla thüno pethita kümoko pon u ngomumi tha püh tamo kütola mhitade unu münu de ucelümi thüküti a müdo.

¹⁵ Kükrelamoli humino tsüri cho vajopüde Satan samüdzi küta ba kütala.

¹⁶ Kümülüpuh kühopüri thüno same si küti balize pu kühu va münyi mode putho süko vaphiyite, side kühu pon thüno same küthoko vaphiyite.

¹⁷ Kühupon pethiko mu kühou küsü munuyo küzhoko bahori dzüyiküvepo mika mi mütha kütilü urhathiyo kütiko rho muku zoyite.

¹⁸ Kütholüsi lüno hihi bide po. “Non metho züde tülhanyi kübace mhapüh puta küra hite” mu “mhathomi puzho ngotiyi zü” siba.

¹⁹ Kühu pethio yolü mhapuh pata zori mi küna küsü se mu ngotüzomo lize rünyi hite.

²⁰ Küsuthi kütami küjo popüh pu mükate, mu kükremi pori müprüyi kütola kühu müthi dolüno thite.

²¹ I nce polaküti Jihova mhuzülü mu Jisu Khrista mhuzülü mu tüyochoyimi küdaküyiko mhuzülüri kümüzi püh posü noyo, mha kühopüh thizori thüma hu khrü mükre mori külalhe de mhapüri thi hite.

²² Mhalü mode pümozode n be chopüh mipüh yolüri sühite mu mi kükremi küphoma züde kürhühi, eli ntho nkhi kümüsayite.

²³ Hisa non dzü libi krazo mode khubuzü küdopüh püh sade krayite kükrelamoli non tsükünu nva thitayo kütila.

²⁴ Humi küsuküthi no mülemulu tayo, side sazho ngoyitayo, siri küjokümo küthi kropüh no kümüjo rüle de pusahu votayo.

²⁵ Sükümhade thüma mhaküve küthi ri humi mhatho se mhayi tayo, sübide thi kümokori seyi tato.