TIMOTHY KÜRAO 4 - KETHOLESI KESAO N.T. (BSI)

Kümütha kücejü voküto

¹ Siri Rüpüno potü küsü vo künukünuco thüma humi u kümülü khavade uswükütse küti hupühko müdzi tato.

² Mu thürü kürüzüko sümi müthaküti dzüko rünyi tato. Therü küsu thümaküve muveva küzhoko. Cejüyo küzhoko mu uko külü ri thügithe müthipuzasi vü küvako bide süko zü mhathi tato.

³ Thüma süko mipon küsuküri hino mu u Kümünupüh pu kümülüko mu küthoo sekütako pon sükopü putsüde süde ucho thino de thi küsüko tihino tato.

⁴ Siri u Kümünupüh mhathiküsü khüko vetsüzo mu mhakühopüri u süde puza tsüde yiyi kütasa theta morive.

⁵ Kükrelamoli u Kümünupüh dzüo la mu u küchola süko thi kümüsayikütala.

Jisu Khrista yitho küvemi

⁶ No dzü hiko pü nzüko lü mu kütüsü lizo no ntho zori züta küta kümülü dzü mu kümütha dzü küveko thon n thüküpüh n pon Khrista Jisu yitho küvemipü thiyito.

⁷ Siri dzü küthüvako mu kütsapüko kühanya küti dzü küpoko rünyi hide küthokülü cho ntho n küphra sü tayite.

⁸ Thüma umo küzhophra küti zono küdopü kümüve zo, siri küthokülüno puküpra kükroba mu tsüdori mu thasa cori kürhü ngoyi küto dzü sülü ba.

⁹ Dzü hikohi küthotüzo mu zü kütsükütsoyi ri züzo.

¹⁰ Süsüla u rhütayoküzho u Kümünupüh yolü u sadzü bataküti la sürhü mu utütso thitayo zo. U Kümünupüh sü thüma mütüko külaküyiyo zo, süyi kümülümi la muku.

¹¹ Dzü hikohipü mipon züyi node posü mu süko pu uko müthayite.

¹² Non khriesa bazolu lino mipüri pon ntha nmülüküta thita hite, sikütamoli kümülümi mhuzülü non n dzü lüri mu n zhorüle lüri. Sülize kükhrü, kümülü mu müsade lhü kütilü ri thaka pü thipüh uko müka zoyite.

¹³ In vo kümothe non kütholüsi phripüh mikaküti mu mitahitarho küti mu mi mütha kütiko lü n yhe thi bazoyite.

¹⁴ Non kütsako ubekha n yolü küsüce sadzüküse dzüla Rüpü mhaphrü kha n phrüküvayo sün mhathi mo ba tahite.

¹⁵ Non mhakühopulüri vekühieyi ba küta thüma kühopü pori seyi kütola non dzü hiko lü terü zode süko thi mu zü bazoyite.

¹⁶ N zho n rülelü zori mu non mi kümütha lüzori münuyite. Non dzü hiko zü bazoyi, kükrelamoli non süzi ba zoyi lize ntho ri mu n dzü kürünyiko ri külayi to kütila.