TIMOTHY KÜRAO 3 - KETHOLESI KESAO N.T. (BSI)

Kühu Kukhwümi zho dzü

¹ Thüma kühopüri kühu kukhwümi yitho thinyiyo küzhomi mha kam küzho phuyo.

² Süla kühu kukhwümi pon mipon puthayi külhomi, pu cemi pülübikünemi mhakuhopü lüri uküthükürü küyimi puzho küvemi mu thümakümünumi, mi müsonyiyo küzhomi mu mi müthayi küsümi molizosu.

³ Pu kümüzümi mori mi vünyi sayo küzhomi mode thüma kümüzimi molizo su: Pu mizü künyonyi sayo küzhomi mu süceraka mühoyokümomi molizo su.

⁴ Puno putho pu celümi ri kükha münu zütayo küzhomi, puneko pori pükhri müprü de puzü züyo küzhomi molize

⁵ Simode thüma kühopuri puthon pu celümi kükhayi semolize puno dipübide u Kümünupüh kühu küsü münuyi veta?

⁶ Puno ko müthu tade Satan bi u Kümünupüh pon pu müzhoküva kümüprü la masami zohite.

⁷ Sizomoli pun mithapüta mu Satan ratho lüno pumapü küta kümüprüla chozoumi mhuzülü ri thürho püyiyo küzhomi molizo su.

Dikonmi Zho Dzü

⁸ Süsü bi Dikon shie thüma kümüzimi udzü müdayo kümomi, hezokranyi yo kümomi, kümüthu lüno mizü yinyio kümomi molizosu.

⁹ Süko ulümüzi de kümülü dzü kümüsü sü poyo küzhomi molizo su.

¹⁰ Sülizo thüma süko rüle küveküsu se mürayi de uko küzho di lize uko pon Dikon kam thiyite.

¹¹ Dikonpüko ri sübide uzhomüzi mu mitha mi mülüyo küzhomi moli mha kuhopülüri u küthükürüyo küzhomi mu küzüthomi molizo su.

¹² Dikonmi ri u nopüne pülübi küti mi, unune mu u celümiko kükhamünu sütayo küzhomi molizo su.

¹³ Süsari Dikon thi münu küzhomi u kümülü ri neyi de Jisu Khrista cecho nkümülü thüpu küthi mamayi yo.

Dzü kümüsü küzhotho-o

¹⁴ Eno nce voze küti lüde dzü hiko thopü nce sü züho.

¹⁵ Eno bachota zori u Kümünupüh celü kübami uzho küdipü biyi molizosushi npon seba nyi. Ce süsü rhütayo küzho u Kümünupüh kuhu, küthoo kütüco mu punophuyo zo.

¹⁶ Sülize mipu pori unanyilü dzü kümüsü mhase küzhotho sü yisü molikündizo. “Süsü thüma müvee no mi mhingo thivo, pu rüpü yolün puyisü matho zole küti seyi tüyo choyimi pungo, thüma lünyiko dolü no pu dzü popü mi müka: cejü hiyolü külhümi pu mülü, puzüde müso kevetho yolükhote”