TIMOTHY KÜRAO 2 - KETHOLESI KESAO N.T. (BSI)

Kürüsu kühu la kutarhoküsü

¹ I nce porasü nyi kübao kütasa kühupon thüma kühopülari cho mu n müzhiemülo mu mi zhopo ri thi mu u Kümünupüh tsü ba zoyite.

² Side cho kütice Küdekola mu mi mho küzho khüko la ri sade chobazoyite: silize min uküyhu küzhie mo mu upon mizü küzüve mu Ihü de kütholü münu de tayi kütola.

³ U külaküyi u Kümünupüh mhüzü ce no siküti pu nüzo kütila.

⁴ Puno thüma mütüko pon külaküyi ngoi küti mu kütho mhaseo vo küti punüzo.

⁵ Süsari u Kümünupüh yozo, sülize u Kümünupüh mu thüma dolü kütha ripuzo puno thüma thiküta Khrista zo.

⁶ Puno pupho khapü thüma mütüko rhapü müzüte, süla pütütüce süsüzhopo thisü molizo süte.

⁷ Süsü la kümülü mu kütho lüno apon Judakümoko kümütha süsü dzüyiküve pü mi mütha mu pü apostle püthi kütola a küdayite mu süsüküthotüzo, cezü mozo.

⁸ Sülano I thüpumi pon kühorapüh kücho thizori ulürüda mori mizü kümülita mode ubenyi pon müsade ube yhopü küchoküthi a müdo.

⁹ Süsü bide thünomi pori unga ne mu ulümüsa müzide ukhwüne uzhotüko ukütsopüta küti a müdo; süsari upitha che dolinyi thipüh mori suna mori mhama kürü khwümeko süta moli,

¹⁰ Thünomi kütholüyo kütiko uvaküzüve kütiko süde mhathoküve linyiko thipüh ukütsoyi no süzo.

¹¹ Thünomi pon mhakühopülüri mikhrikhro bade münude mi ukümüthazüko seyite.

¹² Süzomoli thünomipon sü mi mütha mori thüpumi mhuküzho thi kütamoli münu bade mikhwü rünyiküyi thinyi.

¹³ Kükrelamoli Adam no Eve mhüjü thi müra.

¹⁴ Mu Adam no küdo ketsü lü tamo; veli thünopü no kedoketsülü lüta no phoma ta.

¹⁵ Vele thünopüri nu kümünu lüno pü külayito pü kümülü, kükhrü mu kümüsa lü pükhi kürünu püba tsüsa.