TIMOTHY KÜNAO 4 - KETHOLESI KESAO N.T. (BSI)

¹ I-e Jihova mu kürhüko mu küsako kütso küto Khrista Jisu mhüjülü, mu Pü vo küto mu P küdethi küto ri n ce a dzü khasü züho.

² Kütho dzüo po mi mütha ba zoyi, putütüce ri putütükümo ceri n tütso thi ba zoyi; sügüsühe mumi mütha mi küjo po mi müka ba zoyi,

³ Kükrelamori mi dopüh kümütha dzü u sühkürhü thizo küzü kori rüni muta küto tüpüh vo zoto küzüla, süce sümi unyi müso no kümütha dzü unü unyüko phu küngu phiyito.

⁴ Sio unyi sü kürüpüh küthoo thüra sü küthokümo dzü ceco va tato.

⁵ Vee noe mha kühopüh lü zori n mülü müce bazoyi, kümüzheyi, dzüyi küve popüh mi kümütha kam thi ba zoyi, no yitho thito-o kübao thi tsü zoyi.

⁶ Sio a zari küngüsü to-ü bate, tsüo I tata küto türi tso bate.

⁷ Kümürhayo küzhoko dolü küvethoo lü I mizüh kümürha vo tsova, I mi züta küra ka küzülü I ta votsoyite, I a kümülü süh zoba tsoyite.

⁸ Thayowi lü mhatho ba küyi püo khapüh a cü püh müzüte, Nepoo dzütho tü no mi kütso kütoo Pü tho tüsozho küzho nha vo küto u nüyo küzho khüko ri cü phrüto.

Paul pütho pula küpo dzüko

⁹ No müzhe ace votato-o kezü lü n he thi bazote.

¹⁰ Dema cejü hio lü zhüko vakhrü küzüla a khava no Thessolonia lü vote, Kresken Galatia lü mu Titus ri Damatia lüvo te. Luke lübi azü küba zote.

¹¹ No Mark rizü voyite; choyi küthi ceco I pula kümüve ngoyi zoto küzüla.

¹² Tsüo I Tukika kütsüpü Ephesus lü süve.

¹³ No vo küto ce I thadzü akhü pü Troa lü Karpo belü sü küvao mu lüsidako bahuzori lüsi chüko müku no pü vote.

¹⁴ Müsü rükriyo küzhoo Alekander a küdo swüü Nepo tho pu yi cüla süto.

¹⁵ Nori pü yolü n ceriyite; kükrelamori pü adoko ngomu phi kütala.

¹⁶ I a tho a rüle po kürao va mipüh ri ayo püh kütsüo mori a khava no tatsote. Nepoo po uko yolü süola mhapühri thihi.

¹⁷ Vee sücesü Nepoo a tsüce ba athi muku süzo. Süosü kükrelamori apo Pü dzüo po tsüsü küto mu Judakümoko mütü pori süo sheyi küto lazo. Sino Pü losha ta lüri a süh külayi.

¹⁸ Nepoo Pütho mha küshü kühopü lüri a külayi zoto. Sino a külazüh vo tüo küde lü süyi zoto. Pü po küchothe zapozale küthi-o thiyite. Amen.

Külüküsü

¹⁹ Puskila mu Akila uni mu Onesifera celümi ri külusüte.

²⁰ Evasta-e Kornif lü bate; vee Trofima-e mhathi kütala apo pü khapüh Mileto lü süve.

²¹ No tüsüh mhüdzü ace vo küto ri bazote. Eobolori Poden mu Lino anu Klaudia mu u züko mütüko risa külusüho.

²² Nepoo pono n ropü zühba küyio thiyite. Ngokümüzheo porti n züh ba küyio thiyite.