TIMOTHY KÜNAO 2 - KETHOLESI KESAO N.T. (BSI)

Jisu Khrista thipahi küvemi

¹ Süla anu no Khrista celü küpa ngo kümüzhe-o lü mütü mama zo yite.

² Sio no thüma kükro küshe küngo lü a celü dzü rünyi küyiko, no süko khapü mi kükremi ri müthayi küvemi mipo ri u mülüyi küvemi belü süsüte.

³ Nori Khrista Jisu thipahi küvemi kümha no azü kümüzhe yite.

⁴ Thüma kühopühri thüpahi kam thiküto ce mha kükre thi u küre yomo; süosü kükrelamori püpo thüpahi thito-ü püza tho küyio nü thiyi kütola.

⁵ Sizomori thüma kühopühri mi zü rüshü küve küka thi kütomi thüzho tüce thi rüshü moo kuküyi pirüh püh pü cü yomü.

⁶ Utho thathizo no yi teyi küzhomi, mi kükremi mhüdzü umhatho she ngo rato.

⁷ A kupoko lüsüte, Nepoo pütho mha kühopüh lüri mha küshe külü kha n cü süto.

⁸ Khrista Jisu, rükra ba zo yi; I dzüyi küveo lü popüh mi müka küta kümha Pü küsako dolü rhüla süte, mu Pü David ye-o zo;

⁹ Dzüyiküve süo la küjo küthimi kümha mipo a khüpüh kümüzhe hite küzüzo; siri ukümünupü dzü phakha va zümozo.

¹⁰ Süla küdaküyiko po Khrista Jisu yolü küpa kulaküyi püh küchothe zale küthi sa ngoi küto la I mha mütüko lü sügüsühe tayo.

¹¹ U Pü züh sa loo Pü züh rhü yito:

¹² U sügüsüheyi loo u Pü züh küde thito; u Pü za pomu loo Puri uza pomu tato.

¹³ U dzütho mo zori Püe dzütho süh bazo, kükrelamori Püe Pütho Pdzü molen potyi hozo küzüla; dzü hiko küthozo.

Mhathiyi küshümi thiyi küto

¹⁴ No uko Po dzü hiko rükrayi no süte. Mu Nepoo küngo ce uko po dzü kümüli hi no süte küpali küzü-e nve küyio mori kürünyimi thi müshü vayo küzüla.

¹⁵ Ukümünupü po no ve len po kütola nhe thizo yite, mhatho küve thiyi, sio no münga taho; kütho dzüo küza tü-ü no süzoyi.

¹⁶ Sio dzüchü dzürü müsakümo mütsüzoyi; kükrelamori süko poyo küzhoko kütho lümo mamatato küzüla.

¹⁷ Mu udzüko küthiküshü kümha müma tato; süko dolü Huminia mu Filetari sate.

¹⁸ Uni küthoo vajo yite sizing rhüla süküto sütsüvate, sino humi kümülü thorhü va to-üzü.

¹⁹ Sizori Ukümünupü pü bo dü küsüo mütü bazo, mu süoyo Nepoo Pütho P zhüko sheba zo mu thüma kühopü ri Nepoo za sühyo küzhoko kütho kümoo thürü ta yite, si küzü mohor vüpüh bazo.

²⁰ Sio ce küve küzho lüzori mhabü püh Suna mu rükathi pü küthi lübi mori süh mu rünyo ri püh küthi bayo; sio hu thürho püto mu hu thürho pü yiho.

²¹ Süla thüma kühopühri utho u mükhre kümüsa püh thürho pü kümoko thürüyi loo pü thipüh thürho küpü müsa küta Nepoo po süh mhathiyi küshü mhatho küve mütüko la küla kreküyi mhabü püh thiyi to.

²² Tsüo nota khesa rüli münyüko thürayite süzin ulü müzi no u Nepoo za lü cho mülo küzüko züh kümatho. Kümülü, kükhrü u ulü kümünü, hiko sadzi thizo yite.

²³ Vee mhalü kümo mu mha kütso zü kümo kütso küzü dzüko rünyi mo zo yite; süko la mi po kümüli tayo kütsü nori sheba toho.

²⁴ Sio Nepoo yithomi küpali shü; si küzüo mori kühoph yolü ri uzho veyi moo shü. Mu ulü kükhrü sügü sühe mu mi mütha she moo shü.

²⁵ Ukümünupü tho süko lü thi küdepüh kütho mhashe ceco süyito tho si küzü lüno pu lü münü no kütho ngo kümuko küjo popüh müka no müthayite.

²⁶ Süzi loo Satan sümhüdzü uko tüpüh pü müdo lü süyi ta zori uko pu ratho thüra payi tato.