TIMOTHY KÜNAO 1 - KETHOLESI KESAO N.T. (BSI)

¹ Khrista Jisu lü küpa kürhü ngoyi küto dzüo la ukümünupü müdo lü Khrista Jisu ceco apostle thi küyio Paul celü kha,

² Anu akhrüo Timothy ce küsü; U Jihova upo0o mu u Nepo Khrista Jisu celü küpo ngo kümüzhie, kükhrü mu ulü kümünü po n yo ba küyio thiyi te.

Kümüza kha küsü mu thi küthüpu küsü

³ I a mhalü müsa müzi no a puotsa neko ri rüshü küvo Ukümünupü rüshü no pü chü bayo. Sino thüva ri kühe-o ri kücho mütü kolü I n rüle rükra süh bayozo.

⁴ Sio I n mhüdzü kri küsüko rükra vo küyi ce apo ri anuyi kütola n ngo nyüsai baba yo.

⁵ Kükrelamori n kümülü kütho tüzo kütsü rükra küyila, kümülü süo sü thadzü n zutsa Lowi mu nzu Ewoniki uni lüta, mu süo nlü ri ta küzü I she tübazo.

⁶ Hiohila I npo thadzü a beni pü nyo küsü ce no Ukümünupü celü mhaphrü ngo küyio mu mhü mütoyi yo küzho kümha süo mhümüto sasü non n belü khasüzü-e

⁷ Kükrelamori Ukümünupü upo müprüh ta no kütsü ropü mori kuku mu kükhrü mu ulü kümüzi ropü-o kha cüva kütala.

⁸ Süla no u nepo zhopüo küthi ceco ri mu pu jü thiküto püh dzüyi küve la kümüzhe zoyi.

⁹ Ukümünupü u mhathoko la mori pütho rhüpü küta küratholü Khrista Jisu la ngo kümüzhe pü u kücüla u külayi mu cüküyi kümüsa Poo u cüyi kütazo.

¹⁰ Sio tsüno u kulaküyio Khrista Jisu vo mi mhüngo thive; Püe küsa ri thipüh kümüchü püh kümha ve sino dzüyi küve lano rhüyi küto mu ceretayi küho dzu püh mi dzü va n ve yite.

¹¹ A pod züyi küve süo popüh mi müka kütsü mu apostle mu kümütha thi non a küdayite.

¹² Sü-osüla I kümüzhe kütsü hiko ri ngo küyi zo; sizori I münga ta yiho; sizo mori I Pu mülü ta kütao I süosheta yozo, mu I mha pü pu mülü ta küvao Pu süo rükhü rügu sü vo tüsozho küzho nha tso yiri kütsü I shetü batazo.

¹³ No a celü she küyi u sühva mürhü kütsü jüko püh Khrista Jisu celü ngo küyi kümülü mu kürhü lü n mhüdzü thaka püh thipüh tazo yite.

¹⁴ Mhaküve khapüh nbelü süva kütao non lüta küta kümüsaropü po n khrühi no rükhü rügu süh tazo yite.

¹⁵ Asia lü küba mütükoa ceco thamo ta kütsü nori sheba tho. Süko dolü Fusilo mu Humogini uni risa.

¹⁶ Nepo po Onesifera celümi ngokümüzheo thiyite; kükrelamori pü tsü künu vo alü tho mülu sü mu thügiro pü a khüpü küta la ri münga ta mozo kütsüla.

¹⁷ Si kütsüo mori pü Rom lü küba ce a phu urha thizo vo angoi zo.

¹⁸ Pupo tüsozho küzho nha Nepoo khrü püyi kütola Nepoo po süo thipüh püyo süküyi-o thiyite, pü Ephesus lüzori mha küve ditsu di thüdü thisü sühküzü nori sheswü bato.