ROMEMIKO 8 - KETHOLESI KESAO N.T. (BSI)

Rüpüyo kerhü keba

¹ Süla tsüo kemejo dide Jisu Khrista yo ba ketako, somi uthi upho menyülü tamo ta de Rüpü chothalü tata sheri.

² Kekrelamori Jisu Khrista yono Rüpü kehü thezho kephoma m kesalü asüphra pari te.

³ Kekrelamori uthi umo kethathila thezholü thiyi ho tate, Jihova pünu thüma kephoma hübide uthi umoyo kephoma mejo ve.

⁴ Sizide kemezi zho uyo thitsüyi ketola, uthi upho menyülü mode Rüpülü hü tato.

⁵ Kekrelamori uthi upho menyülü kehüko uthi upho medo züyo, vele Rüpülü kehüko Rüpü medoko lü m züyo.

⁶ Upho medoko kesazo, vele Rüpü medo kelüsü kerhü m thelükemenü.

⁷ Kekrelamori upho lüdosü Jihova medo metsuyo, süo Jihova zho khro ta kemola; mori tari yihozo.

⁸ Süla upho medolü ketako Jihova nü thiyi hozo tila.

⁹ Vele neko upho medolü tamote, vele Rüpü medolü tate; mhace Rüpü nemelülü hüta süze. Tsü mhace thüma kehopüri Khrista Rüpü uyo kedimi sümi püzhü mote.

¹⁰ M Khrista neyo ta süze, upho umoco no kesamite kephomala; vele kemezila Rüpülü rhü yito.

¹¹ Vele mhace Rüpü Jisu thi merhü kesüo n yo hüta süze, Khrista phu merhü keyio nemori phü merhü süto Rüpü neyo hü ketao no.

¹² Süla akhreko, uko uthi upho nüthiketola umo kenü popü tamo.

¹³ Mhace uthi menyülü hüyo süze neko sa zoto, vele Rüpülü kehüla uthi menyüko khava süze neko rhüyito.

¹⁴ Kekrelamori Jihova Rüpü chotha zü keyiko metü Jihova nune thizo ketola.

¹⁵ Kekrelamori neko tüpü thejü kethi mha mpe ti rüpü ngoyimo, vele neko züpü nuthonu kethi Rüpü ngoyi de süla u krati, Abba, Apo siyo.

¹⁶ Jihova Rüpü urüpü zü kese yo (zhopo) uko Jihova nune thi keta.

¹⁷ Uko pü nune ta lize uko pü kalümi ri tazo, Jihova kalü, Khrista zü kesade; mhace u püzü kemezhe yo lize, upüzüde zapozaleri thi kesazo ketola.

Hisa zapozale thiketo

¹⁸ Kekrelamori I lüti tsükehülü kemezhe ketiko pü hisa zapozale uyo mengosü ketoko zü kemede shü mozo.

¹⁹ Thi m rhe kesümetü Jihova nuneko pü mengosü keto menyüde fü bazo.

²⁰ Mehükesüko kemethu püzo, utho umedolü mo, vele mipü mha mehü kesüo kemeripü thisü.

²¹ Kekrelamori mehü kesüko metü kecekere thimolü uko kelapü zapozale Jihova nune thi ketola.

²² Kekrelamori methümehü kesüko metü panyo m kemenu mezhe melo bayo tha ketso.

²³ Süko lebimo, vele uko Rüpü se kerako sheri uko melülü panyo m melo tazo; ukopü nuthonu kethi m uko pho rha keyi fü tazo.

²⁴ Kemeriyo uko kelayi ketala, kengolü kemerisü kemeri mo; thümapü mhango baketasa kedipü merisaba?

²⁵ Vele mhace u ngokemo meri ba süze süsa u sügüsühe de süo fübatayo.

²⁶ Sübide Rüpü ri ukethathikolü ukhrühi bayo, kekrelamori u chokezüko ri seyomo; vele Rüpü no usülü mehimelo de upoyi kehoko ri cho bayo.

²⁷ Rüpü umelülü ukelü kedipü bashi keti phuvo seyi yo, kekrelamori pü kemelümiko la Jihova kelülü mehimelo bayo.

²⁸ Usekeba Jihova kekhrümiko mhakehopü thizori mhakevela thiyo, pümedo thi ketola cükeyiko.

²⁹ Kekrelamori pü mejü sekeba bide uko khi pülünu thisü Nuo hü bide, püpo sazüjürako dolü nurao thi.

³⁰ Süpiri pülünu thi kesüko süko cüriyi, cükeyiko süko thi kemeziriyi, m thikemezi keyiko thipü zapozale ri thisü.

Jisu Khristayo Jihova kekhrü thaka kesü

³¹ Süsa uko kedipü hikola pota? Mhace Jihova ukola tisa, sopüno uko (ngomu) metsuyi veta?

³² Pünu zori kela vamozode uko metüla pü püprasü, pü mhakekre kehopü ri kha utsü sü motome?

³³ Sopüno Jihova kedaketako mejo ketoba? Jihova tho thi kematho süte.

³⁴ Sopü mi mejo ta? Khrista süla satade rhüla süte, Püvo Jihova zaco bate; ukola pü mezhemelo sü bayo.

³⁵ Sopü uthikhoyi veta Khrista kekhrülü? Kemezhe ketilü, lüzhelü, methimeni tilü mori kemekrelü, füne kedilü (mechü), kempelü, zecholü hibitilü ta tome?

³⁶ Hizi thometa, nlano tüsonha ha dokhri sütayo, uko khi tenyü tekopübi kedokhrilü.

³⁷ Simo, hiko metülü pü kekhrüla ukukeyisari kulayi yo.

³⁸ Kekrelamori I lükeyi kesasheri, mori kerhü sheri, tüyo choyimi sheri, mori thezhoko sheri, mori kekuko sheri, mori tsükehü mori hisa vori ketoko sheri.

³⁹ Mori kerekrü sheri, mori kerelü sheri, mori khonu kehopü sheri, Jihova kekhrülü uthikho vaho, Jisu Khrista uko Niepoo lano.