ROMEMIKO 4 - KETHOLESI KESAO N.T. (BSI)

Abraham pü thaka thi kesü

¹ Uko süsa kedipü pota, uthi uphoco Abraham ukrü utsüpu-ola kedipü meve ba?

² Kekrelamori mhace Abraham mhathola püthi kemezi yi ta lize süla kemeko mori zapozale thita lize, Jihova mhüjülü mozo.

³ Kethojülü kedipü poba? Abraham no Jihova melü, süla pükhi kemathomi le side poyo

⁴ Tsühi mipü mhathola püzhokhro khapütsü süze süsü ngokemezhe lamo, thepo therü lamo vele pü ngoti mesü.

⁵ Vele mipü mhatho thimo zori pü kemelüla mezikemokolü püthi kemeziyi ta lize, kemelüla kemezimi thite.

⁶ David ri thejo kepü thümao jupo, mhatho thimo zori Jihova püpü mezile zita.

⁷ Somi kejo kemuko vava, somi kephomako whuva sheri suko mthejo kepütho.

⁸ Thüma somi Niepoo püyo kephoma mi zimo ta sheri sümi thejo kepütho.

⁹ Thejo kepütho hihi popü yikerümi lebi yo süyome? Me popü yirükemomi yori süya? Upoti, Abraham kemelüla kemathomi le phriyite.

¹⁰ Kedipü bide püsa phri yita? Püyi kerüce me? Püyi rükemolü ta? Püyi kerülü mo vele yirükemolü.

¹¹ Pü zasi ngokeyi yikerüpü kemelü kematho mohor vü pütsü, süce pü yirükemomi zolu püpo kemelümi po thi ketola; süko yirükemomi zo sheri: kematho süpü ukoyo sü ketola.

¹² Yikerüko po vele yikerüko lebimo, vele somi uko po Abraham kemelü cholü tayo sheri, sütüce pü yirü mozolu.

Jihova reshu kemelülü ngo keyi

¹³ Kekrelamori reshujü kha püketsü, püpo cejü kalü-o thitole zi, süsü khapü Abraham, mori püshuye ketsü thezho-ola mo; vele kemelü yo matho keyi lazo.

¹⁴ Kekrelamori mhace thezhola kalü thite zize, kemelü khipü kemechü thive; reshujü ri pü kemechü thisa vazo.

¹⁵ Kekrelamori thezhola lekhuri vori, süla thezho kedira vajo keta bamo.

¹⁶ Süla kemelüla ngokemezhe ngoyive, thelalü reshujü süpo pütsa metükoyo vo ketola; thezho keneko lebi yo zomo, vele Abraham kemelü kene metükoyo: püpo uko metü po thi ketola.

Thopü kemeta hibi, I thipü shuye kekro po thito

¹⁷ Jihova mhüjülü u melü keta, pü kesami thi merhü süyo; mhapüri kedilü tsü kebakohi thisü.

¹⁸ Melü rüshu zo sheri melü keyi kemeri, püpo shuye kekro po kethisü; pokesübi nshuye po süthito.

¹⁹ Kemelü thathi tamozo, püthipüphola zono tsühi kesami bita sheri, pü tütse krapüta mori Sara nobu sheri saketabi mechü keta lüsü.

²⁰ Jihova reshujü lüpü püvedi (tsüle) melükemo thi tamo, vele kemelü kushü bazo: zapozale pü Jihova tsü bazo.

²¹ Reshujü melütüde meji zovotso, Jihova pokesüo thiyi vezo sita.

²² Sizi keyila püpü kemathomile zita.

²³ Jüko tsühi tho kesü pülebila zomo,

²⁴ Vele uko metüla, uko Niepo Jisu kesalü phumerhü kesü melü keyiko metü yo sizito.

²⁵ Uko kekri ketakola pü khasü, m uko pokemesa yiketola püphü merhülayi.