ROMEMIKO 15 - KETHOLESI KESAO N.T. (BSI)

Minü kethi, utho unü thikemo

¹ Ukekumiko kethathiko khrühi timesü, utho unü umedo thita mode.

² Thüma kehopüri usüzanumi nüthi de hunehu thi nveyi khe.

³ Kekrelamori Khrista zori pütho pünü thita mo, vele süo thopü metati, mikemeshu pü uko zhoshüthi kesüko ayo kurite.

⁴ Hijü thopü metatiko ukopo seyi ketola thopü meta, uko sügüsühe m hunehu thi kethepu de ketholesiyo ukemeri ba ketola.

⁵ Tsüo Jihova sügüsühe keti m thokemelu kha netsü kesü nekopo Khrista zhorele bide hunehu zü kelürhü bayite.

⁶ Sizi neko kelürhü füpü thide Therüopo zapozale thiyite, uko Niepoo Jisu Khrista Po.

⁷ Sizide neko hunehu züyite, Khrista ri uko züpü Jihova zapo zalelü kesübi.

Jüyikeve Judahmi lari m Judah kemomi lari kemhazo

⁸ Tsü akepo, Kekrelamori Khrista ri yikerülü thekümi thi hijü Jihova reshupü utsüpumi tsü kemetako thitsü sü ketola.

⁹ Sizi keyilü Judahmi kemokopori phikemezhe ngoyi de Therüopo zapozale thiyi ketola, hizi thopü meta, I hila nzapü Judahmi kemoko ce posüto, n zapü chele süto.

¹⁰ Posa kesü, Niepoo chuyite püthümakozüde, ne Judahmi kemoko.

¹¹ Süsari Niepoo chuyite, ne Judahmi kemoko püpo meto süte, nethüma metüko.

¹² Isaiah ri pokesü, Jesse meyo kevoripü Judah kemoko kekhato, Judahmi kemoko pümelüto.

¹³ Tsüo kemeri kha uketsü Jihova celü kemelüla kenü m kezükeve po neko lü ba thishü thi bayite, side kemeri neshu, Kemesa Rüpü kekulü.

Paul thokesü kethepu keneco

¹⁴ I nekoyo athepu bate, azüko, nekoyo keve nephi bate, ngokeyimhaseri seshu bate, hunehu tahi tarhoyi rivebate.

¹⁵ Sizizo sheri akhrüko, thepu zode neko mesela kesü copü Jihova ngokemezhe kha aketsüla.

¹⁶ Apo Judahmi kemokola Jihova choyi thi jüyikeve kepo thevomipü thide Judahmi kemoko po züyi keve, Kemesa Rüpü thi kemesa kesübi.

¹⁷ Jisu Khrista zalü, I Jihova la amhathopü kemeha zori pücoba.

¹⁸ Kekrelamori Khrista kha atsü kemoko mhapüri po keto athepu bamo, Judahmi kemokopo jüzülü bayi ketola jülü m mhatho lüri.

¹⁹ Kemesa Rüpü kekulü zasiko m ungo mhathoko thikesü, Jerusalem lüsheri, pükhüko Illyricum lüsheri, I Khrista jüyikeve poshu süte.

²⁰ I Jüyikeve po ketola ahe thi züzo, thethi dipüce Khrista zapo mesemo balusheri; Kekrelamori I tavo mikekremi shüdüyo mhathi batari sehomo.

²¹ Hibide thopümezü, Püposü kemora ukopo ngoto; seyokemora ukopo seyito.

Paul Romelü voketo kelü

²² Kekrelamori mhahizi tila apo nekoce vori mode achokha tate.

²³ Vele tsüo, hico ala mhatho baphi mote, I hijü tütse kekro menyü ketabi nekoce vori nyü bate.

²⁴ I Spainlü kevo züde nekoce vorito, arevü cholü tavoride neko zükesü keto melüba de nekopo aketsü kesüri thito; vapü neko züde pütü donepü anü keyibi.

²⁵ Vele tsüzova I ta Jerusalem lü vode kemesakoce choyi thisüto.

²⁶ Kekrelamori Macedonia m Achaia lü kebako mhahu khapü Jerusalem lü kemesako kedi vaphi sünyü de kekhrüsü ketala.

²⁷ Uko mhatho hithinyüde thisüte, süla uko popü shusü. Kekrelamori Judahmi kemoko rüpülü ceneyo zhürhü thi ketabi, themoyo mhatho sheri uko thipü süko tsüsüte.

²⁸ I mhatho hiko thitso kevasa, mhapü ketakokhi uko tsü kevasalü; I ta Spain lü kevo cholü neko züde kesüto.

²⁹ I melütü keba, nekoce kevorice Khrista Jüyikeve thejo khapü neko tsü thishuthi süto.

³⁰ Azüneko, I nekoce kecho, Niepo Jisu Khrista zalano, m Kemesa Rüpü kekhrülü, neko azüde Therüoce ala cho ba zote.

³¹ Judealü melükemoko celü akelayi ketola, m Jerusalem lü kemesako amhatho hi uko nüde khiyi ketola.

³² Sizide apo Jihova medolü anüde nekoce vori ketola, neko pori nenü salayi keto.

³³ Tsühi Jihova celü thelü kemenü po neko metü züba yite. Amen.