ROMEMIKO 14 - KETHOLESI KESAO N.T. (BSI)

Milü mejohi

¹ Somi kemelülü thathi ta sheri sümi züyite, vele ne setükemola kemeli tiko thi bahi.

² Mipüno mhametü tizori ve sibato, kekremipü ga lebi titsü zori semo.

³ Mhati kebao po tikemo-o the (retsü) tahite, ti kemoo pori ketio thita hite; kekrelamori Jihova püzüyi ketala.

⁴ No sopü lezide mithekümi mejo ba? Pü nepo-o tho thayi sheri mode tatsü ta to sheri pezoto, Uko thayi zoto ketho Kekrelamori Jihova uko thi methayi vetila.

⁵ Mipüno tüsozhopü lümekre ba yive, kekremipü tüsometü kemhakebi zori bato; Thüma kehopüpori umelülü mhalü metsüyite.

⁶ Pü tüsozho rho kebao Niepoo la rhoba, sübi tüsozho rho kemoo Niepoo la tüsozho rhomo ba. Ketio Niepoola tiba, tikemo-o Niepoo la timoba; Jihova kemeza pote.

⁷ Kekrelamori uhükeba utho ula hübamo, mipüri pütho pula sari yomo.

⁸ Uhükeba sheri Niepoo la hübayo, usata sheri Niepoo la sa tayo; süla urhüba sheri mori sata to sheri Niepoo zhüzo.

⁹ Mhaco hihila Khrista sasü m rhüla süte, sizi keyila pü kesami m kerhümi kenani la Niepo thi ketola.

¹⁰ Vele no kedipüla nsazüo mori nlipü mejoya? Ditono nsazüo mori nlipü retsüya? Kekrelamori uko metü Jihova mhüjülü uko jünyo keti phrüzo ketola.

¹¹ Thopümetati hibi, Niepoo poyo, I rhüketabi thüma metü a mhüjülü khütü phrü zoto; uko meyipü Jihova phra phrü zoto.

¹² Süla uko kehopüri Therüoce ukoju keha phrü zoto.

Miphe kemesü thi hinoti

¹³ Uko süla hunehu lümejo sahi takhe, siti moli thephe kemesü kha usazü jüra mori ulipüne phe kemesü thide upo retuta keve thi molekhe.

¹⁴ I Niepo Jisu la melü m sekeba, mhapüyori mesa kemo bamo, vele somi pütho lüde mesa kemo thi taze pula mesa mote.

¹⁵ Mhace nketila nsazüo mori nlipü nümo thi taze no kekhrülü hüta mote, nketila püpo mhalü tahite, Khrista pulari sasü ketabi.

¹⁶ Süla nkeve pomeshü mo ketola.

¹⁷ Kekrelamori Jihova kede kethisü keti kekra zomo, vele kemezi m kezükeve, m Kemesa Rüpü lü unü keyi.

¹⁸ Kekrelamori mha hizi keyi sü Khrista yitho kethi Ther-o po ukhi keyi m thüma nü thi keyi zo.

¹⁹ Uko süla kezükeve mhathoko huzo yikhe, mha sizi keyilü hunehu thi mve yiyo tila.

²⁰ Themusü Jihova mhatho jü medi zo vamo. Mhametüko mesazo, vele sopüno lümesude ti sheri pula sü thi merho süyo.

²¹ Themu tikemo m hezo kra kemo ve, mori mhakehopü sheri nsazüjüra m nlipü neko thimeshü, nümo thi, m thikethathi lize.

²² No kemelü bame? Jihova mhüjülü khiyi te. Thüma kehopüri thitole lükeyilü pütho pülü mejo kemoo kenütho.

²³ Pü melütü mode ti süze pütho pü mejove, kekrelamori pü kemelü süde timo ketala; mhakehopülü sheri kemelü kedira kephoma zo.