ROMEMIKO 13 - KETHOLESI KESAO N.T. (BSI)

Kekumi khrikhro keta

¹ Thüma metüpo kekuko khrikhro ta yi khe, Jihova zo kemosa keku bamo; Kekusü Jihova kha kesüzo.

² Kehopüri keku zükemumi sü Jihova kha kesüo metsuyo; zükemumi sü kemejo mesüyito.

³ Kekrelamori mikekha ketisü mhakeve kethimi la kethi kedü ti zhümo, vele kesu kethi milazo. Süla no kekusü mpe mome? Size mhakeve thiyi te süsa n mejo taho.

⁴ Kekrelamori keku kekhimi sü Jihova choyi kethimi zo mhakeve thi ketola. Vele no mhakesu thi ketosa nla kempe püte, zechosü kemethu püla khi yomo; vele Jihova choyi thide kesumi yo pü lekhu khasü ketola.

⁵ Süla no lekhu khro keta lebi kemo nmelülü pütü kethi lari pükhro ta yite.

⁶ Kekrelamori nepüco hilari khazhonu khrüyo, uko Jihova choyimi zo; süla uko mhatho hihi thiyo.

⁷ Tsükezüo khatsü zote, khazhonu tsüti mesüko khatsü süte; mhanyo khi keyiko püma shuyo tiko shusü tsüte: mpe kezüko mpe te, therho tsükezüko khatsüte.

⁸ Mipü pori pü hite, vele hunehu khrüsa yite; mikhrü ketimisü thezhoo thitsü süyo.

⁹ Süla ne kekhrükezü hi, No mi dokhri hi, No rego shü, No cejü nri ti zhopo thisu, No mha meho menyü su, zümoze kesu jükhakesü kekreko ceri thomejüku kesü nsüzanumi khrüpü ntho nkekhrübiyite.

¹⁰ Kekhrü süzanumi nümo thi yomo, süla kekhrü no thezho thitsü süyo.

Tsü thi meze moze kesu

¹¹ Hipi sheri neko pütü seba, tsühi zükebalü cokeyi tüte; kekrelamori umelükeyi tüceri tsühi kelakeyi menokute.

¹² Tüzüzhoko vote, tüso menote; süla kezülü mhathoko khavade kevelü rineko süyi khe.

¹³ Kejütholü tayi khe, tüso ketabi, zokra kemezüthide mha kebüta hili; utho umedothide nyonyü m ti kramezüpü ta hiri, müzü kezhenyüsa m mhameho ta hiri.

¹⁴ Vele Jisu Khrista khi bemene yite, uthi upho nüthi ketola mhapüri thihi; sükola kemenyüko lü bahi.