ROMEMIKO 1 - KETHOLESI KESAO N.T. (BSI)

Kelü kesüjü

¹ Paul Jisu Khrista yitho-o, acüpü apostle mipü kethi, Jihova jüyikeve la akelakre keyi.

² Thajü saju keseko ketholesilü popü kemütako.

³ Jüyikeve pü Nuo David thilü vori keto.

⁴ Jihova Nu thitole kekulü po mese kesü, rüpü kemesa zholü, kesalü rhüla keyi yono.

⁵ Püyo ngokemezhe ngoyi m apostle tho (mhatho) sheri, kemelü jüzü püvo Israelmi kemoko metü metso keti, püza-o lano.

⁶ Nrisa Jisu Khrista cükeyi krolü bate.

⁷ Jihova ngokemezhe kroko Rome lü keba kemesako. Ngokemezhe po neko zübayi thenyü kezükeve Therü uko Po celü kevori m Niepo Jisu Khrista celü.

⁸ (Kecholü kemüza kha kesü). Theralü neko metüla I Jisu Khrita zalü Jihova meza kekrelamori neko kemelü po cejü metülü vo ketala.

⁹ Kekrelamori Jihova azhopozo, I arüpü züde pü Nuo jüyikeve choyi thi keta I relü mozode akecholü neko va rü kra tayozo.

¹⁰ Jihova medo lize apo thelalü arevü nvekeyithi de nekoce vori thenyü.

¹¹ Kekrelamori I neko pesünyü bayo de rüpü mhaphrü neko zü keza kesü neko thi kethepu ketola.

¹² Hunehu kemelü thi kemetü yiketo ala sheri m nekola sheri.

¹³ I nekopo semo banyümo, alipüneko m asazüjürako, I tsükenu nekoce vori nyü süyo, vele kemecu ketala kevezo, I neko dolu use hungoyi ketola; Israelmi kemoko dolu thi kebabi.

¹⁴ I Greekmi, mhakeseko, Barbarian m mhasekemomiko pori pü tate.

¹⁵ Hila I jüyikeve po keto Romelü kebako ceri m neko cesheri ponyüde dojüpü tazo. (Jüyikeve keku)

¹⁶ I Khrista Jüyikeve la menga ta yomo, kekrelamori süosü Jihova keku pü kelakeyi jü melü ketako metü tsüsü; Judahmiko ra süsa Greekmila sheri.

¹⁷ Süsü kemelüyo Jihova kemezi thapü ka kesü kemelü, süo thopü kemüta hibi, “Kejüthomi kemelüla rhüyito.”

Thüma vajo keta

¹⁸ Kekrelamori Jihova lekhu tüyo thasu keta thüma mesa kemomi m thüma kesumi kejütho thi mesu ketako m kethoo pü mezikemolü sü ketako metsu.

¹⁹ Kekrelamori Jihova ju seyi keve sü thipü uko mesesü, Jihova sükopü uko mengove

²⁰ Cejü thiyiculü semo m ngomo ketiko kha mese mengo süte. Jihova keku kechothe keta pü mengosüte, süla umezi poyi keto ba mo.

²¹ Kekrelamori uko Jihova sezori pürhopü Jihova le zimozo, mori pü mezale siri mozo; vele uko kemüdokolü kemechüko lü: uco kedilü uko melü thi mezü pütate.

²² Kesemi le sizi tayo, vele uko kenyomi thite.

²³ Uko zapozale Jihova ka m dita (celire) kehoo khi thüma, mera, khonu, m guketa tenhiko marhe thisüyo.

²⁴ Süla Jihova ri uko khapü uko melü kemenyü mesakemolu süve, ukopo uthiuphori jü merho tate.

²⁵ Kekrelamori uko kemedapü Therü kethoo valede khonuko reshü, mhametü thikesüo reshü keti sülü: kechothe thejo kepüo, Amen.

²⁶ Uco hihila Jihova uko khapü zhoshülü kesuko kemenyülu süve, kekrelamori uko nopuko kedepü zhokrezhongako khi süculü zhoko metsu

²⁷ Kemenyü meketo thi thepumi keho kekhrükezü; thenomi kemenyü sülü: Uko khapü süculü zhokemo kethengalü süva de sazhori uko kejola ngo zoto.

²⁸ Uko Jihova khapü uko kelü thinyümo ketala Jihova uko khapü kerevolü süve, thizükemoko thite.

²⁹ Mhakesuko pü chu: kesu dolini kethi, mesakemo, mehomenyü, minümo kethi, mhameho shuti, kedokhri, kejüzükemo, kemeli, kedokeche, udorüshuti, salisalü meso,

³⁰ Mishemeli kethi, Jihova ngokemu, mimelükrü, (retsüketi), kemeha, kemeko, mhakesu kesa kephu, ukrü jü zü kemo,

³¹ Mhasetho keti, jükeve (thezhokeve) vaphro keti, kemelü kedi, kenyo, ukhrü umelü kedi, mikhrü kemo (mehomeroti),

³² Jihova zhoko uko sezori somi zümo sheri sükopo sazüzo, sizo sheri uko nüde kethi lebi mori; mipori thinode mice po meto tayo.