PHILIPPIKO 4 - KETHOLESI KESAO N.T. (BSI)

¹ Süla a züko, I khrü mu münyü bayo küzhoko, a künü mu küdepirüko, nieko Niepoo yolü tha mütü bazoyi te a kükhrüko.

² I Euodia mu Syntyche ni po Niepoo yolü lüpü thiyi no rüda yo.

³ Mu I n ceri choyo, a besü küthoo, thüno hini ri khrühi süte, uni dzüyiküveo la Clement hani mu uzü kükreko kürhü lesida lü uza küniekori khrühi shu sü tsüla.

⁴ Niepoo yolü nienü süh tayite, I küposa polayo nienüyite.

⁵ Mipo nie künüo sheyite, Niepoo küvori tü müno bate.

⁶ Mhapü la ri nie lü müco hi, vele kücho mu mülolü küthüzü lü nie mhacho pü Niepoo müshe zoyi.

⁷ Siyi tsüsa Niepoo celü thülü kümünü, mhashe mütü ce vevü kütsüo n mülü mu n lüdo mütü Khrista Jisu yo kükhapü bayito.

⁸ Külalü, küzüko, mha dipüko kütho, mha dipüko thürho, mha dipüko müzi, mha dipüko müsa, mha dipüko züve, mha dipüko mphrü, mha velotsü kütsü, mhahu chuyiküve ba tsüsa süko lü zoyi.

⁹ Nieko a celü sheyi, khiyi, rünyiyi mu ngoküyiko thiyi, si tsüsa Niepoo künüo nieko zü bayito.

¹⁰ I Niepoo yo a nü shu bate, nieko a rüle rükra la küsüla, nieko a rüle müdo bazo vele süo thisü küto tü ngoyi mo vote.

¹¹ I nieko ce mha rüda kütsüla hio po bamo kükrelamole I mha kübako pü anü küba do she kütsüla.

¹² I mütümügü kütsü do ri she, mu I münyhümünyhü kütsü do ri she; mha kühopü lüri u kühi küthi mu müri kütsü, küthüvü mu kümüzhie kütsü do ri she.

¹³ I mha kühopüri thiyi ve Khrista a thi müku küsüo lü.

¹⁴ Kühopü biri nieko a müzhie küzaküyi la nieko müzari zoho.

¹⁵ Nie Philippiko nieko thori she ba vele dzüyiküve mhatho thürao lü I Macedonia lü ta kütace kühu kükre püri a zü kübedu mha khasü mori ngoyi mo, nieko lübi zo

¹⁶ I Thessalonia lü küba ceri nieko a khrühi lasü.

¹⁷ I nieko ce mha müri tsüla mo, vele püshe zhü mve sapü nieko cenye ba sasü küto lazo.

¹⁸ I mooküshü mütü ngoyi te, sü küzü ri ngoyite, a kühi thisüte Epaphroditus celü mha kütsü küsüko ngoyino, küthünyü mu u rüh küve rüshü, rütho mu Niepoo künü yiyi küshü rüshü.

¹⁹ Mu Niepoo pütho nieko tsakhu khüko lü Khista Jisu zaleo la nieko khrühi sü to.

²⁰ Uko Niepoo mu u Poo po küchothe zapozale thiyite. Amen.

²¹ Khrista Jisu yolü kümüsako mütü külü süte. U zümi a zü kübako mütü nieko külü süho.

²² Kümüsako mütü nieko külü süho, bahorei Caesar cielüko.

²³ Niepoo Jisu Khrista ngokümüzhieo po nieko müt zü bayite. Amen.