PHILIPPIKO 3 - KETHOLESI KESAO N.T. (BSI)

Paul Thaka Thikesü

¹ Thelalü, akezühko, Niepoo yolü nienüyite, I ketho sa thori a kebvümo nieko na keveozo.

² Nie tüshiko na nie ceriyite, mhathokeshü kethi mako, yikürühmi do thikütako yolü u ceriyite.

³ Uko uyi kürühmi küthoko, mu uko ropü lü Kemenupü rüshüyo, mu Khrista Jisu yolü unü tayo, uthi yolü küthiko mülü ta mo.

⁴ Humi uthi yolü küthi mülüketi mesüh le lizo, I süko ceri mülüku ti mesüh.

⁵ I a menukeyi zho thütha nha ayi rüh keyimi, I Israel swüyiemi, Benjamin yie lü hükevorimi, I Hebrewmi, thezhoo lü lizo I Pheriseemi.

⁶ Kesührhüh co lüsü lizo I kehu kemeswumi, thezhoo lüketako züno mathoyi kezho co lüsülizo mipüh ri a kejo püh ri ngoyi ho.

⁷ Deri thadzü mhakehopüh ri a mhüdzüce ve siketako tsüno süko Khrista na mhapüh ri mote.

⁸ Sizo kütho, mu I Niepo Khrista Jisu mhase kevethoo mede süyo I mhatho püh ri mote, apo pü na mha süko metüko medi tsove, silizo I Khrista ngoyi mu püyolü ngoyi ketoko la I mha süko püh nyorho khakevako bitazo.

⁹ Side thezhoo lü ketako zühkeyina I matho küyi krayi mo deri Khrista yolü ngo küyizo.

¹⁰ I Khrista züh küseyi die pü rhühlakesü kekuo ri seyi mu pü kemezhe kesüko lü pü züh kemezhe die a zhorüle ri po pü kesace zho züh kemhayi keto na.

¹¹ Sidie I ri thiyi veyo kesako dolü rhühlakesümi thiyi keto na.

Kesolü Kemenupü kecü

¹² I tsü süko tsoyite simo mori vetsühte simolu, vele I süko tsoyiketo la huzüzo. Süsüna Khrista Jisu ri a püh pü thüma thiküyizo.

¹³ Azühko, I süko tsoyi keto atho ri thiyiketo lümozo, deri I mha püh a lüdo lüba, süsü asaco kebako lü mozo die amhüdzüco hu vozüzo.

¹⁴ U Kemenupü Khrista Jisue mhapühpüh atsü tono kesolü a kecü I mha süo huzüzo.

¹⁵ Süsüna uko pethi ketako, ulü sükemha lütsoyi tokhe, mu nieko lü mhakekre huri lüba lizo Kemenupü süko ri thapüh nieko meka süto.

¹⁶ Sizori uko tavo tsokeyi züh, ta sasüyi tokhe.

¹⁷ Azühko, nieko ri a do zühyite, siyo hako nieko mhüdzü rade tha süko pe n türütüro thiyite.

¹⁸ Kükrenamori I thüma kükro jü tsükünu niekoce posüh bayo mu tsüri a mhüdzüküto thide nieko ce pova, thüma süko Khrista Cross ngomuko zo.

¹⁹ Thüma sükosü na thülao sü küka, uko Kemünupü sü uko vade, uko nga sü uko zhopo zhole, mu uko cejü lü mhako lü kütazo.

²⁰ Deri uko na cenyie sü tülüta, mu uküla küyio Niepo Jisu Khrista küvo khüba.

²¹ Püthori pü müdo thide mha mütüko thipüh pü khrikhro süyive, mu pü küku süo püh umo mhathokümo hio ri thiküsapüh pümo vezo küzü züh kümhayi tato.