PHILIPPIKO 2 - KETHOLESI KESAO N.T. (BSI)

Khrista ngokemezhe mu Pü kezho

¹ Süla Khrista yolü thelü hüketi dzü hu ri, thelü thokemelu dzü, mu lüsülüzhe lüno küpa huri, Ropü lüno kezüh püh kethi huri mu ngokemezhe huri neko dolü bayo.

² Nekelü kemhade kekhrü pühkhrü, kelürhüh de lüpüh thiyi yo a kenüo neyo tsühyito.

³ Kengomu mori utho u lükerükrü de mhathitahi deri ne lü rünu sa no huniehu yi sü nece veku le lüyite.

⁴ Silizo kehopühri netho ne rülelübi lü tahino, mi rülü ri lüyite.

⁵ Jisu Khrista kelüo khi nelü süpü tayite.

⁶ Püe Kemenupü bi zo ri kemeda lüno Kemenupü züh kethedü le lümo

⁷ Sivele Pü tho Püthipüh thümanu thi mu mijümi thide Pü thi müdi.

⁸ Mu Pü thikerünu püh thüma mhügo lü thüma zhorüle bidie kesalüri dzüzüh thi no cross yo ri sasü.

⁹ Süla Kemenupü ri Pü thi mülesü mu püza thipüh metü pi thisüve.

¹⁰ Kekrelamori tüyo ketako ri, cedzü ketako ri mu jükhro keta metüko ri Jisu zalü chütüketo na.

¹¹ Kehopüh ri Jisu Khrista hi Niepoo zo le lüketi u talü po tsode Kemenupü u Poo po zale püyi keto na.

Cedzü lü kevepüh thi zoyite

¹² Silizo a khrüko neko a mhüngoce dzüzüo lü kebalübi mo le a kedisano süceri dzüzü lü ba müfüyi mozosü, N kelakeyio la mi khriprüh mu rüsürüsa die mhathiyite.

¹³ Kekrelamori Kemenupü npo Pü nü Pü medoko thizoketo na Pütho n kenhü süve.

¹⁴ Süla panyoparo mu kepali tahino mha kehopüh ri thiyite.

¹⁵ Siyi yo nie cejü hio lü müzikümo mu u lü kürüzho kütako dolü mesa mu mejokühomi thi Kemenupü nunie thi bayito.

¹⁶ Nieko kürhühprei dzüo thüzühbei baküyi yolü Khrista zho nha apo anüyito, I kemechü püh na tata mo, mori püco kedi püh lü no mhathi ta kemo na.

¹⁷ Ye mhanuü a kehü hio püh nie kemelü rütho püh thi die a za mükrüh to le mha sheri a nü mu nieko mütü zü a nü zoto.

¹⁸ Süsübi nieko nü bayi mu a züh nieko nüyi zü.

Timothy mu Epaphroditus ni ketsüh kesü

¹⁹ Niepo Jisu tho Timothy ketsüh meze püh nieko ce süketo meri ba, silize a pori nieko metü dzu sepüh a nü yiketo na.

²⁰ Nieko dzüve lü kethoketi pü kemha püh ri bamo zo.

²¹ Kekrekoe Jisu Khrista la mo le u tho u meve la ta yo.

²² Deri nieko Timothy se mve ba, püe a züh pükrü pünu bi dzüyikeve mhatho thi vori.

²³ Süna a rüle kedipüh bi toshi seyimütha I püketsüh sü keto lü ba.

²⁴ Mu I Niepoo mülü keti a tho zo ri mücho mo die nieko ce vota keto meri ba.

²⁵ Sizori, a sazüo, a züh die yitho thi mu Khrista thipahi thikezho, nieko dzüyi khi kevori yo mu a thathi ce a thekü kesüo Epaphroditus ketsüh püh nieko ce sü keto lü ba.

²⁶ Pü ri nieko menyü phi ba, siyo pü sükeyi dzü nieko po sekeva na ri sa pü lü kemezhe ba.

²⁷ Pü mhathi shü va ketho, pü sa ta nuzo, deri Kemenupüe pü phimezhe sü, mu pü lübi mole a po ri a thü shüsamo keto na a ri phimezhe sü.

²⁸ I ri pü ketsü sünsa die khükeho thi bate, süosü nieko po ri pü ngolasü no nieko nüyi mu a po ri a lünyi mütsayiketo na.

²⁹ Süla nieko ri Niepo yolü nenüsai die pü züyite, mu thüma hikemhami rhosüte.

³⁰ Kekrelamori nieko a yo thinsa die thihokebao püe thisüto le pü kehü püh kemethi lü sü, mu Khrista yithoo na sata nu zo keti na.