PETER KÜRAO 3 - KETHOLESI KESAO N.T. (BSI)

¹ Sübi ne micemi neko ne nopuneko khrikhro taite mhace humi jüo zümo ti ba lize, micemineko mhapo mozori kerethi tilü redeyi ve.

² Neko khriprü de kerethi tilü mesa (uzhove) lize uko süko pe bato.

³ Ne zhove tisü chozu neketso züve ketao mo, nepitha che dolini kethi, suna pü ketsopü, mori mha vava ti pü keretso tipo bamo.

⁴ Vele thüma süo umelülü resü kevapü keta, mesamo ta keho, suta keho, kemekre kethi rüpü, süosü Jihova mhüjülü püma kerü; mhakezho.

⁵ Uzhourele hibiti thajü thenomi kropü kemesa Jihova melü mu utho uketsopü keta unopu neko khrikhro tayo.

⁶ Sübi Sarah sheri Abraham jüzülü, pü cüpü a niepoo siziyo, neko süpü nu püko, neko mha kevethi keta sasü nethipü methita molize.

⁷ Sübi ne minopuneko sheri uko zü mhase sülü hüte, thechu therho kha necemi neko tsüte, mhabü kethathio, mu kezü kerhü kalü thi kesa tilü, side ne kecho khapü chokha thimo ketola.

⁸ Thelalü, neko metü lüpü thite, hunehu khrü, mu sazüjüra kekhrü khi kephimezhe te, mi meso nyüsa te, merhe medü te.

⁹ Mhakesu kha kesu khüpo thihite, mori khazhemeli kethiri, vele kepile ti jopü mi ketsü, mhasüo la neko cüyi, side neko thejo kalü thiyi te.

¹⁰ Kekrelamori kehü kekhrü miko, tüsozho keveko ngonyülize, püpo pü meyi pü mhakesu kepolü pü kethü yite, mu pü mülü kemeda po hite.

¹¹ Mhakesu retsü (therayi) mu mhakeve thiyi; püpo mhakeve thiyi, mu kezükeve phuyi, mu süo thite.

¹² Kekrelamori Niepoo mhü kemezimi pe bayo, mu pü ni sheri uko kecho la khripü bayo, vele Niepoo püzü khipü mhakesu kethiko metsu tayo.

¹³ Pü sopü lezide mhace no mhakeve meji ta lize uko n metsuyi veta?

¹⁴ Vele mhace no kemezi la kemezhe ta lize, no nnüte, mu uko kethi kedü tiko methi hite; mori nlü kemezheri hite.

¹⁵ Vele Niepo Jihova la nmelü thi kemesa yite; vele pütü metülü kerede pü mifü kelasü keto la, mi nce mhaketso kesüko kemeri püco menünu mu mpe sai de po süte.

¹⁶ Pütü pümesü kelülü uko n kesu pozo sheri uko kesu kethimi tila, uko cejü medade ketha kemolü n mejo keba menga yito, no Khrista la mha keve kepo ketilü.

¹⁷ Süo vekuzo, mhace Jihova medota lize, no mhakeve kethila kemezhe keyi, kesukethi ce sheri.

¹⁸ Kekrelamori Khrista sheri vapü kephomako la kemezhe sü, kematho mathokemola, side uko züvo Jihova cesü ketola, uthi upholü mesasü, vele rüpülü püthi merhüyi.

¹⁹ Süola sheri pü tatsü kesa rüpü thejü thi ketakoce zhopo thisü.

²⁰ Pütü huce jüzü thikemo, Noah tüco Jihova po v apü sügüsühe mecho, ruo kerede kebace, kerhüro kedopü mitütha meha keyi jüdelü.

²¹ Pühü sübi keti uko sheri jülokepü lü ukokelayi, uthiupho mesakemo khrü kemesa kesü zo mo, vele ukelü khapü phra kesü Jihova celaco keva, Jisu Khrista rhüla kesü lazo.

²² Püta tülü khote, mu Jihova zalaco bate, tüyo choyimiko mu keku keneko, kemecoko metü khapü pükhro süve.