PETER KÜRAO 1 - KETHOLESI KESAO N.T. (BSI)

¹ Peter Jisu Khrista apostle mipü, thüma ta kezakeze pü Pontus, Galatia, Cappadocia, Asia, Bithynia kolü vo ketako ce lesi tho kesü.

² Jihova u Po mejümera seketalü kedakeyiko, kemesa Rüpülü thi kemesa keyi, jüzülü mu Jisu Khrista pü kenhü keyi (kegü vakesü) ngokemezhe mu kezü keve po krokeyi thi neko zü bate.

³ Jihova u Po, uko Niepo Jisu Khrista, pü phikemezhe kekro keba uko mehü kesa sala kesü ukemelü rhürha prari keta Jisu Khrista sa kevasa rhü sala keyi lü.

⁴ Kamu dita keho kalü, merhokemo, rata kemoneko la tülü kesü kerede pü metate.

⁵ Jihova kekulü kelayi keta kemelü pütü thelanha hala sü keto la khapü kemeta.

⁶ Neko süla rechü shuba zote, tsühi pütü dopüla mhace mozekesula neko medo kephi kekrolü meshi tari semo.

⁷ Neko kemelü dojü pe keti suna vemo ta keto ceri püma rüku süo melü thü pesü, thechu therho zapozale kethi Jisu Khrista ngovori keto kethilü chusü ketola.

⁸ Neko pükhrü kebao ngomo zori, tsühi neko püngomo sheri, neko pumelü bazo, nerethu mu pophayi keho kenü zapozale chupü keba.

⁹ Neko kemelü pü thelalü kenü ngoyi bate, neko kerhüro kelayi ketala.

¹⁰ Kelakeyi süo saju kepoko ketso mu phu menu shu, uko pepü kemeta ngokemezhe kekhrü süo ta neko ce vori tale no.

¹¹ Phu keta süo dipü sheri, Khrista Rüpü pü zho pürele dipü bi sheri, uko ce mese kesüko, pühü süo zhopo Khrista kemezhe kesü mhüjü zhopo se tate, mu pü zapozale thiketo süo meji vo ketoko.

¹² Hala mese mengo kesü süo süko ce mori, vele ukoce mhasüko yitho kethiko, tsüdo kepoketa jüyikeve zhopo Kemesa Rüpülü nekoce po kesü zo, tüyolü ta kevori; süo tüyo choyiko penyüsa menyü keta.

¹³ Süla ne melü chepha khipü nechepha yite, rhorhü pü, püthelalü nengokemezhe meri keta Jisu Khrista khi kehala netsü sü keto khivori to.

¹⁴ Jüzü nuneko ne mo ketace mehomenyü ketako khi nezho rele thita hite.

¹⁵ Vele neko cü keyio mesa tibi, sübi ne jüpo jüli lü sheri kemesa zho khi yite.

¹⁶ Kekrelamori thopü kemeta, mesa yite, kekrelamori I mesa tila,

¹⁷ Mu mhace neko Po kesüce, pü mipü sheri rho mekre yomo, utho u mhatho cebi sübi sheco thi zoto, ne revü tülü nezho mezi tavo tate.

¹⁸ Neko seba ketabi, cemu retati zhüpü nekopho rha sümo, suna mu raka thibi ti, nekopo neko thajü uko zholü mhakepoketi ketako kemethu kemerü thi tayo.

¹⁹ Vele Jisu Khrista za, püma kerü mu thece kedi.

²⁰ Pü ce ü meju mhüjü pü kedapü metate, vele pü pü pütü thelalü neko mese mengo süte.

²¹ Püyono Jihova melüyi ketola, pü phu merhü sü kesalü, mu zapozale pü putsü, side nekopo nekemelü mu nekemeri khipü Jihova yo sü ketola.

²² Neko ngokeba nekerhüro thi Kemesa Rüpü jüzü kethilü kethera mozode ne sazüjürako kekhrü, nelü kethothi thelü kemesalü hunehu khrü keba.

²³ Menu kesalayi keta, kecekere si mori cemu reta keho se, Jihova jülü, kechothe rhü bayo.

²⁴ Kekrelamori uthi upho kene metü ga (nha) bizo mu thüma zapozale metü sheri nyepü bizo; nha revi tayo, mu nyepü sheri nra tayo.

²⁵ Vele Niepoo jü kechothe tasü zoto, kechothe; mu jü hiohi khi neko ce zhopo thisüyo.